Mpo na nini tosengeli kondimela Yesu Klisto?

“ATA bato mingi oyo bazali baklisto te bandimaka ete azalaki moteyi monene mpe ya mayele. Na ntembe te, azali mpenza moko na bato oyo batiká nsango kino lelo.” (The World Book Encyclopedia) “Moto” yango nde nani? Yesu Klisto, mobandisi ya lingomba ya boklisto.

Nzokande, atako ansiklopedi yango elobi bongo, bato mingi na mikili ya Azia mpe na mikili mosusu, bayebi Yesu Klisto te, bakoki ntango mosusu komikundola bobele nkombo na ye oyo batángaki na mikanda na eteyelo ya ntei. Ata na kati ya mangomba ya boklisto, ezali na bato ya teoloji mpe bakonzi ya mangomba oyo balobaka ete toyebi mpenza Yesu malamu te mpe batyaka ntembe likoló na bosolo ya masolo minei oyo ezali kolobela bomoi na ye (Baevanzile) na kati ya Biblia.

Bakomi ya Baevanzile bayokanaki nde mpo na kobimisa lisolo ya lokuta ya bomoi ya Yesu? Te! Nsima ya koyekola na mozindo masolo ya Evanzile, Will Durant, nganga-mayele ya masolo ya kala oyo ayebani mingi, akomaki boye: “Soki ezali solo ete, bobele na boumeli ya libota moko, mwa ndambo ya bato mpamba bamisalelaki likanisi ya moto moko oyo azali na nguya mpe azali kobenda bato epai na ye; soki bango kaka bamisalelaki mitinda ya etamboli malamu, mpe bondeko oyo tozali komona kati na bato, tokoloba ete wana ezali likamwisi oyo eleki makamwisi nyonso totángaka na kati ya Baevanzile. Bikeke mibale, nsima ya koyekola likambo moko moko, lisolo mokuse ya bomoi ya Yesu, ya bizaleli na ye, mpe ya mateya na ye ezali kaka komonana polele mpe yango ezali lisolo oyo bato ya Mpoto bazali kosepela na yango koleka masolo nyonso.”

Atako bongo, ezali na bato mosusu oyo baboyi kondima Yesu mpo bamonaki makambo mabe oyo bato oyo bamibéngaka baklisto basalaki. Bato mosusu na ekólo Japon bakoki koloba ete, ‘Baklisto babwakaki bombe atomike na engumba ya Nagasaki, nzokande Nagasaki ezali na baklisto ebele koleka bingumba mingi ya Japon.’ Kasi okoki nde kopesa monganga foti mpo moto moko azali na maladi, soki ye moko aboyi kotosa toli oyo monganga apesaki ye? Bato mingi oyo bamibéngaki baklisto babosanaki mibeko ya Yesu mpo na kosilisa mikakatano ya bato. Kasi, Yesu apesaki nkisi mpo na kosilisa mikakatano na biso ya mokolo na mokolo mpe minyoko ya bato na mokili mobimba. Yango wana tozali kosɛnga yo otánga na likebi nyonso lisolo oyo elandi mpe omona yo moko soki azalaki moto ya ndenge nini.