Lisungi mpo na bandeko ya Myanmar oyo mopɛpɛ makasi ebebisaki biloko na bango

NA MOKOLO ya 2 Mai 2008, mipɛpɛ makasi ebɛtaki na Myanmar mpe ebebisaki mboka mpe na mbala moko bapanzi-nsango ya mokili mobimba balobelaki likambo yango. Balobaki ete ntango mipɛpɛ yango ebɛtaki na Irrawaddy, ebale monene ya Myanmar, bato soki 140 000 bakufaki to babungaki.

Likambo ya kokamwa, na ebele ya Batatoli ya Yehova oyo bazalaka na esika wana, ata moko te azwaki likama. Babikaki mingimingi mpo bakendeki kobombana na Bandako ya Bokonzi mpo etongamaki malamu. Na mboka moko, Batatoli 20 mpe bato mosusu 80 bafandaki likoló ya sambá ya Ndako ya Bokonzi na boumeli ya ngonga libwa mpo mai emataki tii na mɛtrɛ soki 5. Bango nyonso babikaki. Likambo ya mawa, bato mosusu 300 ya mboka yango bakufaki. Na bamboka mingi, kaka Bandako ya Bokonzi nde ekweaki te.

Mikolo mibale nsima ya mopɛpɛ wana ya makasi, biro ya Batatoli ya Yehova ya Yangon etindaki ekipi moko ya bandeko na lisangá ya Bothingone, oyo ezali esika ebale ebandá mpo na kosalisa bandeko oyo bazwaki likama. Bandeko ya ekipi yango basalaki mobembo na banzela oyo ebebi makasi, bazalaki kokeba ete báyiba bango te mpe bazalaki koleka bibembe epɔlá. Nsukansuka, bakómaki na Bothingone na biloko lokola loso, makaroni, mai mpe babuji. Bazalaki bato ya liboso oyo bakómaki na esika wana mpo na kosalisa bato oyo bazwaki likama. Nsima ya kopesa Batatoli ya Yehova ya mboka yango biloko, bandeko yango basalaki masolo ya Biblia mpo na kolendisa bango mpe batikelaki bango Babiblia mpe mikanda oyo elimbolaka yango mpo mai ememaki biloko na bango nyonso.

Ezaleli oyo Batatoli ya Yehova bazalaki na yango atako babungisaki biloko ekamwisaki mpenza. Motatoli ya Yehova moko oyo autaki na lisangá moko epai ebale Irrawaddy ezalaka, alobaki boye: “Biloko na biso nyonso ekei. Bandako na biso nyonso ekwei. Milona na biso nyonso ezindi na mai. Mai na biso ya komɛla ebebi. Atako bongo, bandeko bazali komitungisa te lokola bato mosusu. Bazali na elikya epai ya Yehova mpe lisangá na ye. Tokolanda malako nyonso oyo bakopesa biso, ezala tokotikala na mboka na biso to tokokende epai mosusu.”

Batatoli 30 oyo babungisaki mpe biloko na bango nyonso, bayembaki na esengo nyonso banzembo ya Bokonzi na boumeli ya ngonga zomi ya mobembo oyo basalaki mpo na kokende kozwa bilei, bilamba mpe bakapo. Liboso bákóma kuna, bayokaki ete liyangani moko ya mikolo mibale ezali kosalema na engumba moko oyo ezalaki pembeni wana. Bamonaki malamu bákɔta naino liyangani mpo bálendisama na elimo mpe bákutana na bandeko.

Na bisika oyo mopɛpɛ wana ebɛtaki, bandako 35 ya Batatoli ya Yehova ebukanaki, bandako 125 ya Batatoli mosusu mpe Bandako ya Bokonzi 8 ebebaki mwa moke. Likambo ya esengo, bandako ya Betele ebebaki mpenza te.

Na ebandeli, bato bakokaki kokóma na Betele te mpo banzete minene oyo ekweaki ekangaki banzela. Mwa bangonga nsima ya mopɛpɛ, bandeko ya Betele koleka 30 babandaki kolongola banzete yango kozanga kosalela bisaleli ya minene. Ntango bazalaki kosala, bato oyo bazalaki wana batikalaki monɔkɔ polele. Nsima ya mwa ntango moke, bandeko basi bayaki na masanga ya sukali ya malili mpe bambuma mpo na bandeko oyo bazalaki kosala mpe bato mosusu oyo bazalaki wana, mpe likambo yango elekelaki bango. Ntango mopanzi-nsango moko amonaki likambo yango, atunaki boye: “Banani bazali kosala mosala malamu boye?” Ntango bayebisaki ye ete ezali Batatoli ya Yehova, alobaki boye: “Nakosepela mingi soki bato nyonso basali ndenge Batatoli ya Yehova bazali kosala!”

Eumelaki te, Batatoli ya Yehova basalaki babiro mibale na bisika ekeseni mpo na kotambwisa mosala ya kosunga bandeko oyo bazwaki makama. Bankama ya bandeko bamipesaki mpo na kosala na babiro yango. Nsima ya mwa mikolo, batongaki bandako ya sika mpo na Batatoli oyo bandako na bango ebebaki. Ntango ekipi moko ya bandeko ekómaki mpo na kotonga ndako ya Motatoli moko, bato ya mboka na bango bakamwaki. Moto moko alobaki boye: “Lingomba ya mwasi oyo etongeli ye ndako. Kasi, ata moto moko te ya Lingomba na biso ya Bouddha ayei kosalisa ngai. Esengelaki nakóma Motatoli ntango azalaki koteya ngai!”

Ntango ekipi moko ya batongi mpe ya bandeko oyo bazalaki kokabola biloko epai ya Batatoli ya Yehova oyo bazwaki likama bayaki kotala ndako moko oyo ebebaki na engumba Thanlyn, bakamwaki makasi ntango bandeko ya libota yango balobaki ete: “Ndako na biso ebebi makasi te, tokoki naino kofanda awa! Batatoli mosusu bazali ata na ndako te, bókende naino kosalisa bango!”

Na kartye moko na Yangon, bato mosusu bakendeki mpo bámibomba na ndako-nzambe moko. Nzokande, bakutaki porte ya ndako-nzambe yango ekangami mpe moto moko te akokaki kokɔta. Bato yango basilikaki mpe balingaki kobuka porte yango. Kasi, Batatoli ya Yehova bandimaki bato mingi bámibomba na Bandako ya Bokonzi ntango mopɛpɛ ezalaki kobɛta. Na ndakisa, na Ndako ya Bokonzi oyo ezali na engumba Dala, Motatoli moko ná mwasi na ye bayambaki bato 20 oyo bazangaki esika ya komibomba. Na ntɔngɔ, bato yango bazalaki na esika ya kokende te mpe bazalaki na nzala. Motatoli yango asombaki loso ebele oyo ekokaki bato nyonso.

Na libota moko na Yangon, bato mosusu bazali Batatoli ya Yehova mpe basusu bazali na mangomba mosusu. Nsima ya mopɛpɛ makasi wana, libota mobimba eyanganaki na makita na Ndako ya Bokonzi. Mpo na nini? Moto moko ya libota yango alobi boye: “Bato ya lingomba na biso balobaki ete bakoya kotala biso soki mopɛpɛ esili, kasi totali totali tii miso ebɛti nzete. Kaka Batatoli ya Yehova nde bayaki kotala biso. Bapesaki biso loso ná mai. Bokeseni mpenza na bato ya mangomba mosusu!” Bato ya libota yango oyo bazalaki Batatoli te, basepelaki na lisolo ya Linɔ́ngi ya Mosɛnzɛli oyo elobaki ete: “Yehova ayokaka kolela na biso” mpe bapesaki kutu biyano mingi.

Mwasi moko oyo azalaki koyekola Biblia ná Batatoli ya Yehova ayaki na makita pɔsɔ moko nsima ya mopɛpɛ makasi. Na makita, batángaki mokanda moko oyo eutaki na filiale, oyo elobelaki makambo oyo esalemaki mpo na kosalisa bato oyo bakutanaki na likama ya mopɛpɛ mpe makambo oyo bato oyo babikaki na likama yango balobaki. Ntango bazalaki kotánga mokanda yango, mwasi wana abandaki kolela. Akamwaki mpenza mpe asepelaki makasi ntango ayokaki ete Batatoli ya Yehova nyonso bamonanaki mpe bazwaki likama te. Na nsima, bapesaki ye biloko oyo azalaki na yango mposa mpe batyelaki ye hema pembeni ya ndako na ye. Alobaki ete Batatoli ya Yehova bakipaki ye mpenza.

Yesu alobaki ete: “Na ndenge wana bato nyonso bakoyeba ete bozali bayekoli na ngai, soki bozali na bolingo na kati na bino.” (Yoane 13:35) Mpe moyekoli Yakobo alobaki ete kondima ya solo emonanaka na misala. (Yakobo 2:14-17) Batatoli ya Yehova batosaka maloba wana mpe basalaka makasi mpo na komonisa bolingo yango na ndenge basalisaka baoyo bazali na bosɛnga.

[Likanisi ya paragrafe na lokasa 11]

Biblia elobi ete kondima ya solo emonanaka na misala