Biblia ebongolaka bato

NINI etindaki mobali moko oyo alingaki masano ya mbongo mpe azalaki moyibi ete atika makambo yango? Tángá lisolo na ye.

“Nalingaki mingi masano ya mpunda.”​—RICHARD STEWART

ABOTAMAKI NA: 1965

EKÓLO: JAMAÏQUE

BOMOI NA YE YA KALA: MOBƐTI YA MASANO YA MBONGO MPE MOYIBI

NDENGE NAZALAKI: Nakolá na kartye moko ya babola mpe oyo ezali na bato mingi na Kingston, engumba-mokonzi ya Jamaïque. Bato mingi bazalaki na misala te, mpe mobulu ezalaki makasi. Kobanga ezalaki makasi mpo na bato ya mobulu. Nazalaki koyoka lokito ya masasi mikolo nyonso.

Mama azalaki makasi na mosala mpe asalaki nyonso mpo ngai ná baleki na ngai mibale tózala malamu. Alingaki ete tóteyama malamu. Nazalaki mpenza kolinga kelasi te; nalingaki mingi masano ya mpunda. Nazalaki kokima kelasi mpo na kokende kotala masano yango. Kutu, nakómaki kotambwisa mpunda.

Na nsima, namipesaki makasi na kobɛta masano ya mpunda. Nazalaki na mobulu makasi ya basi. Nazalaki komɛla bangi mpe koyiba mpo na kozwa mbongo. Nazalaki na mindoki ebele, kasi Nzambe mersi, totikalá koboma moto te na mbala nyonso oyo tokendaki koyiba.

Nsukansuka, bapolisi bakangaki ngai mpe nakɔtaki bolɔkɔ mpo na makambo oyo nazalaki kosala. Ntango nabimaki, nazongelaki makambo yango. Kutu, nakómaki mabe koleka. Atako nazalaki komonana lokola moto malamu na elongi, nazalaki moto mabe, nazalaki kosilika mingi, mpe nazalaki yauli mpenza. Nazalaki kokipe moto te.

NDENGE OYO BIBLIA EBONGOLI NGAI: Na ntango oyo ngai nazalaki kosala makambo mabe wana, mama ayekolaki Biblia mpe akómaki Motatoli ya Yehova. Namonaki ete akómaki na bizaleli ya malamu mpe yango ebendaki likebi na ngai. Nalingaki koyeba eloko oyo ebongolaki ye; yango wana, Batatoli ya Yehova bakómaki koyekola na ngai Biblia.

Namonaki ete mateya ya Batatoli ya Yehova ekesanaki na oyo ya mangomba mosusu mpe ete makambo nyonso oyo bazalaki koloba ezalaki kouta na Biblia. Kaka bango nde bazalaki kosakola ndako na ndako, ndenge bakristo ya liboso bazalaki kosala. (Matai 28:19; Misala 20:20) Nandimaki ete namoni lingomba ya solo ntango namonaki bolingo oyo bazalaki na yango.​—Yoane 13:35.

Mateya ya Biblia oyo nazalaki koyekola etindaki ngai natika makambo mabe oyo nazalaki kosala. Nayekolaki ete Yehova Nzambe ayini pite mpe ete soki nalingi kosepelisa ye, nasengeli kotika makambo oyo ezalaki kobebisa nzoto na ngai. (2 Bakorinti 7:1; Baebre 13:4) Ntango nayekolaki ete makambo oyo moto asalaka ekoki kosepelisa Yehova to mpe koyokisa ye mawa, likambo yango esimbaki mpenza motema na ngai. (Masese 27:11) Nazwaki ekateli ya kotika komɛla bangi, kozala lisusu na mindoki te, mpe kokóma moto malamu. Mokakatano na ngai monene ezalaki ya kotika mobulu ya basi mpe masano ya mbongo.

Na ebandeli, nalingaki te ete baninga na ngai báyeba ete Batatoli ya Yehova bazali koyekola na ngai Biblia. Kasi, nabongolaki makanisi ntango natángaki Matai 10:33, epai Yesu alobi boye: “Moto nyonso oyo awangani ngai liboso ya bato, ngai mpe nakowangana ye liboso ya Tata na ngai oyo azali na likoló.” Maloba yango etindaki ngai nayebisa baninga na ngai ete Batatoli bazali koteya ngai. Bakamwaki mingi. Bakokaki kondima te ete moto lokola ngai nalingaki kokóma mokristo. Kasi, nayebisaki bango ete nalingi lisusu te kosala makambo oyo nazalaki kosala liboso.

MATOMBA OYO NAZWI: Mama na ngai azalaki na esengo mingi ntango amonaki ete nakómi kotosa Biblia. Lelo oyo, abangaka te ete ntango mosusu nazali kosala makambo ya mabe. Tolobelaka mingi likambo oyo esangisi biso: bolingo na biso mpo na Yehova. Ntango mosusu, nakanisaka ndenge nazalaki mpe nakamwaka ndenge oyo nabongwani mpenza na lisalisi ya Yehova. Natiká bomoi oyo nazalaki na yango ya kolinga basi mpe ya koluka biloko ya mokili.

Soki nayekolaki Biblia te, mbɛlɛ ntango mosusu nakufá to nazali na bolɔkɔ. Kasi, lelo oyo nazali na libota ya esengo mpenza. Nazali na esengo mingi ya kosalela Yehova Nzambe ná mwasi na ngai mpe mwana na biso ya mwasi, oyo azali mwana ya botosi. Nazali kopesa Yehova mersi na ndenge asalisi ngai nakóma na lisangá ya bakristo oyo bazali mpenza na bolingo. Nazali na botɔndi ete moto moko asalaki makasi mpo na koteya ngai Biblia. Lisusu, nasepelaka mingi na ndenge nasalisaka bato mosusu báyeba mateya ya Biblia. Nazali na botɔndi koleka epai ya Yehova Nzambe oyo, na motema boboto na ye, abendaki ngai epai na ye.

[Likanisi ya paragrafe na lokasa 11]

“Nayekolaki ete makambo oyo moto asalaka ekoki kosepelisa Yehova to mpe koyokisa ye mawa”

[Elilingi na lokasa 11]

Ngai ná mwasi na ngai mpe mwana na biso

[Elilingi na lokasa 11]

Namonaki ete mama akómaki na bizaleli ya malamu