ELOBELI TITRE YA EZIPELI | KOBONDELA EZALI MPENZA NA NTINA?

Mpo na nini bato babondelaka?

“Nazalaki mobɛti monene ya masano ya mbongo. Nazalaki kobondela mpo nazwa mbongo ebele na masano yango kasi nazwaki te.”—Samuel,a Kenya.

“Na kelasi, tozalaki ntango nyonso kozongela mabondeli oyo balakisá biso, oyo tokangá na motó.”—Teresa, Philippines.

“Nabondelaka soki nakutani na mikakatano. Nabondelaka mpo na kosɛnga bolimbisi ya masumu mpe mpo nazala mokristo oyo abongi.”—Magdalene, Ghana.

1. Mobali oyo azali kobondela liboso ya mesa moko; 2. Elenge mwasi moko oyo azali kobendela na kelasi; 3. Mwasi oyo azali kobondela

Makambo oyo Samuel, Teresa ná Magdalene balobi emonisi ete bato babondelaka mpo na bantina ndenge na ndenge, mabondeli mosusu ezalaka na ntina mingi koleka mosusu. Mabondeli ya bato mosusu eutaka mpenza na motema; kasi ya basusu ezalaka kaka likolólikoló. Ata bongo, ezala babondeli mpo básala ekzamɛ na kelasi, mpo ekipi na bango elonga na lisano, Nzambe atambwisa libota na bango to mpo na bantina mosusu, bamilio ya bato bamonaka ete kobondela ezalaka na ntina. Kutu, baankɛtɛ emonisi ete ata bato mosusu oyo basambelaka te babondelaka mbala na mbala.

Obondelaka? Soki ɛɛ, obondelaka mpo na likambo nini? Ezala omesaná kobondela to te, okoki komituna boye: ‘Kobondela esalisaka mpenza? Ezali na moto moko oyo ayokaka mabondeli?’ Mokomi moko alobaki ete libondeli ezali kaka “lokola mwa nkisi . . . Ezali lokola nde ozali koloba na nyama oyo obɔkɔlaka.” Minganga mosusu bakanisaka mpe bongo, balobaka ete libondeli ezali lokola “nkisi ya monganga.” Libondeli ezalaka kaka lokola mwa ngalasisi moko ya mokolo na mokolo oyo ezalaka lokola nkisi oyo ebikisaka baoyo babondelaka?

Biblia emonisi ete libondeli esukaka kaka te na kosalisa lokola nkisi ya monganga. Emonisaka biso mpenza ete ezali na moto moko oyo ayokaka mabondeli oyo esalemaka na ndenge esengeli mpe mpo na makambo oyo ebongi. Ezali mpenza bongo? Tótalela naino makambo oyo endimisi yango.

a Bankombo mosusu ezali ya bango te.