Linɔ́ngi ya Mosɛnzɛli mpe Lamuka!: bazulunalo oyo ebongi mpo na eleko na biso ya mpasi
1 Na boyokani na bisakweli ya Biblia, makambo ya yikiyiki mazali kobima kati na mokili mobimba! Ntango tozali kotala makambo mazali koleka zingazinga na biso ezala na kati to libanda ya lisangá ya Teokrasi, tozali kososola ete kosakola “nsango malamu” ya Bokonzi ezali likambo lisengeli kosalema na lombangu mpenza. (Mko. 13:10) Yango ezali kopusa biso na kokoba mosala na biso na molende mpenza na boumeli ya sanza ya Ɔkɔtɔbɛ.
2 Mosala oyo tokosala na sanza oyo ekomonisa ntina ya nsango na biso. Tokoki kokoba kokabola batrakte Nsango ya Bokonzi oyo tobandaki kokabola na sanza ya Aprili mpe ya Mai. Mpo na kolamwisa mɔ́tɔ na biso kati na mosala yango mpe kolamwisa bosepeli ya bato kati na teritware na biso, Linɔ́ngi ya Mosɛnzɛli mpe Lamuká! ekobimisa masolo mabongi, oyo makomonisa polele ndimbola ya bisakweli ya makambo ya yikiyiki oyo mazali kobima na mokili. Ndenge nini tokoki kobongisa kolakisama oyo ekolamwisa mposa ya bato mpo na bazulunalo?
3 Na ntembe te, tokosala kolakisama moko ya malamu soki tolandi matambe oyo ya ntina: (1) Tópona kati na zulunalo moko lisolo oyo tomoni ete ekoki kosimba mitema ya bato ya teritware na biso. (2) Kati na lisolo yango, tópona likanisi moko to mokapo moko oyo, engebene makanisi na biso, ekolamwisa bosepeli ya molobani na biso. (3) Tóbongisa maloba mokuse ya bokɔti na lisolo oyo masangisi mbote ya boninga, motuna moko to mwa maloba oyo mazali komonisa polele likanisi moko kitoko liuti na Biblia, mpe na nsuka tokobyanga ye na esengo nyonso ete azwa bazulunalo. Na ntembe te, ezali likambo ya pɛtɛɛ mpenza. Mpo na nini te kobongisa kolakisama moko elongo na mosakoli oyo okobima na ye kati na mosala ya kosakola? Kolakisama oyo epesami awa na nse ezali bobele komonisa yo lolenge oyo okoki kosala. Okoki koyokanisa yango na bazulunalo ya sika oyo ezali kati na lisangá na bino.
4 Lokola “Lamuká!” ya 22 Aprili (ebimeli ya Lifalanse) ebimisaki motuna oyo ete “Tozali kobika na mikolo ya nsuka?,” tokoki kotalela makanisi oyo mamonisami na nse ya motó na likambo “Mikolo ya nsuka,” na lokasa 6 ya mwa buku “Lolenge nini okoki kobanda mpe kolandisa masolo likoló na Biblia.” Tokoki kobanda lisolo na kolobáká ete:
◼ “Toyei kotala yo mpo na kolobela ndimbola ya makambo ya kobangisa oyo mazali koleka zingazinga na biso. Talá makambo lisolo oyo eyebisi...”
5 “Linɔ́ngi ya Mosɛnzɛli” ya 1 Aprili etuni motuna oyo: “Lingomba—Ezali ekila kosolola na ntina na yango?” Tokoki koloba boye na kolakisáká zulunalo yango:
◼ “Mbala mingi, bato balobaka ete esengeli soko moke te kosolola na ntina na lingomba, mpamba te yango ezali likambo oyo libimisaka ntembe mingi. Okanisi nini mpo na yango?” Na nsima, tólakisa eteni moko ya lisoló yango.
6 Tokoki kolakisa lisolo oyo ete “Solo na makambo ya losambo ekoki komonana?” oyo ebimaki na “Linɔ́ngi ya Mosɛnzɛli” ya 15 Aprili. Maloba oyo makoki kozala malamu mpo na kokɔta na lisolo:
◼ “Lelo oyo, mangomba makómi ebele na boye ete bato mosusu bazali komituna soki bosolo na makambo matali losambo ekoki komonana. Lisoló oyo lizali komonisa lolenge okoki kozwa eyano ya solosolo na motuna yango...”
7 Liboso ya kokende kosakola, mpo na nini te kobongisa elongo na mosakoli moko, kolakisama oyo tokosalela na boye ete tózanga kokakatana ntango tokosala yango? Na lolenge yango, tokoki kopesana makanisi mabongi oyo makosalisa biso na komibongisa malamu koleka mpe na kokóma lisusu na ezaleli ya kozanga kokakatana.
8 Wana nsuka ya ebongiseli ya biloko ya ntango oyo ezali kobɛlɛma, tiká ete tósala na lombangu mpo na kosalisa bato ya sembo ete bábima na Babilone Monene! (Emon. 18:4) Linɔ́ngi ya Mosɛnzɛli mpe Lamuká! ezali kokokisa mokumba moko ya ntina kati na mosala oyo mozali kosalema mbala moko mpo na libela. Tótɔnda Yehova na ndenge apesi biso bisaleli wana ya malamu koleka.