Tósakola bansango malamu ya eloko eleki kitoko

¹ Ekokisi sikawa mibu 117 uta Linɔ́ngi ya Mosɛnzɛli ezali kokɔtela solo ya Biblia. Lelo oyo, baekzamplere 18 950 000 ya zulunalo oyo ezali konyatama na nkótá 125. Lamuká! ezali mpe uta kala mokɔteli mosusu ya Liloba ya Nzambe mpe lelo oyo baekzamplere 15 730 000 ezali kobimisama na nkótá 80.​—Talá Bakolose 1:23.

² Bazulunalo ezali kokokisa mposa ya elimo: Bamilió ya bato ya motema sembo bazali kozwa litomba na Linɔ́ngi ya Mosɛnzɛli mpe na Lamuká! oyo ezali kosalisa bango na kokokisa bamposa na bango ya elimo na nzela ya masoló oyo mazali kotonga kondima. Na ndakisa, kati na Linɔ́ngi ya Mosɛnzɛli ya 1 Febwáli 1996, toyekolaki lisoló oyo elobelaki ntina ya kotya elikya epai na Yehova mpe na Liloba na ye. Linɔ́ngi ya Mosɛnzɛli ya 1 Mársi 1996 elendisaki biso na komipesa mingi kati na mosala ya Yehova mpe na kokóba kozela ye. Oyo nde elendiseli tozwaki na botaleli bozindo ya esakweli ya Sefania! Na nsima totalelaki lisoló moko ya kosimba motema na ntina na bosembo ya boklisto kati na Linɔ́ngi ya Mosɛnzɛli ya 15 Mársi 1996. Nimero ya 15 Máí 1996 emonisaki ntina ya kotánga mpe koyekola Liloba ya Nzambe mokolo na mokolo. Masoló wana masalisaki biso na kokólisa bososoli na biso ya Liloba ya Nzambe mpe kobakisa botɔ́ndi na biso mpo na Bokonzi na ye.

³ Epai mosusu, bazulunalo yango ezali na masoló ya malamu mpe oyo ebongi mpo na etamboli oyo ezali kosepelisa Nzambe, mpo na bizaleli malamu ya boklisto mpe mpo na makambo mosusu ya ntina mingi. Ezali kolobela makambo ya ntina mingi oyo matali bomoi na biso. Na yango, tokoki, uta sikawa, kozala na bomoi moko malamu na kozeláká kokokisama ya bilaka ya Nzambe oyo bitali eloko eleki kitoko mpo na mikolo mizali koya.​—Yis. 48:17; 1 Tim. 6:19.

⁴ Na kozongeláká kotánga na mokuse makambo oyo malobami na lokasa 4 ya nimero nyonso ya Lamuká! tokomona ete tozali na bantina malamu ya kolendisa bato ete bátánga zulunalo yango. Epai nyonso bato bafandi, bázala bilenge to mikóló, yango ezali zulunalo moko kitoko oyo bakoki kotánga. Elobami kati na yango ete: “Lamuká! ezali kotalela mosangani moko na moko kati na libota. Ezali komonisa lolenge ya kolónga mikakatano ya ntango na biso. Ezali koyebisa makambo mazali koleka na mokili, ezali kolobela mimeseno ya bato ya mitindo nyonso, ezali kotalela makambo ya mangomba mpe makambo ya siansi. Kasi esuki bobele wana te. Ezali kolobela makambo na bozindo mpe ezali komonisa ntina mpenza ya makambo mazali kobima na mokili, nzokande ekokɔtaka na makambo ya politiki te mpe ekoponaponaka mposo te. Oyo eleki mpenza, zulunalo oyo ezali kopesa bantina makasi ya kondima ete mosika te Mozalisi akokokisa elaká na ye ya kosala mokili ya sika ya kimya mpe ya kobatelama, oyo ekokitana ebongiseli ya lelo ya mabe mpe oyo ezangi mibeko.”

⁵ Tólakisa bazulunalo epai na bazalani na biso: Tózala bakabi mpo na oyo etali kolakisa Linɔ́ngi ya Mosɛnzɛli mpe Lamuká! (Talá 1 Timoté 6:18.) Tózalaka na mwa banimero elongo na biso mpo na kolakisa yango epai na bato oyo tokoki kokutana na bango. (Mos. 11:6) Biso banso, bakisá bilenge mpe basakoli ya sika, tokoki kosangana mingi na bokaboli bazulunalo na sanza oyo na kosaleláká masoló mokuse oyo mazwi moboko likoló na masoló oyo mazali kolobela makambo mazali koleka lelo na mokili, makambo oyo mazwami na banimero ya sika. Tómimesenisa na makambo oyo mazali kati na yango mpe tólakisa yango na bosembo nyonso mpe na kondimisama nyonso.

⁶ Linɔ́ngi ya Mosɛnzɛli mpe Lamuká! ezali na makambo oyo moto mokomoko azali na mposa ya koyeba. Tókabola yango epai na bato; ezali moko na myango malamu ya kosalisa bango ete báyekola nsango malamu oyo elobi ete mosika te eloko eleki kitoko ekosalema.