Makita ya Mosala mpo na Novɛ́mbɛ
Pɔ́sɔ ebandi na 4 Novɛ́mbɛ
10 mn: Mayebisi. Pesá mpe Mayebisi ya Mosala na biso ya Bokonzi oyo matali lisangá. Lobelá lapólo ya mosala ya lisangá mpo na sanza eleki.
15 mn: Biyano na mituna na bino. Mokɛngɛli ya mosala to nkulutu mosusu ya makoki azali kotalela makambo mapesami elongo na bayoki.
20 mn: “Tóbongisa lolenge na biso ya kolakisa bazulunalo.” (paragrafe 1-7) Tuná mituna likoló na paragrafe 1-4. Na nsima bilakiseli mibale to misato ya mokuse oyo bikomonisa lolenge tokoki kolakisa bazulunalo ya sika na kosaleláká makanisi mapesami na paragrafe 5-7. Lobelá lisusu Mosenzeli ya 15 Sɛtɛ́mbɛ 1987, lokasa 8, paragrafe 8-9 to La Tour de Garde ya 1 Mársi 1987, lokasa 17, paragrafe 8-9.
Loyembo 222 mpe libondeli ya nsuka.
Pɔ́sɔ ebandi na 11 Novɛ́mbɛ
10 mn: Mayebisi. Pesá lapólo ya kɔ́nti.
15 mn: “Tósakola bansango malamu ya eloko eleki kitoko.” Ekosalema na mituna mpe biyano. Bendá likebi likoló na masoló ya kosimba motema oyo mazali na Linɔ́ngi ya Mosɛnzɛli.—Talá La Tour de Garde ya 1 Mársi 1987, lokasa 13.
20 mn: “Tóbongisa lolenge na biso ya kolakisa bazulunalo.” (paragrafe 8-11) Ekosalema na mituna mpe biyano. Lobelá makanisi minei oyo mapesami na Linɔ́ngi ya Mosɛnzɛli ya 1 Yanuáli 1994, nkasa 24-25, paragrafe 18-21. Na lisalisi ya bazulunalo oyo bozali na yango, monisá lolenge ya kobongisa lisoló: (1) poná lisoló moko oyo ekoki kosepelisa bato ya teritware na bino, (2) luká likanisi moko ya kosepelisa oyo okolobela, (3) bongisá motuna moko oyo ekopesa nzela na kobenda likebi likoló na likanisi yango, (4) poná vɛrsɛ́ oyo okokoka kotánga soki likoki epesameli yo mpe (5) bongisá bokɔti na yo na lisoló mpe makambo oyo okoloba na ntina na zulunalo mpo na kolendisa molobani na yo ete andima yango. Sɛngá na basakoli mibale to misato ya makoki ete bámonisa moto na moto lolenge ya kosala lisoló. Elakiseli ya lisoló moko ya pɛtɛɛ ya zulunalo oyo ekosalema na elenge moko.
Loyembo 82 mpe libondeli ya nsuka.
Pɔ́sɔ ebandi na 18 Novɛ́mbɛ
15 mn: Mayebisi. Limbolá lolenge tokoki kosala mpo na komemelaka bato bazulunalo mbala na mbala: (1) kamatá nɔ́ti ya nimero nyonso ya zulunalo oyo totikaki mpe ya lisoló oyo tosololaki, (2) omibongisa mpo na koya lisusu na banimero elandi mpe (3) zalá na ntango ya sikisiki kati na manáka na yo ya mosala ya kosakola na boumeli ya pɔ́sɔ mpo na kozongela bato wana. Sɛngá na bato oyo bazali komonisa bosepeli ete básala abonemá ya sanza motoba, mpe kanisá kotánga bozongeli ya sika mbala nyonso oyo ozali komema bazulunalo ya sika epai na moto.
15 mn: “Tótala teritware na biso na mobimba.” Lobelá lisoló mpe bibongiseli bikamatami na lisangá na bino mpo na kosakola epai na bakomɛlɛsa. Byangá bayangani ete báyebisa makambo ya kolendisa oyo bakutanaki na yango wana bazalaki kosakola na bamagazini oyo ezali na bateritware na bango.
15 mn: Bamposa ya lisangá to lisukúlu oyo ekosalema na nkulutu moko likoló na lisoló “Batelá elikya na yo makasi kino nsuka” oyo ebimaki na Linɔ́ngi ya Mosɛnzɛli ya 1 Máí 1996, nkasa 21-24.
Loyembo 12 mpe libondeli ya nsuka.
Pɔ́sɔ ebandi na 25 Novɛ́mbɛ
10 mn: Mayebisi. Sanza ya Desɛ́mbɛ mpe ya Yanuáli ebɛlɛmi, yango ezalaka na mikolo mingi mizangi mosala mpe bato bazwaka konzé mingi, kopesáká bongo ntango mingi ya kofanda mpamba epai na baoyo basalaka mpe baoyo bakendaka na eteyelo. Lendisá moko na moko na kokanisa na libaku lipesameli ye ya kozala mobongisi-nzela mosungi. Yebisá basakoli nyonso ete bápesa lapólo na bango ya mosala na wikende oyo.
20 mn: “Lolenge ya komisombela ntango malamu.” Ekosalema na mituna mpe biyano. Pesá mwa makanisi mosusu na lisalisi ya Mosenzeli ya 1 Desɛ́mbɛ 1989, nkasa 16-17, paragrafe 7-11.
15 mn: Búku oyo tokolakisa na Desɛ́mbɛ. Tokolakisa búku Boyebi mpe tokosala makasi na kozonga kotala bato oyo totikelaki bango yango, na mokano ya kobanda boyekoli ya Biblia. Basakoli mibale to misato ya makoki bazali kolobela motuya ya búku oyo mpe lolenge tokoki kosalela yango. Mateya oyo mazali kati na yango mataleli bomoi ya bato nyonso. Ezali kolobela makambo mpe mitindá ya moboko ya Biblia oyo bato ya sika basengeli koyeba liboso ya kozwa batisimo. Soki boyekoli ezali kotambola malamu pɔ́sɔ na pɔ́sɔ, boye moyekoli akokóla nokinoki. Lisoló mpe elakiseli likoló na lolenge ya kobanda boyekoli na lisalisi ya mwango ya kobanda boyekoli na mbala moko: talelá elilingi mpe maloba ya nkasa 4-5; limbolá lolenge toyekolaka; sololá na mokuse likoló na paragrafe mitano ya liboso ya mokapo 1; bóyokana mpo na kozongela ye mpo ete bókóba lisoló mpe koyanola na motuna molandi: “Bomoi ya seko ezali bobele ndɔ́tɔ mpamba?” Lobelá mingi ete libaku kitoko ya kotambwisa boyekoli ya Biblia epesaka esengo.
Loyembo 162 mpe libondeli ya nsuka.