Tólanda ndakisa ya Yehova, ye aponaka bilongi te

¹ Yehova amibanzabanzaka mpo na bato. Andimaka moto nyonso oyo azali kosala mokano na ye kozanga kopona bilongi. (Mis 10:34, 35) Ntango Yesu azalaki kosakwela bato nsango malamu, amonisaki mpe ezaleli yango, azalaki kopona bilongi te. (Luka 20:21) Tosengeli kolanda ndakisa na bango, ndenge Paulo asalaki yango, mpe akomaki ete: “Nkolo moko azali Nkolo na nyonso mpe azali na bozwi bokoki kosunga bato nyonso bakobelelaka ye.”—Lom. 10:12.

² Kosakola nsango malamu ya Bokonzi ya Nzambe epai ya bato nyonso oyo tozali kokutana na bango epesaka Nzambe lokumu. Tosengeli kosakolaka nsango malamu oyo epai ya bato mosusu kozanga kotalela lomposo ya nzoto na bango, motindo ya bomoi na bango, bakelasi oyo batángá to bozwi na bango. (Lom. 10:11-13) Yango elimboli ete tosengeli kosakola epai ya bato oyo bakoyoka—mibali, basi, bilenge, mpe mibange. Tosengeli kokóma na ndako nyonso mpo na kopesa moto mokomoko libaku ya koyoka mateya ya solo.

³ Sepelá na moto nyonso: Mokano na biso ezali ya kokutana na moto nyonso, soki likoki ezali. Likanisi oyo etindaki basakoli mosusu básakola na babiro ya minganga, na balopitalo ya minene to ya mike, na babiro oyo etalelaka bolamu ya bato, na bandako ya kosalisa bato, na babiro ya Leta mpe na babiro ya bapolisi. Basakoli mosusu basakolaki mpe epai ya bankóló bisika oyo batekaka basanduku ya bibembe, bakonzi ya biteyelo mpe bapesi toli, mpe bazuzi. Ntango okei epai ya bakonzi mpo na koteya bango, ezali malamu opesa bango matɔndi mpo na mosala ya ntina oyo bazali kosala na mboka. Zalá na limemya, mpe poná masolo oyo ebongi, masolo oyo ezali na boyokani na mosala na bango mpe na mikakatano oyo bakutanaka na yango.

⁴ Mokolo moko, ndeko mwasi moko akendaki kosolola na zuzi moko na biro na ye. Nsima ya lisolo moko ya kitoko, zuzi yango alobaki ete: “Oyebi likambo nasepelaka na yango epai ya Batatoli ya Yehova? Bazali na mitinda oyo eyebani malamu, bapɛngwaka na yango te.” Moto oyo ya lokumu azwaki litatoli malamu mpenza.

⁵ Tokoki kotánga makambo na mitema ya bato te. Kasi, soki tozali kosolola na moto nyonso oyo tokutani na ye, tokomonisa kondima na biso epai ya Yehova ete azali na nguya ya kotambwisa mosala na biso. Lisusu, yango ekopesa bato libaku ya koyoka mpe ya kondima nsango ya elikya. (1 Tim. 2:3, 4) Tiká tósalela ntango na biso na mayele mpe tósala makasi mpo na kolanda ndakisa ya Yehova, ye aponaka bilongi te, soki likoki ezali tómemela bato nyonso nsango malamu.—Lom. 2:11; Ef. 5:1, 2.