Tósakola nsango malamu epai ya bato mingi koleka

WANA nazalaki kokanisa bato ya mboka epai nazali kofanda, namonaki ete mingi bayebaki Batatoli ya Yehova bobele na nzela ya bipanzeli ya nsango. Nakanisaki ete esengelaki kotala bato yango nyonso. Nakanisaki bongo mpo ete bato yango bákoka koyeba soki Batatoli ya Yehova bazali banani mpe bindimeli na bango ezali mpenza nini. Kasi ndenge nini nakokaki kosala? Mobali na ngai azali nkulutu moklisto, mpe apesaki ngai toli ya mayele mpe lolenge ya kosala.

Tozwaki likanisi ya sikisiki kati na lisolo “Bazulunalo oyo ezali kopesa libɔndisi ya solo,” ebimaki na Lamuká! ya 8 Yanúali 1995 (ebimeli ya Lifalansé). Zulunalo yango elobi boye, na ntina na mosala ya Motatoli moko: “Alekaka epai ya Batatoli mosusu mpe akɔngɔlaka bazulunalo Lamuká! ya kala oyo babombaki yango mingi na bandako. Mpe akendaka na babiro oyo amonaki ete bakosepela na masolo oyo malobelamaki na kati.”

Na lisalisi ya mobali na ngai, nokinoki nakɔngɔlaki bankámá ya bazulunalo. Kati na bazulunalo yango naponaki masolo makeseni oyo ebongaki mpo na bato oyo nalingaki kokutana na bango.

Kosaleláká búku oyo ezalaka na banimero ya telefone ya bato, mpe babúku ya kala oyo elobelaka makambo ya mboka, nakomaki na nkasa moko bankombo ya balopitalo, bisika mingi ya masano mpo na bilenge. Lisusu nakomaki bankombo ya bankolo bisika ya kotekisa basanduku ya bibembe, bankolo biteyelo mpe bapesi toli, minganga, mpe bakonzi ya bolɔ́kɔ mpe bazuzi. Nakomaki mpe lisusu nkombo ya bakambi ya misala ya Letá mikotalaka makambo ya masanga mpe bilangwiseli, masangá mpo na bopɛto, mpo na bibɔsɔnɔ mpe baoyo bazwaki makama na etumba, mpe baoyo bakosalaka bolukiluki likoló na biloko ya kolya. Mpe lisusu nabosanaki te bakonzi ya misala ya Letá mikotalaka bolamu ya bato, basali ya Letá, mpe baoyo basalaka misala mitali libota.

Nazalaki koloba nini?

Likambo ya liboso nazalaki kosala ntango nakómi liboso ya moto ezalaki komimonisa polele soki nazali nani. Na nsima, nazalaki koyebisa ete nakosala bobele miniti moke.

Soki nakómi liboso ya moto oyo azali mokonzi na esika yango, nazalaki koloba ete: “Nazali Motatoli ya Yehova. Nzokande, nayei kosolola makambo etali lingomba te, mpamba te yango ebongi te na ngonga oyo ya mosala.” Mbala mingi bato bazalaki kondima koyoka. Na nsima, nazalaki koyokanisa maloba na ngai na ezalela ya moto, nakokaki kobakisa ete: “Koya na ngai ezali na bantina mibale. Ya liboso, nalingi koyebisa bino ete nasepelaka na mosala oyo kompanyi na bino ezali kosala. Mpo ete, ezali likambo moke te ete moto apesa ntango mpe makasi na ye mpo na bolamu ya bato nyonso. Yango ebongi mpenza kopesamela longonya.” Na mabaku mingi bato oyo nazalaki koloba na bango motindo oyo bazalaki kokamwa.

Sikawa moto azalaki mpenza komituna soki ntina ya mibale ya boyei na ngai ezalaki nini. Nazalaki koloba ete: “Ntina ya mibale ya boyei na ngai ezali oyo: Na kati ya zulunalo na biso Lamuká! oyo ebimaka na mokili mobimba, naponaki masolo oyo etali mosala oyo ozali kosala mpe mikakatano na yango. Nandimisami ete yo mpe okolinga koyeba ndenge nini zulunalo oyo ebimaka na mokili mobimba ezali kotalela mikakatano yango. Nasepeli kotikela yo bazulunalo yango.” Mbala mingi bazalaki koloba na ngai ete basepeli na milende na ngai.

Matomba malamu mpe ya kokamwisa

Ntango nazalaki kosalela mwango wana, bato mingi bazalaki koyamba ngai na boboto, bobele moto moko kati na bato 17 nde aboyaki koyamba ngai. Nakutanaki na makambo mingi oyo ezalaki kokamwisa mpe ebimisaki matomba malamu.

Na ndakisa, nsima ya komeka mbala minei mpe kozela na motema molai, nalóngaki kokutana na inspecteur ya biteyelo ya etúká. Azalaki na mosala mingi. Kasi, amoniselaki ngai boboto mpe nasololaki na ye na boumeli ya mwa ntango. Ntango nabimaki na biro na ye, alobaki na ngai ete: “Nasepeli mpenza na molende na yo, mpe nakotánga malamumalamu mikanda otikeli ngai.”

Na libaku mosusu, nakendaki na tribinale ya etúká, nakutanaki na zuzi-mokonzi, mobali moko ya mwa mokóló. Ntango nakɔtaki na biro na ye, alongolaki miso na mikanda na ye mpe atalaki ngai na nkanda.

Alobaki na ngai na mongongo makasi ete: “Nayambaka bato bobele mokolo ya mibale na ntɔ́ngɔ́, mpe mokolo yango nakoyoka makambo nyonso okoloba na ngai.”

Nazongisaki nokinoki mpe nabakisaki ete: “Limbisá ngai na ndenge nayei na ngonga ya malamu te, ya solo, nakosepela kozonga na ngonga mosusu. Kasi nayei mpo na makambo na ngai mosusu.”

Na yango zuzi azalaki na mposa ya koyeba soki ezalaki likambo nini. Atunaki na malɛmbɛ, soki nalingi nini. Nazongiselaki ye ete nakoya lisusu mokolo ya mibale.

Nakamwaki ntango alobaki na ngai ete, “Nalɔmbi yo, fandá. Olingi nini?”

Lisolo ya kitoko ebandaki, mpe asɛngaki bolimbisi mpo na ndenge amonisaki boboto te na ebandeli mpamba te azalaki na mosala mingi.

Mwa moke na nsima zuzi atunaki ngai ete: “Oyebi likambo nasepelaka na yango epai na Batatoli ya Yehova? Bazali na mitindá oyo ezali na moboko malamu, bapɛngwaka na yango te. Hitler asalaki nyonso ekokaki na ye, kasi Batatoli bakendaki na etumba te.”

Ntango tokɔtaki na biro moko na ndeko ya mwasi oyo nazalaki na ye, bakomeli bayebaki biso. Bongo mokonzi ya bakomeli wana alobaki na biso na malɛmbɛ nyonso ete, “Prezidá ayambaka soko moke te bato ezala ya lingomba nini.”

Nayebisaki ye na kimya nyonso ete, “Kasi akoyamba biso, mpo ete tozali Batatoli ya Yehova. Toyei kosɛnga eloko te, mpe tokoumela koleka miniti misato te.” Nasalaki libondeli ya etingya na kati ya motema ete, “Ɛ Yehova, soki olingi tiká ete makambo matambola malamu!”

Mokomeli alobaki na biso na mwa kobanga ete, “Ezali malamu, kasi, nakomeka.” Akendaki. Nsima ya miniti soko mibale, oyo emonanaki epai na ngai lokola aumelaki seko, bayaki elongo na prezidá ye moko. Alobaki ata likambo te, amemaki biso kino na biro na ye, oyo ezalaki koleka babiro mosusu mibale.

Wana tozalaki kosolola, abandaki kokóma mpenza na boboto epai na biso. Na bolingo malamu azwaki banimero ya zulunalo Lamuká! ntango tolakisaki ye yango. Totɔ́ndaki Yehova mpo na libaku tozwaki ya kopesa litatoli na ntina na mokano ya mosala na biso.

Soki nakanisi ebele ya makambo oyo ezali kopesa esengo, nakómi na bosepeli mingi na makambo ntoma Petelo alobaki: “Na solo namoni ete Nzambe akokabolaka bato te; kasi kati na mboka nyonso, oyo akobangaka ye mpe akosalaka boyengebene ayambami na ye.” (Misala 10:34, 35) Mokano ya Nzambe ezali ete bato ya motindo nyonso, ya minɔkɔ nyonso, to ya etɛlɛmɛlo nini bázwa libaku ya koyeba mokano na ye mpo na mabelé.​—Euti na motángi moko.