Bilei ya elimo na ntango oyo ebongi
1. Ndenge nini Ezekiele 36:29 ezali kokokisama lelo oyo?
1 Nkolo Mokonzi Yehova alobi boye: “Nakobyanga masango mpe nakofulisa yango mpe nakotika nzala koya na bino te.” (Ezek. 36:29) Maloba yango ya esakweli ezali kokokisama lelo oyo epai na basaleli ya Nzambe. Na ndenge ya elilingi, Yehova asali ete masangu, oyo ezali na ntina mingi mpo na bomoi, ebima ebele mpo na basaleli na ye. Bilei ya elimo oyo epesamaka na ntango oyo ebongi na mayangani na biso ya etúká ezali komonisa likambo yango polele.
2. Ndenge nini Yehova asalelaki mayangani ya etúká mpo na kopesa bilei ya elimo na ntango oyo ebongi?
2 Na liyangani oyo esalemaki na Columbus, na etúká ya Ohio (États-Unis) na 1931, Yehova asalisaki basaleli na ye mpo bázwa nkombo ya sika—Batatoli ya Yehova. (Yis. 43:10-12) Na 1935, bamonisaki biso banani oyo bazali mpenza ebele ya bato oyo Emoniseli 7:9-17 elobeli. Na 1942, Ndeko Knorr asalaki lisukulu oyo ezalaki na motó ya likambo, “Kimya—Ekoki koumela?” Lisukulu yango esalaki ete mosala ya kosakola na mokili mobimba ekende liboso mpe epesaki nzela ete báfungola Gileadi, Eteyelo ya la Société Watchtower mpo na mateya ya Biblia. Atako mayangani mosusu ezalaka na makambo oyo moto akoki kobosana yango te, liyangani mokomoko ezalaka mesa oyo etondi na bilei malamu ya elimo oyo epesami na ntango oyo ebongi.—Nz. 23:5; Mat. 24:45.
3. Tosengeli kosala nini mpo tózwa matomba na elambo ya elimo oyo ebongisami na liyangani na biso ya etúká?
3 Olyaka mpenza malamu? Atako tozali na biloko mingi ya kolya, tokoki kokufa nzala soki tozali kosala makasi te mpo na kolya. (Mas. 26:15) Ezali mpe bongo na elimo. Emonanaki na mayangani mosusu ete bato mingi bazalaki kotambola to kosolola mpambampamba ntango liyangani ezali kosalema. Atako kosolola na bandeko mpo na kolendisana ezali moko ya makambo ya ntina oyo tokendaka kosala na liyangani, tosengeli kosala yango liboso ete eteni mokomoko ya liyangani ebanda to na nsuka. (Mos. 3:1, 7) Soki tofandi na bisika na biso te mpo na kolanda liyangani na likebi, tokoki kozanga likambo moko ya ntina mingi. Na bantango mosusu, ekoki kosɛnga ete bakɛngɛli ya badepartema ya liyangani mpe bandeko oyo bazali na mikumba básolola makambo etali liyangani na ntango oyo yango ezali kosalema. Soki ezali mpo na makambo ya liyangani te, basengeli kolanda liyangani na likebi mpo na kopesa ndakisa na basusu. Moto moko te kati na biso asengeli kozangisa ata mwa ndambo moke ya bilei ya elimo oyo epesami. (1 Kol. 10:12; Filp. 2:12)
4. Ndenge nini tokoki komonisa botɔndi mpo na ebele ya bilei ya elimo oyo Yehova azali kopesa biso?
4 Tozali na esengo mpenza mpo na ebele ya bilei malamu ya elimo oyo Yehova azali kopesa biso, oyo ekeseni na mateya ya lokuta ya mangomba ya boklisto oyo ezali lokola bilei ekauká. (Yis. 65:13, 14) Lolenge moko oyo tokoki ‘komonisa botɔndi’ na biso ezali ya kotalela liyangani lokola libaku ya koteyama na Yehova. (Kols. 3:15) Tyá likebi na yo nyonso nde na makambo oyo molobi azali koloba kasi na molobi te, mpe talelá makambo yango lokola nde euti na “Molakisi na [biso] Monene.” (Yis. 30:20, 21, NW; 54:13) Landá malamumalamu. Zwá banɔti ya makambo ya ntina. Mpokwa nyonso, zongeláká makanisi ya ntina oyo elobelamaki na liyangani. Salelá makambo oyo oyoki.
5. Makambo nini ya kosepelisa tozwaka na mayangani na biso ya etúká?
5 Liyangani nyonso oyo ezali kosalema lelo oyo liboso ya Armagedon, ezala esalemi na kaa ya bato bakimá mboka, na mboka oyo ezali na bitumba, to na esika moko ya monene ya kimya, ezali komonisa ete tolongi Satana. Biso bandeko oyo tozali kosala na bomoko, tosepelaka mingi na mabaku ya koyangana elongo na mayangani ya etúká. (Ezek. 36:38) Tondimi ete Yehova akopesa biso lisusu na bolingo mpenza “bilei na ntango oyo ebongi.”—Luka 12:42.
[Etanda na lokasa 4]
Monisá botɔndi mpo na mesa ya Yehova
◼ Tyá likebi mpenza
◼ Zwá banɔti ya makambo ya ntina
◼ Mpokwa nyonso, zongeláká makanisi ya ntina liyangani
◼ Salelá makambo oyo oyoki