Mpo na nini tozali na mposa ya boyekoli ya mokanda ya lisangá?

1. Ndenge nini boyekoli ya mokanda ya lisangá ebandá?

¹ Na 1895, bituluku ya Bayekoli ya Biblia, nkombo oyo bazalaki kobenga Batatoli ya Yehova kala, ekómaki kobengama Bituluku ya boyekoli ya Biblia na buku L’Aurore. Bazalaki kosalela buku L’Aurore du Millénium, oyo ezalaki na bavolimi mingi, na boyekoli yango. Na nsima, boyekoli yango ekómaki kobengama Bituluku ya Beloya mpo na Boyekoli ya Biblia. (Mis. 17:11) Mbala mingi, ezalaki etuluku moko ya bato moke oyo bazalaki koyangana na ndako ya ndeko moko na mpokwa ya mokolo moko oyo bango moko baponi. Ndenge wana nde boyekoli ya mokanda ya lisangá ebandá.

2. Ndenge nini tokoki “kolendisana” na boyekoli ya mokanda?

² Elendiseli mpe lisalisi: Lokola bituluku ya boyekoli ya mokanda ezalaka na bato mingi te, bayangani bazalaka na libaku monene ya kolobela kondima na bango polele. Yango esalaka ete “[tólendisana]. . . , moto na moto alendisama na kondima ya mosusu.”​—⁠Lom. 1:⁠12.

3, 4. Ndenge nini ebongiseli ya boyekoli ya mokanda esalisaka biso tókokisa mosala na biso ya kosakola?

³ Soki tozali kolanda na likebi mpenza ndenge oyo mokɛngɛli ya boyekoli ya mokanda azali koteya, tokoyeba “kosembola liloba ya solo malamumalamu.” (2 Tim. 2:15) Tyá likebi na ndenge oyo mokɛngɛli azali kolimbola mikapo oyo esimbi lisolo. Soki mokanda oyo bozali koyekola esɛngi yango, akosalela mbala mosusu kaka Biblia mpo na kobimisa makanisi ya ntina na bozongeli ya nsuka. Ndakisa na ye ya malamu ekoki kosalisa biso tóbongisa ndenge na biso ya koteya na mosala ya kosakola.​—⁠1 Kol. 11:⁠1.

⁴ Longola kotambwisa boyekoli pɔsɔ nyonso, mokɛngɛli ya boyekoli ya mokanda azali mpe ndakisa mpo na mosala ya kosakola. Ayokanaka na mokɛngɛli ya mosala ya kosakola mpo na kozwa bibongiseli ya malamu oyo etali mosala ya kosakola. Alukaka kosalisa basakoli nyonso ya etuluku na kokokisa mokumba na bango ya kosakola nsango malamu mpe ya kokómisa bato bayekoli.​—⁠Mat. 28:​19, 20; 1 Kol. 9:⁠16.

5. Lisalisi nini tokoki kozwa biso moko na nzela ya boyekoli ya mokanda?

⁵ Mokɛngɛli ya boyekoli ya mokanda amibanzabanzaka mpo na bokolɔngɔnɔ ya elimo ya ndeko mokomoko ya etuluku na ye. Amonisaka yango na makita ya lisangá mpe ntango abimaka na basusu na mosala ya kosakola. Soki akei kotala bandeko na bandako na bango, alendisaka bango na elimo. Bandeko basengeli kokakatanaka te kosɛnga mokɛngɛli ya boyekoli ya mokanda lisalisi ya elimo ntango nyonso oyo bazali na mposa na yango.​—⁠Yis. 32:​1, 2. 

6. (a) Ndenge nini koyangana na bituluku ya mike elendisaki bandeko na biso ya mikili mosusu? (b) Matomba nini yo moko osili kozwa na boyekoli ya mokanda?

⁶ Kopesana makasi: Na mikili oyo mosala ya basaleli ya Nzambe epekisami, mbala mingi bandeko bayanganaka na bituluku ya mike. Ndeko mobali moko alobi boye: “Atako mosala na biso ya baklisto epekisamaki, tozalaki kosala makita na biso ya pɔsɔ na pɔsɔ ntango nyonso oyo likoki emonani na bituluku ya bato 10 mpe 15. Na makita, tozalaki kozwa makasi na elimo, tozalaki kozwa makasi yango na boyekoli na biso ya Biblia mpe na ndenge tozalaki kokutana na bandeko mosusu nsima ya makita. Tozalaki koyebisana makambo oyo tokutanaki na yango, mpe yango ezalaki kosalisa biso tómona ete mokomoko na biso azali kobunda etumba ndenge moko.” (1 Pet. 5:⁠9) Tiká ete biso mpe tólendisanaka mpenza ntango tozali komipesa mpo na kosimba Boyekoli ya mokanda na lisangá.​—⁠Ef. 4:⁠16.