Liyangani ya zongazonga ya mbala oyo

Na mikolo ya nsuka ya mokili oyo esili kobeba, ezali na ntina mingi tólongola te bilamba na biso ya elimo mpe tóbatela bizaleli oyo emonisaka ete tozali baklisto. (Em. 16:15) Yango wana, motó ya likambo ya liyangani ya zongazonga mpo na mobu ya mosala 2006 ebongi mpenza, mpamba te elobi ete: “Bólata bomoto ya sika.”​—⁠Kols. 3:⁠10.

Mokolo ya liboso: Masukulu-matongani ya liboso, oyo ezali na motó ya likambo, “Tómonisa polele bizaleli ya bomoto ya sika,” ekolobela mingi ndenge oyo kolata bomoto ya sika epesaka biso matomba na makambo nyonso ya bomoi na biso. Ndenge nini tolataka bomoto ya sika? Masukulu mibale ya nsuka ya mokolo ya liboso, “Mipesá disipilini mpo na komanyola malamu” mpe “Mateya oyo elatisaka biso bomoto ya sika,” ekopesa eyano na motuna wana.

Mokolo ya mibale: Masukulu-matongani ya mibale oyo ezali na motó ya likambo, “Tóluka kozala na lolemo ya bato ya bwanya,” ekomonisa ndenge oyo bomoto ya sika etindaka biso tósalela malamu lolemo na biso. Lisukulu ya bato nyonso oyo ezali na motó ya likambo, “Ozali kolonga moto mabe?”, ekomonisa ntina oyo tosengeli kokeba mpo tókwea te na mayele mabe ya Satana. Masukulu mibale ya nsuka ya liyangani yango, “Omibatela kozanga litɔnɔ na mokili” mpe “Tókómisaka sika bomoto na biso ya kati mokolo na mokolo,” ekosalisa biso tótika bizaleli mpe etamboli oyo eyokani te na banzela ya sembo ya Nzambe mpe tókangama na losambo ya Yehova.

Tozali kozela na motema likoló bilendiseli wana oyo ekotinda biso tólata bomoto ya sika mpe tóbatela yango!