Lisalisi oyo ezali mpasi te komona yango
1. Ndenge nini moto akoki kolɛmba na elimo?
1 Anna, ndeko mwasi moko oyo mosala na ye ezwaka ye ntango mingi mpe mobali na ye azali Motatoli te, amonaki ete koyangana na makita nyonso, kosakola, mpe koyekola Liloba ya Nzambe ekómaki etumba mpenza. Atako azalaki kaka kolinga Yehova, atikaki kosakola. Likambo ya esengo, azwaki lisalisi ya elimo epai ya bankulutu oyo bamibanzabanzaki mpo na ye.
2. Ndenge nini baklisto nyonso bakoki komonisa ete bazali lisalisi oyo ezali mpasi te komona yango?
2 Soki tozali kondima lisalisi ya elimo oyo tozali kozwa na nzela ya lisangá ya boklisto, tokomonisa ete tozali kotyela Yehova ye moko motema. Yesu Klisto amibanzabanzaka na bolingo mpenza mpo na basusu, yango wana bankulutu ya lisangá balandaka ndakisa na ye mpe balukaka mabaku ya kolendisa mpe kosalisa baoyo bazali kokutana na mikakatano na elimo. (1 Tes. 5:14) Mbala mingi, esɛngaka kaka koloba liloba moko ya boboto mpe ya kolendisa oyo euti na bavɛrsɛ mpo na kokitisa moto motema. Kosalisa bato oyo balɛmbi na elimo mpo na mwa ntango ezali likambo ya baklisto nyonso, kasi kaka bankulutu te. Kozanga ntembe, biso nyonso tosilá kolendisama na “liloba oyo elobami na ntango malamu,” mpe oyo moto akanisi malamu liboso ya koloba yango.—Mas. 25:11; Yis. 35:3, 4.
3, 4. Esɛngaka nini mpo na kosalisa basusu, mpe ndenge nini tokoki kosala yango?
3 Kendá epai na bango: Mpo na komonisa ete tozali komibanzabanza mpo na bandeko oyo bazali na mposa ya lisalisi, ezali kosɛnga tókenda epai na bango, tómitya na esika na bango, mpe tózala na molende. Ntango Yonatana ayokaki ete Davidi azali na mikakatano, “atɛlɛmaki mpe akendaki epai na Davidi na Holesa mpe asungaki ye kozwa makasi.” (1 Sam. 23:15, 16) Salisá basusu na lolenge ya malamu. Maloba oyo ezali komonisa ete tozali mpenza komibanzabanza mpo na basusu ebimisaka matomba mingi. Lisusu, Yesu amonisaki polele ete esɛngaka milende mpo na kosalisa ndeko moko azonga na nzela. (Luka 15:4) Soki tozali na mposa makasi ya kosalisa moto moko, tokokoba kosalisa ye ata soki azali kokola malɛmbɛmalɛmbɛ.
4 Bandeko mosusu, na ndakisa baoyo tozali na bango na boyekoli ya mokanda, bakolendisama mpenza soki tozwi likanisi ya kobenga bango mpo na kobima na bango na mosala ya kosakola! Ntango tozali kosalisa mosaleli moko ya Yehova mpo abimaka na mosala ya kosakola, tokoki mpe kosalela libaku yango mpo na kolendisa ye. Ntango yango oyo tolekisaka elongo na mosala ya Yehova, elendisaka mingi mpenza baoyo bazali kozongela makasi na bango ya elimo.
5. Na bantango mosusu, lisalisi nini bankulutu bakoki kopesa?
5 Ebongiseli ya bolingo: Baoyo babandi naino kosakola te to baoyo babandi koyangana sika elongo na lisangá bakoki kozala na mposa ya lisalisi mosusu mpo bákóma na kondima ya makasi. Mbala mosusu, ekosɛnga kaka koyekola na mokomoko na bango buku Tósambela Nzambe kaka moko ya solo, buku Pusaná penepene na Yehova, to buku Biblia eteyaka mpenza nini? Soki moto yango azwá batisimo, mbala mingi esɛngaka te koyekola na ye ntango molai. Komite ya mosala na lisangá esengeli koyeba nani abongi kozwa lisalisi yango.—Talá Biyano na mituna na bino na Mosala na biso ya Bokonzi ya Novɛmbɛ 1998 mpe ya Novɛmbɛ 2000.
6. Ndenge nini ndeko mwasi moko azwaki lisusu makasi na elimo?
6 Anna, oyo tolobeli na ebandeli, andimaki na motema mobimba ebongiseli oyo bankulutu bazwaki ya kotinda ndeko mwasi moko oyo akɔmeli na elimo mpo ayekola Biblia elongo na ye. Ayekolaki kaka mbala minei mpe akómaki komiyoka lisusu penepene na Yehova. Abandaki lisusu koyangana na makita mpe akómaki lisusu na mposa ya kokumisa Yehova liboso ya bato. Ndeko mwasi yango asalisaki ye mpe na mosala ya kosakola na ndenge azalaki kobenga ye akende kotika ye epai ya bato oyo ayekolaka na bango Biblia tii ntango ye moko akómaki na makasi ya kosakola ndako na ndako. Azalaki kaka na mposa moto moko asalisa ye mpo azongela lisusu milende na ye!
7. Matomba nini tozwaka soki tozali kolendisa basusu na elimo?
7 Soki tozali kolendisa baoyo balɛmbi, biso nyonso tokozwa mapamboli. Ndeko oyo basalisi akozala na esengo ndenge akomiyoka ete akómi penepene na Yehova mpe ndenge akómi kosangana na misala ya ebongiseli na Ye. Bankulutu basepelaka ntango bamonaka bandeko ya ndenge wana bazali kokola na elimo. (Luka 15:5, 6) Lisangá ekómaka na bomoko mpo bandeko nyonso bazali kotyelana likebi. (Kols. 3:12-14) Oyo nde bantina ya esengo tozali na yango ya kolanda ndakisa ya Yehova, oyo azali lisalisi oyo ezali mpasi te komona yango.—Ef. 5:1.