Tósepela koyekola buku Biblia eteyaka mpenza nini?

¹ Moko na makambo oyo tosepelaki na yango mingi na liyangani ya etúká “Botosi oyo esepelisaka Nzambe,” ezali kobima ya buku Biblia eteyaka mpenza nini? Etikali moke tokobanda kosalela yango mingi na mosala na biso ya kosakola, mingi mpenza mpo na koyekola na bato Biblia. Yango wana, esengeli tóyeba malamu mokanda yango ya sika. Ya solo, tokoyeba yango malamu mpamba te kobanda na pɔsɔ ya 17 Aprili 2006, tokobanda koyekola yango na Boyekoli ya mokanda na lisangá.

² Mokɛngɛli na boyekoli ya mokanda akobenda likebi ya bayangani na mituna oyo ezali na ebandeli ya mokapo mokomoko. Mpe na nsima, akosalela mituna oyo ezali na nse ya lokasa mpo na kotambwisa boyekoli. Esengeli kotánga bavɛrsɛ oyo esimbi mateya mpe kolobela yango; etanda “Oyo Biblia eteyaka” ekosalisa na bozongeli, mpamba te yango ezali na biyano ya Biblia na mituna oyo ezali na ebandeli ya mokapo. Bokosepela kopesa biyano mpamba te buku yango ezali kolobela makambo na ndenge ya polele, ya pɛtɛɛ, mpe ya kosepelisa.

³ Apɛndisi ya buku yango ezali kolimbola makambo ndenge na ndenge na bozindo. Tokosalela makambo yango ntango moyekoli ya Biblia alingi koyeba makambo mingi etali lisolo oyo tozali koyekola. Na bantango mosusu, tokobanda kotalela biteni ya apɛndisi yango na boyekoli ya mokanda na lisangá. Ndeko oyo azali kotánga na boyekoli ya mokanda, akotánga mpe makambo nyonso oyo tokotalela na apɛndisi, mpe masolo oyo eleki milai tokotalela yango ndambondambo. Apɛndisi ezali na mituna ya boyekoli te. Kasi, mokɛngɛli akoki kotuna bayangani mituna oyo ekosalisa bango bábimisa polele makanisi ya ntina ya apɛndisi.

⁴ Ntango tokoyekola buku Biblia eteyaka na boyekoli ya mokanda na lisangá, tokolekisa ntango mingi te na likambo mokomoko. Kasi, tokosala ndenge wana te ntango tokoyekola yango elongo na bato mosusu, mingi mpenza soki bayebi Biblia malamu te to bayebi yango te. (Mis. 26:28, 29) Ntango tokoyekola na bato buku yango, ekosɛnga tólobela bavɛrsɛ na bozindo mpenza, tólimbola bililingi, mpe bongo na bongo. Na bongo, mityelá mokano ya koyangana pɔsɔ nyonso na boyekoli yango mpe ya kopesa biyano ntango tokoyekola buku Biblia eteyaka mpenza nini?