Zongeláká moto nyonso oyo asepelaki na nsango malamu ata mwa moke
1 Mingi kati na biso, soki tozali lelo na kati ya solo, ezali mpo ndeko moko amonaki ndenge oyo tosepelaki na nsango ya Bokonzi mpe na motema pɛtɛɛ nyonso, azongelaki biso—ntango mosusu mbala ebele—mpo na kosalisa biso tósepela lisusu mingi na nsango yango. Likambo yango esengeli kotinda biso mpe tóbosanaka te kozongela bato nyonso oyo basepelaki na nsango malamu ata mwa moke. Na ntembe te, kozongela bato ezali na kati ya mokumba oyo tozwi ya “kokómisa bato bayekoli.”—Mat. 28:19, 20.
2 Luká koyeba mposa ya moto: Ata soki moto aboyi kozwa mikanda na biso, elongi na ye, mongongo na ye, to makambo oyo azali koloba ekoki komonisa soki asepeli ata mwa moke na nsango ya Bokonzi; mpe yango ekotinda biso tózongela ye. Ndeko moko azalaki kozongela moto moko na boumeli ya pɔsɔ mitano mobimba kozanga ete atikela ye ata mokanda moko. Ntango azongelaki ye na mbala ya motoba, moto yango andimaki kozwa mokanda, mpe nsukansuka boyekoli ya Biblia ebandaki.
3 Soki omoni ete moto oyo bosololi na ye asepeli, zongelá ye nokinoki, ekoki kozala nsima ya mwa mikolo. Kopesa “moto mabe” nzela te ete abɔtɔla makambo oyo elonami na motema ya moto yango. (Mat. 13:19) Soki boyokani na ye mpo ozongela ye na ngonga moko boye, salá nyonso okokisa maloba na yo.—Mat. 5:37.
4 Ntango tozali kosakola na balabala: Osalaka makasi oluka kokutana lisusu na moto oyo asepelaki ntango ozali kosakola na balabala to na litatoli ya libaku malamu? Na nsuka ya lisolo na bino okoki koloba na ye boye: “Nasepeli mingi na lisolo na biso. Tokokutana lisusu wapi mpo tósolola?” Soki ebongi, basakoli mosusu bamonaka malamu kopesa moto oyo asepeli nimero na bango ya telefone to mpe kosɛnga moto yango oyo ya ye. Soki bato bamonaka yo mbala na mbala na esika moko ntango ozali kopesa litatoli na balabala, bakobanga mpenza te kopesa yo nimero na bango ya telefone to adrɛsi na bango. Ata soki moto aboyi kopesa yo nimero ya telefone to adrɛsi na ye, okoki komeka koyebisa ye makambo oyo ekosala ete asepela na nsango malamu na mbala ya nsima oyo okokutana na ye na nzela.
5 Epesaka esengo mingi komona ndenge ndunda to fololo oyo tolonaki mpe tobwakelaki mai ezali kokola. Ndenge moko, biso mpe tokoki koyoka esengo mingi soki tozali kozongela bato mpe kosalisa bango bákola na elimo. (1 Kol. 3:6) Zwá mokano ya kozongelaka moto nyonso oyo asepelaki na nsango malamu ata mwa moke.