Mbongwana kitoko oyo esalemi na Linɔ́ngi ya Mosɛnzɛli!
1 Na ebandeli ya mbula oyo, liyebisi moko ya kosepelisa epesamaki na masangá: Kobanda na sanza ya Yanuali 2008, banimero mibale ya Linɔ́ngi ya Mosɛnzɛli ya sanza mokomoko ekokesana mpenza; moko ekozala mpo na bato nyonso mpe mosusu mpo na bandeko na biso baklisto! Ntango mosusu omitunaki boye: ‘Na ndenge nini banimero yango ekokesana? Lokola banimero yango mibale ekokesana, yango ekobimisa matomba nini? Ezali nde na masolo mosusu ya sika oyo ekobanda kobima na banimero yango?’
2 Makambo oyo ekokesenisa yango: Nimero ya liboso ya sanza, oyo ezali na dati ya 1 ekobengama Linɔ́ngi ya Mosɛnzɛli ya bato nyonso. Masolo nyonso ya Linɔ́ngi ya Mosɛnzɛli yango ekobongisama mpo na moto nyonso. Nimero ya mibale ya sanza, oyo ezali na dati ya 15, ekobengama Linɔ́ngi ya Mosɛnzɛli ya boyekoli mpe tokokabola yango te na mosala ya kosakola. Yango ekozala na masolo nyonso ya boyekoli ya sanza wana ná masolo mosusu oyo etali kaka baklisto oyo bamipesá na Nzambe. Linɔ́ngi ya Mosɛnzɛli ya bato nyonso ekosepelisa Batatoli ya Yehova, kasi ekosepelisa mingi mpenza bato oyo bazali Batatoli te, oyo bandimelaka Biblia. Nzokande, Lamuká! ekokoba kolobela makambo oyo etali bato ya ndenge na ndenge, bakisá mpe bato ya ntembe mpe bato ya mangomba oyo ezali ya boklisto te.
3 Matomba: Na Linɔ́ngi ya Mosɛnzɛli ya boyekoli, ekosɛnga lisusu te kolimbola maloba lokola “mobongisi-nzela” na ndenge oyo ekosalisa bato oyo bazali Batatoli te bákanga ntina na yango. Linɔ́ngi ya Mosɛnzɛli yango ekozala mpe na makambo oyo etali mpenzampenza Batatoli ya Yehova mpe bayekoli ya Biblia oyo bazali kokola na elimo. Ezali boni mpo na Linɔ́ngi ya Mosɛnzɛli ya bato nyonso? Lokola masolo na yango mpe ndenge oyo ekokomama ekobonga na moto nyonso, moto oyo azali Motatoli te akosepela kotánga yango banda ebandeli tii na nsuka. Kozanga ntembe, Batatoli ya Yehova nyonso bakozwa matomba soki batángi banimero yango nyonso mibale. Lokola tokobanda kolakisa kaka Linɔ́ngi ya Mosɛnzɛli moko mpe Lamuká! moko na sanza, tokozala na sanza mobimba ya kobongisa maloba ya kobanda lisolo oyo ekobota mbuma.
4 Masolo ya sika: Masolo mosusu ya sika mpe ya kitoko mpenza ekobanda kobima na Linɔ́ngi ya Mosɛnzɛli ya bato nyonso. Lisolo moko ekolobela mateya ya moboko ya Biblia na ndenge ya pɛtɛɛ mpenza. Lisolo mosusu ekomonisa ndenge oyo Biblia ekoki kosalisa mabota. Bakotyela mpe bilenge ndambo ya makambo oyo bakoki kotalelaka na boyekoli na bango moko. Nimero mokomoko ekozala na lisolo moko oyo ekolobela bavɛrsɛ oyo eteyaka biso mpenza bizaleli ya Yehova.
5 Tozali kobondela Yehova apambola ebongiseli oyo ya sika oyo etali Linɔ́ngi ya Mosɛnzɛli. Tiká ete Linɔ́ngi ya Mosɛnzɛli mpe Lamuká! esalisa lisusu bato mingi oyo bazali na ezaleli oyo ebongi mpo báyoka nsango malamu.—Mat. 10:11.