Ndenge nini tokoki kosalisa bato oyo bakoyangana na Ekaniseli?
1. Wapi litatoli monene oyo ekopesama na mokolo ya 22 Marsi 2008?
1 Na mokolo ya 22 Marsi 2008, bamilio ya bato na mokili mobimba bakozwa litatoli moko monene. Baoyo bakoyangana na Ekaniseli bakoyoka likambo etali bolingo monene oyo Yehova amoniselaki bato na ndenge apesaki lisiko mpo na bolamu na bango. (Yoa. 3:16) Bakoyeba soki Bokonzi ezali nini mpe ndenge oyo Yehova akosalela yango mpo na kokokisa mokano na ye na mabelé mobimba. (Mat. 6:9, 10) Bakomona mpenza ete biso basaleli ya Nzambe tolinganaka mpe tozalaka na bomoko, mpe toyambaka bato na esengo mpenza.—Nz. 133:1.
2. Ndenge nini tokoki kosalisa bayekoli ya Biblia oyo bakoyangana na Ekaniseli?
2 Bayekoli ya Biblia: Bato mosusu oyo bakoyangana na Ekaniseli ekozala bato oyo babandi koyekola Biblia sika elongo na biso. Lakisá bango epai ya bandeko ya lisangá. Limbwelá bango makita na biso ya pɔsɔ na pɔsɔ, mpe tambwisá bango mwa moke na Ndako ya Bokonzi. Ntango molobi akosala lisukulu, akolendisa bato ya ndenge wana bákoba kokola na elimo. Okoki kosalela makambo oyo akoloba mpo na kolendisa bato oyo oyekolaka na bango Biblia.
3. Tokoki kosala nini mpo na kolendisa basakoli oyo batiká kosakola oyo bakoyangana na Ekaniseli?
3 Baoyo batiká kosakola: Basakoli mosusu oyo batiká kosakola bakoyangana mpe na Ekaniseli. Luká kopesa bango mbote na esengo mpenza. Kotuna bango te makambo etali bomoi na bango to koloba te likambo oyo ekoki koyokisa bango nsɔni. Mwa moke nsima ya mokolo ya Ekaniseli, ekozala malamu bankulutu bákende kotala bandeko oyo batiká kosakola, oyo bayaki na Ekaniseli, mpo na kopesa bango longonya na milende oyo basalaki mpo báyangana na Ekaniseli, mpe kobengisa bango na esengo mpenza na makita ya mbala ekoya.
4. Ndenge nini mokomoko na biso akoki kosalisa bato mosusu oyo bakoyangana na Ekaniseli?
4 Bato mosusu: Bato mosusu oyo bakoyangana ekozala ntango mosusu bato oyo toyebani na bango to bandeko na biso oyo biso moko tobengisaki. Ekozala mpe na baoyo bazwaki lokasa ya libyangi na ntango ya kampanye. Soki omoni bato oyo oyebi te, yambá bango mpe yebisá bango nkombo na yo. Ekoki kozala mbala ya liboso báyangana na makita na biso. Ntango ozali kosolola na bango, okoki koyeba ndenge oyo okokutana na bango lisusu. Soki okei kotala bango to obengi bango na telefone mwa mikolo nsima ya Ekaniseli, okoki kopesa bango mposa ya koyeba makambo mosusu mpe kosɛnga bango báyekola Biblia.
5. Tokoki koloba nini mpo na kobanda koyekola na moto Biblia?
5 Ntango tokei kotala moto moko oyo ayanganaki na Ekaniseli, tokoki kosalela makambo oyo elobamaki na lisukulu ya Ekaniseli mpo na kolakisa buku Biblia eteyaka. Na ndakisa, moto oyo akosala lisukulu yango akotánga Yisaya 65:21-23. Ntango ozongeli moto, okoki kolobela makambo wana ya lisukulu mpe kobakisa boye: “Tiká nalakisa yo mapamboli mosusu oyo tokoki kozwa na nzela ya lisiko.” Na nsima, bótalela nkasa 4-5 ya buku Biblia eteyaka. To okoki koloba boye: “Bato mingi bamitunaka soki esakweli wana ya Yisaya ekokokisama ntango nini.” Na nsima, bótalela mokapo 9, paragrafe 1-3. To mpe okoki kaka kolobela makanisi oyo molobi alobaki, olakisi buku Biblia eteyaka, mpe omonisi ndenge boyekoli esalemaka.
6. Mabaku nini tokozala na yango ntango tokotosa etinda ya Yesu ya kokanisa liwa na ye?
6 Tiká mokomoko na biso aluka mabaku ya kosalisa bayekoli ya Biblia, basakoli oyo batiká kosakola, mpe bato mosusu oyo bakoyangana na Ekaniseli. (Luka 22:19) Na ntembe te, Yehova akopambola milende mingi oyo tokosala na mosala na biso ya Bokonzi.