Liyangani ya zongazonga ya mbala oyo

Nini ekoki kosalisa biso tótikala sembo liboso ya bato oyo batɛmɛlaka makasi losambo ya solo? Tokoki kosala nini mpo tólonga makambo oyo Satana azali kosala ntango nyonso mpo na koluka kozongisa biso na mokili oyo mabe? Liyangani ya zongazonga mpo na mobu ya mosala 2009 ekopesa biyano na mituna wana ya ntina mingi. Ezali na motó ya likambo: “Kobá kolonga mabe na kosaláká malamu.” (Lom. 12:21) Talá mwa makambo oyo ezali kozela biso na liyangani yango.

Mokɛngɛli ya etúká akosala Masukulu oyo elobi: “Zwá makasi ya kolonga mabe na kosaláká malamu,” “Kebá na ezaleli ya komityela motema koleka ndelo!,” “Nsuka ya makambo nyonso ya mabe ekómi pene!,” mpe “Tózala na kondima makasi mpo tólonga mokili.” Mokɛngɛli ya zongazonga akosala masukulu oyo elobi: “Oyo ezali ntango ya kolala mpɔngi te!,” euti na Baloma 13:​11-13, mpe “Kolɛmba nzoto te na mokɔlɔ ya mpasi,” euti na Masese 24:10. Tozali mpenza kozela na mposa makasi koyoka lisukulu ya mokɛngɛli ya zongazonga, oyo ezali na motó ya likambo: “Tótya likebi na bamposa ya zongazonga.” Lisukulu mosusu ya kolendisa mpenza ezali oyo ezali na motó ya likambo: “Okoki komipesa ‘na mosala yango ya ministre’ mpe kokóma mobongisi-nzela?” Na liyangani yango, tokolanda masukulu mibale ya biteni mingi. Ya liboso ezali na motó ya likambo: “Tɛmɛlá mayele mabe ya Zabolo.” Ekosalisa biso tóyeba mpe tókima mayele mabe oyo Zabolo azali kosalela na nzela ya bamasini oyo ezali kobima sika, masano, mpe kelasi. Lisukulu mosusu ya biteni mingi, oyo ezali na motó ya likambo: “Kobá kozwa nguya ya kotɛmɛla Satana na mikolo oyo ya mabe,” ekomonisa biso ndenge ya kosalela malamumalamu toli oyo ezali na Baefese 6:​10-18.

Soki tozali kosakola nsango ya Bokonzi, tokomonisa ete tozali kolonga moto oyo abimisaka makambo ya mabe. (Emon. 12:17) Na bongo, tokoki kokamwa te komona ete Satana azali ntango nyonso kobundisa Batatoli ya Yehova. (Yis. 43:​10, 12) Kasi, Zabolo akolonga biso ata moke te, mpamba te tozali na mokano ya ‘kokoba kolonga mabe na kosaláká malamu.’ Zwá bibongiseli libelalibela mpo ozala na liyangani ya zongazonga banda ebandeli tii nsuka mpe ozwela yango mpenza matomba.