Liyangani ya zongazonga ya mbala oyo

Yehova abongi kozwa nkembo. Ndenge nini topesaka Yehova nkembo? Mikakatano nini bato mosusu bakutanaka na yango na likambo yango? Baoyo bapesaka Nzambe nkembo lelo oyo bazwaka mapamboli nini? Liyangani ya zongazonga ya mbula ya mosala 2008 ekopesa biyano ya malamu na mituna wana. Motó ya likambo na yango elobi: “Bósalaka makambo nyonso mpo na nkembo ya Nzambe.” (1 Kol. 10:31) Tótalela ndambo ya makambo oyo ezali kozela biso na mikolo mibale wana, oyo tokoteyama mingi na elimo.

Mokɛngɛli ya etúká akosala masukulu oyo elobi: “Mpo na nini tosengeli kopesa Nzambe nkembo?” mpe “Zalá ndakisa na likambo etali kokokisa masɛngami ya Nzambe.” Akosala mpe lisukulu ya bato nyonso oyo elobi: “Banani bapesaka Nzambe nkembo?,” mpe lisukulu ya nsuka oyo elobi: “Ebele ya bato na mokili mobimba bazali kopesa Nzambe nkembo na bomoko.” Akotambwisa mpe Eteyelo ya mosala ya Teokrasi. Mokɛngɛli ya zongazonga akosala masukulu oyo elobi: “Sepelá na libaku ya komonisa nkembo ya Nzambe,” “Bamposa ya zongazonga,” mpe “Bókoba ‘kopikama makasi na kati ya solo,’” oyo ekouta na 2 Petelo 1:12. Lisusu, tokoyeba ndenge oyo “Mosala ya mobongisi-nzela epesaka Nzambe nkembo.” Ekozala mpe na masukulu mibale ya biteni minei, oyo ekolendisa biso mpenza. Lisukulu ya liboso ya biteni minei, oyo ezali na motó ya likambo: “Tópesa Nzambe nkembo na makambo nyonso ya bomoi na biso,” ekolimbola malamumalamu maloba epemami oyo ezali na 1 Bakolinti 10:31. Lisukulu mosusu ya biteni minei oyo ezali na motó ya likambo: “Tósala mosala mosantu mpo na lokumu ya Yehova,” ekolobela makambo ndenge na ndenge oyo etali losambo na biso. Tokolanda mpe lisolo mokuse na Linɔ́ngi ya Mosɛnzɛli mpe tokotalela mokapo ya mokolo ya lomingo. Batisimo mpe ekozala.

Bato mingi balingaka kondimela Nzambe te. Mingi batye makanisi na bango nyonso na mikano ya bato mpe bazwaka ntango te ya komanyola bonene ya Yehova. (Yoa. 5:44) Kasi, biso toyebi ete ezali na ntina mingi tózwaka ntango ya koluka koyeba ndenge ya “Kosala makambo nyonso mpo na nkembo ya Nzambe.” Salá makasi ozala na liyangani yango mpe olanda yango mobimba.