Liyangani ya mokolo moko ya mbala oyo

Liyangani ya mokolo moko ya mobu ya mosala 2009 ezali na motó ya likambo: ‘Taláká malamu mosala na yo ya ministre, mpo okokisa yango,’ euti na Bakolose 4:17. Lokola tozali baklisto, tozwaka likebisi wana na motuya mingi. Mokano na biso ezali ete tókokisa mosala na biso ya kosakola na bosembo mpenza ndenge Yesu asalaki. (Yoa. 17:14) Ntoma Paulo mpe apesi biso ndakisa malamu na likambo wana. Azalaki na mokano ya kosala mosala na ye tii na nsuka.​—⁠Mis. 20:⁠24.

Lisolo oyo mokɛngɛli ya zongazonga akosala ekomonisa ndenge basakoli mingi balongaka mikakatano na mosala ya kosakola. Na nsima lisukulu oyo elobi: “Kolisá mposa oyo olonaki” ekomonisa ndenge oyo tokoki mpenza kosalisa bato oyo bazali “na ezaleli oyo ebongi mpo na bomoi ya seko.” (Mis. 13:48) Lisolo ya liboso oyo molobi mopaya akosala ekolobela vɛrsɛ mokomoko ya 2 Bakolinti 6:​1-10, ekozala na motó ya likambo: “Ndenge oyo tomilobelaka lokola baministre.” Na nsima ya midi, akosala lisukulu oyo elobi: “Zwáká mosala na yo ya kosakola na motuya mingi.” Na ntembe te, tokolendisama mingi na lisukulu oyo elobi: “Bilenge mpe mikóló basepelaka na mosala ya kosakola” mpe mosusu oyo elobi “Bilenge oyo bakokisaka mosala ya kosakola.” Baoyo balingi kozwa batisimo mpo na komonisa ete bamipesi na Nzambe, basengeli koyebisa yango nokinoki epai ya mokɛngɛli-mokambi. Moko ya masolo ya ntina mingi oyo tolandaka na mayangani na biso ya mike to ya minene, ezali boyekoli ya Linɔ́ngi ya Mosɛnzɛli. Memá Linɔ́ngi ya Mosɛnzɛli oyo ebongisami mpo na pɔsɔ ya liyangani ya mokolo moko.

Kotala malamu mosala na biso ya kosakola elimboli ete tosengeli kosala makasi mpo makambo mosusu epekisa biso te kokokisa mosala oyo Yehova apesi biso. Makambo ya kolendisa oyo euti na Makomami, oyo tokoyoka na liyangani na biso ya mokolo moko ekosalisa biso tóyeba nini tosengeli kosala mpo na kotya mosala ya kosakola na esika ya liboso na bomoi na biso mpe makambo nini ekosalisa biso tókokisa mosala yango malamumalamu.