Biyano na mituna na bino

◼ Osengeli kosala nini soki balobi na yo otika kosakola na esika moko boye?

Na bisika mosusu, basakoli oyo bazalaki kosakola ndako na ndako to kokabola bazulunalo bakutanaki na bapolisi oyo bayebisaki bango ete bazali kobuka mobeko mpe balobaki na bango bátika kosakola. Soki okutani na likambo ya ndenge wana, kosala matata te, tosá mpe longwá mbala moko na esika yango. (Mat. 5:41; Flp. 4:5) Esengeli te oluka kosilisa likambo na ndenge na yo mpe koluka komonisa ete tozali na lotomo ya kosakola. Soki likoki ezali, kangá nimero ya makarɔ ya polisi yango mpe esika biro na bango ezali. Na nsima, yebisá bankulutu likambo yango mbala moko, mpe bango bakoyebisa biro ya filiale. Ndenge moko mpe, soki nkolo to mokɛngɛli ya esika to ya lopango moko oyo ezali na bandako ebele, na ndakisa etaje moko, asɛngi yo olongwa na esika yango, kosala motó makasi te; bimá mpe na nsima, yebisá bankulutu likambo yango. Kozala na boboto mpe na bonkonde epai ya moto oyo azali na bokonzi ekoki kobatela biso mpo tózwa te mikakatano mosusu ezangi ntina.​—Mas. 15:1; Rom. 12:18.