Kokanisa te ete okokoka te mpo ozalaka na ntango te
1. Mpo na nini basakoli mosusu bakakatanaka kotuna moto soki akosepela koyekola na bango Biblia?
1 Basakoli mosusu bakakatanaka kotuna moto soki akosepela koyekola na bango Biblia mpo bazalaka na ntango te. Koyekola na moto Biblia esɛngaka ntango. Esɛngaka ntango mpo na kobongisa boyekoli, kotambwisa yango mpe kosalisa moto oyo azali koyekola Biblia alonga mikakatano oyo ekoki kopekisa ye akola na elimo. Ntoma Paulo alobaki ete apesaki molimo na ye mpo na kosalisa bato ya Tesaloniki mpo báyeba Yehova. (1 Tes. 2:7, 8) Ndenge nini tokoki koyekola na moto Biblia atako tozalaka na ntango te?
2. Na ndenge nini bolingo na biso mpo na Yehova ekosalisa biso tóyeba kosalela ntango na biso?
2 Kosalela Yehova esɛngaka ntango: Likambo ya solo ezali ete kosalela Yehova esɛngaka ntango. Na ndakisa, esɛngaka ntango mpo na koyangana na makita mbala na mbala, kokende na mosala ya kosakola, kotánga Biblia mpe kobondela. Moto oyo abalá, ata soki azalaka na makambo mingi ya kosala, azwaka kaka ntango ya kolekisa ná molongani na ye. Tosengeli ‘kosomba ntango’ na esengo nyonso mpo na kosalela Yehova mpo tolingaka ye. (Ef. 5:15-17; 1 Yoa. 5:3) Na kolanda maloba ya Yesu, eteni monene ya losambo na biso ezali kokómisa bato bayokoli. (Mat. 28:19, 20) Soki tokanisi na ntina ya likambo yango, ekosalisa biso tokakatanaka te kondima mokumba ya koyekola na bato Biblia.
3. Ndenge nini tokoki kokoba koyekola na bato ata soki makambo ndenge na ndenge ebebisaka programɛ na biso ya kosakola?
3 Tokosala ndenge nini soki mosala, maladi ya ntango molai mpe mikumba na kati ya lisangá ezwi biso ntango nyonso? Basakoli mosusu oyo na bantango mosusu basengelaka kozala na mobembo bayekolaka na bato na nzela ya telefone to ya Internet. Basakoli oyo maladi ya ntango molai epekisaka bango bábima na mosala ya kosakola, babengisaka bayekoli na ndako mpo na koyekola. Basusu baponá basakoli mosusu oyo batyelaka motema báyekolaka na bato na bango Biblia soki bango bazali te.
4. Mapamboli nini tokozwa soki toyekolaka na bato Biblia?
4 Lokola Paulo apesaki ntango mpe makasi na ye mpo na kosalisa bato mosusu báyekola solo, yango ememelaki ye esengo mingi. (Mis. 20:35) Ntango akanisaki na ntina ya bato nyonso oyo asalisaki ntango azalaki na Tesaloniki, yango etindaki ye apesa Yehova matɔndi. (1 Tes. 1:2) Esengo na biso na mosala ya kosakola ekobakisama soki tozali te koboya koyekola na bato Biblia atako tozalaka na makambo mingi ya kosala.