“Yanganisá bato”
1. Bokokani nini ezali kati na mayangani ya etúká mpe mayangani oyo esangisaka bato ya mikili mingi ná liyangani ya ntina mingi oyo Bayisraele basalaki mwa moke nsima ya kobima na Ezipito?
1 Ntango Bayisraele babimaki na Ezipito, mwa moke na nsima, Yehova asɛngaki Moize ‘ayanganisa bato’ na Ngomba Sinai mpo na koyoka maloba ya Yehova, mpo bábanga ye mpe báteya bana na bango banzela na ye. (Mib. 4:10-13) Ezalaki mpenza ntango ya kolendisa kondima mpe oyo bakokaki kobosana yango te! Ndenge moko mpe, nsima ya mwa basanza, basaleli ya Yehova bakoyangana na mayangani ya etúká mpe mayangani oyo esangisaka bato ya mikili mingi mpo na koteyama na Yehova. Tosengeli kosala nini mpo tózwa mpenza matomba na mayangani yango?
2. Tosengeli kosala nini mpo na “komibongisa” mpo na liyangani na biso?
2 ‘Omibongisa’: Yehova ayebisaki Bayisraele ‘bámibongisa’ mpo na liyangani ya ntina mingi na Ngomba Sinai. (Kob. 19:10, 11) Ndenge moko mpe, esengeli moto nyonso amibongisa malamu mpo na liyangani. Komibongisa esuki kaka te na baoyo bakosala masolo. Na ndakisa, ekosɛnga ete bandeko mingi bázwa bibongiseli mpo na kosɛnga konje na mosala. Ntango mosusu mokakatano na yo ezali lokola oyo ya Nehemia. Azalaki na mposa ya kotika naino mosala na ye ya mopesi-masanga ya mokonzi Artazerezese mpo na kokende na Yerusaleme kopesa mabɔkɔ na mosala ya kotonga lisusu bifelo na yango; kasi ayebaki ete mbala mosusu mokonzi akopesa ye nzela te. Nehemia abondelaki mpe na nsima na mpiko nyonso, aponaki maloba oyo ebongi mpo na koyebisa mokonzi mposa na ye. Mokonzi apesaki ye nzela akende; kutu asungaki ye na mosala yango ya kotonga! (Neh. 2:1-9) Longola kosɛnga konje na mosala epai ya patrɔ na yo, osili kozwa bibongiseli mpo na mobembo mpe esika ya kolala? Bankulutu bakosepela kosalisa ndeko nyonso oyo azali na bosɛnga. Omibongisa mpo na kokóma na ngonga mikolo nyonso misato mpe ‘otyela makambo oyo okoyoka likebi mingi koleka.’—Ebr. 2:1.
3. Nini ekosalisa biso tóbongisa motema na biso mpo na liyangani?
3 Lolenge mosusu ya komibongisa ezali ya kobongisa motema na biso mpo na koyoka mpe koyekola. (Ezr. 7:10) Programɛ ya liyangani ekotyama mwa mikolo liboso na site jw.org mpe mitó ya makambo ya badiskur ekotyama elongo na vɛrsɛ moko to mibale oyo esimbi yango. Yango ekozala mpenza makambo ya malamu ya kotalela na losambo na biso na kati ya libota mwa bapɔsɔ liboso ya liyangani. Basakoli mosusu babimisaka programɛ yango na papye mpe basalelaka yango mpo na kokoma makanisi ya ntina na liyangani.
4. Ndenge nini baboti bakoki kosalela liyangani mpo na koteya bana na bango?
4 ‘Teyá bana na yo’: Moko ya mikano ya liyangani oyo esalemaki na Ngomba Sinai ezalaki mpo baboti ya Yisraele “báteya bana na bango.” (Mib. 4:10) Liyangani mpe epesaka baboti libaku moko ya malamu mpenza ya koteya bana na bango. Baboti basengeli kofanda esika moko na bana na bango na boumeli ya mikolo nyonso misato mpe kosalisa bango bálanda na likebi. Na nsuka ya mokolo mokomoko mpe nsima ya mikolo, bakoki kolobela elongo makambo ya liyangani na losambo na bango na kati ya libota.
5. Matomba nini tokozwa soki toyangani na liyangani oyo ezali koya?
5 Liyangani ya ntina mingi oyo esalemaki na Ngomba Sinai esalisaki Bayisraele bázwa na motuya libaku malamu oyo bazalaki na yango ya kozala basaleli ya Nzambe. (Mib. 4:7, 8) Liyangani na biso oyo ezali koya mpe ebongisami mpo na kosalisa biso ndenge wana. Na boumeli ya mikolo misato, tokozala na libaku ya kokabwana na mokili mabe ya Satana mpe kozwa libɔndisi na paradiso na biso ya elimo na kati ya libota ya bandeko. (Yis. 35:7-9) Lokola mokolo ya Yehova ezali se kokóma pene, tóbosanaka te libaku oyo tozalaka na yango ya koyangana elongo mpo na kolendisana!—Ebr. 10:24, 25.