Namonanaka moto ya ndenge nini na miso ya Yehova?
1. Na ndenge nini Biblia ezali lokola talatala?
1 Mbala boni omitalaka na talatala? Mingi na biso tosalaka yango mokolo na mokolo, mpo esalisaka biso tómona bisika oyo tosengeli kobongisa. Biblia ezali lokola talatala. Kotánga Liloba ya Nzambe esalisaka biso tómona bomoto na biso ya kati, bomoto oyo Yehova amonaka. (1 Sa. 16:7; Yak. 1:22-24) Liloba ya Nzambe ekoki “kososola makanisi mpe mikano ya motema.” (Ebr. 4:12) Ndenge nini kotánga Biblia mpe komanyola yango mokolo na mokolo esalisaka biso tómona bisika oyo tosengeli kobongisa mpo tókóma bapalanganisi ya nsango malamu oyo bakokisaka malamu mosala na bango?—Nz. 1:1-3.
2. Ndenge nini Biblia ekoki kosalisa biso tómitalela?
2 Saleláká Biblia lokola talatala: Masolo ya Biblia oyo elobeli basaleli ya sembo ya Yehova eteyaka biso bizaleli oyo esepelisaka ye. Na ndakisa, Davidi amonisaki molende mpo na nkombo ya Nzambe. (1 Sa. 17:45, 46) Na mpiko nyonso, Yisaya andimaki kosakola na teritware moko ya mpasi. (Yis. 6:8, 9) Bolingo makasi oyo Yesu azalaki na yango mpo na Tata na ye ya likoló etindaki ye asepela mingi na mosala ya kosakola, na esika ya kotalela yango lokola mokumba ya kilo. (Yoa. 4:34) Bakristo ya liboso bazalaki kosakola na molende, batyelaki Yehova motema mpe bazalaki na ekateli ya kokoba kosakola. (Mis. 5:41, 42; 2 Ko. 4:1; 2 Tim. 4:17) Komanyola na bandakisa wana esalisaka biso tómitalela mpo tóbongisa lolenge na biso ya kokokisa mosala na biso mosantu.
3. Mpo na nini tosengeli kosala mbongwana oyo esengeli kozanga koumela?
3 Salá mbongwana oyo esengeli: Na ntembe te, ekozala na ntina te komitala na talatala mpe kozanga kobongisa esika oyo esengeli. Tosengeli kosɛnga Yehova asalisa biso tómitalela na bosembo mpenza mpe tósala mbongwana oyo esengeli. (Nz. 139:23, 24; Luka 11:13) Lokola ntango oyo etikali ekómi mokuse mpe bomoi ya bato ezali na likama, tosengeli kosala mbongwana oyo esengeli kozanga koumela.—1 Ko. 7:29; 1 Tim. 4:16.
4. Nini ekómelaka moto oyo atalatalaka na Liloba ya Nzambe mpe asalelaka makambo oyo amonaka?
4 Bomoto ya kati, oyo Yehova atalaka, ezali na ntina mingi koleka ndenge oyo tomonanaka na libándá. (1 Pe. 3:3, 4) Nini ekómelaka moto oyo atalatalaka na Liloba ya Nzambe mpe asalelaka makambo oyo amonaka? ‘Akómaka moyoki oyo abosanaka te, kasi moto oyo azali kosala mosala mpe akozala na esengo ndenge azali kosalela yango.’ (Yak. 1:25) Ya solo, tokozala na esengo mpe tokokóma basakoli oyo babongi mpamba te, “lokola talatala, tozali kongɛngisa nkembo ya Yehova.”—2 Ko. 3:18.