Salelá malamumalamu makambo oyo ezali na buku Biblia eteyaka

Ntango moyekoli ya Biblia azali koyekola makambo oyo Biblia eteyaka mpenza mpe kosalela yango, akokola mpe akobota mbuma na elimo. (Nz. 1:1-3) Tokoki kosalisa moto oyo toyekolaka na ye Biblia akende liboso soki tozali kosalela malamu makambo mosusu oyo ezali na buku Biblia eteyaka.

Mituna ya ebandeli: Mokapo mokomoko ebandaka na mituna oyo biyano na yango ezali na kati ya lisolo. Okoki kotuna mituna yango mpo na kopesa moyekoli mposa ya kolanda lisolo, kasi kozela eyano te. To okoki kosɛnga ye apesa likanisi ya mokuse na motuna mokomoko. Soki apesi likanisi ya malamu te, ezali na ntina te osembola ye na ntango wana. Maloba na ye ekosalisa yo oyeba bisika oyo osengeli konyata mpe kobenda likebi na ye.​—Mas. 16:23; 18:13.

Apɛndisi: Soki moyekoli akangi ntina mpe andimi makambo oyo ezali na paragrafe, okoki kaka kolendisa ye atánga ye moko apɛndisi oyo eyokani na liteya yango. Na boyekoli ya mbala ekoya, okoki kozwa mwa miniti mpo na kotala soki akangi ntina na yango to te. Nzokande, soki olingi ete apɛndisi esalisa ye mpenza, osengeli kozwa mwa miniti na ntango ya boyekoli mpo na kolobela yango to kotánga mwa baparagrafe na yango mpe kotuna mituna oyo obongisaki liboso.

Etanda ya bozongeli: Etanda ya bozongeli na nsuka ya mokapo mokomoko ezali na maloba oyo epesi eyano na mituna ya ebandeli. Okoki kosalela etanda ya bozongeli mpo na komindimisa ete moyekoli ya Biblia akangi ntina mpe akoki kolimbola makambo ya ntina. Bótánga yango na mongongo makasi ná bavɛrsɛ oyo etyami wana. Na nsima, sɛngá moyekoli ya Biblia asalela vɛrsɛ to bavɛrsɛ mpo na komonisa ete makambo yango ezali solo.​—Mis. 17:2, 3.