Salá ete boyekoli na yo moko ememela yo matomba mingi

MPO NA NINI EZALI NA NTINA: Koyekola Liloba ya Nzambe esalisaka biso ‘tósosola bonene mpe bolai mpe bosanda mpe bozindo’ ya solo. (Ef 3:18) Esalisaka biso mpe tózala na mbeba te mpe na litɔnɔ te na kati ya mokili oyo mabe mpe tókoba “kokangama makasi na liloba ya bomoi.” (Flp 2:15, 16) Koyekola Liloba ya Nzambe esalisaka mokomoko na biso apona bisaleli oyo ebongi na ye. Tokoki kosala nini mpo tózwa matomba mpenza ntango tozali kotánga mpe koyekola Biblia?

NDENGE YA KOSALA YANGO:

• Tyáká langi na bavɛrsɛ mpe tyáká mwa banɔti pembeni na Biblia na yo ya boyekoli; ezala ya papye to na aparɛyi na yo

• Ntango ozali kotánga Liloba ya Nzambe, omituna boye: ‘Nani? Nini? Ntango nini? Wapi? Mpo na nini? Ndenge nini?’

• Lukáká koyeba makambo nyonso. Saleláká bisaleli ya bolukiluki oyo ezali; lukáká na kolanda motó ya likambo to vɛrsɛ ya Biblia

• Manyoláká na makambo ozali kotánga mpo omona soki yango etali yo na nini

• Saleláká makambo oyo ozali koyekola na bomoi na yo ya mokolo na mokolo.​—Lk 6:47, 48

TALÁ VIDEO KANGAMÁ “MAKASI” NA LILOBA​—YEKOLÁKÁ MALAMU YO MOKO, NA NSIMA YANOLÁ NA MITUNA OYO:

• Ndenge nini bamosusu balobeli boyekoli ya bango moko?

• Mpo na nini tosengeli kobanda na libondeli liboso ya koyekola biso moko?

• Nini ekoki kosalisa biso tókanga ntina ya vɛrsɛ moko malamumalamu?

• Bilembo ya ndenge nini tokoki kotya na Biblia na biso ya boyekoli?

• Mpo na nini komanyola ezali na ntina ntango tozali koyekola Liloba ya Nzambe?

• Tosengeli kosala nini na makambo oyo toyekoli?