Tókóma baninga ya Yehova
1. Likambo nini ndeko mwasi moko amonaki na oyo etali makambo ya elimo oyo amesanaki kosala?
1 Ndeko mwasi moko moklisto alobaki boye: “Na mbula soki 20 oyo nasali na lisangá, nyonso nasalaka ezali kaka koyangana na makita mpe kobima na mosala ya kosakola.” Kasi, abakisaki boye: “Nayebi sikoyo ete atako makita mpe mosala ya kosakola ezali na ntina, kaka yango te nde ekoki kosalisa ngai na ntango ya mikakatano. . . . Namoni ete nasengeli kobongola makanisi oyo nazalaki na yango mpe kobanda koyekola ngai moko na mozindo mpo nakoka mpenza koyeba Yehova, kolinga ye mpe kozala na botɔndi mpo na oyo Mwana na ye apesi biso.”
2. Mpo na nini ezali na ntina mingi ete tókóma baninga ya Yehova?
2 Mpo na kozala na boyokani malamu mpenza na Yehova esɛngaka kosala milende. Longola kozala na momeseno ya kosala makambo oyo esɛngami na baklisto, esɛngaka mpe kosala makambo mosusu. Soki tozali lisusu kobondela Yehova mbala na mbala te, nsukansuka tokoki komona ye lokola moto oyo tozalaki na ye boninga makasi kasi sikoyo tosololaka na ye lisusu te. (Emon. 2:4) Tótala sikoyo ndenge oyo koyekola Biblia biso moko mpe kobondela ekoki kosalisa biso tókóma baninga ya Yehova.—Nz. 25:14.
3. Ndenge nini tosengeli koyekolaka biso moko mpo ete tópusana penepene na Nzambe?
3 Kobondela mpe komanyola ezali na ntina mingi: Mpo tóleisa motema na biso ntango tozali koyekola biso moko, tosengeli kosuka kaka te na kotya mikɔlɔtɔ na makanisi ya ntina oyo tomoni na lisolo oyo tozali koyekola mpe na kotánga bavɛrsɛ oyo maloba na yango etyami te na lisolo yango. Koyekola Biblia biso moko esɛngaka ete tókanisaka na makambo lisolo oyo tozali koyekola ezali komonisa biso na ntina na banzela ya Yehova, na mitinda mpe na bizaleli na ye. (Ex. 33:13) Soki tokangi ntina ya makambo ya elimo, yango esimbaka mitema na biso mpe etindaka biso tókanisa mpo na bomoi na biso. (Nz. 119:35, 111) Ntango tozali koyekola Biblia biso moko, tosengeli kosala yango mpo tópusana penepene na Yehova. (Yak. 4:8) Mpo na koyekola malamumalamu, esɛngaka kobongisa ntango mpe esika oyo ebongi; lisusu, kozala na momeseno ya koyekola esɛngaka koboya makambo mosusu. (Dan. 6:10) Ata soki ozalaka na misala ebele ya kosala, omibombelaka ntango mokolo na mokolo mpo na komanyola likoló ya bizaleli kitoko ya Yehova?—Nz. 119:147, 148; 143:5.
4. Ndenge nini kobondela liboso ya kobanda koyekola biso moko esalisaka biso tókóma baninga ya Yehova?
4 Mpo ete tózwa matomba ntango tozali koyekola biso moko, ezali mpe na ntina mingi ete tósalaka mabondeli oyo euti mpenza na motema. Mpo solo oyo ezali na Biblia esimba mitema na biso mpe etinda biso na ‘kosalela Nzambe mosala mosantu na ezaleli ya kobanga Nzambe mpe nsɔmɔ,’ tozali na mposa ya elimo santu na ye. (Ebe. 12:28) Yango wana, mbala nyonso oyo tolingi koyekola, tosengeli naino kobondela Yehova apesa biso elimo na ye. (Mat. 5:3) Ntango tozali komanyola likoló ya Makomami mpe tozali kosalela mikanda oyo ebongiseli ya Yehova epesi biso, tozali kofungwela Yehova mitema na biso. (Nz. 62:8) Koyekola ndenge wana ezali lolenge moko ya kosambela Yehova, oyo tozali komonisa ete tokangami na ye mpe tozali kokómisa boninga na biso na ye makasi.—Yuda 20, 21.
5. Mpo na nini ezali na ntina mingi ete tómanyolaka likoló ya Liloba ya Nzambe mokolo na mokolo?
5 Se ndenge tosalaka na bato nyonso oyo toyokanaka na bango, tosengeli mpe, na bomoi na biso mobimba, kobatelaka boyokani na biso na Yehova mpo ezalaka ntango nyonso makasi. Yango wana, tiká ete tósombaka ntango mokolo na mokolo mpo na kopusana penepene na Nzambe; lokola toyebi, ye mpe akopusana penepene na biso.—Nz. 1:2, 3; Ef. 5:15, 16.