Kolanda programɛ ya liyangani ya etúká na nzela ya TV to ya radio

Liyangani ya etúka ya 2020 etiki nsango mpo ezali mbala ya liboso na mokili mobimba bato bálanda yango na TV to na radio mpe etyama na site Internet! Kasi, na Malawi mpe na Mozambique, bandeko mingi balandaki programɛ ya liyangani na nzela ya Internet te. Ndenge nini esalemaki?

Na kokesana na bisika mosusu, Komite ya Bakambi mpe Komite ya Mateya ya Lisangani ya Mikóló-Bakambi epesaki nzela bálekisa programɛ ya liyangani na bashɛni ya TV mpe ya radio na Malawi mpe na Mozambique. Mpo na nini bapesaki nzela básala bongo? Na Malawi, Internet ezalaka ntalo mingi koleka na mokili, mpe Batatoli ya Yehova moke nde bakoki kosalela Internet. Ndenge William Chumbi, ndeko moko ya Komite ya Filiale amonisi yango: “Radio mpe televizyo ezalaki nzela kaka moko oyo bandeko bakokaki kolanda programɛ ya liyangani.” Luka Sibeko, oyo azali mpe ndeko ya Komite ya Filiale na Malawi, abakisi boye: “Soki tozalaká te na likoki ya kolanda programɛ na nzela ya TV mpe ya radio, kaka bandeko moke na filiale na biso nde bakokaki kolanda programɛ yango mpe kozwela yango matomba.” Na Mozambique mpe, bandeko moke nde bazalaki na likoki ya kosomba baaparɛyi oyo ebongi, kozanga kolobela Internet yango moko.

Kobongisa makambo

Mpo na maladi mabe ya coronavirus, bashɛni ya televizyo mpe ya radio esí ebandaki kolekisa programɛ ya makita ya lisangá.a Na yango, bandeko na biso basɛngaki na bashɛni yango ebakisa bangonga mosusu mpo na kolakisa programɛ ya liyangani.

Na Malawi, bandeko na biso bakutanaki na mokakatano moko. Mbala mingi, bashɛni ya televizyo mpe ya radio epesaka bato ngonga kaka moko mpo na kokokisa bosɛnga na bango, mpo babangaka ete bato bálɛmba soki programɛ ezali molai mingi. Kasi bandeko balimbwelaki bango ete mosala na biso ezali mosala oyo etali bato nyonso. Ata na ntango oyo ya maladi mabe, tozali kopesa mateya oyo ezali kouta na Biblia, mpe yango ezali kosalisa bango bázala bato malamu mpe bázala na bomoi ya libota ya esengo. Ntango bankolo bashɛni yango bayokaki bongo, babakiselaki biso ngonga mosusu.

Na Malawi, bato balandaki programɛ ya liyangani ya etúká na nzela ya shɛni moko ya televizyo mpe shɛni moko ya radio, mpe bamilio ya bato balandaki programɛ yango kaka na bashɛni wana mibale. Na Mozambique, bandeko balandaki programɛ ya liyangani ya etúká na nzela ya shɛni ya televizyo mpe na nzela ya bashɛni 85 ya radio.

Na bikólo wana nyonso mibale, ndenge balekisaki programɛ yango na bashɛni ya televizyo ezwaki dolare 28 227b mpe ezwaki dolare 20 000 na nzela ya bashɛni ya radio. Bashɛni yango ya radio ezalaki kosɛnga dolare kobanda na 15 mpo na shɛni ya radio tii na 2 777 mpo na shɛni ya ekólo mobimba.

Bandeko na biso basalaki makasi mpo na kosalela malamu mbongo ya makabo. Na Malawi, na ndakisa, bandeko basololaki na bankolo bashɛni yango mpo bákitisa mwa moke mbongo oyo bazalaki kosɛnga, balongolaki 30% ya mbongo oyo basengelaki kofuta. Yango esalaki ete bandeko bábatela dolare 1 711. Na Mozambique, bashɛni mosusu endimaki kokitisa motángo ya mbongo mpo Batatoli ya Yehova bazalaka na etamboli malamu, bazalaka sembo mpe bafutaka malamu.

Maloba ya botɔndi

Bandeko na biso bazalaki na esengo ya kolanda liyangani na nzela ya radio to televizyo. Patrick, nkulutu moko na Malawi, alobi boye: “Tozali kopesa bandeko ya Lisangani ya Mikóló-Bakambi matɔndi mpo na ezaleli na bango ya komitya na esika ya basusu na eleko ya maladi mabe oyo.” Isaac, ndeko moko kaka na Malawi, alobi boye: “Tozali kaka na radio, kasi tozali na aparɛyi mosusu te. Yango wana, tozali kopesa matɔndi na ebongiseli ya Yehova na ndenge epesi biso likoki ya kolanda programɛ ya liyangani na nzela ya radio. Na nzela ya ebongiseli oyo, libota na ngai mobimba ezalaki na likoki ya kozwa matomba na programɛ ya liyangani ya etúká. Tomonaki yango lokola elembo oyo emonisi ete Yehova alingaka bato na ye.”

Liyangani ya etúká ya 2020 ezalaki liyangani ya liboso oyo mosakoli moko na Mozambique ayanganaki. Alobi boye: “Bibongiseli nyonso oyo ezwamaki mpo na kolanda liyangani oyo ekundweli ngai ete Yehova azali Nzambe Mozwi-ya-Nguya-Nyonso. Maladi oyo ya mabe epekisaki Yehova te mpo apesa biso mateya na ye mpe nalandaki yango na ndako na ngai moko. Namonaki elembo oyo emonisi ete Batatoli ya Yehova balinganaka mpenza. Nandimi ete oyo ezali lingomba ya solo.”

Nkulutu moko na nkombo Wyson alobi boye: “Nazali kopesa moombo ya sembo matɔndi ndenge azali kotyela biso likebi na eleko oyo ya maladi mabe. Ebongiseli oyo azwaki ya kolekisa programɛ ya liyangani na nzela ya radio mpe ya TV esalisi mingi na biso oyo tozali kobunda na mokakatano ya mbongo tólanda yango mpe tózwela yango matomba.”

Mpo na liyangani ya etúká ya 2021, Komite ya Bakambi mpe Komite ya Mateya epesaki nzela mpo programɛ ya liyangani eleka na bashɛni ya televizyo mpe ya radio na bamboka oyo eponamaki. Mbongo ekouta wapi mpo na kolekisa programɛ ya liyangani na ndenge wana? Na nzela ya makabo oyo epesamaka mpo na kosunga mosala ya kosakola na mokili mobimba, oyo bato mingi bapesaka na nzela ya donate.jw.org. Tozali kopesa yo matɔndi mpo na makabo na yo ya bolingo.