Tólóna bosepeli na ntango ya bozongeli ya sika

¹ Mosala ya kosakola ekokanisami mpenza na mosala ya kolóna bilanga, mpe bozongeli ya sika ekokanisama na komwangisa mai. (Mat 13:23; Luka 10:2; 1 Kol. 9:10) Biso baoyo “tozali basalani elongo na Nzambe”, tozali na mokumba ya kobatela mbóto nyonso oyo elónami sika ete ekóla mpe ebota mbuma. (1 Kol 3:6, 9) Lolenge nini kosala oyo ekoki na biso na likambo yango?

² Tózala pene ya kozongela nokinoki baoyo nyonso bamonisaki bosepeli. Tótalela lisusu banoti na biso ya ndako na ndako mpe tózwa ekateli mpo na koyeba baoyo tokokende kotala mpe makambo nini toyebisaki bango. Lisoló ekotalela mingimingi makambo oyo tolobelaki na mbala eleki. Tólimbola makambo kozanga kokakatana, tótya na elimo na biso makanisi mosusu ya Biblia oyo tokoki kokɔtisa na lisoló. Ezali ntango nyonso malamu kosalela Biblia, mpamba te yango ezali na nguya ya kosimba motema.​—Eb 4:12.

³ Soki totikaki mwa búku “Nzambe azali mpenza komibanzabanza mpo na biso?,” tokoki kolaba ete:

◼“Bato mingi bakanisaka mpenza ete Nzambe akobebisa mabelé, nzokande basusu babangaka na kokanisáká ete moto ye moko nde akobebisa yango. Okanisi nini mpo na yango? [Tiká ete moto yango ayanola.] Biblia ezali koyebisa biso ete na esika ya kobebisa mabelé, Nzambe akolongola nde likoló na yango bokɛsɛnɛ mpe akokómisa yango esika ya kimya mpe ya libateli.” Tóbenda likebi likoló na lokasa 22 mpe tótánga Masese 2:21, 22 oyo epesami. Soki moto yango amonisi bosepeli, tólakisa ye lolenge nini boyekoli ya Biblia esalemaka, to tólakisa ye bazulunalo ya sika mpe tózwa bibongiseli mpo na bozongeli ya sika oyo na boumeli na yango tokolobela mokili ya sika oyo Nzambe alaki.

⁴ Soki totikaki mwa búku “Tala”, tokoki koloba ete:

◼“Ntango nayaki mbala eleki, totángaki kati na Biblia elaka ya Nzambe oyo etali kobongola mabelé ete mákóma paladiso lokola oyo emonisamaka na likoló ya ezipeli ya mwa búku oyo natikelaki yo. Tokoki kosepela na makambo kitoko wana nyonso na koyekoláká mokano ya Nzambe mpe kondima bopusi na yango likoló na bomoi na biso.” Tótánga Yoane 17:3, na nsima tófungola mwa búku yango na baparagrafe 53, lokasa 27. Tólimbola na mokuse mpo na nini ezali na ntina ete tózala na boyebi ya sikisiki ya Liloba ya Nzambe.

⁵ Nsima ya kotika mwa búku “But de la vie” na moto oyo amipesá mingi na makambo ya losambo, tokoki komona mbala mosusu malamu koloba boye:

◼“Na ntembe te, osilaki kozongela mbala mingi losambo ya Tata wa biso. Okanisaka na nini na ntango ozali kosɛnga na Nzambe ete Bokonzi na ye eya?” Nsima na eyano ya molobani na biso, tófungola mwa búku yango na baparagrafe 8 mpe 9 na lokasa 26, mpe tótánga Danyele 2:44. Tokoki mbala mosusu kolanda lisoló na komonisáká ete koya ya Bokonzi ya Nzambe ekolimbola nsuka ya mabe mpe ya mpasi. Tólobela mingi likambo oyo ete soki tozali sembo na miso ya Nzambe, tokokoka kosepela na bomoi ya seko kati na Paladiso awa na mabelé.

⁶ Tómikundola ete tokoki kozongela lisusu moto nyonso oyo ayokaki biso, ata soki totikaki mokanda to totikaki yango te. Tósala milende ya komibombela ntango mpo na kosala bozongeli ya sika pɔsɔ na pɔsɔ. Yehova akopambola milende oyo tozali kosala mpo na kokólisa bosepeli oyo bato bazali komonisa. Tiká ete yango ebota mbuma mpo na lokumu na ye!​—Yoane 15:8.