Baboti oyo bazali kosepela!

¹ Mpo na bino baoyo bozali bilenge mpe baoyo bozali kofanda kati na libota ya boklisto, ezali na lolenge moko ya sikisiki oyo bokoki kosala mpo ete baboti na bino bázala na esengo. Soki bozali kotambola kati na boyengebene, ‘batata na bino mpe bamama na bino bakosepela.’ (Mas. 23:22-25) Baboti balingaka mpenza ete bózala malamu. Eloko oyo ekosepelisa bango mingi ezali bongo komona bino komipesa na solo mpe kopesa bomoi na bino epai na Yehova.

² Oyo nde likambo malamu kozala na baboti oyo bazali baklisto! Uta kobotama na bino, bazali koleisa bino, kolatisa bino, kofandisa bino na ndako mpe kobatela kolɔngɔ́nɔ́ na bino ya nzoto. Likambo ya ntina koleka, bazali kosala makasi mpo ete bóyeba Yehova mpe bóyeba misala na ye ya sembo; kobongisama wana ekoki kopesa bino bomoi ya seko. (Ef. 6:1-4) Lolenge nini bokoki komonisa botɔ́ndi?

³ Bómipesa na solo: Baboti na bino basalaki makasi mpo na kosalisa bino ete bókamata solo na lisɛki te, ete bókóla na elimo mpe ete bókangama na lisangá ya Yehova. Bokoki komonisa botɔ́ndi na kozaláká na bosepeli mpenza mpo na boyekoli ya libota. Bómonisa mposa ya koyangana na makita, bózala na momeseno ya komibongisaka mpo ete libota likómaka na ntango malamu na makita. Bófandaka pembeni na baboti na bino mpe bótyaka likebi; bólanda makambo bazali koteya na mikanda oyo mizali kotalelama. Bósala makasi na kopesa biyano. Bózala banakelasi ya malamu na Eteyelo ya mosala ya Teokrasi, bóndimaka badevuare oyo bazali kopesa bino mpe bóbongisaka yango malamu. Na Ndako ya Bokonzi, bópesaka mabɔkɔ na misala ndenge na ndenge oyo mizali kosalema. Na kosaláká bongo, bokobatela makanisi na bino likoló na makambo oyo mazali na litomba mpo na ezaleli na bino ya elimo.

⁴ Bómityela mikano mokemoke. Bósuka te bobele na bosangani ya likolólikoló na mosala ya kosakola; bókólisa mposa ya kokóma basakoli oyo babongi. Bólanda manáka ya botángi ya Biblia pɔ́sɔ na pɔ́sɔ, to mpe bótánga yango na mobimba engebene manáka ya moto na moto. Bómityela mokano ya kokokisa masɛngami mpo na komipesa epai na Nzambe mpe kozwa batisimo. Baboti na bino bakoki kosalisa bino malamu mpo na koyeba kelasi nini bokoki kotánga mpo na kozwa kobongisama oyo ekopesa bino nzela ya kosalela mpenzampenza Yehova. Bóluka kozala na lokumu malamu oyo ekopesa bino likoki ya kozwa mikumba minene, na ndakisa mosala ya mobongisi-nzela to mosala ya Betele. (Mis. 16:1, 2) Bómityela mikano ya ‘komikɔtisela makambo maleki ntina, mpo ete . . . bótonda na mbuma ya boyengebene.’​—Filp. 1:10, 11, NW.

⁵ Bolenge ezali eleko oyo bosengeli kolakisama, kozwa eksperiansi mpe koyekola lolenge ya kofanda elongo na bato. Ezali eleko oyo bokoki kosepela na bomoi liboso ete mitungisi mpe mikumba ya bokóló eya. Salomo alobaki ete: “Elenge, sepelá na bolenge na yo mpe tiká ete motema na yo esepelisa yo na mikolo na bolenge na yo.” (Mos. 11:9) Soki bozwi ekateli ya kosalela Yehova na bolenge na bino, bokozwa mapamboli ya seko.​—1 Nt. 28:9.

⁶ Soki ‘bolandi boyengebene’ na esika ya kolanda ‘bamposa ya bolenge,’ baboti na bino bakozala na mawa te mpe na mitungisi na motema te. (2 Tim. 2:22) Motema na bino moko ekozala na bantina ya kosepela. (Mas. 12:25) Oyo eleki mpenza ntina, bokosepelisa Mozalisi na bino, Yehova Nzambe.​—Mas. 27:11.