Bibele babakisami
1 Lokola na ekeke ya liboso, lisangá ya boklisto ezali lelo kokola na lolenge ya kokamwa. (Mis. 2:41; 4:4) Na mobu moleki, bayekoli ya sika 366 579 bazwaki batisimo, to koleka mwayene ya batisimo 1 000 na mokolo! Koleka milió moko ya bato bazwaki batisimo na boumeli ya mibu misato miuti koleka. Ya solo, Yehova azali kokoba kobakisa bibele ya bandimi.—Mis. 5:14.
2 Ebele ya bato ya sika, oyo bazali na eksperiansi mingi te na bomoi ya boklisto, bazali na mposa ya lisungi mpe kobongisama na baoyo bazali makasi kati na kondima. (Mis. 15:1) Kati na baklisto ya liboso, bamoko balóngaki te ‘kokola kino kotela,’ ata mbula mingi nsima ya batisimo na bango. (Ebe. 5:12; 6:1) Yango wana Paulo kati na mokanda na ye epai na Baebele, alobeli mingi makambo oyo baklisto basengeli kosala mpo na kokola na elimo. Makambo yango mazali nini, mpe lisungi nini ekoki kopesama?
3 Kokóma na momeseno malamu ya boyekoli: Na boyokani na mateya ya Paulo, mpo na kozala moyekoli malamu esengeli koyekola ntango nyonso, kozongela makambo oyo ozali koyekola mpe kosalela “bilei makasi” oyo lisangá ya Yehova ezali kopesa. (Ebe. 5:13, 14; talá Linɔ́ngi ya Mosɛnzɛli 15 Augústo 1993, nkasa 12-17.) Kosololáká makambo ya elimo na bato ya sika mpe kokaboláká na bango biloko ya motuya ya solo oyo tozwaki na boyekoli ya biso moko, na ntembe te tokopesa bango mposa ya kokóma na momeseno malamu ya boyekoli. Ntango na ntango, tokoki mbala mosusu kobyanga moto moko ya sika ete asangana na boyekoli ya biso moko to ya libota na biso.
4 Koyangana mbala na mbala na makita: Ndakisa ya bosembo na biso mpe maloba na biso ya kolendisa oyo elobami na bolingo ekosalisa basangani ya sika ya lisangá ete bákeba na likambo mosusu oyo Paulo alobaki: “Momeseno” oyo basusu bazalaka na yango ya kozangisa makita ya boklisto. (Ebe. 10:24, 25) Tósalisa bango na koyeba ete makita ezali nzela ya elimo oyo ekoyokanisa bango na lisangá. Tósala na boye ete bámiyoka ete bandimami kati na bandeko.
5 Kosolola na Yehova na kondimisama ete akoyoka biso: Mpo na kolónga bolɛmbu ya nzoto mpe mabunga ya bomoto na biso, tosengeli koluka lisalisi ya Yehova kati na libondeli, na koyebisáká ye makanisi na biso ya nsé ya motema mpe mitungisi na biso ya motema. Bato ya sika basengeli koyeba ete ntango bazali kolɔmba Yehova ete asalisa bango, lokola Paulo azali kolendisa biso na kosala yango, basengeli kolemba te. (Ebe. 4:15, 16; 10:22) Na koyebisáká bango makambo oyo biso moko tokutanaki na yango, tokolendisa kondima na bango ete Yehova ayokaka mabondeli oyo mauti na nsé ya motema.
6 Kobomba ntango mpo na mosala ya kosakola: Paulo amonisaki mpe lisusu ete ‘na kotombweláká Nzambe mbeka na masanzoli ntango nyonso’ tozali komikomisa makasi na elimo. (Ebe. 13:15) Tokoki kosɛnga na mosakoli ya sika ete asangana na biso na manáka na biso ya mosala ya kosakola ya pɔ́sɔ na pɔ́sɔ, boye te? Mbala mosusu tokoki kobongisa elongo lolenge ya kolakisa nsango malamu to kotalela motindo moko ya mosala oyo ye azwi naino eksperiansi na yango te.
7 Bibele oyo babakisami bazali kopesa esengo. Na komipesáká mpo na kobongisa mpe kolendisa basangani ya sika ya lisangá, tokosalisa bango ete bámitongela kondima moko makasi, oyo esɛngisami mpo na “kobatela molimo na bomoi.”—Ebe. 3:12, 13; 10:39.