Biblia eteyaka​—Buku ya liboso mpo na koyekola na bato Biblia

¹ Tosepelaki mingi ntango bayebisaki biso ete buku Biblia eteyaka mpenza nini? ebimi, na liyangani ya etúká “Botosi oyo esepelisaka Nzambe”! Bayangani basepelaki ntango bazwaki buku yango na nsuka ya programɛ ya mokolo ya pɔsɔ. Ndenge nini tokosalela buku ya sika mpo na koteya bato? Ezali buku ya liboso oyo tokobanda kosalela mpo koyekola na bato Biblia. Atako tokolakisa mpo na mbala ya liboso buku yango ya sika na sanza ya Marsi, basakoli balendisami na kobanda kosalela yango mbala moko mpo na kobanda mpe kokoba koyekola na bato Biblia.

² Bato oyo bazali koyekola Biblia sikoyo: Basakoli oyo bazali koyekola na bato Biblia na buku Boyebi to mwa buku Azali kosɛnga basengeli kozala na bososoli mpo na koyeba ndenge nini mpe ntango nini bakoki kobanda koyekola na bango buku ya sika. Soki bobandi koyekola na moto sika, okoki kobanda koyekola buku ya sika elongo na ye banda na mokapo ya liboso. Soki bokómi mosika na buku Boyebi, bokoki kokoba na mokapo oyo ekokani na oyo bokómi, na buku Biblia eteyaka. Soki bokómi pene na kosilisa buku Boyebi, mbala mosusu bokomona malamu bósilisa yango.

³ Na ntembe te, biso nyonso toyebi bato mingi oyo bakosepela koyekola buku Biblia eteyaka. Mpo na nini te kosalisa mokomoko na bango ayekola Biblia mokemoke na buku oyo ya sika? Na ndakisa, bato oyo basilisá koyekola mwa buku Azali kosɛnga to buku Boyebi kasi bakolaki na elimo te mpo bámipesa mpe bázwa batisimo, bakoki kondima lisusu koyekola buku oyo ya sika. Mbala mosusu, baboti bakomona malamu kosalela buku yango mpo na kosalisa bana na bango bákoma na boyebi ya solosolo ya mokano ya Nzambe.​—Kols. 1:9, 10.

⁴ Koyekola buku ya mibale: Esengeli ete moyekoli ya Biblia ayekola buku mosusu nsima ya kosilisa buku Biblia eteyaka mpenza nini? Ee. Soki emonani polele ete moyekoli azali kokola na elimo, ata soki azali kokola malɛmbɛmalɛmbɛ, mpe azali kosepela na makambo oyo azali koyekola, mosakoli akoki kokoba koyekola na ye na buku Tósambela Nzambe kaka moko ya solo. Tondimi mpenza ete buku Biblia eteyaka ekozala esaleli moko ya ntina mingi na mosala na biso, wana tozali kokokisa mokumba na biso ya kokómisa bato bayekoli.​—Mat. 28:19, 20.