Soki mpasi ekweli yo

MPASI ekoki kokwela moto nyonso. Ata mpe bato oyo bamonanaka lokola bakoká na nyonso.

BIBLIA ELOBI BOYE:

“Ezali te bato ya mbangu mingi nde balongaka na momekano ya kopota mbangu, to bato ya nguya nde balongaka na etumba, ezali mpe te bato ya bwanya nde bazwaka bilei, ezali mpe te bato ya mayele nde bazwaka bomɛngo, mpe ezali kutu te bato oyo bazali na boyebi nde bandimamaka; mpamba te ntango ná makambo oyo ekanami te ekwelaka bango nyonso.”​—Mosakoli 9:11.

Likambo ezali te ya koyeba soki okokutana na likambo moko ya mpasi kasi nde oyo okosala soki ekómeli yo. Na ndakisa:

• Okosala nini soki obungisi biloko na yo nyonso na makama lokola koningana ya mabele to mopɛpɛ makasi?

• Okosala nini soki monganga ayebisi yo ete ozali na maladi moko ya mabe mpenza?

• Okosala nini soki ndeko to moninga na yo akufi?

Batatoli ya Yehova, babimisi ya zulunalo oyo bazali na kondima ete Biblia ekosuka kaka te na kosalisa yo oyikela likambo moko ya mpasi mpiko, kasi ekopesa mpe yo elikya ya solosolo. (Baroma 15:4) Tótalela bandakisa misato oyo emonisi ndenge Biblia ekoki kosalisa yo.