ຈົດໝາຍສະບັບທຳອິດຂອງໂຢຮັນ
3 ເບິ່ງແມ້ ພະເຈົ້າຜູ້ເປັນພໍ່ສະແດງຄວາມຮັກຕໍ່ພວກເຮົາຫຼາຍສ່ຳໃດ.+ ເພິ່ນເຖິງຂັ້ນຍອມໃຫ້ພວກເຮົາຖືກເອີ້ນວ່າລູກຂອງພະເຈົ້າ.+ ພວກເຮົາກໍເປັນລູກຂອງເພິ່ນແທ້ໆ ແຕ່ໂລກບໍ່ຮູ້ຈັກພວກເຮົາ+ຍ້ອນໂລກບໍ່ຮູ້ຈັກເພິ່ນ.+ 2 ພີ່ນ້ອງທີ່ຮັກ ຕອນນີ້ພວກເຮົາເປັນລູກຂອງພະເຈົ້າແລ້ວ+ ແຕ່ພວກເຮົາຍັງບໍ່ຮູ້ວ່າພວກເຮົາຈະມີສະພາບແບບໃດໃນອະນາຄົດ.+ ພວກເຮົາຮູ້ວ່າເມື່ອເພິ່ນມາໃຫ້ພວກເຮົາເຫັນ ພວກເຮົາຈະມີສະພາບຄືກັບເພິ່ນ ຍ້ອນພວກເຮົາຈະໄດ້ເຫັນເພິ່ນແບບທີ່ເພິ່ນເປັນແທ້ໆ. 3 ຄົນທີ່ຫວັງໃນເພິ່ນແບບນັ້ນກໍເຮັດໃຫ້ໂຕເອງບໍລິສຸດ+ຄືກັບທີ່ເພິ່ນບໍລິສຸດ.
4 ຄົນທີ່ເຮັດຜິດເປັນນິດໄສກໍກຳລັງເຮັດຜິດກົດໝາຍຂອງພະເຈົ້າ ຍ້ອນບາບໝາຍເຖິງການບໍ່ໄດ້ເຮັດຕາມກົດໝາຍຂອງພະເຈົ້າ. 5 ພວກເຈົ້າກໍຮູ້ວ່າພະເຢຊູມາເພື່ອກຳຈັດບາບຂອງພວກເຮົາ+ແລະເພິ່ນບໍ່ມີບາບເລີຍ. 6 ຄົນທີ່ເປັນອັນໜຶ່ງອັນດຽວກັບເພິ່ນຈະບໍ່ເຮັດຜິດເປັນນິດໄສ+ ແຕ່ຄົນທີ່ເຮັດຜິດເປັນນິດໄສກໍຍັງບໍ່ໄດ້ເຫັນເພິ່ນແລະຍັງບໍ່ຮູ້ຈັກເພິ່ນ. 7 ພວກລູກທີ່ຮັກ ຢ່າໃຫ້ຜູ້ໃດຫຼອກລວງພວກເຈົ້າ. ຄົນທີ່ເຮັດສິ່ງທີ່ຖືກຕ້ອງເປັນຄົນເຊື່ອຟັງພະເຈົ້າຄືກັບທີ່ພະເຢຊູເຊື່ອຟັງ. 8 ຄົນທີ່ເຮັດຜິດເປັນນິດໄສກໍເປັນຄົນຂອງມານຮ້າຍ ຍ້ອນມານຮ້າຍເຮັດຜິດມາຕະຫຼອດຕັ້ງແຕ່ທຳອິດ*+ ແລະຜູ້ທີ່ເປັນລູກຂອງພະເຈົ້າມາກໍເພື່ອທຳລາຍທຸກສິ່ງທີ່ມານຮ້າຍເຮັດ.*+
9 ຄົນທີ່ເປັນລູກຂອງພະເຈົ້າຈະບໍ່ເຮັດຜິດເປັນນິດໄສ+ຍ້ອນພະລັງຂອງເພິ່ນຢູ່ນຳລາວ ແລະລາວເຮັດຜິດເປັນນິດໄສບໍ່ໄດ້ຍ້ອນລາວເປັນລູກຂອງພະເຈົ້າ.+ 10 ຜູ້ໃດເປັນລູກຂອງພະເຈົ້າແລະຜູ້ໃດເປັນລູກຂອງມານຮ້າຍກໍຈະເຫັນໄດ້ຈາກສິ່ງທີ່ລາວເຮັດ. ຄົນທີ່ບໍ່ເຮັດສິ່ງທີ່ຖືກຕ້ອງແລະບໍ່ຮັກພີ່ນ້ອງກໍບໍ່ໄດ້ເປັນລູກຂອງພະເຈົ້າ.+ 11 ພວກເຈົ້າໄດ້ຍິນເລື່ອງນີ້ຕັ້ງແຕ່ທຳອິດແລ້ວທີ່ວ່າ ໃຫ້ພວກເຮົາຮັກກັນ.+ 12 ຢ່າເປັນຄືກາອິນທີ່ເປັນຄົນຂອງຊາຕານໂຕຊົ່ວຮ້າຍ. ລາວຂ້ານ້ອງຊາຍໂຕເອງ.+ ເປັນຫຍັງລາວຈຶ່ງຂ້ານ້ອງ? ກໍຍ້ອນການກະທຳຂອງລາວຊົ່ວ+ ແຕ່ການກະທຳຂອງນ້ອງຖືກຕ້ອງ.+
13 ພີ່ນ້ອງເອີ້ຍ ບໍ່ຕ້ອງແປກໃຈທີ່ໂລກຊັງພວກເຈົ້າ.+ 14 ພວກເຮົາຮູ້ວ່າແຕ່ກີ້ພວກເຮົາຕາຍໄປແລ້ວ ແຕ່ຕອນນີ້ພວກເຮົາມີຊີວິດ+ຍ້ອນພວກເຮົາຮັກພີ່ນ້ອງ.+ ຄົນທີ່ບໍ່ຮັກພີ່ນ້ອງກໍຍັງຢູ່ໃນຄວາມຕາຍ.+ 15 ຄົນທີ່ຊັງພີ່ນ້ອງກໍສ່ຳກັບວ່າຂ້າຜູ້ນັ້ນແລ້ວ+ ແລະພວກເຈົ້າກໍຮູ້ວ່າຄົນທີ່ຂ້າຄົນຈະບໍ່ໄດ້ຊີວິດຕະຫຼອດໄປ.+ 16 ພວກເຮົາໄດ້ຮູ້ວ່າຄວາມຮັກເປັນແນວໃດກໍຍ້ອນພະເຢຊູສະລະຊີວິດເພື່ອພວກເຮົາ+ ພວກເຮົາຈຶ່ງຄວນສະລະຊີວິດເພື່ອພີ່ນ້ອງຄືກັນ.+ 17 ຖ້າຜູ້ໃດມີຊັບສິນເງິນຄຳທີ່ຈະຊ່ວຍຄົນອື່ນໄດ້ແລະເຫັນພີ່ນ້ອງຂັດສົນ ແຕ່ກໍຍັງໃຈດຳບໍ່ຍອມສະແດງຄວາມເອື້ອເຟື້ອ ຊິເວົ້າໄດ້ແນວໃດວ່າລາວຮັກພະເຈົ້າ?+ 18 ພວກລູກທີ່ຮັກ ຢ່າໃຫ້ພວກເຮົາຮັກດ້ວຍຄຳເວົ້າເທົ່ານັ້ນ+ ແຕ່ໃຫ້ຮັກດ້ວຍການກະທຳ+ແລະດ້ວຍຄວາມຈິງໃຈ.+
19 ເມື່ອເຮັດແບບນີ້ ພວກເຮົາກໍຮູ້ວ່າພວກເຮົາຢູ່ຝ່າຍຄວາມຈິງແລະພວກເຮົາໝັ້ນໃຈໄດ້ວ່າພະເຈົ້າຮັກພວກເຮົາ. 20 ເຖິງວ່າໃຈພວກເຮົາຈະຕຳໜິໂຕເອງຫຼາຍສ່ຳໃດ ພະເຈົ້າກໍໃຫຍ່ກວ່າໃຈຂອງພວກເຮົາ*ແລະເພິ່ນຮູ້ທຸກສິ່ງ.+ 21 ພີ່ນ້ອງທີ່ຮັກ ຖ້າໃຈພວກເຮົາບໍ່ຕຳໜິໂຕເອງ ພວກເຮົາກໍກ້າເວົ້າກັບພະເຈົ້າໄດ້ຢ່າງໝັ້ນໃຈ.+ 22 ເມື່ອພວກເຮົາຂໍຫຍັງນຳພະເຈົ້າ ພວກເຮົາກໍຈະໄດ້ຮັບຕາມທີ່ຂໍ+ ຍ້ອນພວກເຮົາເຮັດຕາມຄຳສັ່ງຂອງເພິ່ນແລະໃຊ້ຊີວິດແບບທີ່ເພິ່ນພໍໃຈ. 23 ທີ່ຈິງ ສິ່ງທີ່ເພິ່ນສັ່ງໄວ້ແມ່ນ ໃຫ້ພວກເຮົາເຊື່ອໃນ*ພະເຢຊູຄລິດລູກຊາຍຂອງເພິ່ນ+ ແລະໃຫ້ພວກເຮົາຮັກກັນ+ຄືກັບທີ່ເພິ່ນໄດ້ບອກ. 24 ນອກຈາກນັ້ນ ຜູ້ທີ່ເຮັດຕາມຄຳສັ່ງຂອງພະເຈົ້າກໍເປັນອັນໜຶ່ງອັນດຽວກັບເພິ່ນ ແລະເພິ່ນເປັນອັນໜຶ່ງອັນດຽວກັບລາວ.+ ພວກເຮົາຮູ້ວ່າພະເຈົ້າເປັນອັນໜຶ່ງອັນດຽວກັບພວກເຮົາຍ້ອນເພິ່ນໃຫ້ພະລັງຂອງເພິ່ນກັບພວກເຮົາ.+