ຫ້ອງສະໝຸດອອນລາຍຂອງວັອດສ໌ທາວເວີ້
ຫໍສັງເກດການ
ຫ້ອງສະໝຸດອອນລາຍ
ລາວ
  • ຄຳພີໄບເບິນ
  • ສິ່ງພິມ
  • ການປະຊຸມ
  • ຄຄ ບົດທີ 10 ໜ້າ 116-127
  • ເມື່ອ​ສະມາຊິກ​ໃນ​ຄອບຄົວ​ປ່ວຍ

ສ່ວນນີ້ບໍ່ມີວິດີໂອ

ຂໍອະໄພ ບໍ່ສາມາດເປີດວິດີໂອໄດ້

  • ເມື່ອ​ສະມາຊິກ​ໃນ​ຄອບຄົວ​ປ່ວຍ
  • ເຄັດລັບສຳລັບຄວາມສຸກໃນຄອບຄົວ
  • ຫົວຂໍ້ຍ່ອຍ
  • ເລື່ອງທີ່ຄ້າຍກັນ
  • ເຈົ້າ​ຮູ້ສຶກ​ຢ່າງ​ໃດ​ໃນ​ເລື່ອງ​ນັ້ນ?
  • ນ້ຳໃຈ​ທີ່​ສະໝານ​ຢຽວ​ຢາ
  • ການ​ຈັດ​ລຳດັບ​ຄວາມ​ສຳຄັນ
  • ການ​ຊ່ວຍ​ລູກໆ
  • ຄວນ​ມີ​ທັດສະນະ​ຢ່າງ​ໃດ​ຕໍ່​ການ​ຮັກສາ​ທາງ​ການ​ແພດ
  • ພະ​ເຢໂຫວາ​ຈະ​ຄ້ຳຈູນ​ເຈົ້າ
    ຫໍສັງເກດການປະກາດລາຊະອານາຈັກຂອງພະເຢໂຫວາ—2015
  • ເຈົ້າ​ຈະ​ດູ​ແລ​ບ້ານ​ເຮືອນ​ໄດ້​ຢ່າງ​ໃດ?
    ເຄັດລັບສຳລັບຄວາມສຸກໃນຄອບຄົວ
  • ຂໍ​ໃຫ້ “ລໍ​ຖ້າ​ພະ​ເຢໂຫວາ”
    ຫໍສັງເກດການປະກາດລາຊະອານາຈັກຂອງພະເຢໂຫວາ (ສຶກສາ)—2022
  • ໂຢບສັດຊື່ຕໍ່ພະເຈົ້າ
    ໜັງສືຂອງຂ້ອຍກ່ຽວກັບເລື່ອງໃນພະຄຳພີໄບເບິນ
ເບິ່ງຕື່ມ
ເຄັດລັບສຳລັບຄວາມສຸກໃນຄອບຄົວ
ຄຄ ບົດທີ 10 ໜ້າ 116-127

ບົດ​ສິບ

ເມື່ອ​ສະມາຊິກ​ໃນ​ຄອບຄົວ​ປ່ວຍ

1, 2. ຊາຕານ​ໄດ້​ໃຊ້​ໂສກນາດຕະກຳ​ແລະ​ຄວາມ​ເຈັບ​ປ່ວຍ​ຢ່າງ​ໃດ​ເພື່ອ​ພະຍາຍາມ​ທຳລາຍ​ຄວາມ​ສັດ​ຊື່​ໝັ້ນ​ຄົງ​ຂອງ​ໂຢບ?

ບຸລຸດ​ຊື່​ໂຢບ​ຄົງ​ຕ້ອງ​ຖືກ​ນັບ​ຢ່າງ​ແນ່ນອນ​ວ່າ​ຢູ່​ໃນ​ຈຳນວນ​ຄົນ​ເຫຼົ່າ​ນັ້ນ​ຊຶ່ງ​ມີ​ຊີວິດ​ຄອບຄົວ​ທີ່​ມີ​ຄວາມ​ສຸກ. ຄຳພີ​ໄບເບິນ​ຮຽກ​ທ່ານ​ວ່າ “ໃຫຍ່​ກວ່າ​ລູກ​ທິດ​ບົວລະພາ​ທັງ​ປວງ.” ທ່ານ​ມີ​ລູກ​ຊາຍ​ເຈັດ​ຄົນ​ແລະ​ລູກ​ສາວ​ສາມ​ຄົນ ລວມ​ທັງ​ໝົດ​ສິບ​ຄົນ. ທ່ານ​ຍັງ​ມີ​ຊັບ​ສິນ​ທີ່​ຈະ​ລ້ຽງ​ດູ​ຄອບຄົວ​ເປັນ​ຢ່າງ​ດີ. ສຳຄັນ​ທີ່​ສຸດ ທ່ານ​ນຳ​ໜ້າ​ໃນ​ກິດຈະກຳ​ຝ່າຍ​ວິນຍານ​ແລະ​ເປັນ​ຫ່ວງ​ເລື່ອງ​ຖານະ​ຂອງ​ລູກໆ ຕໍ່​ໜ້າ​ພະ​ເຢໂຫວາ. ທັງ​ໝົດ​ນີ້​ຍັງ​ຜົນ​ດ້ວຍ​ຄວາມ​ຜູກ​ພັນ​ທີ່​ໃກ້​ຊິດ​ແລະ​ມີ​ຄວາມ​ສຸກ​ໃນ​ຄອບຄົວ.—ໂຢບ 1:1-5.

2 ສະພາບການ​ຂອງ​ໂຢບ​ບໍ່​ໄດ້​ພົ້ນ​ຈາກ​ການ​ສັງເກດ​ຂອງ​ຊາຕານ​ສັດຕູ​ຕົວ​ສຳຄັນ​ຂອງ​ພະ​ເຢໂຫວາ​ພະເຈົ້າ. ຊາຕານ ຜູ້​ຊຶ່ງ​ຫາ​ທາງ​ຢ່າງ​ບໍ່​ລົດ​ຢ່ອນ​ທີ່​ຈະ​ທຳລາຍ​ຄວາມ​ສັດ​ຊື່​ໝັ້ນຄົງ​ຂອງ​ຜູ້​ຮັບໃຊ້​ຂອງ​ພະເຈົ້າ ໄດ້​ໂຈມຕີ​ໂຢບ​ໂດຍ​ການ​ທຳລາຍ​ຄອບຄົວ​ທີ່​ມີ​ຄວາມ​ສຸກ​ຂອງ​ທ່ານ. ຄັນ​ແລ້ວ ມັນ “ໄດ້​ຕີ​ທ່ານ​ໂຢບ​ໃຫ້​ເປັນ​ບາດ​ຮ້າຍ​ເຕັມ​ຕົວ​ຕັ້ງ​ແຕ່​ຝາ​ຕີນ​ຈົນ​ເຖິງ​ຍອດ​ຫົວ.” ໂດຍ​ວິທີ​ນີ້​ຊາຕານ​ຫວັງ​ຈະ​ໃຊ້​ໂສກນາດຕະກຳ​ແລະ​ຄວາມ​ເຈັບ​ປ່ວຍ​ທຳລາຍ​ຄວາມ​ສັດ​ຊື່​ໝັ້ນຄົງ​ຂອງ​ໂຢບ.—ໂຢບ 2:6, 7.

3. ອາການ​ຂອງ​ໂລກ​ທີ່​ໂຢບ​ເປັນ​ມີ​ອັນ​ໃດ​ແດ່?

3 ຄຳພີ​ໄບເບິນ​ບໍ່​ໄດ້​ລະບຸ​ຊື່​ທາງ​ການ​ແພດ​ຂອງ​ໂລກ​ທີ່​ໂຢບ​ເປັນ. ແຕ່ ພະ​ຄຳພີ​ໃຫ້​ເຮົາ​ຮູ້​ອາການ​ຂອງ​ໂລກ. ເນື້ອ​ໜັງ​ຂອງ​ເຂົາ​ເຕັມ​ໄປ​ດ້ວຍ​ໜອນ ແລະ​ຜິວ​ໜັງ​ກໍ​ຕົກ​ເກັດ​ແລະ​ເປື່ອຍ​ເນົ່າ. ລົມຫັນໃຈ​ຂອງ​ໂຢບ​ເໝັນ ແລະ​ຮ່າງ​ກາຍ​ມີ​ກິ່ນ​ເນົ່າ. ທ່ານ​ຖືກ​ທໍລະມານ​ດ້ວຍ​ຄວາມ​ເຈັບ​ປວດ. (ໂຢບ 7:5; 19:17; 30:17, 30) ໂຢບ​ນັ່ງ​ຢູ່​ໃນ​ກອງ​ຂີ້​ເທົ່າ​ດ້ວຍ​ຄວາມ​ເຈັບ​ປວດ​ແລະ​ຂູດ​ຕົວ​ເອງ​ກັບ​ເສດ​ໝໍ້​ດິນ​ເຜົາ​ແຕກ. (ໂຢບ 2:8) ເປັນ​ພາບ​ທີ່​ໜ້າ​ສັງເວດ​ແທ້ໆ!

4. ທຸກ​ຄອບຄົວ​ປະສົບ​ກັບ​ສິ່ງ​ໃດ​ເປັນ​ຄັ້ງ​ຄາວ?

4 ເຈົ້າ​ຈະ​ມີ​ປະຕິກິລິຍາ​ຢ່າງ​ໃດ​ຫາກ​ເຈົ້າ​ປະສົບ​ຄວາມ​ເຈັບ​ປວດ​ດ້ວຍ​ໂລກ​ທີ່​ຮ້າຍແຮງ​ເຊັ່ນ​ນັ້ນ? ທຸກ​ມື້​ນີ້ ຊາຕານ​ບໍ່​ໂຈມຕີ​ຜູ້​ຮັບໃຊ້​ຂອງ​ພະເຈົ້າ​ດ້ວຍ​ຄວາມ​ເຈັບ​ປ່ວຍ​ເຊັ່ນ​ທີ່​ມັນ​ເຄີຍ​ເຮັດ​ກັບ​ໂຢບ. ແຕ່​ເນື່ອງ​ຈາກ​ຄວາມ​ບໍ່​ສົມບູນ​ຂອງ​ມະນຸດ, ຄວາມ​ຕຶງ​ຄຽດ​ໃນ​ຊີວິດ​ປະຈຳ​ວັນ, ແລະ​ສິ່ງ​ແວດ​ລ້ອມ​ທີ່​ເຮົາ​ຢູ່​ນັ້ນ​ເສື່ອມ​ລົງ, ບາງ​ຄັ້ງ​ບາງ​ຄາວ​ຈຶ່ງ​ຄາດ​ໝາຍ​ໄດ້​ວ່າ ສະມາຊິກ​ໃນ​ຄອບຄົວ​ອາດ​ຈະ​ເຈັບ​ໄຂ້. ທັງໆ ທີ່​ເຮົາ​ໄດ້​ຈັດການ​ປ້ອງກັນ ເຮົາ​ທຸກ​ຄົນ​ກໍ​ຍັງ​ເຈັບ​ໄຂ້​ໄດ້​ງ່າຍ ເຖິງ​ແມ່ນ​ນ້ອຍ​ຄົນ​ທົນ​ທຸກ​ເຖິງ​ຂະໜາດ​ທີ່​ໂຢບ​ປະສົບ​ກໍ​ຕາມ. ເມື່ອ​ຄວາມ​ເຈັບ​ໄຂ້​ຮຸກ​ຮານ​ຄອບຄົວ​ຂອງ​ເຮົາ ນັ້ນ​ອາດ​ເປັນ​ການ​ທ້າທາຍ​ທີ່​ແທ້​ຈິງ. ເພາະ​ສະນັ້ນ ຂໍ​ໃຫ້​ເຮົາ​ພິຈາລະນາ​ເບິ່ງ​ວ່າ​ຄຳພີ​ໄບເບິນ​ຊ່ວຍ​ເຮົາ​ຢ່າງ​ໃດ​ໃນ​ການ​ຮັບ​ມື​ກັບ​ສັດຕູ​ຂອງ​ມະນຸດ​ຊາດ​ຕົວ​ນີ້​ທີ່​ມີ​ຢູ່​ເລື້ອຍ​ມາ.—ຜູ້ເທສນາປ່າວປະກາດ 9:11; 2 ຕີໂມເຕ 3:16.

ເຈົ້າ​ຮູ້ສຶກ​ຢ່າງ​ໃດ​ໃນ​ເລື່ອງ​ນັ້ນ?

5. ຕາມ​ປົກກະຕິ​ສະມາຊິກ​ຄອບຄົວ​ມີ​ປະຕິກິລິຍາ​ຢ່າງ​ໃດ​ໃນ​ກໍລະນີ​ທີ່​ມີ​ຄວາມ​ເຈັບ​ປ່ວຍ​ຊົ່ວ​ຄາວ?

5 ການ​ຂັດ​ຈັງຫວະ​ກິດຈະວັດ​ປົກກະຕິ​ໃນ​ຊີວິດ ບໍ່​ວ່າ​ມາ​ຈາກ​ສາເຫດ​ອັນ​ໃດ​ກໍ​ຕາມ ມັກ​ຈະ​ຫຍຸ້ງຍາກ​ສະເໝີ ແລະ​ນີ້​ເປັນ​ຄວາມ​ຈິງ​ໂດຍ​ສະເພາະ​ຢ່າງ​ຍິ່ງ​ຫາກ​ວ່າ​ການ​ຂັດ​ຈັງຫວະ​ນັ້ນ​ເກີດ​ຈາກ​ການ​ເຈັບ​ປ່ວຍ​ເປັນ​ເວລາ​ນານ. ແມ່ນ​ແຕ່​ການ​ເຈັບ​ປ່ວຍ​ໄລຍະ​ສັ້ນໆ ກໍ​ຮຽກ​ຮ້ອງ​ໃຫ້​ມີ​ການ​ປັບ​ຕົວ, ການ​ໂອນ​ອ່ອນ, ແລະ​ການ​ເສຍ​ສະລະ. ສະມາຊິກ​ຄອບຄົວ​ທີ່​ມີ​ສຸຂະພາບ​ແຂງແຮງ​ຕ້ອງ​ຢູ່​ມິດໆ ເພື່ອ​ໃຫ້​ຄົນ​ໄຂ້​ໄດ້​ພັກ​ຜ່ອນ. ເຂົາ​ອາດ​ຕ້ອງ​ງົດ​ກິດຈະກຳ​ບາງ​ຢ່າງ. ແຕ່​ໃນ​ຄອບຄົວ​ສ່ວນ​ຫຼາຍ​ແລ້ວ ແມ່ນ​ແຕ່​ເດັກ​ນ້ອຍ​ກໍ​ຍັງ​ຮູ້ສຶກ​ສົງສານ​ພີ່​ນ້ອງ​ຫຼື​ພໍ່​ແມ່​ທີ່​ເຈັບ​ປ່ວຍ ແມ່ນ​ວ່າ​ເຂົາ​ອາດ​ຕ້ອງ​ໄດ້​ຮັບ​ການ​ເຕືອນ​ເປັນ​ຄັ້ງ​ຄາວ​ໃຫ້​ຄຳນຶງ​ເຖິງ​ຄົນ​ອື່ນ. (ໂກໂລດ 3:12) ໃນ​ກໍລະນີ​ຂອງ​ການ​ເຈັບ​ປ່ວຍ​ຊົ່ວ​ຄາວ ຕາມ​ປົກກະຕິ​ຄອບຄົວ​ພ້ອມ​ສະເໝີ​ທີ່​ຈະ​ເຮັດ​ສິ່ງ​ຊຶ່ງ​ຈຳເປັນ. ນອກ​ຈາກ​ນັ້ນ ສະມາຊິກ​ແຕ່​ລະ​ຄົນ​ໃນ​ຄອບຄົວ​ຄົງ​ຫວັງ​ຈະ​ໄດ້​ຮັບ​ການ​ຄຳນຶງ​ເຖິງ​ເຊັ່ນ​ດຽວ​ກັນ​ຫາກ​ເຂົາ​ເກີດ​ເຈັບ​ປ່ວຍ​ຂຶ້ນ​ມາ.—ມັດທາຽ 7:12.

6. ມີ​ປະຕິກິລິຍາ​ອັນ​ໃດ​ແດ່​ປາກົດ​ໃຫ້​ເຫັນ​ໃນ​ບາງ​ຄັ້ງ​ຫາກ​ສະມາຊິກ​ຄອບຄົວ​ຖືກ​ໂຈມຕີ​ດ້ວຍ​ຄວາມ​ເຈັບ​ປ່ວຍ​ຮ້າຍແຮງ​ແບບ​ຍືດ​ຍາວ?

6 ແຕ່​ຈະ​ວ່າ​ຢ່າງ​ໃດ​ຫາກ​ຄວາມ​ເຈັບ​ປ່ວຍ​ນັ້ນ​ຮ້າຍແຮງ​ຫຼາຍ​ແລະ​ການ​ຂັດ​ຈັງຫວະ​ນັ້ນ​ຮຸນແຮງ​ແລະ​ຍືດ​ຍາວ? ຕົວຢ່າງ​ເຊັ່ນ ຈະ​ວ່າ​ຢ່າງ​ໃດ​ຫາກ​ມີ​ຄົນ​ໃນ​ຄອບຄົວ​ເປັນ​ອຳມະພາດ​ເນື່ອງ​ຈາກ​ເປັນ​ໂລກ​ເສັ້ນ​ເລືອດ​ສະໝອງ, ໄຮ້​ສະມັດຖະພາບ​ເນື່ອງ​ຈາກ​ໂລກ​ອັລໄຊເມີຣ໌, ຫຼື​ອ່ອນ​ເພຍ​ເນື່ອງ​ດ້ວຍ​ໂລກ​ອື່ນໆ ບາງ​ຢ່າງ? ຫຼື​ຈະ​ວ່າ​ຢ່າງ​ໃດ​ຫາກ​ວ່າ​ສະມາຊິກ​ໃນ​ຄອບຄົວ​ເປັນ​ໂລກ​ທາງ​ຈິດ ເຊັ່ນ ຈິດ​ຕະ​ເພດ? ປະຕິກິລິຍາ​ຕອນ​ຕົ້ນ​ໂດຍ​ທົ່ວ​ໄປ​ແມ່ນ​ຄວາມ​ສົງສານ—ເສົ້າໃຈ​ທີ່​ຜູ້​ເປັນ​ທີ່​ຮັກ​ທຸກ​ທໍລະມານ​ຫຼາຍ​ຂະໜາດ​ນັ້ນ. ຢ່າງ​ໃດ​ກໍ​ຕາມ ຄວາມ​ສົງສານ​ອາດ​ຕິດ​ຕາມ​ດ້ວຍ​ປະຕິກິລິຍາ​ອື່ນໆ. ຂະນະ​ທີ່​ສະມາຊິກ​ໃນ​ຄອບຄົວ​ພົບ​ວ່າ​ຕົນ​ໄດ້​ຮັບ​ຜົນ​ກະທົບ​ຫຼາຍ​ແທ້ໆ ແລະ​ເສລີ​ພາບ​ຂອງ​ເຂົາ​ຖືກ​ຈຳກັດ​ເນື່ອງ​ຈາກ​ຄວາມ​ເຈັບ​ປ່ວຍ​ຂອງ​ຄົນ​ໜຶ່ງ​ແລ້ວ ເຂົາ​ອາດ​ເລີ່ມ​ຮູ້ສຶກ​ຂຸ່ນ​ເຄືອງ​ໃຈ. ເຂົາ​ອາດ​ນຶກ​ສົງໄສ​ວ່າ “ເປັນ​ຫຍັງ​ເລື່ອງ​ນີ້​ຕ້ອງ​ເກີດ​ຂຶ້ນ​ກັບ​ຂ້ອຍ?”

7. ພັນລະຍາ​ຂອງ​ໂຢບ​ມີ​ປະຕິກິລິຍາ​ຢ່າງ​ໃດ​ຕໍ່​ຄວາມ​ເຈັບ​ປ່ວຍ​ຂອງ​ທ່ານ ແລະ​ເຫັນ​ໄດ້​ຊັດ​ວ່າ​ນາງ​ລືມ​ອັນ​ໃດ​ໄປ?

7 ສິ່ງ​ຄ້າຍໆ ກັນ​ເບິ່ງ​ຄື​ໄດ້​ຜ່ານ​ເຂົ້າ​ມາ​ໃນ​ຄວາມ​ຄຶດ​ຂອງ​ພັນລະຍາ​ໂຢບ. ຢ່າ​ລືມ​ວ່າ ນາງ​ປະສົບ​ກັບ​ການ​ສູນ​ເສຍ​ລູກໆ ມາ​ແລ້ວ. ຂະນະ​ທີ່​ເຫດການ​ໜ້າ​ເສົ້າ​ສະຫຼົດ​ເຫຼົ່າ​ນັ້ນ​ເກີດ​ຂຶ້ນ ນາງ​ຄົງ​ເກືອບ​ຄຸມ​ສະຕິ​ບໍ່​ຢູ່​ຫຼາຍ​ຂຶ້ນ​ເລື້ອຍໆ ຢ່າງ​ບໍ່​ຕ້ອງ​ສົງໄສ. ສຸດ​ທ້າຍ ເມື່ອ​ນາງ​ເຫັນ​ສາມີ​ຂອງ​ນາງ​ຊຶ່ງ​ເຄີຍ​ວ່ອງ​ໄວ​ແລະ​ແຂງແຮງ​ຕ້ອງ​ທໍລະມານ​ຢ່າງ​ເຈັບ​ປວດ​ດ້ວຍ​ໂລກ​ທີ່​ໜ້າ​ລັງກຽດ ນາງ​ເບິ່ງ​ຄື​ວ່າ​ລືມ​ປັດໄຈ​ສຳຄັນ​ຍິ່ງ​ເໜືອ​ກວ່າ​ໂສກນາດຕະກຳ​ທັງ​ສິ້ນ ນັ້ນ​ແມ່ນ​ຄວາມ​ສຳພັນ​ທີ່​ນາງ​ແລະ​ສາມີ​ຂອງ​ນາງ​ມີ​ຕໍ່​ພະເຈົ້າ. ຄຳພີ​ໄບເບິນ​ບອກ​ວ່າ “ແລ້ວ​ເມຍ​ຂອງ​ໂຢບ​ໄດ້​ເວົ້າ​ຕໍ່​ລາວ​ວ່າ ‘ເຈົ້າ​ຍັງ​ຈະ​ຍຶດ​ໝັ້ນ​ໃນ​ຄວາມ​ສັດ​ຊື່​ຢູ່​ຕໍ່​ໄປ​ຫຼື ເປັນ​ຫຍັງ​ເຈົ້າ​ຈຶ່ງ​ບໍ່​ດ່າ​ພະເຈົ້າ​ແລ້ວ​ຕາຍ​ເສຍ.’”—ໂຢບ 2:9, ປ.ມ.

8. ເມື່ອ​ຜູ້​ໜຶ່ງ​ປ່ວຍ​ໜັກ ຂໍ້​ພະ​ຄຳພີ​ອັນ​ໃດ​ຈະ​ຊ່ວຍ​ສະມາຊິກ​ຄົນ​ອື່ນໆ ໃນ​ຄອບຄົວ​ໃຫ້​ຮັກສາ​ທັດສະນະ​ທີ່​ເໝາະ​ສົມ?

8 ຫຼາຍ​ຄົນ​ຮູ້ສຶກ​ຂ້ອງ​ຂັດ​ໃຈ ຊ້ຳ​ກັບ​ຍັງ​ໃຈ​ຮ້າຍ​ອີກ ເມື່ອ​ຊີວິດ​ຂອງ​ເຂົາ​ປ່ຽນ​ຈາກ​ໜ້າ​ມື​ເປັນ​ຫຼັງ​ມື​ເນື່ອງ​ດ້ວຍ​ຄວາມ​ເຈັບ​ໄຂ້​ຂອງ​ອີກ​ຄົນ​ໜຶ່ງ. ແຕ່​ຄລິດສະຕຽນ​ຜູ້​ທີ່​ຄຶດ​ຫາ​ເຫດຜົນ​ໃນ​ສະພາບການ​ນັ້ນ​ຄວນ​ຈະ​ເຂົ້າ​ໃຈ​ໃນ​ທີ່​ສຸດ​ວ່າ ນີ້​ເປີດ​ໂອກາດ​ໃຫ້​ເຂົາ​ສະແດງ​ວ່າ​ເຂົາ​ມີ​ຄວາມ​ຮັກ​ເລິກ​ເຊິ່ງ​ຊ່ຳ​ໃດ. ຄວາມ​ຮັກ​ແທ້ “ອົດ​ທົນ​ດົນ​ນານ​ແລະ​ສະແດງ​ຄວາມ​ກະລຸນາ . . . [ແລະ] ບໍ່​ສະແຫວງ​ຫາ​ຜົນ​ປະໂຫຍດ​ສຳລັບ​ຕົນ​ເອງ . . . ຄວາມ​ຮັກ​ທົນ​ຮັບ​ເອົາ​ທຸກ​ສິ່ງ, ເຊື່ອ​ທຸກ​ສິ່ງ, ຫວັງ​ທຸກ​ສິ່ງ, ອົດ​ທົນ​ທຸກ​ສິ່ງ.” (1 ໂກລິນໂທ 13:4-7, ລ.ມ.) ແທນ​ທີ່​ຈະ​ຍອມ​ໃຫ້​ຄວາມ​ຮູ້ສຶກ​ຕ່າງໆ ໃນ​ດ້ານ​ລົບ​ເຂົ້າ​ຄອບງຳ ດັ່ງ​ນັ້ນ ນັບ​ວ່າ​ສຳຄັນ​ທີ່​ເຮົາ​ໃຊ້​ຄວາມ​ພະຍາຍາມ​ຢ່າງ​ສຸດ​ຄວາມ​ສາມາດ​ທີ່​ຈະ​ຄວບຄຸມ​ຄວາມ​ຮູ້ສຶກ​ເຫຼົ່າ​ນັ້ນ​ໄວ້.—ສຸພາສິດ 3:21.

9. ຄຳ​ຮັບ​ຮອງ​ອັນ​ໃດ​ສາມາດ​ຊ່ວຍ​ສະມາຊິກ​ໃນ​ຄອບຄົວ​ໃນ​ດ້ານ​ວິນຍານ​ແລະ​ຄວາມ​ຮູ້ສຶກ​ໄດ້​ເມື່ອ​ມີ​ຜູ້​ໜຶ່ງ​ປ່ວຍ​ຮ້າຍແຮງ?

9 ຈະ​ເຮັດ​ຢ່າງ​ໃດ​ໄດ້​ແດ່​ເພື່ອ​ປ້ອງກັນ​ສະຫວັດດີພາບ​ຝ່າຍ​ວິນຍານ​ແລະ​ຄວາມ​ຮູ້ສຶກ​ຂອງ​ຄອບຄົວ​ໄວ້​ເມື່ອ​ສະມາຊິກ​ຄົນ​ໜຶ່ງ​ເຈັບ​ປ່ວຍ​ຮ້າຍແຮງ? ແນ່​ລະ ແຕ່​ລະ​ໂລກ​ຈຳຕ້ອງ​ມີ​ວິທີ​ດູ​ແລ​ແລະ​ການ​ປິ່ນປົວ​ສະເພາະ​ຢ່າງ ແລະ​ຄົງ​ຈະ​ບໍ່​ເໝາະ​ທີ່​ໜັງສື​ນີ້​ຈະ​ສະເໜີ​ແນະ​ວິທີ​ໃດໆ ທາງ​ການ​ແພດ​ຫຼື​ການ​ເບິ່ງ​ແຍງ​ຄົນ​ໄຂ້​ທີ່​ບ້ານ. ຢ່າງ​ໃດ​ກໍ​ຕາມ ໃນ​ດ້ານ​ວິນຍານ ພະ​ເຢໂຫວາ “ຍົກ​ບັນດາ​ຄົນ​ທີ່​ຕົກ​ອັບ​ໃຫ້​ລຸກ​ຂຶ້ນ.” (ຄຳເພງ 145:14, ລ.ມ.) ກະສັດ​ດາວິດ​ຂຽນ​ວ່າ “ຜູ້​ທີ່​ເຂົ້າ​ໃຈ [“ໃສ່​ໃຈ,” ລ.ມ.] ຄົນ​ຈົນ​ກໍ​ເປັນ​ສຸກ​ຫຼາຍ ໃນ​ວັນ​ບໍ່​ດີ​ພະ​ເຢໂຫວາ​ຈະ​ຊ່ອຍ​ຜູ້​ນັ້ນ​ໃຫ້​ພົ້ນ. ພະ​ເຢໂຫວາ​ຈະ​ປົກ​ປ້ອງ​ກັ້ນ​ແລະ​ຮັກສາ​ຊີວິດ​ຂອງ​ເພິ່ນ​ໄວ້. . . . ພະ​ເຢໂຫວາ​ຈະ​ອຸດຫນູນ​ເພິ່ນ​ເວລາ​ນອນ​ປ່ວຍ​ຢູ່.” (ຄຳເພງ 41:1-3) ພະ​ເຢໂຫວາ​ປົກ​ປັກ​ຮັກສາ​ຜູ້​ຮັບໃຊ້​ຂອງ​ພະອົງ​ໃຫ້​ມີ​ຊີວິດ​ຢູ່​ທາງ​ດ້ານ​ຝ່າຍ​ວິນຍານ. ແມ່ນ​ແຕ່​ເມື່ອ​ເຂົາ​ຖືກ​ທົດລອງ​ດ້ານ​ຄວາມ​ຮູ້ສຶກ​ທີ່​ເກີນ​ກຳລັງ​ຂອງ​ເຂົາ​ເອງ. (2 ໂກລິນໂທ 4:7) ສະມາຊິກ​ຄອບຄົວ​ຫຼາຍ​ຄົນ​ທີ່​ຜະເຊີນ​ກັບ​ຄວາມ​ເຈັບ​ໄຂ້​ຮ້າຍແຮງ​ໃນ​ຄອບຄົວ​ຂອງ​ເຂົາ​ໄດ້​ກ່າວ​ຊ້ຳ​ຄຳ​ຂອງ​ຜູ້​ປະ​ພັນ​ຄຳເພງ​ທີ່​ວ່າ “ຂ້າ​ນ້ອຍ​ມີ​ຄວາມ​ທຸກ​ເຫຼືອ​ເກີນ ຂໍ​ໂຜດ​ໃຫ້​ຂ້າ​ນ້ອຍ​ມີ​ຊີວິດ​ຢູ່​ຕາມ​ພະ​ຄຳ​ແຫ່ງ​ພະອົງ.”—ຄຳເພງ 119:107.

ນ້ຳໃຈ​ທີ່​ສະໝານ​ຢຽວ​ຢາ

10, 11. (ກ) ອັນ​ໃດ​ເປັນ​ສິ່ງ​ຈຳເປັນ​ເພື່ອ​ຄອບຄົວ​ຈະ​ຈັດການ​ກັບ​ຄວາມ​ເຈັບ​ປ່ວຍ​ຢ່າງ​ມີ​ຜົນ​ສຳເລັດ​ໄດ້? (ຂ) ຍິງ​ຄົນ​ໜຶ່ງ​ຈັດການ​ກັບ​ຄວາມ​ເຈັບ​ປ່ວຍ​ຂອງ​ສາມີ​ຢ່າງ​ໃດ?

10 ສຸພາສິດ​ຂໍ້​ໜຶ່ງ​ໃນ​ຄຳພີ​ໄບເບິນ​ບອກ​ວ່າ “ຈິດໃຈ​ຂອງ​ຄົນ​ທົນ​ຕໍ່​ຄວາມ​ເຈັບ​ປ່ວຍ​ໄດ້ ແຕ່​ຜູ້​ທີ່​ມີ​ຈິດໃຈ​ຊອກ​ຊ້ຳ​ຈະ​ທົນ​ໄດ້​ຢ່າງ​ໃດ?” (ສຸພາສິດ 18:14, ສະບັບ​ແປ 97) ຄວາມ​ຊອກ​ຊ້ຳ​ໃຈ​ອາດ​ມີ​ຜົນ​ກະທົບ​ຕໍ່​ນ້ຳໃຈ​ຂອງ​ຄອບຄົວ​ແລະ “ຈິດໃຈ​ຂອງ​ຄົນ” ດ້ວຍ. ແຕ່ “ມີ​ສັນຕິສຸກ​ໃນ​ຈິດໃຈ​ໃຫ້​ມີ​ສຸຂະພາບ​ດີ.” (ສຸພາສິດ 14:30, ສະບັບ​ແປ 97) ຄອບຄົວ​ຈະ​ຮັບ​ມື​ກັບ​ຄວາມ​ເຈັບ​ປ່ວຍ​ຮ້າຍແຮງ​ໄດ້​ຢ່າງ​ມີ​ຜົນ​ສຳເລັດ​ຫຼື​ບໍ່​ນັ້ນ​ສ່ວນ​ຫຼາຍ​ຂຶ້ນ​ຢູ່​ກັບ​ເຈຕະຄະຕິ ຫຼື​ນ້ຳໃຈ​ຂອງ​ສະມາຊິກ​ຂອງ​ຄອບຄົວ.—ທຽບ​ກັບ​ສຸພາສິດ 17:22.

11 ຍິງ​ຄລິດສະຕຽນ​ຄົນ​ໜຶ່ງ​ຕ້ອງ​ທົນ​ເບິ່ງ​ສາມີ​ຂອງ​ນາງ​ພິການ​ຍ້ອນ​ເປັນ​ໂລກ​ເສັ້ນ​ເລືອດ​ສະໝອງ​ຫຼັງ​ຈາກ​ແຕ່ງ​ດອງ​ກັນ​ໄດ້​ພຽງ​ແຕ່​ຫົກ​ປີ. ນາງ​ເລົ່າ​ວ່າ “ຄວາມ​ສາມາດ​ໃນ​ການ​ເວົ້າ​ຂອງ​ສາມີ​ຂ້ອຍ​ໄດ້​ຮັບ​ຜົນ​ກະທົບ​ຢ່າງ​ຮ້າຍແຮງ ແລະ​ເກືອບ​ຈະ​ເປັນ​ໄປ​ບໍ່​ໄດ້​ທີ່​ຈະ​ສົນທະນາ​ນຳ​ເຂົາ. ຄວາມ​ຕຶງ​ຄຽດ​ທາງ​ຈິດໃຈ​ໃນ​ການ​ພະຍາຍາມ​ເຂົ້າ​ໃຈ​ສິ່ງ​ທີ່​ເຂົາ​ພະຍາຍາມ​ເວົ້າ​ນັ້ນ​ຮຸນແຮງ​ເຫຼືອ​ເກີນ.” ລອງ​ຄຶດ​ເຖິງ​ຄວາມ​ເຈັບ​ປວດ​ແລະ​ຄວາມ​ຜິດ​ຫວັງ​ທີ່​ສາມີ​ຕ້ອງ​ປະສົບ​ເຊັ່ນ​ກັນ. ສາມີ​ພັນລະຍາ​ຄູ່​ນັ້ນ​ເຮັດ​ຢ່າງ​ໃດ? ແມ່ນ​ແຕ່​ຢູ່​ຫ່າງ​ໄກ​ຈາກ​ປະຊາຄົມ​ຄລິດສະຕຽນ​ກໍ​ຕາມ ພີ່​ນ້ອງ​ຍິງ​ຜູ້​ນີ້​ພະຍາຍາມ​ສຸດ​ຄວາມ​ສາມາດ​ທີ່​ຈະ​ຮັກສາ​ຄວາມ​ເຂັ້ມແຂງ​ຝ່າຍ​ວິນຍານ​ໄວ້​ໂດຍ​ການ​ຕາມ​ໃຫ້​ທັນ​ກັບ​ຄວາມ​ຮູ້​ທ້າຍ​ສຸດ​ທັງ​ໝົດ​ຂອງ​ອົງການ​ແລະ​ທັນ​ກັບ​ການ​ແຈກ​ຈ່າຍ​ອາຫານ​ຝ່າຍ​ວິນຍານ​ຕໍ່​ເນື່ອງ​ໃນ​ວາລະສານ​ຫໍສັງເກດການ ແລະ​ຕື່ນເຖີດ! (ພາສາ​ໄທ) ການ​ເຮັດ​ແບບ​ນີ້​ເຮັດ​ໃຫ້​ນາງ​ມີ​ກຳລັງ​ຝ່າຍ​ວິນຍານ​ທີ່​ຈະ​ເບິ່ງ​ແຍງ​ສາມີ​ຜູ້​ເປັນ​ທີ່​ຮັກ​ຂອງ​ນາງ​ຈົນ​ກະທັ່ງ​ເຂົາ​ເສຍ​ຊີວິດ​ໃນ​ອີກ​ສີ່​ປີ​ຫຼັງ​ຈາກ​ນັ້ນ.

12. ດັ່ງ​ທີ່​ປາກົດ​ໃນ​ກໍລະນີ​ຂອງ​ໂຢບ ລາງ​ເທື່ອ​ຜູ້​ປ່ວຍ​ມີ​ສ່ວນ​ຊ່ວຍເຫຼືອ​ອັນ​ໃດ?

12 ໃນ​ກໍລະນີ​ຂອງ​ໂຢບ ທ່ານ​ເອງ​ຊຶ່ງ​ເປັນ​ຄົນ​ເຈັບ​ທໍລະມານ ເປັນ​ຝ່າຍ​ທີ່​ຄົງ​ຄວາມ​ແຂງແຮງ​ໄວ້. ທ່ານ​ຖາມ​ພັນລະຍາ​ຂອງ​ທ່ານ​ວ່າ “ເຮົາ​ໄດ້​ຮັບ​ຂອງ​ດີ​ມາ​ແຕ່​ພະເຈົ້າ​ທັງ​ມວນ ແລະ​ການ​ອັນຕະລາຍ​ພວກ​ເຮົາ​ຈະ​ບໍ່​ຮັບ​ຫຼື?” (ໂຢບ 2:9) ບໍ່​ແປກ​ທີ່​ສາວົກ​ຍາໂກໂບ​ໄດ້​ອ້າງ​ເຖິງ​ໂຢບ​ໃນ​ຕອນ​ຫຼັງ​ວ່າ​ເປັນ​ຕົວຢ່າງ​ທີ່​ເດັ່ນ​ໃນ​ຄວາມ​ອົດ​ທົນ​ແລະ​ອົດ​ກັ້ນ! ທີ່​ຍາໂກໂບ 5:11 (ລ.ມ.) ເຮົາ​ອ່ານ​ວ່າ “ທ່ານ​ທັງ​ຫຼາຍ​ເຄີຍ​ໄດ້​ຍິນ​ເຖິງ​ຄວາມ​ອົດ​ທົນ​ຂອງ​ໂຢບ​ແລະ​ໄດ້​ເຫັນ​ຜົນ​ທີ່​ພະ​ເຢໂຫວາ​ປະທານ​ແລ້ວ​ວ່າ ພະ​ເຢໂຫວາ​ປ່ຽມ​ໄປ​ດ້ວຍ​ຄວາມ​ຮັກ​ແພງ​ອັນ​ອ່ອນ​ລະມຸນ​ແລະ​ເມດຕາ.” ຄ້າຍ​ກັນ​ໃນ​ທຸກ​ມື້​ນີ້ ມີ​ຫຼາຍ​ກໍລະນີ​ທີ່​ທັດສະນະ​ຄະຕິ​ທີ່​ປ່ຽມ​ດ້ວຍ​ຄວາມ​ກ້າຫານ​ຂອງ​ສະມາຊິກ​ທີ່​ປ່ວຍ​ໃນ​ຄອບຄົວ​ໄດ້​ຊ່ວຍ​ໃຫ້​ຄົນ​ອື່ນ​ໃນ​ບ້ານ​ໃຫ້​ຮັກສາ​ໄວ້​ຊຶ່ງ​ທັດສະນະ​ໃນ​ແງ່​ບວກ.

13. ຄອບຄົວ​ທີ່​ປະສົບ​ຄວາມ​ເຈັບ​ປ່ວຍ​ຮ້າຍແຮງ​ບໍ່​ຄວນ​ເຮັດ​ການ​ປຽບ​ທຽບ​ອັນ​ໃດ?

13 ຄົນ​ສ່ວນ​ຫຼາຍ​ທີ່​ຕ້ອງ​ຈັດການ​ກັບ​ຄວາມ​ເຈັບ​ປ່ວຍ​ໃນ​ຄອບຄົວ​ຍອມ​ຮັບ​ວ່າ ໃນ​ຕອນ​ຕົ້ນ​ນັ້ນ ບໍ່​ແມ່ນ​ເລື່ອງ​ຜິດ​ປົກກະຕິ​ທີ່​ສະມາຊິກ​ໃນ​ຄອບຄົວ​ຈະ​ປະສົບ​ໄລຍະ​ທີ່​ລຳບາກ​ໃນ​ການ​ຜະເຊີນ​ກັບ​ຄວາມ​ເປັນ​ຈິງ​ຂອງ​ບັນຫາ​ນັ້ນ. ພວກ​ເຂົາ​ຍັງ​ຊີ້​ໃຫ້​ເຫັນ​ດ້ວຍ​ວ່າ ທ່າ​ທີ​ຊຶ່ງ​ຄົນ​ເຮົາ​ມອງ​ເບິ່ງ​ສະຖານະການ​ນັ້ນ​ຖື​ວ່າ​ສຳຄັນ​ທີ່​ສຸດ. ການ​ປ່ຽນ​ແປງ​ແລະ​ການ​ປັບ​ຕົວ​ໃນ​ດ້ານ​ກິດຈະວັດ​ຂອງ​ຄອບຄົວ​ອາດ​ຫຍຸ້ງຍາກ​ໃນ​ຕອນ​ຕົ້ນ. ແຕ່​ຫາກ​ຄົນ​ເຮົາ​ໃຊ້​ຄວາມ​ພະຍາຍາມ​ແທ້ໆ ແລ້ວ ເຂົາ​ຈະ​ສາມາດ​ປັບ​ຕົວ​ໃຫ້​ເຂົ້າ​ກັບ​ສະພາບການ​ໃໝ່​ໄດ້. ໃນ​ການ​ເຮັດ​ດັ່ງ​ນັ້ນ ນັບ​ວ່າ​ສຳຄັນ​ທີ່​ເຮົາ​ຈະ​ບໍ່​ທຽບ​ສະຖານະການ​ຂອງ​ເຮົາ​ກັບ​ຂອງ​ຜູ້​ອື່ນ​ຊຶ່ງ​ບໍ່​ມີ​ໃຜ​ປ່ວຍ​ໃນ​ບ້ານ ໂດຍ​ຄຶດ​ວ່າ ຊີວິດ​ຂອງ​ເຂົາ​ສະບາຍ​ກວ່າ​ແລະ ‘ນັ້ນ​ບໍ່​ຍຸຕິທຳ!’ ຕາມ​ຄວາມ​ຈິງ ບໍ່​ມີ​ໃຜ​ຮູ້​ແທ້ໆ ດອກ​ວ່າ​ຄົນ​ອື່ນ​ຕ້ອງ​ແບກ​ພາລະ​ອັນ​ໃດ. ຄລິດສະຕຽນ​ທຸກ​ຄົນ​ພົບ​ການ​ຊູ​ໃຈ​ໃນ​ຄຳ​ຕັດ​ຂອງ​ພະ​ເຍຊູ​ທີ່​ວ່າ “ບັນດາ​ຜູ້​ທີ່​ເຮັດ​ວຽກ​ໜັກ​ແລະ​ມີ​ພາລະ​ຫຼາຍ ຈົ່ງ​ມາ​ຫາ​ເຮົາ ແລະ​ເຮົາ​ຈະ​ເຮັດ​ໃຫ້​ເຈົ້າ​ທັງ​ຫຼາຍ​ສົດ​ຊື່ນ.”—ມັດທາຽ 11:28, ລ.ມ.

ການ​ຈັດ​ລຳດັບ​ຄວາມ​ສຳຄັນ

14. ຈະ​ຈັດ​ລຳດັບ​ຄວາມ​ສຳຄັນ​ຢ່າງ​ເໝາະ​ສົມ​ໄດ້​ຢ່າງ​ໃດ?

14 ໃນ​ການ​ຜະເຊີນ​ກັບ​ຄວາມ​ເຈັບ​ປ່ວຍ​ຮ້າຍແຮງ ຄອບຄົວ​ຄວນ​ຈື່​ຖ້ອຍ​ຄຳ​ຊຶ່ງ​ມີ​ຂຶ້ນ​ໂດຍ​ການ​ດົນ​ໃຈ​ທີ່​ວ່າ “ດ້ວຍ​ພວກ​ປຶກສາ​ຫຼາຍ​ຄົນ​ກໍ​ຊະນະ​ໄດ້.” (ສຸພາສິດ 15:22) ສະມາຊິກ​ຄອບຄົວ​ຈະ​ມາ​ພ້ອມ​ໜ້າ​ແລະ​ຫາ​ລື​ກັນ​ກ່ຽວ​ກັບ​ສະຖານະການ​ທີ່​ເກີດ​ຂຶ້ນ​ເນື່ອງ​ຈາກ​ຄວາມ​ເຈັບ​ປ່ວຍ​ໄດ້​ບໍ? ຄົງ​ຈະ​ເໝາະ​ສົມ​ຢ່າງ​ແນ່ນອນ​ທີ່​ຈະ​ເຮັດ​ເຊັ່ນ​ນັ້ນ​ດ້ວຍ​ການ​ອະທິດຖານ​ແລະ​ໝາຍ​ພຶ່ງ​ການ​ຊີ້​ນຳ​ຈາກ​ພະ​ຄຳ​ຂອງ​ພະເຈົ້າ. (ຄຳເພງ 25:4) ຄວນ​ພິຈາລະນາ​ສິ່ງ​ໃດ​ໃນ​ການ​ປຶກສາ​ກັນ​ນັ້ນ? ກໍ​ມີ​ເລື່ອງ​ການ​ປິ່ນປົວ, ການ​ເງິນ, ແລະ​ດ້ານ​ຄອບຄົວ​ທີ່​ຈະ​ຕ້ອງ​ຕັດສິນ​ໃຈ. ໃຜ​ຈະ​ເປັນ​ຫຼັກ​ໃນ​ການ​ເບິ່ງ​ແຍງ? ຄອບຄົວ​ຈະ​ໃຫ້​ຄວາມ​ຮ່ວມ​ມື​ກັນ​ຢ່າງ​ໃດ​ເພື່ອ​ຊ່ວຍເຫຼືອ​ກັນ​ໃນ​ການ​ດູ​ແລ​ເອົາໃຈໃສ່​ນັ້ນ? ການ​ຈັດ​ກຽມ​ເຫຼົ່າ​ນີ້​ຈະ​ມີ​ຜົນ​ກະທົບ​ຢ່າງ​ໃດ​ກັບ​ສະມາຊິກ​ແຕ່​ລະ​ຄົນ​ໃນ​ຄອບຄົວ? ຈະ​ເອົາໃຈໃສ່​ຕໍ່​ຄວາມ​ຈຳເປັນ​ຝ່າຍ​ວິນຍານ​ແລະ​ດ້ານ​ອື່ນໆ ຂອງ​ຜູ້​ເປັນ​ຫຼັກ​ຊຶ່ງ​ຄອຍ​ໃຫ້​ການ​ເບິ່ງ​ແຍງ​ນັ້ນ​ຢ່າງ​ໃດ?

15. ພະ​ເຢໂຫວາ​ກະກຽມ​ການ​ຄ້ຳຈູນ​ອັນ​ໃດ​ໄວ້​ໃຫ້​ແກ່​ຄອບຄົວ​ທີ່​ປະສົບ​ຄວາມ​ເຈັບ​ປ່ວຍ​ຮ້າຍແຮງ?

15 ການ​ອະທິດຖານ​ຢ່າງ​ຈິງ​ຈັງ​ເພື່ອ​ຂໍ​ການ​ຊີ້​ນຳ​ຈາກ​ພະ​ເຢໂຫວາ, ການ​ຄຶດ​ຮ່ຳເພິງ​ໃນ​ພະ​ຄຳ​ຂອງ​ພະອົງ, ແລະ​ການ​ປະຕິບັດ​ຢ່າງ​ກ້າຫານ​ຕາມ​ແນວ​ທາງ​ທີ່​ຄຳພີ​ໄບເບິນ​ຊີ້​ແຈງ​ນັ້ນ ມັກ​ຈະ​ໃຫ້​ຜົນ​ເປັນ​ພະ​ພອນ​ເກີນ​ຄວາມ​ຄາດ​ໝາຍ​ຂອງ​ເຮົາ​ເລື້ອຍໆ. ໂລກ​ຂອງ​ສະມາຊິກ​ໃນ​ຄອບຄົວ​ທີ່​ປ່ວຍ​ຢູ່​ນັ້ນ​ອາດ​ບໍ່​ທຸເລົາ​ລົງ​ສະເໝີ​ໄປ. ແຕ່​ການ​ໝາຍ​ພຶ່ງ​ພະ​ເຢໂຫວາ​ນຳ​ໄປ​ສູ່​ຜົນ​ດີ​ທີ່​ສຸດ​ບໍ່​ວ່າ​ຢູ່​ໃນ​ສະພາບການ​ໃດໆ. (ຄຳເພງ 55:22) ຜູ້​ປະ​ພັນ​ຄຳເພງ​ກ່າວ​ວ່າ “ໂອ້​ພະ​ເຢໂຫວາ​ຄວາມ​ດີ​ຂອງ​ພະອົງ​ຊູ​ແຮງ​ຂ້າ​ນ້ອຍ. ໃນ​ຄວາມ​ຄຶດ​ອັນ​ມາກ​ຫຼາຍ​ຢູ່​ພາຍ​ໃນ​ຂ້າ​ນ້ອຍ ຄວາມ​ເລົ້າໂລມ​ຂອງ​ພະອົງ​ໄດ້​ໃຫ້​ຈິດໃຈ​ຂ້າ​ນ້ອຍ​ມີ​ຄວາມ​ສະຫນຸກ.”—ຄຳເພງ 94:18, 19; ເຊີນ​ເບິ່ງ​ຄຳເພງ 63:6-8 ດ້ວຍ.

ການ​ຊ່ວຍ​ລູກໆ

16, 17. ອາດ​ຈະ​ຊີ້​ໃຫ້​ເຫັນ​ຈຸດ​ສຳຄັນ​ອັນ​ໃດ​ເມື່ອ​ສົນທະນາ​ກັບ​ລູກ​ຜູ້​ນ້ອຍ​ເລື່ອງ​ຄວາມ​ເຈັບ​ໄຂ້​ຂອງ​ອ້າຍ​ເອື້ອຍ​ຫຼື​ນ້ອງ?

16 ຄວາມ​ເຈັບ​ປ່ວຍ​ຮ້າຍແຮງ​ອາດ​ກໍ່​ບັນຫາ​ກັບ​ລູກໆ ໃນ​ຄອບຄົວ. ນັບ​ວ່າ​ສຳຄັນ​ທີ່​ພໍ່​ແມ່​ຈະ​ຊ່ວຍ​ລູກໆ ໃຫ້​ເຂົ້າ​ໃຈ​ຄວາມ​ຈຳເປັນ​ທີ່​ເກີດ​ຂຶ້ນ​ແລະ​ສິ່ງ​ທີ່​ພວກ​ເຂົາ​ອາດ​ເຮັດ​ໄດ້​ເພື່ອ​ຊ່ວຍເຫຼືອ. ຫາກ​ວ່າ​ຜູ້​ປ່ວຍ​ນັ້ນ​ເປັນ​ລູກ, ກໍ​ຕ້ອງ​ຊ່ວຍ​ພີ່ໆ ນ້ອງໆ ໃຫ້​ເຂົ້າ​ໃຈ​ວ່າ ຄວາມ​ເອົາໃຈໃສ່​ແລະ​ການ​ເບິ່ງ​ແຍງ​ເພີ່ມ​ຂຶ້ນ​ທີ່​ຜູ້​ປ່ວຍ​ໄດ້​ຮັບ​ນັ້ນ​ບໍ່​ໄດ້​ໝາຍ​ຄວາມ​ວ່າ​ລູກ​ຄົນ​ອື່ນໆ ໄດ້​ຮັບ​ຄວາມ​ຮັກ​ນ້ອຍ​ກວ່າ​ແຕ່​ຢ່າງ​ໃດ. ແທນ​ທີ່​ຈະ​ປ່ອຍ​ໃຫ້​ຄວາມ​ຂຸ່ນ​ເຄືອງ​ໃຈ​ຫຼື​ການ​ຊີງ​ດີ​ຂະຫຍາຍ​ຕົວ​ຂຶ້ນ ພໍ່​ແມ່​ສາມາດ​ຊ່ວຍ​ລູກ​ຄົນ​ອື່ນໆ ໃຫ້​ກໍ່​ຄວາມ​ຜູກ​ພັນ​ທີ່​ໃກ້​ຊິດ​ຕໍ່​ກັນ​ຫຼາຍ​ຂຶ້ນ​ແລະ​ມີ​ຄວາມ​ຮັກ​ແທ້​ຂະນະ​ທີ່​ເຂົາ​ຮ່ວມ​ກັນ​ຈັດການ​ກັບ​ສະພາບການ​ທີ່​ເກີດ​ຈາກ​ຄວາມ​ເຈັບ​ປ່ວຍ​ນັ້ນ.

17 ຕາມ​ທຳມະດາ​ລູກໆ ຈະ​ຕອບ​ຮັບ​ງ່າຍ​ກວ່າ​ຫາກ​ພໍ່​ແມ່​ເຂົ້າ​ເຖິງ​ຄວາມ​ຮູ້ສຶກ​ຂອງ​ເຂົາ ແທນ​ທີ່​ຈະ​ອະທິບາຍ​ຍືດ​ຍາວ​ຫຼື​ຊັບຊ້ອນ​ກ່ຽວ​ກັບ​ອາການ​ປ່ວຍ​ແລະ​ການ​ຮັກສາ. ດັ່ງ​ນັ້ນ ອາດ​ຈະ​ບອກ​ຫຍໍ້ໆ ເຖິງ​ສິ່ງ​ທີ່​ສະມາຊິກ​ຄອບຄົວ​ຜູ້​ປ່ວຍ​ນັ້ນ​ພວມ​ຟັນ​ຝ່າ​ຢູ່. ຫາກ​ລູກ​ທີ່​ມີ​ສຸຂະພາບ​ດີ​ເຫັນ​ວ່າ​ໂລກ​ນັ້ນ​ກີດ​ກັ້ນ​ຄົນ​ປ່ວຍ​ໄວ້​ຈາກ​ການ​ເຮັດ​ຫຼາຍ​ສິ່ງ​ຊຶ່ງ​ຕົວ​ເຂົາ​ເອງ​ຖື​ວ່າ​ເປັນ​ເລື່ອງ​ທຳມະດາ​ແລ້ວ ເຂົາ​ກໍ​ຄົງ​ຈະ​ມີ “ຄວາມ​ຮັກ​ແພງ​ສັນ​ພີ່​ນ້ອງ” ຫຼາຍ​ຂຶ້ນ ແລະ​ມີ “ຄວາມ​ເມດຕາ​ຮັກ​ແພງ​ອັນ​ອ່ອນ​ລະມຸນ.”—1 ເປໂຕ 3:8, ລ.ມ.

18. ຈະ​ຊ່ວຍ​ລູກ​ທີ່​ໃຫຍ່​ກວ່າ​ໃຫ້​ເຂົ້າ​ໃຈ​ບັນຫາ​ທີ່​ເກີດ​ຂຶ້ນ​ຈາກ​ຄວາມ​ເຈັບ​ປ່ວຍ​ໄດ້​ຢ່າງ​ໃດ? ແລະ​ເລື່ອງ​ນີ້​ອາດ​ເປັນ​ປະໂຫຍດ​ກັບ​ເຂົາ​ຢ່າງ​ໃດ?

18 ຄວນ​ຊ່ວຍ​ລູກ​ທີ່​ໃຫຍ່​ກວ່າ​ໃຫ້​ສຳນຶກ​ວ່າ​ມີ​ສະພາບການ​ລຳບາກ​ເກີດ​ຂຶ້ນ​ແລະ​ເຮັດ​ໃຫ້​ທຸກ​ຄົນ​ໃນ​ຄອບຄົວ​ຕ້ອງ​ເສຍ​ສະລະ. ເມື່ອ​ມີ​ຄ່າ​ໃຊ້​ຈ່າຍ​ໃນ​ການ​ຮັກສາ​ພະ​ຍາ​ບານ​ທີ່​ຕ້ອງ​ຊຳລະ ອາດ​ຈະ​ເປັນ​ໄປ​ບໍ່​ໄດ້​ທີ່​ພໍ່​ແມ່​ຈະ​ຈັດ​ຫາ​ໃຫ້​ກັບ​ລູກ​ຄົນ​ອື່ນໆ ຕາມ​ທີ່​ເຂົາ​ຕ້ອງການ. ລູກໆ ຈະ​ແຄ້ນ​ໃຈ​ໃນ​ເລື່ອງ​ນີ້​ແລະ​ຮູ້ສຶກ​ວ່າ​ຕົນ​ພວມ​ຖືກ​ຕັດ​ສິດ​ບໍ? ຫຼື​ເຂົາ​ຈະ​ເຂົ້າ​ໃຈ​ສະພາບການ​ແລະ​ເຕັມ​ໃຈ​ເຮັດ​ການ​ເສຍ​ສະລະ​ທີ່​ຈຳເປັນ​ບໍ? ສ່ວນ​ຫຼາຍ​ຂຶ້ນ​ຢູ່​ທີ່​ວິທີ​ຫາ​ລື​ໃນ​ເລື່ອງ​ນັ້ນ​ແລະ​ນ້ຳໃຈ​ທີ່​ເສີມ​ສ້າງ​ກັນ​ຂຶ້ນ​ໃນ​ຄອບຄົວ. ທີ່​ຈິງ ໃນ​ຫຼາຍ​ຄອບຄົວ ຄວາມ​ເຈັບ​ປ່ວຍ​ຂອງ​ສະມາຊິກ​ໄດ້​ຊ່ວຍ​ອົບຮົມ​ລູກ​ໃຫ້​ປະຕິບັດ​ຕາມ​ຄຳ​ແນະນຳ​ຂອງ​ໂປໂລ​ທີ່​ວ່າ “ຢ່າ​ກະທຳ​ສິ່ງ​ໜຶ່ງ​ສິ່ງ​ໃດ​ດ້ວຍ​ການ​ຖຽງ​ກັນ ຫຼື​ດ້ວຍ​ການ​ອວດ​ຕົວ​ອັນ​ເປົ່າໆ ແຕ່​ວ່າ​ດ້ວຍ​ໃຈ​ຖ່ອມ​ຕົວ​ລົງ​ໃຫ້​ຜູ້​ນີ້​ຖື​ຜູ້​ນັ້ນ​ດີ​ກວ່າ​ຕົວ​ເອງ. ຢ່າ​ໃຫ້​ຜູ້​ໜຶ່ງ​ຜູ້​ໃດ​ເບິ່ງ​ແຕ່​ສິ່ງ​ທັງ​ຫຼາຍ​ຂອງ​ຕົນ​ເອງ​ເທົ່າ​ນັ້ນ ແຕ່​ວ່າ​ໃຫ້​ເບິ່ງ​ສິ່ງ​ທັງ​ຫຼາຍ​ຂອງ​ຜູ້​ອື່ນ​ດ້ວຍ.”—ຟີລິບ 2:3, 4.

ຄວນ​ມີ​ທັດສະນະ​ຢ່າງ​ໃດ​ຕໍ່​ການ​ຮັກສາ​ທາງ​ການ​ແພດ

19, 20. (ກ) ຫົວໜ້າ​ຄອບຄົວ​ແບກ​ໜ້າທີ່​ຮັບ​ຜິດ​ຊອບ​ອັນ​ໃດ​ເມື່ອ​ສະມາຊິກ​ຄອບຄົວ​ເຈັບ​ປ່ວຍ? (ຂ) ເຖິງ​ແມ່ນ​ວ່າ​ບໍ່​ເປັນ​ຕຳລາ​ແພດ ຄຳພີ​ໄບເບິນ​ຈັດ​ໃຫ້​ມີ​ເຄື່ອງ​ນຳ​ທາງ​ເພື່ອ​ຮັບ​ມື​ກັບ​ຄວາມ​ເຈັບ​ປ່ວຍ​ໃນ​ທາງ​ໃດ?

19 ຄລິດສະຕຽນ​ທີ່​ສົມດຸນ​ບໍ່​ຄັດ​ຄ້ານ​ການ​ຮັກສາ​ທາງ​ການ​ແພດ​ຕາບ​ເທົ່າ​ທີ່​ການ​ຮັກສາ​ນັ້ນ​ບໍ່​ຂັດ​ກັບ​ກົດໝາຍ​ຂອງ​ພະເຈົ້າ. ເມື່ອ​ສະມາຊິກ​ໃນ​ຄອບຄົວ​ປ່ວຍ ເຂົາ​ຮ້ອນຮົນ​ຫາ​ທາງ​ຊ່ວຍເຫຼືອ​ເພື່ອ​ບັນເທົາ​ຄວາມ​ທຸກ​ທໍລະມານ​ຂອງ​ຜູ້​ທີ່​ປ່ວຍ. ແຕ່​ອາດ​ຈະ​ມີ​ຄວາມ​ເຫັນ​ທາງ​ການ​ແພດ​ທີ່​ແຕກຕ່າງ​ກັນ​ຊຶ່ງ​ຕ້ອງ​ພິຈາລະນາ​ເບິ່ງ​ຜົນ​ໄດ້​ຜົນ​ເສຍ. ນອກ​ຈາກ​ນັ້ນ ເມື່ອ​ບໍ່​ຫຼາຍ​ປີ​ມາ​ນີ້​ມີ​ໂລກ​ແລະ​ຄວາມ​ຜິດ​ປົກກະຕິ​ທີ່​ແປກ​ອັນ​ໃໝ່​ເກີດ​ຂຶ້ນ​ຢ່າງ​ຄາດ​ບໍ່​ເຖິງ ແລະ​ສຳລັບ​ໂລກ​ເຫຼົ່າ​ນີ້​ຫຼາຍ​ໂລກ ບໍ່​ມີ​ວິທີ​ການ​ຮັກສາ​ອັນ​ເປັນ​ທີ່​ຍອມ​ຮັບ​ໂດຍ​ທົ່ວ​ໄປ. ແມ່ນ​ແຕ່​ການ​ວິນິດໄສ​ໂລກ​ຢ່າງ​ຖືກ​ຕ້ອງ​ບາງ​ເທື່ອ​ກໍ​ຍັງ​ເຮັດ​ໄດ້​ຍາກ. ດັ່ງ​ນັ້ນ​ແລ້ວ ຄລິດສະຕຽນ​ຄວນ​ເຮັດ​ປະການ​ໃດ?

20 ເຖິງ​ແມ່ນ​ວ່າ​ຜູ້​ຂຽນ​ຄຳພີ​ໄບເບິນ​ຜູ້​ໜຶ່ງ​ເປັນ​ແພດ​ແລະ​ອັກຄະສາວົກ​ໂປໂລ​ເຄີຍ​ໃຫ້​ຄຳ​ແນະນຳ​ການ​ຮັກສາ​ທີ່​ມີ​ປະໂຫຍດ​ແກ່​ຕີໂມເຕ​ເພື່ອນ​ຂອງ​ທ່ານ​ກໍ​ຕາມ ພະ​ຄຳພີ​ເປັນ​ເຄື່ອງ​ຊີ້​ນຳ​ທາງ​ດ້ານ​ສິນທຳ​ແລະ​ຝ່າຍ​ວິນຍານ ບໍ່​ແມ່ນ​ຕຳລາ​ແພດ. (ໂກໂລດ 4:14; 1 ຕີໂມເຕ 5:23) ດັ່ງ​ນັ້ນ ໃນ​ເລື່ອງ​ການ​ຮັກສາ​ທາງ​ການ​ແພດ ຫົວໜ້າ​ຄອບຄົວ​ຄລິດສະຕຽນ​ຕ້ອງ​ເຮັດ​ການ​ຕັດສິນ​ໃຈ​ຢ່າງ​ສົມດຸນ​ດ້ວຍ​ຕົນ​ເອງ. ບາງ​ທີ​ເຂົາ​ອາດ​ຮູ້ສຶກ​ວ່າ​ຕ້ອງການ​ໄດ້​ຄວາມ​ຄຶດ​ເຫັນ​ທາງ​ການ​ແພດ​ຫຼາຍ​ກວ່າ​ໜຶ່ງ​ຢ່າງ. (ທຽບ​ກັບ​ສຸພາສິດ 18:17.) ແນ່ນອນ ເຂົາ​ຄົງ​ຢາກ​ໄດ້​ຄວາມ​ຊ່ວຍເຫຼືອ​ດີ​ທີ່​ສຸດ​ຊຶ່ງ​ຫາ​ໄດ້​ໃຫ້​ກັບ​ສະມາຊິກ​ທີ່​ປ່ວຍ​ຢູ່ ແລະ​ຄົນ​ສ່ວນ​ຫຼາຍ​ສະແຫວງ​ຫາ​ຄວາມ​ຊ່ວຍເຫຼືອ​ນີ້​ໃນ​ທ່າມກາງ​ອາຍຸລະແພດ​ທົ່ວ​ໄປ. ບາງ​ຄົນ​ຮູ້ສຶກ​ສະບາຍ​ໃຈ​ກວ່າ​ກັບ​ການ​ເລືອກ​ວິທີ​ປິ່ນປົວ​ແບບ​ອື່ນ. ນີ້​ກໍ​ຄື​ກັນ​ເປັນ​ການ​ຕັດສິນ​ໃຈ​ສ່ວນ​ຕົວ. ແຕ່​ເມື່ອ​ຈັດການ​ກັບ​ບັນຫາ​ສຸຂະພາບ ຄລິດສະຕຽນ​ບໍ່​ຍັບຢັ້ງ​ໃນ​ການ​ໃຫ້ ‘ພະ​ຄຳ​ຂອງ​ພະເຈົ້າ​ເປັນ​ໂຄມ​ໄຟ​ສຳລັບ​ຕີນ​ຂອງ​ເຂົາ​ແລະ​ເປັນ​ແສງ​ສະຫວ່າງ​ຕາມ​ທາງ​ຂອງ​ເຂົາ.’ (ຄຳເພງ 119:105) ພວກ​ເຂົາ​ຍັງ​ປະຕິບັດ​ຕາມ​ແນວ​ຊີ້​ນຳ​ທີ່​ຈັດ​ໄວ້​ໃນ​ຄຳພີ​ໄບເບິນ. (ເອຊາອີ 55:8, 9) ດ້ວຍ​ເຫດ​ນີ້ ເຂົາ​ຫຼີກ​ເວັ້ນ​ເຕັກນິກ​ການ​ວິນິດໄສ​ໂລກ​ແບບ​ທຳ​ນອງ​ຂອງ​ລັດທິ​ພູດ​ຜີສາດ ແລະ​ຫຼີກ​ເວັ້ນ​ວິທີ​ການ​ຮັກສາ​ທີ່​ຂັດ​ກັບ​ຫຼັກ​ການ​ຂອງ​ຄຳພີ​ໄບເບິນ.—ຄຳເພງ 36:9; ກິດຈະການ 15:28, 29; ຄຳປາກົດ 21:8.

21, 22. ຍິງ​ຊາວ​ເອເຊຍ​ຄົນ​ໜຶ່ງ​ຫາ​ເຫດຜົນ​ຢ່າງ​ໃດ​ກ່ຽວ​ກັບ​ຫຼັກ​ການ​ຂໍ້​ໜຶ່ງ​ຂອງ​ຄຳພີ​ໄບເບິນ ແລະ​ການ​ຕັດສິນ​ໃຈ​ຂອງ​ນາງ​ປາກົດ​ວ່າ​ຖືກ​ຕ້ອງ​ຢ່າງ​ໃດ​ໃນ​ສະຖານະການ​ຂອງ​ນາງ?

21 ລອງ​ມາ​ພິຈາລະນາ​ກໍລະນີ​ຂອງ​ຍິງ​ສາວ​ຊາວ​ເອເຊຍ​ຄົນ​ໜຶ່ງ. ບໍ່​ດົນ​ຫຼັງ​ຈາກ​ນາງ​ເລີ່ມ​ຮຽນ​ຮູ້​ກ່ຽວ​ກັບ​ຄຳພີ​ໄບເບິນ​ອັນ​ເປັນ​ຜົນ​ຈາກ​ການ​ສຶກສາ​ກັບ​ພະຍານ​ພະ​ເຢໂຫວາ ນາງ​ຄອດ​ລູກ​ສາວ​ກ່ອນ​ກຳນົດ​ຊຶ່ງ​ມີ​ນ້ຳ​ໜັກ​ພຽງ 1.47 ກິໂລກາມ​ເທົ່າ​ນັ້ນ. ຍິງ​ຜູ້​ນີ້​ເສຍໃຈ​ຫຼາຍ​ເມື່ອ​ແພດ​ບອກ​ນາງ​ວ່າ ລູກ​ນັ້ນ​ຈະ​ປັນຍາ​ອ່ອນ​ຢ່າງ​ຮຸນແຮງ​ແລະ​ຈະ​ຍ່າງ​ບໍ່​ໄດ້​ເລີຍ. ແພດ​ແນະນຳ​ນາງ​ໃຫ້​ມອບ​ລູກ​ໃຫ້​ກັບ​ສະຖານ​ສົງເຄາະ. ສາມີ​ຂອງ​ນາງ​ກໍ​ບໍ່​ແນ່​ໃຈ​ກ່ຽວ​ກັບ​ເລື່ອງ​ນີ້. ນາງ​ຈະ​ຫັນ​ໜ້າ​ໄປ​ຫາ​ໃຜ?

22 ນາງ​ບອກ​ວ່າ “ຂ້ອຍ​ຈື່​ໄດ້​ຈາກ​ການ​ຮຽນ​ຄຳພີ​ໄບເບິນ​ວ່າ ‘ລູກ​ທັງ​ຫຼາຍ​ເປັນ​ມໍລະດົກ​ຈາກ​ພະ​ເຢໂຫວາ; ຜົນ​ຈາກ​ທ້ອງ​ເປັນ​ລາງວັນ.’” (ຄຳເພງ 127:3, ລ.ມ.) ນາງ​ຕັດສິນ​ໃຈ​ຈະ​ນຳ​ເອົາ “ມໍລະດົກ” ນີ້​ກັບ​ບ້ານ​ແລະ​ລ້ຽງ​ດູ​ລູກ​ຂອງ​ນາງ. ສິ່ງ​ຕ່າງໆ ຫຍຸ້ງຍາກ​ໃນ​ຕອນ​ຕົ້ນ ແຕ່​ດ້ວຍ​ຄວາມ​ຊ່ວຍເຫຼືອ​ຂອງ​ເພື່ອນ​ຄລິດສະຕຽນ​ໃນ​ປະຊາຄົມ​ທ້ອງ​ຖິ່ນ​ຂອງ​ພະຍານ​ພະ​ເຢໂຫວາ ຍິງ​ຄົນ​ນີ້​ສາມາດ​ຈັດການ​ແລະ​ໃຫ້​ການ​ຊ່ວຍເຫຼືອ​ເປັນ​ພິເສດ​ຊຶ່ງ​ຈຳເປັນ​ແກ່​ລູກ. ສິບ​ສອງ​ປີ​ຕໍ່​ມາ ລູກ​ຄົນ​ນັ້ນ​ໄປ​ຍັງ​ການ​ປະຊຸມ​ທີ່​ຫໍ​ປະຊຸມ​ແລະ​ເພີດເພີນ​ກັບ​ການ​ຄົບ​ຫາ​ກັບ​ພວກ​ເດັກ​ນ້ອຍ​ທີ່​ນັ້ນ. ຜູ້​ເປັນ​ແມ່​ອອກ​ຄວາມ​ເຫັນ​ວ່າ “ຂ້ອຍ​ຮູ້ສຶກ​ຂອບຄຸນ​ຫຼາຍ​ແທ້ໆ ທີ່​ຫຼັກ​ການ​ໃນ​ຄຳພີ​ໄບເບິນ​ໄດ້​ກະຕຸ້ນ​ໃຫ້​ຂ້ອຍ​ເຮັດ​ສິ່ງ​ທີ່​ຖືກ​ຕ້ອງ. ຄຳພີ​ໄບເບິນ​ຊ່ວຍ​ຂ້ອຍ​ໃຫ້​ຮັກສາ​ໄວ້​ຊຶ່ງ​ສະຕິ​ຮູ້ສຶກ​ຜິດ​ຊອບ​ທີ່​ສະອາດ​ຕໍ່​ພະ​ເຢໂຫວາ​ພະເຈົ້າ​ແລະ​ບໍ່​ຕ້ອງ​ມາ​ນັ່ງ​ຮູ້ສຶກ​ເສຍໃຈ​ຊຶ່ງ​ອາດ​ຈະ​ມີ​ໄປ​ຕະຫຼອດ​ຊີວິດ.”

23. ຄຳພີ​ໄບເບິນ​ໃຫ້​ຄຳ​ປອບ​ໂຍນ​ອັນ​ໃດ​ກັບ​ຄົນ​ປ່ວຍ​ແລະ​ຄົນ​ເຫຼົ່າ​ນັ້ນ​ທີ່​ເບິ່ງ​ແຍງ​ເຂົາ?

23 ຄວາມ​ເຈັບ​ປ່ວຍ​ຈະ​ບໍ່​ຢູ່​ກັບ​ເຮົາ​ຕະຫຼອດ​ໄປ. ຜູ້​ພະຍາກອນ​ເອຊາອີ​ຊີ້​ໄປ​ເຖິງ​ອະນາຄົດ​ເມື່ອ “ຊາວ​ຊົນ​ຈະ​ບໍ່​ກ່າວ​ວ່າ ‘ຂ້ອຍ​ບໍ່​ສະບາຍ.’” (ເອຊາອີ 33:24) ຄຳ​ສັນຍາ​ນັ້ນ​ຈະ​ສຳເລັດ​ສົມ​ຈິງ​ໃນ​ໂລກ​ໃໝ່​ທີ່​ໃກ້​ເຂົ້າ​ມາ​ຢ່າງ​ວ່ອງ​ໄວ. ຢ່າງ​ໃດ​ກໍ​ດີ ຈົນ​ຮອດ​ຕອນ​ນັ້ນ ເຮົາ​ຕ້ອງ​ຮັບ​ມື​ກັບ​ຄວາມ​ເຈັບ​ປ່ວຍ​ແລະ​ຄວາມ​ຕາຍ. ໜ້າ​ຍິນດີ​ທີ່ ພະ​ຄຳ​ຂອງ​ພະເຈົ້າ​ໃຫ້​ເຄື່ອງ​ນຳ​ທາງ​ແລະ​ການ​ຊ່ວຍເຫຼືອ​ແກ່​ເຮົາ. ກົດ​ພື້ນ​ຖານ​ກ່ຽວ​ກັບ​ຄວາມ​ປະພຶດ​ທີ່​ຄຳພີ​ໄບເບິນ​ສະເໜີ​ໃຫ້​ນັ້ນ​ຍືນ​ນານ ແລະ​ກົດ​ເຫຼົ່າ​ນັ້ນ​ເໜືອ​ກວ່າ​ຄວາມ​ຄຶດ​ເຫັນ​ທີ່​ປ່ຽນ​ແປງ​ຢູ່​ເລື້ອຍໆ ຂອງ​ມະນຸດ​ບໍ່​ສົມບູນ. ສະນັ້ນ ຜູ້​ທີ່​ສຸຂຸມ​ເຫັນ​ພ້ອມ​ກັບ​ຜູ້​ປະ​ພັນ​ຄຳເພງ​ຊຶ່ງ​ຂຽນ​ວ່າ “ພະ​ບັນຍັດ​ຂອງ​ພະ​ເຢໂຫວາ​ເປັນ​ອັນ​ດີ​ທີ່​ສຸດ​ຈຶ່ງ​ໃຫ້​ມີ​ແຮງ​ໃນ​ຈິດໃຈ ຄຳພີ​ຍານ​ຂອງ​ພະ​ເຢໂຫວາ​ກໍ​ທ່ຽງ​ແທ້​ຈຶ່ງ​ໃຫ້​ຄົນ​ບໍ່​ຮູ້​ກາຍ​ເປັນ​ຄົນ​ປັນຍາ . . . ຂໍ້​ຕັດສິນ​ທັງ​ຫຼາຍ​ຂອງ​ພະ​ເຢໂຫວາ​ເປັນ​ຄວາມ​ຈິງ​ແລະ​ຊອບທຳ​ທັງ​ສິ້ນ​ພ້ອມ​ກັນ . . . ຜູ້​ທີ່​ຖື​ຮັກສາ​ຂໍ້​ທັງ​ຫຼາຍ​ນັ້ນ​ກໍ​ມີ​ຄ່າ​ບຳເໜັດ​ອັນ​ໃຫຍ່.”—ຄຳເພງ 19:7, 9, 11.

ຫຼັກ​ການ​ເຫຼົ່າ​ນີ້​ຈາກ​ຄຳພີ​ໄບເບິນ​ສາມາດ​ຊ່ວຍ . . . ຄອບຄົວ​ຢ່າງ​ໃດ​ໃນ​ການ​ຈັດການ​ກັບ​ຄວາມ​ເຈັບ​ປ່ວຍ​ຮ້າຍແຮງ​ແລະ​ການ​ຂັດ​ຈັງຫວະ​ທີ່​ເກີດ​ຂຶ້ນ?

ຄວາມ​ຮັກ​ອົດ​ທົນ​ນານ​ແລະ​ອົດ​ທົນ​ທຸກ​ສິ່ງ.—1 ໂກລິນໂທ 13:4-7.

ເປັນ​ສິ່ງ​ສຳຄັນ​ທີ່​ຈະ​ປູກ​ຝັງ​ນ້ຳໃຈ​ທີ່​ດີ.—ສຸພາສິດ 18:14.

ເປັນ​ປະໂຫຍດ​ທີ່​ຈະ​ສະແຫວງ​ຫາ​ຄຳ​ແນະນຳ​ກ່ອນ​ເຮັດ​ການ​ຕັດສິນ​ໃຈ​ທີ່​ສຳຄັນ.—ສຸພາສິດ 15:22.

ພະ​ເຢໂຫວາ​ໃຫ້​ການ​ຄ້ຳຈູນ​ແກ່​ເຮົາ​ເມື່ອ​ຊີວິດ​ຍາກ​ລຳບາກ.—ຄຳເພງ 55:22.

ພະ​ຄຳ​ຂອງ​ພະ​ເຢໂຫວາ​ເປັນ​ເຄື່ອງ​ນຳ​ທາງ​ໃນ​ທຸກ​ສະຖານະການ.—ຄຳເພງ 119:105.

    ໜັງສືພາສາລາວ (1993-2025)
    ອອກຈາກລະບົບ
    ເຂົ້າສູ່ລະບົບ
    • ລາວ
    • ແຊຣ໌
    • ການຕັ້ງຄ່າ
    • Copyright © 2025 Watch Tower Bible and Tract Society of Pennsylvania
    • ເງື່ອນໄຂການນຳໃຊ້
    • ນະໂຍບາຍກ່ຽວກັບຂໍ້ມູນສ່ວນຕົວ
    • ຕັ້ງຄ່າຄວາມເປັນສ່ວນຕົວ
    • JW.ORG
    • ເຂົ້າສູ່ລະບົບ
    ແຊຣ໌