ບົດຮຽນ 14
ວິທີທີ່ພະຍານພະເຢໂຫວາໄດ້ຮັບການຈັດໃຫ້ເປັນລະບຽບ
ພະຍານພະເຢໂຫວາສະໄໝປັດຈຸບັນມີຕອນເລີ່ມຕົ້ນເມື່ອໃດ? (1)
ການປະຊຸມຕ່າງໆ ຂອງພະຍານພະເຢໂຫວາດຳເນີນຢ່າງໃດ? (2)
ມີການສະໜັບສະຫນູນໃນເລື່ອງການໃຊ້ຈ່າຍຢ່າງໃດ? (3)
ໃຜນຳໜ້າໃນແຕ່ລະປະຊາຄົມ? (4)
ມີການຈັດການປະຊຸມໃຫຍ່ອັນໃດແຕ່ລະປີ? (5)
ມີການເຮັດງານອັນໃດທີ່ສຳນັກງານກາງແລະທີ່ສຳນັກງານສາຂາຂອງພວກເຂົາ? (6)
1. ພະຍານພະເຢໂຫວາສະໄໝປັດຈຸບັນມີຕອນເລີ່ມຕົ້ນໃນທົດສະວັດ 1870. ຂັ້ນທຳອິດ ພວກເຂົາຖືກເອີ້ນວ່ານັກສຶກສາຄຳພີໄບເບິນ. ແຕ່ໃນປີ 1931 ພວກເຂົາຮັບເອົາຊື່ຕາມພະຄຳພີທີ່ວ່າ ພະຍານພະເຢໂຫວາ. (ເອຊາອີ 43:10) ຈາກການເລີ່ມຕົ້ນນ້ອຍໆ ອົງການນີ້ໄດ້ຈະເລີນເຕີບໂຕຈົນມີພະຍານພະເຢໂຫວາຫຼາຍລ້ານຄົນຊຶ່ງເຮັດການປະກາດໃນຫຼາຍກວ່າ 230 ດິນແດນຢ່າງຂະຫຍັນໝັ່ນພຽນ.
2. ປະຊາຄົມສ່ວນຫຼາຍຂອງພະຍານພະເຢໂຫວາມີການປະຊຸມອາທິດລະສາມເທື່ອ. ທ່ານໄດ້ຮັບການເຊີນໃຫ້ເຂົ້າຮ່ວມການປະຊຸມເຫຼົ່ານີ້. (ເຫບເລິ 10:24, 25) ຄຳພີໄບເບິນເປັນພື້ນຖານສຳລັບສິ່ງທີ່ມີການສອນ. ການປະຊຸມເລີ່ມຕົ້ນແລະຈົບດ້ວຍການອະທິດຖານ. ນອກຈາກນີ້ ມີການຮ້ອງ “ເພງຝ່າຍວິນຍານ” ດ້ວຍຄວາມຮູ້ສຶກຈາກຫົວໃຈນະເກືອບທຸກການປະຊຸມ. (ເອເຟດ 5:18, 19, ລ.ມ.) ບໍ່ຕ້ອງເສຍຄ່າເຂົ້າ ແລະບໍ່ມີການແຜ່ເກັບເງິນ.—ມັດທາຍ 10:8.
3. ປະຊາຄົມຕ່າງໆ ສ່ວນຫຼາຍຈັດການປະຊຸມທີ່ຫໍປະຊຸມແຫ່ງລາຊະອານາຈັກ. ຕາມປົກກະຕິແລ້ວຫໍປະຊຸມເຫຼົ່ານີ້ເປັນສິ່ງສ້າງໃນລັກສະນະທຳມະດາແບບງ່າຍໆ ໂດຍພະຍານພະເຢໂຫວາອາສາສະໝັກ. ທ່ານຈະບໍ່ເຫັນຮູບພະ ຮູບພາບພະເຍຊູຖືກຄຶງຢູ່ເທິງໄມ້ກາງເຂນຫຼືສິ່ງຕ່າງໆ ທຳນອງນັ້ນທີ່ຫໍປະຊຸມແຫ່ງລາຊະອານາຈັກ. ມີການອອກຄ່າໃຊ້ຈ່າຍຕ່າງໆ ໂດຍການບໍລິຈາກໂດຍສະໝັກໃຈ. ມີຫີບບໍລິຈາກຕັ້ງໄວ້ສຳລັບຄົນເຫຼົ່ານັ້ນທີ່ຕ້ອງການບໍລິຈາກ.—2 ໂກລິນໂທ 9:7.
4. ໃນແຕ່ລະປະຊາຄົມມີຜູ້ເຖົ້າແກ່ ຫຼືຜູ້ດູແລ. ພວກເຂົານຳໜ້າໃນການສອນໃນປະຊາຄົມ. (1 ຕີໂມເຕ 3:1-7; 5:17) ພວກເຂົາໄດ້ຮັບການຊ່ວຍເຫຼືອໂດຍພວກຜູ້ຮັບໃຊ້ທີ່ໄດ້ຖືກແຕ່ງຕັ້ງ. (1 ຕີໂມເຕ 3:8-10, 12, 13) ຄົນເຫຼົ່ານີ້ບໍ່ໄດ້ຮັບການຍົກຍ້ອງສູງກວ່າຄົນອື່ນໃນປະຊາຄົມ. (2 ໂກລິນໂທ 1:24) ພວກເຂົາບໍ່ໄດ້ຮັບຕຳແໜ່ງພິເສດ. (ມັດທາຍ 23:8-10) ພວກເຂົາບໍ່ແຕ່ງຕົວຜິດແຜກຈາກຄົນອື່ນໆ . ພວກເຂົາບໍ່ໄດ້ຮັບຄ່າຈ້າງສຳລັບການງານຂອງເຂົາ. ພວກຜູ້ເຖົ້າແກ່ເຕັມໃຈເອົາໃຈໃສ່ດູແລຄວາມຈຳເປັນຝ່າຍວິນຍານຂອງປະຊາຄົມ. ພວກເຂົາສາມາດໃຫ້ຄຳປອບໂຍນແລະໃຫ້ຄຳແນະນຳໄດ້ໃນຍາມທີ່ມີບັນຫາຫຍຸ້ງຍາກ.—ຍາໂກໂບ 5:14-16; 1 ເປໂຕ 5:2, 3.
5. ພະຍານພະເຢໂຫວາໄດ້ຈັດໃຫ້ມີການປະຊຸມໝວດຫຼືການປະຊຸມພາກແຕ່ລະປີ. ໃນໂອກາດເຫຼົ່ານີ້ ຫຼາຍປະຊາຄົມມາຢູ່ຮ່ວມກັນເພື່ອຮັບການສັ່ງສອນເປັນພິເສດຕາມຫຼັກຄຳພີໄບເບິນ. ການຮັບບັບເຕມາຂອງສາວົກໃໝ່ໆ ເປັນສ່ວນນຶ່ງທີ່ມີເປັນປະຈຳຂອງການປະຊຸມໝວດຫຼືການປະຊຸມພາກແຕ່ລະແຫ່ງ.—ມັດທາຍ 3:13-17; 28:19, 20.
6. ສຳນັກງານກາງຂອງພະຍານພະເຢໂຫວາຕັ້ງຢູ່ທີ່ນິວຍອຣ໌ກ. ທີ່ນັ້ນມີຄະນະກຳມະການປົກຄອງ ຄືສູນຮ່ວມກຸ່ມຜູ້ປົກຄອງທີ່ມີປະສົບການຊຶ່ງດູແລປະຊາຄົມທົ່ວໂລກ. ນອກຈາກນີ້ຍັງມີສຳນັກງານສາຂາ 100 ກວ່າແຫ່ງທົ່ວໂລກ. ໃນສະຖານທີ່ເຫຼົ່ານີ້ ພວກອາສາສະໝັກຊ່ວຍໃນການພິມແລະຈັດສົ່ງໜັງສືຊຶ່ງອະທິບາຍຄຳພີໄບເບິນ. ພ້ອມນີ້ມີການໃຫ້ຄຳແນະນຳເພື່ອຈັດລະບຽບງານປະກາດ. ເປັນຫຍັງຈຶ່ງບໍ່ວາງແຜນໄປຢ້ຽມຢາມສຳນັກງານສາຂາທີ່ຢູ່ໃກ້ທີ່ສຸດເຮືອນຂອງທ່ານ?