ໜ້າປົກ | ການປົກຄອງຂອງພະເຈົ້າຈະໃຫ້ຫຍັງກັບເຈົ້າ?
ການປົກຄອງຂອງພະເຈົ້າ—ພະເຢຊູຖືວ່ານັ້ນເປັນເລື່ອງທີ່ສຳຄັນ
ຕອນທີ່ພະເຢຊູປະກາດຢູ່ເທິງແຜ່ນດິນໂລກ ເພິ່ນໄດ້ສອນຫຼາຍຢ່າງ. ເພື່ອເປັນຕົວຢ່າງ ເພິ່ນສອນໃຫ້ພວກລູກສິດຮູ້ວິທີອະທິດຖານ ວິທີເຮັດໃຫ້ພະເຈົ້າພໍໃຈ ແລະວິທີຫາຄວາມສຸກໄດ້. (ມັດທາຍ 6:5-13; ມາຣະໂກ 12:17; ລູກາ 11:28) ແຕ່ເລື່ອງທີ່ພະເຢຊູຢາກເວົ້າຫຼາຍກ່ອນໝູ່ ທີ່ໃຈເພິ່ນມັກຫຼາຍທີ່ສຸດ ແມ່ນເລື່ອງການປົກຄອງຂອງພະເຈົ້າ.—ລູກາ 6:45
ບົດຄວາມກ່ອນໜ້ານີ້ບອກວ່າ ວຽກ “ປະກາດຂ່າວເລື່ອງການປົກຄອງຂອງພະເຈົ້າ” ເປັນຊີວິດຈິດໃຈຂອງພະເຢຊູ. (ລູກາ 8:1) ເພິ່ນທຸ່ມເທໂຕເອງ ໄດ້ຍ່າງຫຼາຍຮ້ອຍກິໂລແມັດໄປໆມາໆທົ່ວດິນແດນຂອງອິດສະຣາເອນເພື່ອສອນຜູ້ຄົນເລື່ອງການປົກຄອງຂອງພະເຈົ້າ. ພະທຳກິດຕິຄຸນທັງ 4 ເຫຼັ້ມບັນທຶກໄວ້ກ່ຽວກັບວຽກປະກາດຂອງພະເຢຊູ ແລະອ້າງເຖິງການປົກຄອງຂອງພະເຈົ້າຕັ້ງ 100 ກວ່າເທື່ອ. ສ່ວນໃຫຍ່ແລ້ວ ແມ່ນພະເຢຊູເອງເປັນຜູ້ທີ່ເວົ້າເຖິງ ແຕ່ຍັງເປັນພຽງແຕ່ສ້ຽວດຽວເທົ່ານັ້ນຂອງທັງໝົດ!—ໂຢຮັນ 21:25
ເປັນຫຍັງການປົກຄອງຂອງພະເຈົ້າຈຶ່ງມີຄວາມສຳຄັນຫຼາຍຂະໜາດນັ້ນສຳລັບພະເຢຊູຕອນທີ່ເພິ່ນຢູ່ເທິງແຜ່ນດິນໂລກ? ເຫດຜົນໜຶ່ງກໍຄື ພະເຢຊູຮູ້ວ່າພະເຈົ້າໄດ້ເລືອກເພິ່ນໃຫ້ເປັນຜູ້ປົກຄອງ. (ເອຊາຢາ 9:6; ລູກາ 22:28-30) ແນວໃດກໍຕາມ ພະເຢຊູບໍ່ໄດ້ແນ່ໃສ່ອຳນາດຫຼືການຍົກຍ້ອງທີ່ໂຕເອງຈະຮັບ. (ມັດທາຍ 11:29; ມາຣະໂກ 10:17, 18) ເພິ່ນສົ່ງເສີມການປົກຄອງຂອງພະເຈົ້າຍ້ອນເຫດຜົນທີ່ບໍ່ເຫັນແກ່ໂຕ. ແລ້ວເຫດຜົນຫຼັກທີ່ພະເຢຊູໄດ້ໃສ່ໃຈການປົກຄອງຂອງພະເຈົ້າaຈົນຮອດທຸກມື້ນີ້ ແມ່ນຍ້ອນສິ່ງທີ່ການປົກຄອງຂອງພະເຈົ້ານັ້ນຈະເຮັດເພື່ອຜູ້ທີ່ພະເຢຊູຮັກຄື ພໍ່ຂອງເພິ່ນທີ່ຢູ່ໃນສະຫວັນແລະພວກລູກສິດທີ່ສັດຊື່.
ສິ່ງທີ່ການປົກຄອງຂອງພະເຈົ້າຈະເຮັດເພື່ອພໍ່ຂອງພະເຢຊູ
ພະເຢຊູຮັກພໍ່ທີ່ຢູ່ໃນສະຫວັນສຸດຫົວໃຈ. (ສຸພາສິດ 8:30; ໂຢຮັນ 14:31) ເພິ່ນຍົກຍ້ອງຄຸນລັກສະນະອັນດີເລີດຂອງພໍ່ເຊັ່ນ ຄວາມຮັກ ຄວາມເມດຕາ ແລະຄວາມຍຸຕິທຳ. (ພະບັນຍັດ 32:4; ເອຊາຢາ 49:15; 1 ໂຢຮັນ 4:8) ແນ່ນອນພະເຢຊູທົນບໍ່ໄຫວເມື່ອຕ້ອງຟັງຄຳຕົວະທີ່ແພ່ອອກໄປກ່ຽວກັບພໍ່ຂອງໂຕເອງ ເຊັ່ນ ພະເຈົ້າບໍ່ເປັນຫ່ວງຄວາມທຸກຂອງຜູ້ຄົນແລະພະເຈົ້າເອງຕ້ອງການໃຫ້ພວກເຮົາມີຄວາມທຸກ. ນັ້ນຄືເຫດຜົນໜຶ່ງທີ່ພະເຢຊູປະກາດ “ຂ່າວດີເລື່ອງການປົກຄອງຂອງພະເຈົ້າ” ຢ່າງກະຕືລືລົ້ນ ເພິ່ນຮູ້ວ່າເມື່ອເຖິງເວລາ ການປົກຄອງຂອງພະເຈົ້າຈະກອບກູ້ຊື່ສຽງຂອງພໍ່ຄືນ. (ມັດທາຍ 4:23; 6:9, 10) ນັ້ນຈະເປັນໄປໄດ້ໂດຍວິທີໃດ?
ໂດຍໃຊ້ການປົກຄອງຂອງພະເຈົ້າ ພະເຢໂຫວາຈະລົງມືຈັດການຂັ້ນເດັດຂາດເພື່ອຜົນປະໂຫຍດຂອງມະນຸດ. “ພະເຈົ້າຈະເຊັດນ້ຳຕາທຸກຢົດ” ຈາກຕາຂອງຜູ້ທີ່ສັດຊື່ຕໍ່ພະເຈົ້າ. ພະເຢໂຫວາຈະຕັດຕົ້ນເຫດຂອງນ້ຳຕານັ້ນອອກໂດຍຮັບຮອງວ່າ “ຄວາມຕາຍຈະບໍ່ມີອີກຕໍ່ໄປ ຄວາມໂສກເສົ້າຫຼືສຽງຮ້ອງໄຫ້ເສຍໃຈຫຼືຄວາມເຈັບປວດຈະບໍ່ມີອີກເລີຍ.” (ພະນິມິດ 21:3, 4) ພະເຈົ້າຈະໃຊ້ການປົກຄອງຂອງເພິ່ນເພື່ອກຳຈັດຄວາມທຸກທັງໝົດຂອງມະນຸດ.b
ບໍ່ຕ້ອງສົງໄສເລີຍເປັນຫຍັງພະເຢຊູຈຶ່ງກະຕືລືລົ້ນໄປບອກຜູ້ຄົນໃຫ້ຮູ້ເລື່ອງການປົກຄອງຂອງພະເຈົ້າ! ເພິ່ນຮູ້ວ່າການປົກຄອງນັ້ນຈະສະແດງໃຫ້ເຫັນວ່າພໍ່ຂອງເພິ່ນມີພະລັງອຳນາດແລະມີຄວາມເມດຕາຫຼາຍສ່ຳໃດ. (ຢາໂກໂບ 5:11) ພະເຢຊູຍັງຮູ້ວ່າການປົກຄອງຂອງພະເຈົ້າຈະເປັນປະໂຫຍດສຳລັບຄົນອື່ນທີ່ເພິ່ນຮັກ ນັ້ນຄື ຜູ້ທີ່ສັດຊື່ຕໍ່ພະເຈົ້າ.
ສິ່ງທີ່ການປົກຄອງຂອງພະເຈົ້າຈະເຮັດເພື່ອຜູ້ທີ່ສັດຊື່ຕໍ່ພະເຈົ້າ
ກ່ອນທີ່ເພິ່ນຈະມາຢູ່ເທິງແຜ່ນດິນໂລກ ພະເຢຊູເຄີຍຢູ່ສະຫວັນມາດົນແລ້ວນຳພໍ່. ພໍ່ໄດ້ໃຊ້ລູກຊາຍເພື່ອສ້າງສັບພະທຸກສິ່ງຂຶ້ນມາໃຫ້ມີຊີວິດ ຕັ້ງແຕ່ທ້ອງຟ້າທີ່ໜ້າງຶດງໍ້ ເຊິ່ງເຕັມດ້ວຍດວງດາວທີ່ນັບບໍ່ຖ້ວນໄປຈົນເຖິງທຸກສິ່ງທີ່ມີຊີວິດຢູ່ເທິງແຜ່ນດິນໂລກທີ່ງົດງາມ. (ໂກໂລຊາຍ 1:15, 16) ແຕ່ໃນບັນດາທຸກສິ່ງທຸກຢ່າງທີ່ສ້າງຂຶ້ນມາ ພະເຢຊູ “ຮັກມະນຸດຫຼາຍ” ທີ່ສຸດ.—ສຸພາສິດ 8:31, ລ.ມ.
ພະເຢຊູສອນຜູ້ຄົນກ່ຽວກັບການປົກຄອງຂອງພະເຈົ້າດ້ວຍຄວາມຮັກ ເຫັນໄດ້ຊັດເຈນຕັ້ງແຕ່ຕົ້ນໆວ່າພະເຢຊູມາຢູ່ເທິງແຜ່ນດິນໂລກເພື່ອ “ປະກາດຂ່າວດີ” ແກ່ຄົນທຸກຍາກ. (ລູກາ 4: 18) ພະເຢຊູບໍ່ພຽງແຕ່ເວົ້າວ່າຕ້ອງຊ່ວຍຄົນ. ແຕ່ເພິ່ນໄດ້ສະແດງໃຫ້ເຫັນຫຼາຍເທື່ອວ່າເພິ່ນຮັກຜູ້ຄົນແທ້. ເມື່ອຜູ້ຄົນມາລວມໂຕຟັງພະເຢຊູສອນ ເພິ່ນ “ກໍຮູ້ສຶກອີ່ຕົນພວກເຂົາແລະໄດ້ປິ່ນປົວຄົນທີ່ເຈັບປ່ວຍ.” (ມັດທາຍ 14:14) ເມື່ອຜູ້ຊາຍຄົນໜຶ່ງທີ່ປ່ວຍໜັກສະແດງຄວາມເຊື່ອວ່າພະເຢຊູສາມາດປິ່ນປົວລາວໄດ້ຖ້າພະເຢຊູຢາກຊ່ວຍ ພະເຢຊູໄດ້ຮັກລາວ. ພະເຢຊູຕອບດ້ວຍຄວາມເມດຕາວ່າ: “ຂ້ອຍຢາກຊ່ວຍ! ໃຫ້ເຈົ້າເຊົາພະຍາດເດີ້” ແລ້ວກໍປົວຄົນນັ້ນ. (ລູກາ 5:12, 13) ເມື່ອພະເຢຊູເຫັນມາຣີ ໝູ່ຂອງລາວກຳລັງໂສກເສົ້າ ຍ້ອນວ່າລາຊະໂຣນ້ອງຊາຍຂອງລາວຕາຍ ພະເຢຊູກໍ “ໂສກເສົ້າ” “ສະເທືອນໃຈ” ແລະ “ຮ້ອງໄຫ້ນ້ຳຕາໄຫຼ.” (ໂຢຮັນ 11:32-36) ຈາກນັ້ນ ເພິ່ນກໍເຮັດສິ່ງທີ່ບໍ່ຂາດຄິດເລີຍ ພະເຢຊູປຸກລາຊະໂຣຄືນມາຈາກຕາຍ ທັງໆທີ່ລາວຕາຍໄດ້ 4 ມື້ແລ້ວ!—ໂຢຮັນ 11:38-44
ພະເຢຊູຮູ້ຢູ່ແລ້ວວ່າການຊ່ວຍເຫຼືອທີ່ເພິ່ນໃຫ້ຈະຢູ່ພຽງແຕ່ຊົ່ວຄາວ. ເພິ່ນຮູ້ດີວ່າບໍ່ຊ້າກໍໄວ ຜູ້ທີ່ປົວດີແລ້ວຈະເຈັບປ່ວຍອີກ ແລະຜູ້ທີ່ຄືນມາຈາກຕາຍກໍຈະຕາຍໄປອີກ. ແຕ່ພະເຢຊູຍັງຮູ້ວ່າການປົກຄອງຂອງພະເຈົ້າຈະກຳຈັດບັນຫາເຫຼົ່ານັ້ນໃຫ້ໝົດໄປຢ່າງຖາວອນ. ຍ້ອນແນວນີ້ ພະເຢຊູບໍ່ພຽງແຕ່ເຮັດການອັດສະຈັນເທົ່ານັ້ນ ແຕ່ຍັງປະກາດ “ຂ່າວດີເລື່ອງການປົກຄອງຂອງພະເຈົ້າ” ຢ່າງກະຕືລືລົ້ນ. (ມັດທາຍ 9:35) ການອັດສະຈັນທີ່ເພິ່ນເຮັດຢູ່ເທິງແຜ່ນດິນໂລກເປັນພຽງແຕ່ຕົວຢ່າງເລັກໆນ້ອຍໆຂອງສິ່ງທັງໝົດທີ່ການປົກຄອງຂອງພະເຈົ້າຈະເຮັດໃນອີກບໍ່ດົນຢູ່ທົ່ວໂລກ. ລອງເບິ່ງວ່າຄຳພີໄບເບິນໄດ້ສັນຍາວ່າແນວໃດກ່ຽວກັບເລື່ອງນີ້.
ຈະບໍ່ມີບັນຫາສຸຂະພາບອີກຕໍ່ໄປ
“ໃນຕອນນັ້ນ ຄົນຕາບອດຈະເຫັນຮຸ່ງ ແລະຄົນຫູໜວກຈະໄດ້ຍິນ ໃນຕອນນັ້ນ ຄົນເປັນລ່ອຍຈະໂດດໄດ້ຄືກວາງ ແລະຄົນປາກກືກຈະຮ້ອງຢ່າງມີຄວາມສຸກ.” ນອກຈາກນັ້ນ “ຢູ່ແຜ່ນດິນນັ້ນຈະບໍ່ມີໃຜເວົ້າວ່າ ‘ຂ້ອຍບໍ່ສະບາຍ.’”—ເອຊາຢາ 33:24; 35:5, 6
ຈະບໍ່ມີຄວາມຕາຍ
“ຄົນດີຈະໄດ້ຢູ່ໃນໂລກ ພວກເຂົາຈະໄດ້ຢູ່ໃນໂລກຕະຫຼອດໄປ.”—ຄຳເພງ 37:29, ລ.ມ.
“ເພິ່ນຈະທຳລາຍຄວາມຕາຍໃຫ້ດັບສູນຕະຫຼອດໄປ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດຈະເຊັດນ້ຳຕາໃຫ້ທຸກຄົນ.”—ເອຊາຢາ 25:8
ຄົນທີ່ຕາຍໄປແລ້ວຈະກັບຄືນມາມີຊີວິດ
“ທຸກຄົນເຊິ່ງຢູ່ໃນອຸໂມງຝັງສົບຈະໄດ້ຍິນສຽງເພິ່ນ ແລະຈະອອກມາ.”—ໂຢຮັນ 5:28, 29
“ຄົນ . . . ຈະຄືນມາຈາກຕາຍ.”—ກິດຈະການ 24:15
ຈະມີເຮືອນໃຫ້ຢູ່ພ້ອມກັບວຽກໃຫ້ເຮັດ
“ເຂົາເຈົ້າຈະປຸກເຮືອນແລະໄດ້ຢູ່ໃນເຮືອນນັ້ນ ເຂົາເຈົ້າຈະເຮັດສວນໝາກລະແຊັງແລະໄດ້ກິນໝາກຂອງມັນ. ເຂົາເຈົ້າຈະບໍ່ປຸກເຮືອນແລ້ວໃຫ້ຄົນອື່ນຢູ່ ເຂົາເຈົ້າຈະບໍ່ເຮັດສວນໝາກລະແຊັງແລ້ວໃຫ້ຄົນອື່ນກິນ. . .ແລະຄົນທີ່ເຮົາເລືອກໄວ້ຈະມີຄວາມສຸກຢ່າງເຕັມທີກັບວຽກທີ່ເຂົາເຈົ້າເຮັດ.”—ເອຊາຢາ 65:21, 22
ຈະບໍ່ມີສົງຄາມ
“ພະອົງຈະເຮັດໃຫ້ທົ່ວໂລກບໍ່ມີສົງຄາມອີກເລີຍ.”—ຄຳເພງ 46:9, ລ.ມ.
“ຊາດຕ່າງໆຈະບໍ່ຕໍ່ສູ້ກັນ ແລະຈະບໍ່ມີໃຜຝຶກເຮັດສົງຄາມອີກ.”—ເອຊາຢາ 2:4
ຈະບໍ່ມີການຂາດແຄນອາຫານ
“ແຜ່ນດິນຈະເກີດຜົນ ພະເຈົ້າ ພະເຈົ້າຂອງພວກເຮົາຈະອວຍພອນພວກເຮົາ.”—ຄຳເພງ 67:6, ລ.ມ.
“ຈະມີເຂົ້າຢ່າງຫຼວງຫຼາຍໃນແຜ່ນດິນ ເທິງຍອດເຂົາທັງຫຼາຍຈະມີເຂົ້າຢ່າງອຸດົມສົມບູນ.”—ຄຳເພງ 72:16, ລ.ມ.
ຈະບໍ່ມີຄວາມຍາກຈົນ
“ຄົນຈົນຈະບໍ່ໄດ້ຖືກລືມຕະຫຼອດໄປ”—ຄຳເພງ 9:18, ລ.ມ.
“ເຂົາຈະຊ່ວຍຄົນຈົນທີ່ຮ້ອງຂໍຄວາມຊ່ວຍເຫຼືອ ລວມທັງຄົນຕ່ຳຕ້ອຍແລະທຸກຄົນທີ່ບໍ່ມີໃຜຊ່ວຍ. ເຂົາຈະອີ່ຕົນຄົນຕ່ຳຕ້ອຍແລະຄົນຈົນ ເຂົາຈະຊ່ວຍຊີວິດຄົນຍາກຈົນ.”—ຄຳເພງ 72:12,13, ລ.ມ.
ເມື່ອເຈົ້າຄິດເຖິງຄຳສັນຍາຕ່າງໆນີ້ທີ່ການປົກຄອງຂອງພະເຈົ້າຈະເຮັດໃຫ້ເກີດຂຶ້ນ ເຈົ້າເຂົ້າໃຈບໍ ເປັນຫຍັງການປົກຄອງຂອງພະເຈົ້າຈຶ່ງເປັນເລື່ອງທີ່ສຳຄັນສຳລັບພະເຢຊູ? ຕອນທີ່ຢູ່ເທິງແຜ່ນດິນໂລກ ເພິ່ນບອກເລື່ອງການປົກຄອງຂອງພະເຈົ້າໃຫ້ກັບທຸກຄົນທີ່ຕ້ອງການຟັງ ຍ້ອນເພິ່ນຮູ້ວ່າການປົກຄອງນັ້ນຈະກຳຈັດບັນຫາຂອງມະນຸດໃຫ້ໝົດໄປ.
ເຈົ້າເດ ເຈົ້າມັກຄຳສັນຍາໃນຄຳພີໄບເບິນເລື່ອງການປົກຄອງຂອງພະເຈົ້າບໍ? ຖ້າມັກ ເຈົ້າຈະຮຽນຮູ້ເລື່ອງການປົກຄອງຂອງພະເຈົ້າຫຼາຍຂຶ້ນໄດ້ແນວໃດ? ແລະເຈົ້າຕ້ອງເຮັດແນວໃດເພື່ອເຈົ້າຈະຮັບປະໂຫຍດຈາກການປົກຄອງຂອງພະເຈົ້າຢ່າງແນ່ນອນ? ເຈົ້າຈະໄດ້ຄຳຕອບໃນບົດຄວາມຕໍ່ໄປ.
a ຕອນນີ້ ພະເຢຊູມີຊີວິດຢູ່ໃນສະຫວັນ ແລະຕັ້ງແຕ່ເພິ່ນກັບໄປຫັ້ນ ເຮົາໝັ້ນໃຈວ່າເພິ່ນແຮ່ງສົນໃຈເລື່ອງການປົກຄອງຂອງພະເຈົ້າ.—ລູກາ 24:51
b ສຳລັບຂໍ້ມູນກ່ຽວກັບເຫດຜົນທີ່ພະເຈົ້າຍອມໃຫ້ມະນຸດມີຄວາມທຸກເປັນໄລຍະໜຶ່ງ ຂໍເບິ່ງບົດ 11 ຂອງປຶ້ມຮຽນຄຳພີໄບເບິນແລ້ວໄດ້ຫຍັງ? ຈັດພິມໂດຍພະຍານພະເຢໂຫວາ