ໃຜຈະໄປສະຫວັນ?
ຄຳຕອບຈາກຄຳພີໄບເບິນ
ພະເຈົ້າເລືອກຄລິດສະຕຽນທີ່ສັດຊື່ຈຳນວນໜຶ່ງໃຫ້ໄປສະຫວັນ. (1 ເປໂຕ 1:3, 4) ຄົນທີ່ຖືກເລືອກຕ້ອງຮັກສາຄວາມເຊື່ອໃຫ້ເຂັ້ມແຂງແລະໃຊ້ຊີວິດໃນແບບທີ່ບໍລິສຸດແລະສະອາດຕໍ່ໆໄປເພື່ອຈະມີຄຸນສົມບັດເໝາະສົມທີ່ຈະໄດ້ຮັບຊີວິດໃນສະຫວັນ.—ເອເຟໂຊ 5:5; ຟີລິບປອຍ 3:12-14
ເຂົາເຈົ້າຈະໄປເຮັດຫຍັງໃນສະຫວັນ?
ຄົນທີ່ໄປສະຫວັນຈະເປັນກະສັດແລະປະໂລຫິດຮ່ວມກັບພະເຢຊູເປັນເວລາ 1.000 ປີ. (ພະນິມິດ 5:9, 10; 20:6) ເຂົາເຈົ້າຈະເປັນ “ຟ້າສະຫວັນໃໝ່” ຄືການປົກຄອງໃນສະຫວັນແລະຈະປົກຄອງ “ໂລກໃໝ່” ເຊິ່ງກໍຄືສັງຄົມມະນຸດທີ່ຢູ່ໃນໂລກແລະຊ່ວຍຟື້ນຟູມະນຸດທຸກຄົນໃຫ້ກັບມາເປັນຄົນດີແບບທີ່ພະເຈົ້າຕັ້ງໃຈໄວ້ຕັ້ງແຕ່ທຳອິດ.—ເອຊາຢາ 65:17; 2 ເປໂຕ 3:13
ຄົນທີ່ຈະໄປສະຫວັນມີຈຳນວນເທົ່າໃດ?
ຄຳພີໄບເບິນບອກຢ່າງຈະແຈ້ງວ່າມີຄົນ 144.000 ຄົນທີ່ຈະຖືກປຸກໃຫ້ຟື້ນຄືນມາຈາກຕາຍແລະມີຊີວິດໃນສະຫວັນ. (ພະນິມິດ 7:4) ນິມິດໃນປຶ້ມພະນິມິດ 14:1-3 ອັກຄະສາວົກໂຢຮັນເຫັນ “ລູກແກະຂອງພະເຈົ້າຢືນຢູ່ເທິງພູເຂົາຊີໂອນ ແລະມີຄົນ 144.000 ຄົນຢູ່ນຳ” ໃນນິມິດນີ້ “ລູກແກະ” ໝາຍເຖິງພະເຢຊູທີ່ຖືກປຸກໃຫ້ຄືນມາຈາກຕາຍ. (ໂຢຮັນ 1:29; 1 ເປໂຕ 1:19) “ພູເຂົາຊີໂອນ” ໝາຍເຖິງຕຳແໜ່ງສູງສົ່ງທີ່ພະເຢຊູກັບ 144.000 ຄົນໄດ້ຮັບໃນສະຫວັນ.—ຄຳເພງ 2:6; ເຮັບເຣີ 12:22
ຄົນທີ່ “ພະເຈົ້າໄດ້ເອີ້ນແລະເລືອກໄວ້” ໃຫ້ປົກຄອງຮ່ວມກັບພະຄລິດໃນສະຫວັນຍັງຖືກເອີ້ນວ່າ: “ແກະຝູງນ້ອຍ” ນຳ. (ພະນິມິດ 17:14; ລູກາ 12:32) ນີ້ສະແດງວ່າເຂົາເຈົ້າຈະມີຈຳນວນໜ້ອຍເມື່ອທຽບກັບແກະທັງໝົດຂອງພະເຢຊູ.—ໂຢຮັນ 10:16
ຄວາມເຊື່ອຜິດໆກ່ຽວກັບຄົນທີ່ຈະໄປສະຫວັນ
ບາງຄົນເຊື່ອວ່າ: ຄົນດີທຸກຄົນໄປສະຫວັນ
ຄວາມຈິງແມ່ນ: ພະເຈົ້າສັນຍາວ່າຄົນດີສ່ວນຫຼາຍຈະມີຊີວິດຕະຫຼອດໄປໃນໂລກ.—ຄຳເພງ 37:11, 29, 34
ພະເຢຊູບອກວ່າ: “ບໍ່ມີຜູ້ໃດເຄີຍຂຶ້ນໄປສະຫວັນ.” (ໂຢຮັນ 3:13) ການທີ່ພະເຢຊູເວົ້າແບບນີ້ສະແດງວ່າຄົນດີທີ່ຕາຍໄປກ່ອນເພິ່ນເຊັ່ນ: ອັບຣາຮາມ ໂມເຊ ໂຢບ ແລະດາວິດບໍໄດ້ໄປສະຫວັນ. (ກິດຈະການ 2:29, 34) ແຕ່ເຂົາເຈົ້າມີຄວາມຫວັງວ່າຈະໄດ້ຮັບການປຸກໃຫ້ຄືນມາຈາກຕາຍເພື່ອຢູ່ໃນໂລກ.—ໂຢບ 14:13-15
ການຟື້ນຄືນມາຈາກຕາຍເພື່ອໄປສະຫວັນເອີ້ນວ່າ: “ຄືນມາຈາກຕາຍລຳດັບທຳອິດ.” (ພະນິມິດ 20:6) ນີ້ໝາຍຄວາມວ່າຈະມີການຄືນມາຈາກຕາຍເພື່ອຢູ່ໃນໂລກ.
ຄຳພີໄບເບິນສອນວ່າເມື່ອການປົກຄອງຂອງພະເຈົ້າມາປົກຄອງ “ຄວາມຕາຍຈະບໍ່ມີອີກຕໍ່ໄປ.” (ພະນິມິດ 21:3, 4) ຄຳສັນຍານີ້ໃຊ້ໄດ້ກັບໂລກເທົ່ານັ້ນ ເພາະບໍ່ເຄີຍມີຄວາມຕາຍໃນສະຫວັນ.
ບາງຄົນເຊື່ອວ່າ: ມະນຸດທຸກຄົນເລືອກໄດ້ເອງວ່າຢາກມີຊີວິດໃນສະຫວັນຫຼືໃນໂລກ.
ຄວາມຈິງແມ່ນ: ພະເຈົ້າເປັນຜູ້ກຳນົດວ່າຄລິດສະຕຽນທີ່ສັດຊື່ຄົນໃດຈະໄດ້ “ລາງວັນ ນັ້ນແມ່ນຊີວິດໃນສະຫວັນຕາມທີ່ພະເຈົ້າເອີ້ນ.” (ຟີລິບປອຍ 3:14) ບໍ່ວ່າເຮົາຢາກຈະໄປສະຫວັນຫຼາຍສ່ຳໃດ ຖ້າພະເຈົ້າບໍ່ເລືອກກໍໄປສະຫວັນບໍ່ໄດ້.—ມັດທາຍ 20:20-23
ບາງຄົນເຊື່ອວ່າ: ຊີວິດຕະຫຼອດໄປໃນໂລກດ້ອຍຄ່າກວ່າຊີວິດໃນສະຫວັນ ເພາະຄົນທີ່ໄດ້ຢູ່ໃນໂລກແມ່ນຄົນທີ່ບໍ່ສົມຄວນຈະໄປສະຫວັນ.
ຄວາມຈິງແມ່ນ: ພະເຈົ້າເອີ້ນຄົນທີ່ຈະຢູ່ຕະຫຼອດໄປໃນໂລກວ່າ: “ປະຊາຊົນຂອງເຮົາ” “ຄົນທີ່ເຮົາເລືອກໄວ້” ແລະ “ຄົນທີ່ພະເຢໂຫວາອວຍພອນ” (ເອຊາຢາ 65:21-23, ລ.ມ.) ເຂົາເຈົ້າຈະມີສິດທິພິເສດໃນການເຮັດໃຫ້ຄວາມຕ້ອງການຂອງພະເຈົ້າຕັ້ງແຕ່ທຳອິດເກີດຂຶ້ນແທ້ ນັ້ນຄືມະນຸດສົມບູນແບບຢູ່ໃນໂລກທີ່ເປັນອຸທິຍານຕະຫຼອດໄປ.—ປະຖົມມະການ 1:28; ຄຳເພງ 115:16; ເອຊາຢາ 45:18
ບາງຄົນເຊື່ອວ່າ: ຈຳນວນ 144.000 ຄົນໃນປຶ້ມພະນິມິດເປັນພຽງສັນຍະລັກບໍ່ແມ່ນຈຳນວນຄົນທີ່ຈະໄປສະຫວັນແທ້ໆ.
ຄວາມຈິງແມ່ນ: ເຖິງວ່າປຶ້ມພະນິມິດຈະມີໂຕເລກທີ່ເປັນສັນຍະລັກຢູ່ຫຼາຍ ແຕ່ໂຕເລກບາງໂຕກໍເປັນຈຳນວນແທ້ໆ ເຊັ່ນ: “ຊື່ຂອງອັກຄະສາວົກ 12 ຄົນຂອງລູກແກະຂອງພະເຈົ້າ.” (ພະນິມິດ 21:14) ລອງມາເບິ່ງຫຼັກຖານທີ່ເຮັດໃຫ້ສະຫຼຸບໄດ້ວ່າຈຳນວນ 144,000 ຄົນເປັນຈຳນວນແທ້ໆບໍ່ແມ່ນສັນຍະລັກ.
ພະນິມິດ 7:4 ບອກວ່າ: “ຄົນທີ່ຖືກປະທັບກາ (ຫຼືໄດ້ຮັບການຮັບຮອງວ່າໄດ້ໄປສະຫວັນ) ມີຈຳນວນ 144.000 ຄົນ” ແຕ່ຂໍ້ຕໍ່ມາອີກບໍ່ເທົ່າໃດຂໍ້ມີການເວົ້າເຖິງຄົນອີກກຸ່ມໜຶ່ງແມ່ນ “ຄົນຝູງໃຫຍ່ທີ່ບໍ່ມີຜູ້ໃດນັບຈຳນວນໄດ້” ເຊິ່ງ “ຄົນຝູງໃຫຍ່” ນີ້ກໍໄດ້ຮັບຄວາມລອດຈາກພະເຈົ້າຄືກັນ. (ພະນິມິດ 7:9, 10) ຖ້າຈຳນວນ 144.000 ຄົນເປັນສັນຍະລັກໝາຍເຖິງຈຳນວນຫຼວງຫຼາຍບໍ່ຈຳກັດຢູ່ແລ້ວ ກໍບໍ່ຈຳເປັນຕ້ອງປຽບທຽບກັບຄົນອີກກຸ່ມໜຶ່ງ.a
ນອກຈາກນີ້ ປຶ້ມພະນິມິດອະທິບາຍວ່າຄົນ 144.000 ຄົນ “ຖືກຊື້ຈາກທ່າມກາງມະນຸດເຊິ່ງເປັນໝາກຜົນທຳອິດ.” (ພະນິມິດ 14:4) ຄຳວ່າ “ໝາກຜົນທຳອິດ” ໝາຍເຖິງສ່ວນນ້ອຍໆສ່ວນໜຶ່ງທີ່ຖືກຄັດອອກມາຈາກໝາກຜົນທັງໝົດ ເຊິ່ງເປັນຄຳທີ່ເໝາະຈະໃຊ້ກັບຄົນກຸ່ມນ້ອຍໆທີ່ຖືກເລືອກໃຫ້ໄປປົກຄອງໃນສະຫວັນຮ່ວມກັບພະເຢຊູເພື່ອເບິ່ງແຍງປະຊາຊົນເທິງໂລກເຊິ່ງມີຢ່າງຫຼວງຫຼາຍຈົນລະບຸຈຳນວນບໍ່ໄດ້.—ພະນິມິດ 5:10
a ສາສະດາຈານໂຣເບີດ ແອລ. ໂທມັດອະທິບາຍກ່ຽວກັບຈຳນວນ 144.000ຄົນ ໃນພະນິມິດ 7:4 ວ່າ: “ນີ້ເປັນຈຳນວນທີ່ຈຳກັດເຊິ່ງກົງກັນຂ້າມກັບຈຳນວນທີ່ບໍ່ຈຳກັດໃນພະນິມິດ 7:9 ຖ້າຈະຖືວ່າໂຕເລກນີ້ເປັນສັນຍະລັກກໍຄືຊິບໍ່ມີໂຕເລກໃດໃນປຶ້ມພະນິມິດເປັນຈຳນວນແທ້ໆໄດ້ເລີຍ.”—ພະນິມິດ 1-7: An Exegetical Commentary ໜ້າ 474