ເຄັດລັບທີ 5 ການມີເຫດຜົນ
“ຄວາມອ່ອນຫວານ [ຄວາມມີເຫດຜົນ] ຂອງທ່ານທັງຫຼາຍຈົ່ງໃຫ້ປາກົດແກ່ຄົນທັງປວງ.”—ຟິລິບ 4:5
ເລື່ອງນີ້ໝາຍຄວາມວ່າແນວໃດ? ຄອບຄົວປະສົບຄວາມສຳເລັດໄດ້ແມ່ນຍ້ອນຜົວແລະເມຍໃຫ້ອະໄພໃນຂໍ້ຜິດພາດຂອງກັນແລະກັນຢູ່ສະເໝີ. (ໂລມ 3:23) ຖ້າເປັນພໍ່ແມ່ກໍບໍ່ຄວນເຄັ່ງຄັດໂພດຫຼືຕາມໃຈລູກຫຼາຍໂພດ ແລະຄວນຕັ້ງກົດລະບຽບໃນຄອບຄົວແບບພໍດີພໍງາມ. ເມື່ອຈຳເປັນຕ້ອງແກ້ໄຂຕັກເຕືອນລູກ ພໍ່ແມ່ກໍຄວນເຮັດ “ຕາມກຳນົດ [ຕາມຄວາມເໝາະສົມ].”—ເຢເຣມີ 30:11
ເປັນຫຍັງເລື່ອງນີ້ຈຶ່ງສຳຄັນ? ຄຳພີໄບເບິນກ່າວວ່າ “ຄວາມປັນຍາທີ່ມາແຕ່ທາງເທິງນັ້ນ . . . ມີໃຈອົດທົນ [ມີເຫດຜົນ].” (ຢາໂກໂບ 3:17) ພະເຢໂຫວາເອງບໍ່ໄດ້ຮຽກຮ້ອງຄວາມດີເລີດຈາກມະນຸດທີ່ບໍ່ສົມບູນແບບ ຄັນຊັ້ນເປັນຫຍັງຜົວຫຼືເມຍຈຶ່ງຮຽກຮ້ອງແບບນັ້ນຈາກຄູ່ຂອງຕົນ? ທີ່ຈິງ ການຕຳໜິເລື່ອງຄວາມຜິດເລັກໆນ້ອຍໆມີແຕ່ພາໃຫ້ເຄືອງໃຈກັນ ແລະບໍ່ໄດ້ເຮັດໃຫ້ອັນໃດດີຂຶ້ນ. ດີທີ່ສຸດແມ່ນໃຫ້ຍອມຮັບວ່າ “ເຮົາທັງປວງກະທຳຜິດຫຼາຍປະການ.”—ຢາໂກໂບ 3:2
ພໍ່ແມ່ທີ່ປະສົບຄວາມສຳເລັດໃນຄອບຄົວຈະສະແດງຄວາມມີເຫດຜົນເມື່ອປະຕິບັດກັບລູກ. ພໍ່ແມ່ບໍ່ຄວນຕີສອນລູກຈົນເກີນຂອບເຂດ ທັງຈະບໍ່ເປັນຄົນທີ່ເອົາໃຈ “ຍາກ.” (1 ເປໂຕ 2:18) ພໍ່ແມ່ຄວນໃຫ້ລູກໄວຮຸ່ນມີອິດສະຫຼະພໍສົມຄວນເມື່ອລູກສະແດງໃຫ້ເຫັນວ່າມີຄວາມຮັບຜິດຊອບ. ພໍ່ແມ່ບໍ່ຄວນຄວບຄຸມຊີວິດຂອງລູກໃນເລື່ອງເລັກໆນ້ອຍໆ. ແຫຼ່ງອ້າງອີງໜຶ່ງກ່າວວ່າ ການພະຍາຍາມຄວບຄຸມທຸກຢ່າງໃນຊີວິດຂອງໄວຮຸ່ນ “ເປັນຄືກັບການເຊີ້ງຂໍຝົນແບບເອົາເປັນເອົາຕາຍ ແຕ່ຝົນກໍບໍ່ຕົກ ແລະພໍ່ແມ່ກໍເມື່ອຍລ້າໆ.”
ລອງວິທີຕໍ່ໄປນີ້. ໃຫ້ກວດກາເບິ່ງຄວາມມີເຫດຜົນຂອງເຮົາ ໂດຍຕອບຄຳຖາມຕໍ່ໄປນີ້.
◼ ເຮົາຍ້ອງຜົວຫຼືເມຍ ຄັ້ງສຸດທ້າຍຕອນໃດ?
◼ ເຮົາຕຳໜິຜົວຫຼືເມຍ ຄັ້ງສຸດທ້າຍຕອນໃດ?
ຕັ້ງໃຈຢ່າງເດັດຂາດ. ຢູ່ຂອບເບື້ອງຊ້າຍມື ຖ້າເຮົາຕອບຄຳຖາມຂໍ້ທີໜຶ່ງໄດ້ຍາກ ແຕ່ພັດຕອບຂໍ້ທີສອງໄດ້ງ່າຍ ຂໍໃຫ້ປັບປຸງຕົວເອງໃນສິ່ງທີ່ຄາດໝາຍຈາກຄູ່ຂອງເຮົາ.
ເປັນສິ່ງທີ່ດີຖ້າຈະລົມກັບຜົວຫຼືເມຍກ່ຽວກັບສິ່ງທີ່ເຮົາທັງສອງຕັ້ງໃຈຈະເຮັດ.
ໃຫ້ຄຶດຫາອິດສະຫຼະບາງຢ່າງທີ່ເຮົາອາດຍອມໃຫ້ລູກໄວຮຸ່ນມີຫຼາຍຂຶ້ນ ເມື່ອລູກສະແດງໃຫ້ເຫັນວ່າມີຄວາມຮັບຜິດຊອບ.
ຄົງຈະດີຖ້າເວົ້າແບບກົງໆກັບລູກໄວຮຸ່ນໃນເລື່ອງໂມງເວລາເມືອເຮືອນ.
[ຮູບພາບໜ້າ 7]
ເຊັ່ນດຽວກັບຄົນທີ່ຂັບລົດຢ່າງລະມັດລະວັງ ຄົນທີ່ມີເຫດຜົນໃນຄອບຄົວກໍພ້ອມຈະຍອມປ່ອຍທາງໃຫ້ຄົນອື່ນ