ບົດ 92
ພະເຍຊູປຸກຄົນຕາຍໃຫ້ເປັນຂຶ້ນມາອີກ
ເດັກຍິງທີ່ເຈົ້າເຫັນຢູ່ທີ່ນີ້ມີອາຍຸ 12 ປີ. ພະເຍຊູພວມຈັບມືນາງນ້ອຍ ແລະພໍ່ແມ່ຂອງນາງຢືນຢູ່ໃກ້ໆ. ເຈົ້າຮູ້ບໍວ່າເປັນຫຍັງພໍ່ແມ່ຈຶ່ງມີຄວາມຍິນດີແທ້ໆ? ໃຫ້ເຮົາຄົ້ນເບິ່ງຕໍ່ໄປ.
ພໍ່ຂອງນາງນ້ອຍເປັນຄົນສຳຄັນຊື່ຢາອິລຶດ. ມື້ນຶ່ງລູກສາວລົ້ມປ່ວຍ ແລະເຂົ້ານອນເທິງຕຽງ. ແຕ່ອາການຂອງນາງນ້ອຍບໍ່ດີຂຶ້ນ. ອາການກໍ່ຊຸດລົງເລື້ອຍໆ. ຢາອິລຶດແລະເມຍຮູ້ສຶກກັງວົນຫຼາຍ. ເພາະເບິ່ງຄືວ່າລູກສາວນ້ອຍພວມຈະຕາຍຢູ່ແລ້ວ. ນາງເປັນລູກໂທນຂອງເຂົາ. ດັ່ງນັ້ນຢາອິລຶດຈຶ່ງໄປຊອກຫາພະເຍຊູ. ເພາະທ່ານໄດ້ຍິນກ່ຽວກັບການອັດສະຈັນຕ່າງໆທີ່ພະເຍຊູພວມເຮັດ.
ເມື່ອຢາອິລຶດພົບພະເຍຊູ ຝູງຊົນມາກມາຍອ້ອມລ້ອມພະອົງ. ແຕ່ຢາອິລຶດສາມາດແຫວກຝູງຊົນເຂົ້າໄປແລະນ້ອມຕົວລົງທີ່ຕີນຂອງພະເຍຊູ. ທ່ານທູນວ່າ: ‘ລູກສາວຂອງຂ້າພະເຈົ້າພວມປ່ວຍໜັກ.’ ເຂົາຂໍຮ້ອງວ່າ: ‘ຂໍເຊີນພະອົງສະເດັດໄປປິ່ນປົວນາງໃຫ້ຫາຍປ່ວຍເຖີດ.’ ພະເຍຊູຮັບປາກວ່າພະອົງຈະໄປ.
ລະຫວ່າງທີ່ພວກເຂົາເດີນທາງໄປນັ້ນ ຝູງຄົນຊຸກບຽດກັນເພື່ອເຂົ້າໃກ້ພະອົງ. ພະເຍຊູຢຸດກະທັນຫັນ. ແລະພະອົງຖາມວ່າ: ‘ໃຜໄດ້ແຕະຕ້ອງເຮົາ?’ ພະເຍຊູຮູ້ສຶກວ່າມີອຳນາດຊ່ານອອກຈາກພະອົງ ສະນັ້ນພະອົງຈຶ່ງຮູ້ວ່າຕ້ອງມີຄົນໃດຄົນນຶ່ງໄດ້ແຕະຕ້ອງພະອົງ. ແຕ່ແມ່ນໃຜລະ? ແມ່ນຍິງຄົນນຶ່ງຜູ້ປ່ວຍໜັກເປັນເວລາ 12 ປີມາແລ້ວ. ນາງໄດ້ບາຍແຄມເສື້ອຂອງພະເຍຊູ ແລະກໍ່ຫາຍພະຍາດທັນທີ!
ເຫດການນີ້ເຮັດໃຫ້ຢາອິລຶດຮູ້ສຶກດີຂຶ້ນ ເພາະເຫັນວ່າການທີ່ພະເຍຊູຈະຮັກສາຜູ້ໃດໃຫ້ຫາຍພະຍາດນັ້ນງ່າຍອີ່ຫຼີ. ແຕ່ຄັນແລ້ວຄົນນຳຂ່າວມາເຖິງ. ເຂົາບອກຢາອິລຶດວ່າ: ‘ຢ່າລົບກວນພະເຍຊູອີກເລີຍ ລູກສາວຂອງທ່ານຕາຍແລ້ວ.’ ພະເຍຊູບັງເອີນໄດ້ຍິນແລະບອກຢາອິລຶດວ່າ: ‘ຢ່າເປັນທຸກ ລູກສາວຂອງເຈົ້າຈະຫາຍດີປົກກະຕິ’
ເມື່ອມາເຖິງເຮືອນຂອງຢາອິລຶດ ຜູ້ຄົນຕ່າງກໍ່ພາກັນຮ້ອງໄຫ້ດ້ວຍຄວາມໂສກເສົ້າເສຍໃຈໜັກ. ແຕ່ພະເຍຊູຕັດວ່າ: ‘ຢ່າຊູ່ຮ້ອງໄຫ້. ເດັກນັ້ນບໍ່ຕາຍດອກ ແຕ່ວ່ານອນຫຼັບທໍ່ນັ້ນເອງ.’ ແຕ່ພວກເຂົາຫົວຂວັນໃສ່ພະເຍຊູ ເພາະເຂົາຮູ້ວ່າເດັກສາວນັ້ນຕາຍແລ້ວ.
ຄັນແລ້ວພະເຍຊູກໍ່ນຳພໍ່ແມ່ຂອງເດັກແລະອັກຄະສາວົກສາມຄົນຂອງພະອົງເຂົ້າໄປໃນຫ້ອງທີ່ເດັກນັ້ນນອນຢູ່. ພະອົງຈັບມືຂອງເດັກຍິງນັ້ນແລະກ່າວວ່າ: ‘ຈົ່ງລຸກຂຶ້ນເຖີດ!’ ແລະເດັກຍິງນັ້ນກໍ່ກັບມາມີຊີວິດອີກ ຢ່າງທີ່ເຈົ້າເຫັນທີ່ນີ້. ແລະເດັກຍິງນັ້ນກໍ່ລຸກຂຶ້ນແລະຍ່າງໄປມາ! ດ້ວຍເຫດນັ້ນພໍ່ແມ່ຂອງເດັກຍິງຈຶ່ງມີຄວາມຍິນດີຫຼາຍ.
ນີ້ບໍ່ແມ່ນຄົນທຳອິດທີ່ພະເຍຊູໄດ້ປຸກໃຫ້ເປັນຂຶ້ນຈາກຕາຍ. ຄົນທຳອິດທີ່ພະຄຳພີກ່າວເຖິງຄືລູກຊາຍຂອງຍິງແມ່ໝ້າຍຄົນນຶ່ງຜູ້ອາໄສຢູ່ໃນເມືອງນາອິນ. ຕໍ່ມາພະເຍຊູປຸກລາຊະໂລຜູ້ເປັນນ້ອງຊາຍຂອງມາທາແລະມາລີໃຫ້ຂຶ້ນມາຈາກຕາຍດ້ວຍ. ເມື່ອພະເຍຊູປົກຄອງເປັນກະສັດຂອງພະເຈົ້າ ພະອົງຈະນຳເອົາຄົນທີ່ຕາຍແລ້ວເປັນຈຳນວນຫຼວງຫຼາຍກັບຄືນສູ່ຊີວິດອີກ. ເລື່ອງນັ້ນຈະບໍ່ເຮັດໃຫ້ເຮົາຊື່ນໃຈຍິນດີບໍ?
ລຶກາ 8:40-56; 7:11-17; ໂຍຮັນ 11:17-44.