ບົດຄວາມສຶກສາທີ 11
ເຮົາຈະໄດ້ຮັບປະໂຫຍດຈາກການອ່ານຄຳພີໄບເບິນໄດ້ແນວໃດ?
“ພະເຈົ້າຊ່ວຍພວກເຈົ້າໃຫ້ອົດທົນ.”—ຣມ. 15:5
ເພງ 94 ເຮົາຂອບໃຈພະເຈົ້າສຳລັບພະຄຳພີ
ໃຈຄວາມສຳຄັນa
1. ຜູ້ຮັບໃຊ້ພະເຢໂຫວາອາດເຈິບັນຫາຫຍັງແດ່?
ເຈົ້າກຳລັງເຈິບັນຫາທີ່ເຮັດໃຫ້ລຳບາກໃຈບໍ? ບາງເທື່ອພີ່ນ້ອງໃນປະຊາຄົມອາດເຮັດໃຫ້ເຈົ້າເສຍໃຈ. (ຢກບ. 3:2) ຫຼືໝູ່ຢູ່ໂຮງຮຽນຫຼືຢູ່ບ່ອນເຮັດວຽກອາດເຍາະເຍີ້ຍເຈົ້າຍ້ອນຮັບໃຊ້ພະເຢໂຫວາ. (1 ປຕ. 4:3, 4) ຫຼືຄົນໃນຄອບຄົວອາດພະຍາຍາມຂັດຂວາງເຈົ້າບໍ່ໃຫ້ໄປປະຊຸມ ຫຼືລົມເລື່ອງຄວາມເຊື່ອກັບຄົນອື່ນ. (ມທ. 10:35, 36) ບັນຫາເຫຼົ່ານີ້ອາດເຮັດໃຫ້ເຈົ້າຮູ້ສຶກທໍ້ໃຈແລະຢາກຍອມແພ້. ແຕ່ບໍ່ວ່າເຈົ້າຈະເຈິບັນຫາຫຍັງ ກໍຂໍໃຫ້ເຈົ້າໝັ້ນໃຈວ່າພະເຢໂຫວາຈະໃຫ້ສະຕິປັນຍາເພື່ອຊ່ອຍເຈົ້າໃຫ້ຕັດສິນໃຈໄດ້ດີ ແລະໃຫ້ກຳລັງເພື່ອຈະຊ່ອຍເຈົ້າໃຫ້ອົດທົນກັບບັນຫາເຫຼົ່ານີ້ໄດ້.
2. ຕາມໂຣມ 15:4 ການອ່ານຄຳພີໄບເບິນຊ່ອຍເຮົາໄດ້ແນວໃດ?
2 ພະເຢໂຫວາໃຫ້ບັນທຶກເລື່ອງຂອງຄົນທີ່ບໍ່ສົມບູນແບບໄວ້ໃນຄຳພີໄບເບິນ ເຊິ່ງເຂົາເຈົ້າສາມາດອົດທົນກັບບັນຫາຕ່າງໆໄດ້. ຍ້ອນຫຍັງ? ກໍຍ້ອນຢາກໃຫ້ເຮົາໄດ້ບົດຮຽນຈາກເລື່ອງຂອງເຂົາເຈົ້າ. ນີ້ຈຶ່ງເປັນເຫດຜົນທີ່ພະເຢໂຫວາໃຫ້ອັກຄະສາວົກໂປໂລຂຽນໂຣມ 15:4 (ອ່ານ) ເມື່ອເຮົາອ່ານເລື່ອງຕ່າງໆທີ່ຢູ່ໃນຄຳພີໄບເບິນ ກໍຈະຊ່ອຍເຮົາໃຫ້ໄດ້ຮັບກຳລັງໃຈແລະມີຄວາມຫວັງ. ເພື່ອຈະໄດ້ຮັບປະໂຫຍດເຮົາບໍ່ພຽງແຕ່ອ່ານເທົ່ານັ້ນ ແຕ່ເຮົາຕ້ອງໃຫ້ຄຳພີໄບເບິນປັບຄວາມຄິດແລະຈິດໃຈຂອງເຮົາ. ແລ້ວເຮົາຕ້ອງເຮັດຫຍັງແດ່ເພື່ອຈະຊອກຫາຄຳແນະນຳທີ່ຊ່ອຍໃຫ້ແກ້ໄຂບັນຫາໄດ້? ມີສີ່ຂັ້ນຕອນທີ່ເຮົາສາມາດເຮັດໄດ້ຄື: (1) ອະທິດຖານ (2) ນຶກພາບ (3) ຄິດຕຶກຕອງ ແລະ (4) ເຮັດຕາມ. ໃຫ້ເຮົາມາເບິ່ງວ່າເຮົາຈະໃຊ້ສີ່ຂັ້ນຕອນນີ້ແນວໃດb ແລະເຮົາຈະໃຊ້ວິທີນີ້ໃນການສຶກສາເລື່ອງຂອງກະສັດດາວິດແລະອັກຄະສາວົກໂປໂລແນວໃດ.
1. ອະທິດຖານ
ກ່ອນຈະອ່ານຄຳພີໄບເບິນ ໃຫ້ອະທິດຖານຂໍພະເຢໂຫວາຊ່ອຍໃຫ້ເຈົ້າເຫັນຄຳແນະນຳທີ່ຈະເອົາໄປໃຊ້ໄດ້ (ເບິ່ງຂໍ້ 3)
3. ກ່ອນເຈົ້າຈະອ່ານຄຳພີໄບເບິນເຈົ້າຄວນເຮັດຫຍັງແລະຍ້ອນຫຍັງ?
3 (1) ອະທິດຖານ. ກ່ອນເຈົ້າຈະເລີ່ມອ່ານຄຳພີໄບເບິນ ໃຫ້ອະທິດຖານເຖິງພະເຢໂຫວາເພື່ອຊ່ອຍເຈົ້າໃຫ້ໄດ້ຮັບປະໂຫຍດຈາກສິ່ງທີ່ອ່ານເຊັ່ນ: ເຈົ້າສາມາດຂໍພະເຢໂຫວາໃຫ້ຊ່ອຍເຈົ້າເຫັນຫຼັກການໃນຄຳພີໄບເບິນທີ່ຈະຊ່ອຍໃຫ້ແກ້ໄຂບັນຫາໄດ້.—ຟລປ. 4:6, 7; ຢກບ. 1:5
2. ນຶກພາບ
ໃຫ້ນຶກພາບວ່າເຈົ້າເປັນຕົວລະຄອນຫຼັກໃນເລື່ອງທີ່ເຈົ້າອ່ານ (ເບິ່ງຂໍ້ 4)
4. ເຈົ້າຈະເຂົ້າໃຈເລື່ອງຂອງຄົນໃນຄຳພີໄບເບິນຫຼາຍຂຶ້ນໄດ້ແນວໃດ?
4 (2) ນຶກພາບ. ພະເຢໂຫວາໃຫ້ເຮົາມີຄວາມສາມາດທີ່ຈະນຶກພາບເຖິງເລື່ອງຕ່າງໆໄດ້. ເພື່ອຈະເຂົ້າໃຈຊີວິດຂອງບຸກຄົນໃນຄຳພີໄບເບິນ ໃຫ້ນຶກພາບວ່າເຈົ້າເປັນຕົວລະຄອນທີ່ຢູ່ໃນເຫດການນັ້ນ ແລະນຶກພາບວ່າຕົວລະຄອນນັ້ນອາດຈະຄິດຫຼືຮູ້ສຶກແນວໃດ.
3. ຄິດຕຶກຕອງ
ຄິດຢ່າງເລິກເຊິ່ງກ່ຽວກັບສິ່ງທີ່ອ່ານ ແລະຄິດເບິ່ງວ່າຈະເອົາໄປໃຊ້ໄດ້ແນວໃດ (ເບິ່ງຂໍ້ 5)
5. ການຄິດຕຶກຕອງແມ່ນຫຍັງ ແລະເຈົ້າຈະເຮັດແບບນັ້ນໄດ້ແນວໃດ?
5 (3) ຄິດຕຶກຕອງ. ການຄິດຕຶກຕອງແມ່ນການຄິດຢ່າງເລິກເຊິ່ງກ່ຽວກັບສິ່ງທີ່ອ່ານ ແລະຄິດວ່າຈະເອົາສິ່ງນັ້ນໄປໃຊ້ໄດ້ແນວໃດ. ການເຮັດແບບນີ້ຈະຊ່ອຍເຈົ້າໃຫ້ເຂົ້າໃຈແນວຄິດຫຼັກແລະພາບລວມຂອງເລື່ອງນັ້ນໄດ້ດີຂຶ້ນ. ການອ່ານຄຳພີໄບເບິນໂດຍບໍ່ໄດ້ຄິດຕຶກຕອງກໍເປັນຄືກັບການທີ່ເຮົາເບິ່ງຊິ້ນສ່ວນຂອງຮູບຈິກຊໍທີ່ບໍ່ທັນໄດ້ປະກອບເຂົ້າກັນ. ເມື່ອເຮົາຄິດຕຶກຕອງກໍເປັນຄືກັບເຮົາກຳລັງເອົາຊິ້ນສ່ວນຂອງຮູບຈິກຊໍມາຕໍ່ເຂົ້າກັນເພື່ອຈະເຫັນຮູບທັງໝົດໄດ້. ເພື່ອຈະຊ່ອຍເຈົ້າໃຫ້ຄິດຕຶກຕອງ ໃຫ້ລອງຖາມຕົວເອງວ່າຕົວລະຄອນຫຼັກໃນເລື່ອງນີ້ໄດ້ເຮັດຫຍັງເພື່ອແກ້ໄຂບັນຫາ? ພະເຢໂຫວາຊ່ອຍລາວແນວໃດ? ຂ້ອຍຈະໃຊ້ບົດຮຽນຈາກເລື່ອງທີ່ອ່ານໄດ້ແນວໃດເພື່ອຊ່ອຍຂ້ອຍໃຫ້ອົດທົນກັບບັນຫາ?
4. ເຮັດຕາມ
ໃຫ້ນຳໃຊ້ສິ່ງທີ່ໄດ້ຮຽນເພື່ອຈະຕັດສິນໃຈໄດ້ດີຂຶ້ນ ມີຄວາມສະຫງົບໃຈຫຼາຍຂຶ້ນ ແລະມີຄວາມເຊື່ອທີ່ເຂັ້ມແຂງ (ເບິ່ງຂໍ້ 6)
6. ເປັນຫຍັງເຮົາຕ້ອງເຮັດຕາມສິ່ງທີ່ໄດ້ຮຽນ?
6 (4) ເຮັດຕາມ. ພະເຢຊູບອກວ່າຖ້າເຮົາບໍ່ເຮັດຕາມສິ່ງທີ່ຮຽນ ເຮົາກໍເປັນຄືກັບຄົນທີ່ສ້າງເຮືອນຢູ່ເທິງດິນຊາຍ. ເຖິງລາວຈະພະຍາຍາມຫຼາຍສ່ຳໃດ ແຕ່ກໍເສຍແຮງໄປລ້າໆ. ຍ້ອນຫຍັງ? ກໍຍ້ອນວ່າເມື່ອມີລົມແຮງແລະກະແສນ້ຳຊັດໃສ່ ເຮືອນລາວກໍຈະພັງ. (ມທ. 7:24-27) ຄ້າຍຄືກັນ ຖ້າເຮົາອະທິດຖານ ນຶກພາບ ແລະຄິດຕຶກຕອງແລ້ວແຕ່ວ່າບໍ່ໄດ້ເຮັດຕາມສິ່ງທີ່ຮຽນ ເຮົາກໍຈະບໍ່ໄດ້ປະໂຫຍດຫຍັງ. ດັ່ງນັ້ນ ເມື່ອເຮົາເຈິບັນຫາແລະຖືກຂົ່ມເຫງ ຄວາມເຊື່ອເຮົາກໍຈະອ່ອນລົງ. ແຕ່ກົງກັນຂ້າມ ຖ້າເຮົາສຶກສາຄົ້ນຄວ້າແລະເຮັດຕາມສິ່ງທີ່ໄດ້ຮຽນ ເຮົາກໍຈະຕັດສິນໃຈໄດ້ດີ ມີຄວາມສະຫງົບໃຈ ແລະມີຄວາມເຊື່ອທີ່ເຂັ້ມແຂງຫຼາຍຂຶ້ນ. (ເອຊາ. 48:17, 18) ຕອນນີ້ໃຫ້ເຮົາມາເບິ່ງວ່າ ເຮົາຈະໄດ້ບົດຮຽນຫຍັງຈາກເລື່ອງຂອງກະສັດດາວິດໂດຍໃຊ້ສີ່ຂັ້ນຕອນນີ້.
ເຈົ້າໄດ້ບົດຮຽນຫຍັງຈາກເລື່ອງຂອງດາວິດ?
7. ຕອນນີ້ເຮົາຈະຮຽນເລື່ອງຂອງໃຜ?
7 ໝູ່ຄູ່ຫຼືຄົນໃນຄອບຄົວຂອງເຈົ້າເຄີຍເຮັດໃຫ້ເຈົ້າເສຍໃຈບໍ? ຖ້າເປັນແບບນັ້ນ ເຈົ້າຈະໄດ້ຮັບປະໂຫຍດເມື່ອຮຽນເລື່ອງຂອງກະສັດດາວິດຕອນທີ່ອາບຊາໂລມລູກຊາຍຂອງລາວທໍລະຍົດລາວແລະພະຍາຍາມທີ່ຈະເປັນກະສັດແທນລາວ.—2 ຊາມ. 15:5-14, 31; 18:6-14
8. ເຈົ້າຈະເຮັດຫຍັງເພື່ອຈະໄດ້ຮັບຄວາມຊ່ວຍເຫຼືອຈາກພະເຢໂຫວາ?
8 (1) ອະທິດຖານ. ຕອນທີ່ຄິດເຖິງເລື່ອງຂອງດາວິດ ໃຫ້ອະທິດຖານບອກພະເຢໂຫວາໃຫ້ຮູ້ວ່າເຈົ້າຮູ້ສຶກແນວໃດເມື່ອຄົນອື່ນເຮັດບໍ່ດີຕໍ່ເຈົ້າ. (ເພງ. 6:6-9) ໃຫ້ເວົ້າແບບເຈາະຈົງ. ຈາກນັ້ນ ຂໍພະເຢໂຫວາຊ່ອຍເຈົ້າໃຫ້ເຫັນຫຼັກການທີ່ຈະຮູ້ວ່າຕ້ອງເຮັດແນວໃດກັບບັນຫາທີ່ມີຢູ່.
9. ເຈົ້າເລົ່າໄດ້ບໍວ່າເກີດຫຍັງຂຶ້ນກັບດາວິດແລະອາບຊາໂລມ?
9 (2) ນຶກພາບ. ຂໍໃຫ້ຄິດເຖິງເລື່ອງຂອງດາວິດ ແລະນຶກພາບເບິ່ງວ່າລາວເຈິບັນຫາຫຍັງແດ່. ອາບຊາໂລມລູກຊາຍຂອງດາວິດໄດ້ພະຍາຍາມຫຼາຍປີເພື່ອເຮັດໃຫ້ປະຊາຊົນມາຮັກລາວ. (2 ຊາມ. 15:7) ເມື່ອອາບຊາໂລມເຫັນວ່າເຖິງເວລາແລ້ວ ລາວກໍໄດ້ສົ່ງຄົນຂອງລາວໄປທົ່ວອິດສະຣາເອນເພື່ອກຽມປະຊາຊົນໃຫ້ຍອມຮັບວ່າລາວຈະຂຶ້ນເປັນກະສັດ. ລາວຍັງໄດ້ເຮັດໃຫ້ອາກີໂຕເຟນເຊິ່ງເປັນໝູ່ສະໜິດແລະທີ່ປຶກສາຂອງດາວິດເຂົ້າມາຮ່ວມກະບົດກັບລາວ. ເມື່ອອາບຊາໂລມປະກາດວ່າຕົວເອງເປັນກະສັດແລ້ວ ລາວກໍພະຍາຍາມໄລ່ຂ້າດາວິດເຊິ່ງຕອນນັ້ນດາວິດກໍບໍ່ສະບາຍຫຼາຍ. (ເພງ. 41:1-9) ດາວິດຮູ້ແຜນການຂອງອາບຊາໂລມ ລາວກໍເລີຍໜີອອກຈາກເຢຣູຊາເລັມ. ແລະສຸດທ້າຍທະຫານຂອງອາບຊາໂລມກໍສູ້ກັບທະຫານຂອງດາວິດ. ແຕ່ທະຫານຂອງອາບຊາໂລມຕີບໍ່ຊະນະ ແລ້ວອາບຊາໂລມກໍຖືກຂ້າ.
10. ດາວິດອາດຈະຮູ້ສຶກແນວໃດຕອນທີ່ມີບັນຫາ?
10 ຂໍໃຫ້ນຶກພາບອີກວ່າ ດາວິດຈະຮູ້ສຶກແນວໃດກັບສິ່ງທີ່ເກີດຂຶ້ນກັບລາວ. ລາວຮັກອາບຊາໂລມແລະໄວ້ໃຈອາກີໂຕເຟນແຕ່ທັງສອງຄົນກໍຫັກຫຼັງລາວ ເຮັດໃຫ້ລາວເສຍໃຈ ແລະເຖິງຂັ້ນພະຍາຍາມຈະຂ້າລາວ. ດາວິດອາດຈະຄິດວ່າໝູ່ຄົນອື່ນໆກໍໄປຢູ່ຝ່າຍອາບຊາໂລມ ແລະບໍ່ໄວ້ໃຈເຂົາເຈົ້າກໍໄດ້. ຫຼືລາວອາດຈະຄິດວ່າໜີໄປຢູ່ບ່ອນອື່ນຜູ້ດຽວກໍດີກວ່າ. ຫຼືລາວອາດຈະທໍ້ໃຈຫຼາຍຈົນບໍ່ຢາກເຮັດຫຍັງເລີຍ. ແທນທີ່ດາວິດຈະຄິດແບບນັ້ນ ລາວໄດ້ແກ້ໄຂບັນຫາແລະຜ່ານມັນໄປໄດ້. ຍ້ອນຫຍັງ?
11. ດາວິດໄດ້ເຮັດແນວໃດກັບສະພາບການຂອງລາວ?
11 (3) ຄິດຕຶກຕອງ. ເຈົ້າໄດ້ບົດຮຽນຫຍັງຈາກເລື່ອງຂອງດາວິດ? ເພື່ອຈະຮູ້ຄຳຕອບ ໃຫ້ເຮົາມາຕອບຄຳຖາມນີ້: “ດາວິດໄດ້ເຮັດຫຍັງເພື່ອຊ່ອຍຕົວເອງ?” ດາວິດບໍ່ໄດ້ຕື່ນຕົກໃຈແລະຕັດສິນໃຈແບບຟ້າວຟັ່ງ ແລະລາວກໍບໍ່ໄດ້ຢ້ານຫຼືທໍ້ໃຈຫຼາຍຈົນບໍ່ຢາກເຮັດຫຍັງເລີຍ. ແຕ່ລາວໄດ້ອະທິດຖານຂໍຄວາມຊ່ວຍເຫຼືອຈາກພະເຢໂຫວາ ແລະຂໍຄວາມຊ່ວຍເຫຼືອຈາກໝູ່ ແລ້ວລາວກໍລົງມືເຮັດຕາມທີ່ໄດ້ຕັດສິນໃຈນັ້ນ. ເຖິງວ່າດາວິດຈະເສຍໃຈຫຼາຍ ແຕ່ລາວກໍບໍ່ໄດ້ເກັບຄວາມຄຽດໄວ້. ລາວຍັງໄວ້ໃຈພະເຢໂຫວາແລະໄວ້ໃຈໝູ່ຄົນອື່ນໆ.
12. ພະເຢໂຫວາໄດ້ຊ່ອຍດາວິດແນວໃດ?
12 ພະເຢໂຫວາຊ່ອຍດາວິດແນວໃດ? ເມື່ອເຮົາຄົ້ນຄວ້າ ເຮົາກໍຈະເຫັນວ່າພະເຢໂຫວາໃຫ້ກຳລັງກັບດາວິດເພື່ອຈະອົດທົນກັບບັນຫາທີ່ຫຍຸ້ງຍາກນີ້ໄດ້. (ເພງ. 3:1-8; ຂໍ້ຄວາມຫົວບົດ) ພະເຢໂຫວາອວຍພອນການຕັດສິນໃຈຂອງດາວິດ ແລະເພິ່ນຍັງໄດ້ຊ່ອຍໝູ່ທີ່ສັດຊື່ຂອງລາວຕອນທີ່ເຂົາເຈົ້າຕໍ່ສູ້ເພື່ອປົກປ້ອງລາວ.
13. ເຈົ້າຈະຮຽນແບບດາວິດໄດ້ແນວໃດເມື່ອມີຄົນເຮັດໃຫ້ເຈົ້າເສຍໃຈຫຼາຍ? (ມັດທາຍ 18:15-17)
13 (4) ເຮັດຕາມ. ໃຫ້ຖາມຕົວເອງວ່າ “ຂ້ອຍຈະຮຽນແບບດາວິດແນວໃດ?” ເຈົ້າຕ້ອງລົງມືແກ້ໄຂບັນຫາທັນທີ. ໃຫ້ເຮັດຕາມຄຳແນະນຳຂອງພະເຢຊູທີ່ຢູ່ໃນມັດທາຍບົດທີ 18 ແຕ່ຈະເຮັດຕາມແຕ່ລະຂັ້ນຕອນຫຼືເຮັດຕາມຫຼັກການນັ້ນກໍຂຶ້ນຢູ່ກັບເຫດການທີ່ເກີດຂຶ້ນ. (ອ່ານມັດທາຍ 18:15-17) ແຕ່ເຈົ້າຕ້ອງບໍ່ຟ້າວຕັດສິນໃຈຕອນທີ່ຍັງໃຈຮ້າຍຢູ່. ເຈົ້າຄວນອະທິດຖານຂໍໃຫ້ພະເຢໂຫວາຊ່ອຍເຈົ້າໃຫ້ສະຫງົບໃຈແລະຮູ້ວ່າຈະເຮັດແນວໃດ. ຢ່າເຊົາໄວ້ໃຈໝູ່ ແຕ່ໃຫ້ເຕັມໃຈຮັບເອົາຄວາມຊ່ວຍເຫຼືອຈາກເຂົາເຈົ້າ. (ສຸພາ. 17:17) ແລະທີ່ສຳຄັນທີ່ສຸດ ເຈົ້າຄວນເຮັດຕາມຄຳແນະນຳທີ່ພະເຢໂຫວາໃຫ້ໄວ້ໃນຄຳພີໄບເບິນ.—ສຸພາ. 3:5, 6
ເຈົ້າໄດ້ບົດຮຽນຫຍັງຈາກເລື່ອງຂອງໂປໂລ?
14. ມີສະຖານະການຫຍັງແດ່ທີ່ອາດເຮັດໃຫ້ເຈົ້າໄດ້ຮັບກຳລັງໃຈຈາກ 2 ຕີໂມທຽວ 1:12-16; 4:6-11, 17-22?
14 ເຈົ້າຖືກຄົນໃນຄອບຄົວຕໍ່ຕ້ານຍ້ອນຮັບໃຊ້ພະເຢໂຫວາບໍ? ຫຼືເຈົ້າຢູ່ໃນປະເທດທີ່ວຽກປະກາດຖືກຈຳກັດຫຼືເຖິງຂັ້ນຖືກສັ່ງຫ້າມບໍ? ຖ້າເປັນແບບນັ້ນ ເຈົ້າອາດຈະໄດ້ກຳລັງໃຈເມື່ອອ່ານ 2 ຕີໂມທຽວ 1:12-16; 4:6-11, 17-22.c ໂປໂລໄດ້ຂຽນຂໍ້ຄຳພີເຫຼົ່ານີ້ຕອນທີ່ລາວຢູ່ໃນຄຸກ.
15. ເຈົ້າອາດຈະຂໍໃຫ້ພະເຢໂຫວາຊ່ອຍຫຍັງ?
15 (1) ອະທິດຖານ. ກ່ອນເຈົ້າຈະອ່ານເລື່ອງຂອງໂປໂລ ໃຫ້ອະທິດຖານບອກພະເຢໂຫວາຢ່າງເຈາະຈົງວ່າເຈົ້າມີບັນຫາຫຍັງແດ່ ແລະຮູ້ສຶກແນວໃດຕໍ່ບັນຫານັ້ນ. ຈາກນັ້ນ ໃຫ້ຂໍພະເຢໂຫວາຊ່ອຍເຈົ້າໃຫ້ຮູ້ວ່າ ຈະເອົາຫຼັກການຈາກເລື່ອງຂອງໂປໂລໄປໃຊ້ໄດ້ແນວໃດ.
16. ສະພາບການຂອງໂປໂລເປັນແນວໃດ?
16 (2) ນຶກພາບ. ໃຫ້ນຶກພາບວ່າເຈົ້າເປັນໂປໂລ. ໂປໂລຖືກລ່າມໂສ້ຢູ່ຄຸກໃນເມືອງໂຣມ. ເຖິງວ່າລາວຈະເຄີຍເຂົ້າຄຸກມາກ່ອນແລ້ວ ແຕ່ວ່າເທື່ອນີ້ລາວຮູ້ດີວ່າລາວຈະຕ້ອງຕາຍ. ນອກຈາກນັ້ນ ພີ່ນ້ອງບາງຄົນກໍໄດ້ຖິ້ມລາວໄປ ແຖມລາວຍັງມີບັນຫາສຸຂະພາບນຳອີກ.—2 ຕມ. 1:15
17. ໂປໂລອາດຮູ້ສຶກແນວໃດເມື່ອມີບັນຫາ?
17 ໂປໂລອາດຈະຄິດເຖິງອະດີດແລະຄິດວ່າຖ້າບໍ່ໄດ້ເລືອກຮັບໃຊ້ພະເຈົ້າ ລາວກໍຄືຊິບໍ່ຖືກຈັບແລະລຳບາກແບບນີ້. ລາວອາດຈະຄຽດໃຫ້ພີ່ນ້ອງໃນແຂວງອາຊີທີ່ໄດ້ຖິ້ມລາວໄປ. ແລະລາວອາດຈະບໍ່ໄວ້ໃຈໝູ່ຄົນອື່ນໆອີກກໍໄດ້. ແຕ່ໂປໂລບໍ່ໄດ້ຄິດແບບນັ້ນ. ເປັນຫຍັງໂປໂລຈຶ່ງໝັ້ນໃຈວ່າລາວຍັງມີໝູ່ທີ່ສັດຊື່ຕໍ່ລາວແລະພະເຢໂຫວາຈະໃຫ້ລາງວັນກັບລາວ?
18. ເມື່ອຢູ່ໃນສະພາບການທີ່ຫຍຸ້ງຍາກ ໂປໂລໄດ້ເຮັດຫຍັງແດ່?
18 (3) ຄິດຕຶກຕອງ. ໃຫ້ຕອບຄຳຖາມນີ້: “ໂປໂລໄດ້ຊ່ອຍຕົວເອງແນວໃດ?” ເຖິງໂປໂລຮູ້ວ່າອີກບໍ່ດົນຈະຕ້ອງຕາຍ ແຕ່ລາວກໍບໍ່ລືມວ່າສິ່ງທີ່ສຳຄັນທີ່ສຸດແມ່ນເຮັດໃຫ້ພະເຢໂຫວາໄດ້ຮັບກຽດ. ແລະລາວຍັງຄິດເຖິງວິທີທີ່ຈະສາມາດໃຫ້ກຳລັງໃຈຄົນອື່ນໄດ້. ລາວເພິ່ງພະເຢໂຫວາໂດຍອະທິດຖານເລື້ອຍໆ. (2 ຕມ. 1:3) ແທນທີ່ໂປໂລຈະຄິດເຖິງແຕ່ເລື່ອງທີ່ພີ່ນ້ອງໄດ້ຖິ້ມລາວ ລາວໄດ້ຄິດເຖິງໝູ່ທີ່ດີທີ່ໄດ້ຊ່ວຍເຫຼືອລາວແລະເຫັນຄຸນຄ່າສິ່ງທີ່ເຂົາເຈົ້າເຮັດ. ນອກຈາກນັ້ນ ໂປໂລກໍຍັງສຶກສາຄຳພີໄບເບິນເປັນປະຈຳ. (2 ຕມ. 3:16, 17; 4:13) ແລະທີ່ສຳຄັນທີ່ສຸດ ລາວໝັ້ນໃຈວ່າພະເຢໂຫວາແລະພະເຢຊູຮັກລາວ ພວກເພິ່ນຈະບໍ່ປະຖິ້ມລາວ ແລະຈະໃຫ້ລາງວັນກັບລາວທີ່ຮັບໃຊ້ຢ່າງສັດຊື່.
19. ພະເຢໂຫວາຊ່ອຍໂປໂລແນວໃດ?
19 ພະເຢໂຫວາບອກໂປໂລວ່າ ລາວຈະຕ້ອງອົດທົນກັບການຂົ່ມເຫງຍ້ອນເປັນຄລິດສະຕຽນ. (ກຈກ. 21:11-13) ພະເຢໂຫວາຊ່ອຍໂປໂລແນວໃດ? ພະເຢໂຫວາໄດ້ຕອບຄຳອະທິດຖານຂອງລາວ ແລະຕໍ່ມາກໍໃຫ້ກຳລັງໃຈລາວ. (2 ຕມ. 4:17) ພະເຢໂຫວາເຮັດໃຫ້ໂປໂລໝັ້ນໃຈວ່າ ລາວຈະໄດ້ຮັບລາງວັນຈາກວຽກຮັບໃຊ້ທີ່ລາວເຮັດ. ແລະເພິ່ນຍັງໄດ້ກະຕຸ້ນໝູ່ທີ່ສັດຊື່ໃຫ້ມາຊ່ວຍເຫຼືອໂປໂລ.
20. ຕາມໂຣມ 8:38, 39 ເຮົາຈະຮຽນແບບໂປໂລໄດ້ແນວໃດ?
20 (4) ເຮັດຕາມ. ໃຫ້ຖາມຕົວເອງວ່າ ‘ຂ້ອຍຈະຮຽນແບບໂປໂລໄດ້ແນວໃດ?’ ຄືກັບໂປໂລ ເຮົາຄວນຄາດໝາຍວ່າເຮົາຈະຖືກຂົ່ມເຫງຍ້ອນວ່າເຮົາຮັບໃຊ້ພະເຢໂຫວາ. (ມຣກ. 10:29, 30) ເພື່ອຈະຮັກສາຄວາມສັດຊື່ຕໍ່ພະເຢໂຫວາເມື່ອມີບັນຫາ ເຮົາຕ້ອງອະທິດຖານເຖິງເພິ່ນແລະສຶກສາຄຳພີໄບເບິນເປັນປະຈຳ. ແລະເຮົາຕ້ອງຈື່ໄວ້ສະເໝີວ່າ ສິ່ງສຳຄັນທີ່ສຸດແມ່ນຕ້ອງເຮັດໃຫ້ພະເຢໂຫວາໄດ້ຮັບກຽດ. ແລະເຮົາໝັ້ນໃຈໄດ້ວ່າພະເຢໂຫວາຈະບໍ່ຖິ້ມເຮົາ ແລະບໍ່ມີຫຍັງທີ່ຈະມາຂັດຂວາງເພິ່ນບໍ່ໃຫ້ສະແດງຄວາມຮັກຕໍ່ເຮົາ.—ອ່ານໂຣມ 8:38, 39; ຮຣ. 13:5, 6
ຮຽນຈາກເລື່ອງຂອງຄົນໃນຄຳພີໄບເບິນ
21. ສິ່ງໃດຊ່ອຍອາຢະແລະເຮັກເຕີໃຫ້ຜ່ານບັນຫາທີ່ຫຍຸ້ງຍາກໄປໄດ້?
21 ຕົວຢ່າງຂອງຄົນໃນຄຳພີໄບເບິນຈະຊ່ອຍເຮົາໃຫ້ມີກຳລັງທີ່ຈະອົດທົນກັບບັນຫາຕ່າງໆໄດ້ ບໍ່ວ່າເຮົາຈະຢູ່ໃນສະພາບການແບບໃດກໍຕາມ. ຕົວຢ່າງເຊັ່ນ: ອາຢະເຊິ່ງເປັນໄພໂອເນຍຢູ່ຍີ່ປຸ່ນບອກວ່າ ເລື່ອງຂອງໂຢນາຊ່ອຍລາວບໍ່ໃຫ້ຮູ້ສຶກຢ້ານຕອນທີ່ປະກາດສາທາລະນະ. ໃນອິນໂດເນເຊຍມີໄວລຸ້ນຄົນໜຶ່ງທີ່ຊື່ເຮັກເຕີເຊິ່ງພໍ່ແມ່ບໍ່ໄດ້ຮັບໃຊ້ພະເຢໂຫວາໄດ້ບອກວ່າ ເລື່ອງຂອງຣຸດຊ່ອຍລາວໃຫ້ຢາກຮຽນຮູ້ກ່ຽວກັບພະເຢໂຫວາແລະຮັບໃຊ້ເພິ່ນ.
22. ເຈົ້າຈະເຮັດແນວໃດເພື່ອຈະໄດ້ຮັບປະໂຫຍດຫຼາຍທີ່ສຸດຈາກການເບິ່ງລະຄອນໃນຄຳພີໄບເບິນ ຫຼືອ່ານບົດຄວາມຊຸດ “ຮຽນແບບຄວາມເຊື່ອຂອງພວກເຂົາ”?
22 ເຮົາຈະຊອກຫາຕົວຢ່າງຂອງຄົນໃນຄຳພີໄບເບິນທີ່ຈະຊ່ອຍເຮົາໃຫ້ມີກຳລັງໃຈໄດ້ຢູ່ໃສ? ໃນວິດີໂອ ລະຄອນສຽງ ແລະບົດຄວາມຊຸດ “ຮຽນແບບຄວາມເຊື່ອຂອງພວກເຂົາ” ຈະຊ່ອຍເຮົາໃຫ້ເຂົ້າໃຈຊີວິດຂອງເຂົາເຈົ້າເຊິ່ງຈະເຮັດໃຫ້ເຮົາມີກຳລັງໃຈ.d ກ່ອນເຈົ້າຈະເບິ່ງ ຟັງ ຫຼືອ່ານກ່ຽວກັບເລື່ອງນັ້ນ ໃຫ້ອະທິດຖານຂໍພະເຢໂຫວາໃຫ້ຊ່ອຍເຈົ້າເຫັນຈຸດສຳຄັນທີ່ຈະເອົາໄປໃຊ້ໄດ້. ໃຫ້ນຶກພາບວ່າຕົວເຈົ້າເອງເປັນຕົວລະຄອນຫຼັກໃນເລື່ອງນັ້ນ. ໃຫ້ຄິດຕຶກຕອງວ່າຜູ້ຮັບໃຊ້ທີ່ສັດຊື່ຂອງພະເຢໂຫວາໄດ້ເຮັດຫຍັງແດ່ ແລະເພິ່ນໄດ້ຊ່ອຍເຂົາເຈົ້າໃຫ້ອົດທົນກັບບັນຫາແນວໃດ. ຈາກນັ້ນ ໃຫ້ເອົາບົດຮຽນທີ່ເຈົ້າໄດ້ຮັບໄປໃຊ້ໃນຊີວິດ. ໃຫ້ຂອບໃຈພະເຢໂຫວາທີ່ຊ່ວຍເຫຼືອເຈົ້າ ແລະສະແດງໃຫ້ເຫັນວ່າເຈົ້າເຫັນຄ່າການຊ່ວຍເຫຼືອເຫຼົ່ານີ້ໂດຍໃຫ້ກຳລັງໃຈແລະຊ່ວຍເຫຼືອພີ່ນ້ອງຄົນອື່ນໆ.
23. ຕາມເອຊາອີ 41:10, 13 ພະເຢໂຫວາສັນຍາຫຍັງກັບເຮົາ?
23 ເນື່ອງຈາກຊາຕານປົກຄອງໂລກນີ້ ຊີວິດເຮົາຈຶ່ງຫຍຸ້ງຍາກແລະບາງຄັ້ງເຮົາກໍບໍ່ຮູ້ວ່າຈະເຮັດແນວໃດ. (2 ຕມ. 3:1) ແຕ່ເຮົາບໍ່ຕ້ອງຢ້ານຫຼືກັງວົນຫຼາຍເກີນໄປ ຍ້ອນພະເຢໂຫວາຮູ້ວ່າເຮົາມີບັນຫາຫຍັງແດ່. ແລະເມື່ອເຮົາຕ້ອງການຄວາມຊ່ວຍເຫຼືອ ພະເຢໂຫວາກໍຈະໃຊ້ມືຂວາຂອງເພິ່ນຊ່ວຍເຫຼືອເຮົາຕາມທີ່ເພິ່ນສັນຍາໄວ້. (ອ່ານເອຊາອີ 41:10, 13) ເຮົາໝັ້ນໃຈໄດ້ວ່າພະເຢໂຫວາຈະຊ່ອຍເຮົາ ແລະຕົວຢ່າງຂອງຄົນໃນຄຳພີໄບເບິນກໍຈະຊ່ອຍເຮົາໃຫ້ມີກຳລັງອົດທົນກັບບັນຫາຕ່າງໆໄດ້.
ເພງ 96 ປຶ້ມຄຳພີໄບເບິນປຽບເໝືອນຊັບສົມບັດ
a ມີຫຼາຍເລື່ອງໃນຄຳພີໄບເບິນທີ່ສະແດງໃຫ້ເຫັນວ່າ ພະເຢໂຫວາຮັກຜູ້ຮັບໃຊ້ຂອງເພິ່ນແລະຈະຊ່ອຍເຂົາເຈົ້າໃຫ້ອົດທົນກັບບັນຫາຕ່າງໆໄດ້. ໃນບົດຄວາມນີ້ເຮົາຈະມາເບິ່ງວ່າ ເຮົາຈະສຶກສາສ່ວນຕົວແນວໃດເພື່ອຈະໄດ້ຮັບປະໂຫຍດຈາກເລື່ອງທີ່ອ່ານໃນຄຳພີໄບເບິນ.
b ຂັ້ນຕອນທີ່ເວົ້າໃນບົດນີ້ເປັນພຽງວິທີການໜຶ່ງເທົ່ານັ້ນ ຍັງມີວິທີອື່ນອີກທີ່ຢູ່ໃນຄູ່ມືຄົ້ນຄວ້າສຳລັບພະຍານພະເຢໂຫວາ ຫົວຂໍ້ “ຄຳພີໄບເບິນ” ຫົວຂໍ້ຍ່ອຍ “ການອ່ານແລະການເຂົ້າໃຈຄຳພີໄບເບິນ.” ພາສາໄທ
c ບໍ່ອ່ານຂໍ້ຄຳພີເຫຼົ່ານີ້ຕອນທີ່ສຶກສາຫໍສັງເກດການ ໃນການປະຊຸມ.
d ເບິ່ງບົດຄວາມຊຸດ “ຮຽນແບບຄວາມເຊື່ອຂອງພວກເຂົາ—ຜູ້ຄົນໃນສະໄໝຄຳພີໄບເບິນ” ໃນເວັບໄຊ jw.org (ໄປທີ່ ຄຳສອນໃນຄຳພີໄບເບິນ > ຄວາມເຊື່ອໃນພະເຈົ້າ) ພາສາໄທ.