ບົດຄວາມສຶກສາທີ 53
ພີ່ນ້ອງຊາຍທີ່ຍັງໜຸ່ມ ຂໍໃຫ້ເຈົ້າເປັນຄລິດສະຕຽນທີ່ມີຄວາມເປັນຜູ້ໃຫຍ່
“ລູກຕ້ອງເຂັ້ມແຂງແລະກ້າຫານເດີ້.”—1ກສ. 2:2
ເພງ 135 ພະເຢໂຫວາເຊີນຢ່າງອົບອຸ່ນວ່າລູກຂອງເຮົາຈົ່ງມີປັນຍາເຖີດ
ໃຈຄວາມສຳຄັນa
1. ພີ່ນ້ອງຊາຍທຸກຄົນຕ້ອງເຮັດຫຍັງ?
ກະສັດດາວິດບອກໂຊໂລໂມນວ່າ: “ລູກຕ້ອງເຂັ້ມແຂງແລະກ້າຫານເດີ້.” (1ກສ. 2:1-3) ຄຳແນະນຳນີ້ສຳຄັນຫຼາຍສຳລັບພີ່ນ້ອງຊາຍທຸກຄົນໃນທຸກມື້ນີ້. ເພື່ອຈະເຮັດຕາມຄຳແນະນຳນີ້ ພີ່ນ້ອງຊາຍຕ້ອງເຊື່ອຟັງກົດໝາຍຂອງພະເຈົ້າແລະໃຊ້ຫຼັກການໃນຄຳພີໄບເບິນໃນທຸກແງ່ມຸມຂອງຊີວິດ. (ລກ. 2:52) ເປັນຫຍັງຈຶ່ງສຳຄັນທີ່ພີ່ນ້ອງຊາຍທີ່ຍັງໜຸ່ມຈະກ້າວໜ້າເປັນຄລິດສະຕຽນທີ່ມີຄວາມເປັນຜູ້ໃຫຍ່?
2-3. ເປັນຫຍັງຈຶ່ງສຳຄັນທີ່ພີ່ນ້ອງຊາຍທີ່ຍັງໜຸ່ມຕ້ອງພະຍາຍາມເປັນຄລິດສະຕຽນທີ່ມີຄວາມເປັນຜູ້ໃຫຍ່?
2 ພີ່ນ້ອງຊາຍທີ່ມີຄວາມເປັນຜູ້ໃຫຍ່ມີໜ້າທີ່ສຳຄັນຫຼາຍຢ່າງທັງໃນຄອບຄົວແລະໃນປະຊາຄົມ. ພີ່ນ້ອງຊາຍທີ່ຍັງໜຸ່ມ ເຈົ້າຄືຊິຄິດກ່ຽວກັບໜ້າທີ່ຮັບຜິດຊອບທີ່ເຈົ້າຈະເຮັດໃນອະນາຄົດເຊັ່ນ: ເຈົ້າອາດຈະຕັ້ງເປົ້າໝາຍທີ່ຈະຮັບໃຊ້ເຕັມເວລາ ເປັນຜູ້ຊ່ວຍວຽກຮັບໃຊ້ ແລະຕໍ່ມາກໍເປັນຜູ້ດູແລໃນປະຊາຄົມ. ເຈົ້າອາດຢາກແຕ່ງດອງແລະມີລູກ. (ອຟຊ. 6:4; 1ຕມ. 3:1) ດັ່ງນັ້ນ ເພື່ອຈະເຮັດຕາມເປົ້າໝາຍແລະເຮັດໜ້າທີ່ເຫຼົ່ານີ້ໄດ້ດີເຈົ້າຕ້ອງເປັນຄລິດສະຕຽນທີ່ມີຄວາມເປັນຜູ້ໃຫຍ່.b
3 ສິ່ງໃດຈະຊ່ວຍເຈົ້າໃຫ້ເປັນຄລິດສະຕຽນທີ່ມີຄວາມເປັນຜູ້ໃຫຍ່? ເຈົ້າຄວນຝຶກທັກສະຫຍັງແດ່? ແລະເຈົ້າຕ້ອງເຮັດຫຍັງເພື່ອຈະກຽມພ້ອມຕັ້ງແຕ່ຕອນນີ້ສຳລັບໜ້າທີ່ຮັບຜິດຊອບໃນອະນາຄົດແລະເຮັດວຽກນັ້ນໄດ້ດີ?
ສິ່ງທີ່ຈະຊ່ວຍເຈົ້າໃຫ້ເປັນຄລິດສະຕຽນທີ່ມີຄວາມເປັນຜູ້ໃຫຍ່
ການຮຽນແບບຄຸນລັກສະນະທີ່ດີຂອງພະເຢຊູຈະຊ່ວຍເຈົ້າໃຫ້ເປັນຄລິດສະຕຽນທີ່ມີຄວາມເປັນຜູ້ໃຫຍ່ (ເບິ່ງຂໍ້ 4)
4. ມີຕົວຢ່າງຂອງໃຜແດ່ທີ່ເຈົ້າສາມາດຮຽນແບບໄດ້? (ເບິ່ງຮູບ)
4 ຮຽນແບບຕົວຢ່າງທີ່ດີ. ໃນຄຳພີໄບເບິນມີຕົວຢ່າງທີ່ດີຂອງຜູ້ຊາຍທີ່ສັດຊື່ຫຼາຍຄົນທີ່ພີ່ນ້ອງຊາຍທີ່ຍັງໜຸ່ມສາມາດຮຽນແບບໄດ້. ເຂົາເຈົ້າຮັກພະເຈົ້າແລະເບິ່ງແຍງຄົນຂອງເພິ່ນ. ນອກຈາກນັ້ນ ຍັງມີຕົວຢ່າງທີ່ດີຂອງພີ່ນ້ອງຊາຍທີ່ມີຄວາມເປັນຜູ້ໃຫຍ່ໃນຄອບຄົວ ແລະໃນປະຊາຄົມຂອງເຈົ້າທີ່ເຈົ້າສາມາດຮຽນແບບໄດ້. (ຮຣ. 13:7) ເຮົາຍັງມີຕົວຢ່າງທີ່ດີທີ່ສຸດເຊິ່ງກໍຄືພະເຢຊູຄລິດ. (1ປຕ. 2:21) ຕອນທີ່ເຈົ້າຮຽນຮູ້ຕົວຢ່າງຂອງຄົນເຫຼົ່ານີ້ໃຫ້ສັງເກດວ່າເຂົາເຈົ້າມີຄຸນລັກສະນະທີ່ດີຫຍັງແດ່ ແລະຈະຮຽນແບບເຂົາເຈົ້າແນວໃດ?—ຮຣ. 12:1, 2
5. ເຈົ້າຈະພັດທະນາຄວາມສຸຂຸມຮອບຄອບໄດ້ແນວໃດ? ແລະເປັນຫຍັງເລື່ອງນີ້ຈຶ່ງສຳຄັນ? (ຄຳເພງ 119:9)
5 ພັດທະນາແລະ “ຮັກສາ . . . ຄວາມສຸຂຸມຮອບຄອບເອົາໄວ້.” (ສຸພາ. 3:21, ລ.ມ) ຜູ້ຊາຍທີ່ສຸຂຸມຮອບຄອບຈະບໍ່ເຮັດຫຍັງແບບໃຈຮ້ອນ ແຕ່ລາວຈະຄິດກ່ອນສະເໝີ. ດັ່ງນັ້ນ ໃຫ້ເຈົ້າພະຍາຍາມພັດທະນາແລະຮັກສາຄຸນລັກສະນະນີ້ເອົາໄວ້. ຍ້ອນຫຍັງ? ຍ້ອນຄົນໜຸ່ມໃນທຸກມື້ນີ້ມັກເຮັດຕາມໃຈໂຕເອງແລະໃຫ້ອາລົມຢູ່ເໜືອເຫດຜົນ. (ສຸພາ. 7:7; 29:11) ນອກຈາກນັ້ນ ສື່ຕ່າງໆອາດມີອິດທິພົນຕໍ່ຄວາມຄິດແລະການກະທຳຂອງເຈົ້າ. ຄັນຊັ້ນ ເຈົ້າຕ້ອງເຮັດແນວໃດເພື່ອຈະມີຄວາມສຸຂຸມຮອບຄອບ? ໃຫ້ຮຽນຮູ້ຫຼັກການໃນຄຳພີໄບເບິນແລະຄິດວ່າມັນເປັນປະໂຫຍດແນວໃດ. ຈາກນັ້ນ ໃຫ້ໃຊ້ຫຼັກການເຫຼົ່ານັ້ນຊ່ວຍເຈົ້າໃນການຕັດສິນໃຈເພື່ອຈະເຮັດສິ່ງທີ່ພະເຢໂຫວາພໍໃຈ. (ອ່ານຄຳເພງ 119:9) ຖ້າເຈົ້າພັດທະນາຄຸນລັກສະນະນີ້ມັນກໍຈະຊ່ວຍເຈົ້າໃຫ້ເປັນຄລິດສະຕຽນທີ່ມີຄວາມເປັນຜູ້ໃຫຍ່. (ສຸພາ. 2:11, 12; ຮຣ. 5:14) ໃຫ້ເຮົາມາເບິ່ງວ່າຄວາມສຸຂຸມຮອບຄອບຈະຊ່ວຍເຈົ້າແນວໃດໃນ 2 ເລື່ອງຕໍ່ໄປນີ້: (1) ວິທີທີ່ເຈົ້າປະຕິບັດກັບພີ່ນ້ອງຍິງ ແລະ (2) ການແຕ່ງໂຕຂອງເຈົ້າ.
6. ພີ່ນ້ອງຊາຍທີ່ສຸຂຸມຮອບຄອບຈະໃຫ້ກຽດພີ່ນ້ອງຍິງແນວໃດ?
6 ຄວາມສຸຂຸມຮອບຄອບຈະເຮັດໃຫ້ເຈົ້າໃຫ້ກຽດພີ່ນ້ອງຍິງ. ເປັນເລື່ອງປົກກະຕິແລະເປັນເລື່ອງທີ່ດີທີ່ພີ່ນ້ອງຊາຍທີ່ຍັງໜຸ່ມຈະສະແດງຄວາມຮັກຕໍ່ພີ່ນ້ອງຍິງທີ່ເປັນຄລິດສະຕຽນ. ແຕ່ຖ້າລາວບໍ່ຄິດທີ່ຈະແຕ່ງດອງກັບພີ່ນ້ອງຍິງຄົນນັ້ນລາວກໍບໍ່ຄວນເວົ້າ ສົ່ງຂໍ້ຄວາມ ຫຼືເຮັດຫຍັງກໍຕາມທີ່ເຮັດໃຫ້ພີ່ນ້ອງຍິງຄົນນັ້ນເຂົ້າໃຈຜິດ. (1ຕມ. 5:1, 2) ຖ້າລາວກຳລັງຄົບຫາກັບພີ່ນ້ອງຍິງຄົນໜຶ່ງຢູ່ ລາວຈະປົກປ້ອງຊື່ສຽງຂອງພີ່ນ້ອງຍິງຄົນນັ້ນໂດຍບໍ່ໄປຫັ້ນມານີ້ນຳກັນສອງຕໍ່ສອງ ຕ້ອງມີໝູ່ໄປນຳ.—1ກຣ. 6:18
7. ຄວາມສຸຂຸມຮອບຄອບຈະຊ່ວຍພີ່ນ້ອງຊາຍທີ່ຍັງໜຸ່ມແນວໃດ ຕອນທີ່ເຂົາເຈົ້າເລືອກເຄື່ອງນຸ່ງແລະການແຕ່ງໂຕ?
7 ອີກເລື່ອງໜຶ່ງທີ່ພີ່ນ້ອງຊາຍທີ່ຍັງໜຸ່ມສະແດງໃຫ້ເຫັນວ່າມີຄວາມສຸຂຸມຮອບຄອບກໍຄື: ວິທີທີ່ລາວຕັດສິນໃຈເລືອກເຄື່ອງນຸ່ງແລະການແຕ່ງໂຕ. ຄົນທີ່ອອກແບບເຄື່ອງນຸ່ງແລະແຟຊັ້ນໃນທຸກມື້ນີ້ສ່ວນຫຼາຍແລ້ວເປັນຄົນທີ່ບໍ່ນັບຖືພະເຢໂຫວາແລະໃຊ້ຊີວິດແບບຜິດສິນລະທຳ. ວິທີທີ່ເຂົາເຈົ້າໃຊ້ຊີວິດສະແດງໃຫ້ເຫັນຈາກເຄື່ອງນຸ່ງທີ່ເຂົາເຈົ້າໃສ່ເຊິ່ງຮັດຮູບຫຼາຍ ແລະເຄື່ອງນຸ່ງທີ່ເຮັດໃຫ້ຜູ້ຊາຍເບິ່ງຄືຜູ້ຍິງ. ດັ່ງນັ້ນ ຕອນທີ່ຄລິດສະຕຽນທີ່ມີຄວາມເປັນຜູ້ໃຫຍ່ຕັດສິນໃຈວ່າຈະເລືອກເຄື່ອງນຸ່ງແບບໃດ ລາວຈະຄິດເຖິງຫຼັກການໃນຄຳພີໄບເບິນ ແລະຄິດເຖິງຄົນທີ່ເປັນຕົວຢ່າງທີ່ດີໃນປະຊາຄົມ. ລາວອາດຖາມໂຕເອງວ່າ: ‘ການຕັດສິນໃຈຂອງຂ້ອຍສະແດງໃຫ້ເຫັນບໍ່ວ່າຂ້ອຍເປັນຄົນທີ່ມີສະຕິດີແລະຄິດເຖິງຄວາມຮູ້ສຶກຂອງຄົນອື່ນ? ວິທີທີ່ຂ້ອຍແຕ່ງໂຕເຮັດໃຫ້ຄົນອື່ນເຊື່ອແທ້ໆບໍ່ວ່າຂ້ອຍເປັນຜູ້ຮັບໃຊ້ຂອງພະເຈົ້າ?’ (1ກຣ. 10:31-33; ຕຕ. 2:6) ພີ່ນ້ອງຊາຍທີ່ຍັງໜຸ່ມທີ່ມີຄວາມສຸຂຸມຮອບຄອບຈະໄດ້ຮັບຄວາມນັບຖືຈາກພີ່ນ້ອງ ແລະເຮັດໃຫ້ພະເຢໂຫວາພໍໃຈ.
8. ພີ່ນ້ອງຊາຍທີ່ຍັງໜຸ່ມຄວນເຮັດແນວໃດເພື່ອຈະເປັນຄົນທີ່ໄວ້ໃຈໄດ້?
8 ເປັນຄົນທີ່ໄວ້ໃຈໄດ້. ພີ່ນ້ອງຊາຍທີ່ຍັງໜຸ່ມທີ່ໄວ້ໃຈໄດ້ຈະເປັນຄົນທີ່ມີຄວາມຮັບຜິດຊອບ ແລະເຮັດວຽກທີ່ໄດ້ຮັບມອບໝາຍໃຫ້ສຳເລັດ. (ລກ. 16:10) ຕົວຢ່າງທີ່ດີທີ່ສຸດທີ່ເຈົ້າຈະຮຽນແບບໄດ້ກໍຄືພະເຢຊູ. ພະເຢຊູເອົາໃຈໃສ່ວຽກມອບໝາຍທຸກຢ່າງທີ່ເພິ່ນໄດ້ຮັບ ແລະເພິ່ນກໍມີຄວາມຮັບຜິດຊອບນຳ. ພະເຢຊູເຮັດວຽກມອບໝາຍທີ່ພະເຢໂຫວາໃຫ້ກັບເພິ່ນເຖິງວ່າວຽກນັ້ນຈະຍາກຫຼາຍ. ພະເຢຊູຮັກຄົນອື່ນໂດຍສະເພາະພວກລູກສິດຂອງເພິ່ນ ແລະເພິ່ນເຕັມໃຈເສຍຊີວິດເພື່ອເຂົາເຈົ້າ. (ຢຮ. 13:1) ດັ່ງນັ້ນ ເຈົ້າຈະຮຽນແບບພະເຢຊູໄດ້ໂດຍເຮັດວຽກມອບໝາຍສຸດຄວາມສາມາດ ແລະຖ້າບໍ່ແນ່ໃຈວ່າວຽກນັ້ນເຮັດແນວໃດກໍໃຫ້ຖ່ອມໃຈແລະຂໍຄວາມຊ່ວຍເຫຼືອຈາກພີ່ນ້ອງຊາຍທີ່ມີຄວາມເປັນຜູ້ໃຫຍ່. ຢ່າເຮັດພໍແລ້ວມືແລ້ວຕີນຊື່ໆ ແຕ່ໃຫ້ເຮັດວຽກນັ້ນສຸດຄວາມສາມາດຄືກັບ “ເຮັດໃຫ້ພະເຢໂຫວາບໍ່ແມ່ນເຮັດໃຫ້ມະນຸດ.” (ຣມ. 12:11; ກລຊ. 3:23) ແນ່ນອນວ່າເຈົ້າເປັນຄົນທີ່ບໍ່ສົມບູນແບບ ດັ່ງນັ້ນ ເຈົ້າອາດເຮັດຜິດພາດໄດ້. ຖ້າເປັນແນວນັ້ນ ໃຫ້ເຈົ້າຖ່ອມໃຈແລະຍອມຮັບຜິດ.—ສຸພາ. 11:2
ຝຶກທັກສະຕ່າງໆທີ່ເປັນປະໂຫຍດ
9. ເປັນຫຍັງພີ່ນ້ອງຊາຍທີ່ຍັງໜຸ່ມຄວນຝຶກທັກສະຕ່າງໆທີ່ເປັນປະໂຫຍດ?
9 ເພື່ອເຈົ້າຈະເປັນຄລິດສະຕຽນທີ່ມີຄວາມເປັນຜູ້ໃຫຍ່ເຈົ້າຄວນຝຶກທັກສະບາງຢ່າງ. ການເຮັດແບບນີ້ຈະເປັນປະໂຫຍດຫຼາຍເຊັ່ນ: ມັນຈະເຮັດໃຫ້ເຈົ້າຊ່ວຍວຽກໃນປະຊາຄົມໄດ້ ລ້ຽງໂຕເອງແລະຄອບຄົວໄດ້. ນອກຈາກນັ້ນ ຍັງຊ່ວຍເຈົ້າໃຫ້ໃກ້ຊິດກັບພະເຢໂຫວາຫຼາຍຂຶ້ນ. ໃຫ້ເຮົາມາເບິ່ງວ່າມີທັກສະຫຍັງແດ່ທີ່ເຈົ້າຈະຝຶກໄດ້.
ການອ່ານແລະຂຽນໄດ້ດີຈະເປັນປະໂຫຍດຕໍ່ເຈົ້າແລະປະຊາຄົມ (ເບິ່ງຂໍ້ 10-11)
10-11. ຖ້າພີ່ນ້ອງຊາຍທີ່ຍັງໜຸ່ມອ່ານແລະຂຽນໄດ້ດີ ມັນຈະເປັນປະໂຫຍດກັບລາວແລະພີ່ນ້ອງໃນປະຊາຄົມແນວໃດ? (ຄຳເພງ 1:1-3) (ເບິ່ງຮູບ)
10 ອ່ານແລະຂຽນໄດ້ດີ. ຄຳພີໄບເບິນບອກວ່າຄົນທີ່ອ່ານແລະຄິດຕຶກຕອງກົດໝາຍຂອງພະເຢໂຫວາທຸກມື້ຈະມີຄວາມສຸກ ແລະທຸກສິ່ງທີ່ລາວເຮັດຈະສຳເລັດ. (ອ່ານຄຳເພງ 1:1-3) ການອ່ານຄຳພີໄບເບິນທຸກມື້ຈະຊ່ວຍລາວໃຫ້ຮູ້ວ່າພະເຢໂຫວາຄິດແນວໃດແລ້ວຄິດຄືກັບເພິ່ນ ແລະລາວຈະຮູ້ວິທີເອົາຄຳແນະນຳໃນຄຳພີໄບເບິນໄປໃຊ້. (ສຸພາ. 1:3, 4) ທຸກປະຊາຄົມຈຳເປັນຕ້ອງມີພີ່ນ້ອງຊາຍແບບນີ້. ຍ້ອນຫຍັງ?
11 ພີ່ນ້ອງໃນປະຊາຄົມຕ້ອງການພີ່ນ້ອງຊາຍທີ່ມີຄວາມສາມາດໃນການສອນແລະໃຫ້ຄຳແນະນຳຈາກຄຳພີໄບເບິນໄດ້. (ຕຕ. 1:9) ຖ້າເຈົ້າອ່ານແລະຂຽນໄດ້ດີ ເຈົ້າຈະກຽມຄຳບັນລະຍາຍ ແລະອອກຄວາມຄິດເຫັນໃນແບບທີ່ເປັນປະໂຫຍດຕໍ່ພີ່ນ້ອງ ແລະຊ່ວຍເຂົາເຈົ້າໃຫ້ມີຄວາມເຊື່ອເຂັ້ມແຂງ. ນອກຈາກນັ້ນ ຖ້າເຈົ້າອ່ານແລະຂຽນໄດ້ດີມັນຈະຊ່ວຍເຈົ້າຕອນສຶກສາສ່ວນໂຕ ຕອນທີ່ຟັງຄຳບັນລະຍາຍໃນການປະຊຸມປະຊາຄົມແລະການປະຊຸມໃຫຍ່. ສິ່ງທີ່ເຈົ້າຈົດໄວ້ຈະຊ່ວຍເຈົ້າໃຫ້ມີຄວາມເຊື່ອເຂັ້ມແຂງແລະໃຫ້ກຳລັງໃຈຄົນອື່ນ.
12. ສິ່ງໃດຈະຊ່ວຍເຈົ້າໃຫ້ເປັນຜູ້ຟັງແລະສື່ສານໄດ້ດີ?
12 ຟັງແລະສື່ສານໄດ້ດີ. ພີ່ນ້ອງຊາຍຄວນຝຶກທີ່ຈະຟັງແລະສື່ສານໄດ້ດີເຊິ່ງໝາຍເຖິງເປັນຜູ້ຟັງທີ່ດີ ແລະເຂົ້າໃຈຄວາມຄິດກັບຄວາມຮູ້ສຶກຂອງຄົນອື່ນ. (ສຸພາ. 20:5) ລາວຄວນຝຶກສັງເກດສີໜ້າ ທ່າທາງ ແລະສຽງຂອງຄົນທີ່ລາວລົມນຳ. ເຈົ້າຈະຝຶກແບບນີ້ບໍ່ໄດ້ ຖ້າເຈົ້າບໍ່ໄດ້ລົມກັບຄົນອື່ນແບບໜ້າຕໍ່ໜ້າ ແລະຖ້າເຈົ້າມີແຕ່ຕິດຕໍ່ກັບຄົນອື່ນຜ່ານອຸປະກອນເອເລັກໂຕຣນິກ ເຊັ່ນ: ສົ່ງອີເມວຫຼືສົ່ງຂໍ້ຄວາມ ເຈົ້າກໍຈະຟັງແລະສື່ສານບໍ່ໄດ້ດີ. ດັ່ງນັ້ນ ແທນທີ່ຈະລົມກັບຄົນອື່ນຜ່ານອຸປະກອນເຫຼົ່ານີ້ໃຫ້ເຈົ້າພະຍາຍາມລົມແບບໜ້າຕໍ່ໜ້າ.—2ຢຮ. 12
ການຮຽນທັກສະບາງຢ່າງຈະຊ່ວຍເຈົ້າໃຫ້ມີວຽກເຮັດ (ເບິ່ງຂໍ້ 13)
13. ພີ່ນ້ອງຊາຍທີ່ຍັງໜຸ່ມຕ້ອງຮຽນຫຍັງອີກ? (1 ຕີໂມທຽວ 5:8) (ເບິ່ງຮູບ)
13 ຮຽນທັກສະທີ່ຈະຊ່ວຍເຈົ້າໃຫ້ລ້ຽງໂຕເອງໄດ້. ຄລິດສະຕຽນທີ່ມີຄວາມເປັນຜູ້ໃຫຍ່ຕ້ອງລ້ຽງໂຕເອງແລະຄອບຄົວໄດ້. (ອ່ານ 1 ຕີໂມທຽວ 5:8) ໃນບາງປະເທດພີ່ນ້ອງຊາຍທີ່ຍັງໜຸ່ມສາມາດຮຽນທັກສະຈາກພໍ່ຫຼືຈາກພີ່ນ້ອງເພື່ອຈະເປັນອາຊີບແລະລ້ຽງໂຕເອງໄດ້. ສ່ວນປະເທດອື່ນຈະຮຽນຕອນທີ່ຮຽນຢູ່ມັດທະຍົມຕອນປາຍ ຫຼືເລືອກຮຽນສາຍອາຊີບ. ບໍ່ວ່າຈະແນວໃດ ເຈົ້າຄວນຮຽນທັກສະຢ່າງໃດຢ່າງໜຶ່ງທີ່ຈະເປັນອາຊີບໄດ້. (ກຈກ. 18:2, 3; 20:34; ອຟຊ. 4:28) ນອກຈາກນັ້ນ ເຈົ້າຄວນດຸໝັ່ນໃນການເຮັດວຽກແລະເຮັດໃຫ້ຫຼ້ອນໜ້າທີ່. ການເຮັດແບບນີ້ຈະຊ່ວຍໃຫ້ເຈົ້າຊອກວຽກໄດ້ງ່າຍແລະມີວຽກເຮັດຕະຫຼອດ. ຄຸນລັກສະນະແລະທັກສະຕ່າງໆທີ່ເວົ້າມານັ້ນເປັນສິ່ງທີ່ສຳຄັນສຳລັບພີ່ນ້ອງຊາຍເຊິ່ງຈະຊ່ວຍໃຫ້ເຂົາເຈົ້າພ້ອມສຳລັບໜ້າທີ່ຮັບຜິດຊອບໃນອະນາຄົດ. ໃຫ້ເຮົາມາເບິ່ງວ່າເຈົ້າຈະເຮັດຫຍັງໄດ້ແດ່.
ກຽມພ້ອມສຳລັບໜ້າທີ່ຮັບຜິດຊອບໃນອະນາຄົດ
14. ພີ່ນ້ອງຊາຍທີ່ຍັງໜຸ່ມຈະກຽມໂຕແນວໃດເພື່ອຈະຮັບໃຊ້ເຕັມເວລາ?
14 ເປັນຜູ້ຮັບໃຊ້ເຕັມເວລາ. ພີ່ນ້ອງຊາຍທີ່ມີຄວາມເປັນຜູ້ໃຫຍ່ຫຼາຍຄົນເລີ່ມຮັບໃຊ້ເຕັມເວລາຕັ້ງແຕ່ຍັງໜຸ່ມ. ການເປັນໄພໂອເນຍຈະຊ່ວຍໃຫ້ຄົນໜຸ່ມຮູ້ຈັກເຮັດວຽກກັບພີ່ນ້ອງທີ່ມີຄວາມແຕກຕ່າງກັນ ຮູ້ຈັກບໍລິຫານເງິນ ແລະບໍ່ໃຊ້ຈ່າຍຟຸ່ມເຟືອຍ. (ຟລປ. 4:11-13) ຖ້າເຈົ້າວາງແຜນຈະຮັບໃຊ້ເຕັມເວລາ ການສະໝັກເປັນໄພໂອເນຍສົມທົບເປັນຈຸດເລີ່ມຕົ້ນທີ່ດີ. ຫຼາຍຄົນເປັນໄພໂອເນຍສົມທົບໄລຍະໜຶ່ງເພື່ອຈະກຽມພ້ອມກ່ອນຈະເປັນໄພໂອເນຍປະຈຳ. ການເປັນໄພໂອເນຍປະຈຳເປີດໂອກາດທີ່ໜ້າຕື່ນເຕັ້ນໃຫ້ເຈົ້າໄດ້ຮັບໃຊ້ພະເຢໂຫວາຫຼາຍຂຶ້ນໃນອີກຫຼາຍຮູບແບບເຊັ່ນ: ການເປັນອາສາສະໝັກໃນທີມກໍ່ສ້າງຫຼືຮັບໃຊ້ຢູ່ເບເທນ.
15-16. ສິ່ງໃດຈະຊ່ວຍພີ່ນ້ອງຊາຍທີ່ຍັງໜຸ່ມໃຫ້ເປັນຜູ້ຊ່ວຍວຽກຮັບໃຊ້ແລະຜູ້ດູແລໄດ້?
15 ເປັນຜູ້ຊ່ວຍວຽກຮັບໃຊ້ຫຼືຜູ້ດູແລ. ພີ່ນ້ອງຊາຍຄວນມີເປົ້າໝາຍທີ່ຈະມີຄຸນສົມບັດທີ່ຈະເປັນຜູ້ດູແລແລະຮັບໃຊ້ພີ່ນ້ອງໃນປະຊາຄົມ. ຄຳພີໄບເບິນບອກວ່າຄົນທີ່ພະຍາຍາມຈະໄດ້ເປັນຜູ້ດູແລກໍ “ຢາກເຮັດວຽກທີ່ດີ.” (1ຕມ. 3:1) ແຕ່ກ່ອນຈະເປັນຜູ້ດູແລ ພີ່ນ້ອງຊາຍກໍຕ້ອງມີຄຸນສົມບັດທີ່ຈະເປັນຜູ້ຊ່ວຍວຽກຮັບໃຊ້ກ່ອນ. ຜູ້ຊ່ວຍວຽກຮັບໃຊ້ຈະຊ່ວຍຜູ້ດູແລເອົາໃຈໃສ່ພີ່ນ້ອງ. ທັງຜູ້ດູແລແລະຜູ້ຊ່ວຍວຽກຮັບໃຊ້ຈະຊ່ວຍເຫຼືອພີ່ນ້ອງຢ່າງຖ່ອມໃຈແລະດຸໝັ່ນໃນການເຮັດວຽກປະກາດ. ພີ່ນ້ອງຊາຍທີ່ຍັງໜຸ່ມອາດມີຄຸນສົມບັດທີ່ຈະເປັນຜູ້ຊ່ວຍວຽກຮັບໃຊ້ໄດ້ຕັ້ງແຕ່ອາຍຸບໍ່ຮອດ 20 ປີ ແລະຜູ້ຊ່ວຍວຽກຮັບໃຊ້ທີ່ມີຄຸນສົມບັດກໍອາດໄດ້ຮັບການແຕ່ງຕັ້ງໃຫ້ເປັນຜູ້ດູແລໄດ້ຕັ້ງແຕ່ອາຍຸຊາວປາຍປີ.
16 ຄຸນສົມບັດສຳລັບຄົນທີ່ຈະເປັນຜູ້ຊ່ວຍວຽກຮັບໃຊ້ແລະຜູ້ດູແລບອກໄວ້ໃນຄຳພີໄບເບິນ. ສິ່ງທີ່ຈະຊ່ວຍໃຫ້ພີ່ນ້ອງຊາຍມີຄຸນສົມບັດກໍຄືຄວາມຮັກທີ່ເຂົາເຈົ້າມີຕໍ່ພະເຢໂຫວາ ຕໍ່ຄອບຄົວ ແລະຕໍ່ພີ່ນ້ອງໃນປະຊາຄົມ. (1ຕມ. 3:1-13; ຕຕ. 1:6-9; 1ປຕ. 5:2, 3) ເຈົ້າຕ້ອງເຮັດຫຍັງເພື່ອຈະມີຄຸນສົມບັດ? ໃຫ້ສຶກສາແລະພະຍາຍາມເຂົ້າໃຈວ່າຂໍ້ຮຽກຮ້ອງແລະຄຸນລັກສະນະແຕ່ລະຢ່າງກ່ຽວຂ້ອງກັນແນວໃດ? ແລະອະທິດຖານຂໍຄວາມຊ່ວຍເຫຼືອຈາກພະເຢໂຫວາເພື່ອຈະຊ່ວຍໃຫ້ເຈົ້າເຮັດຕາມຂໍ້ຮຽກຮ້ອງເຫຼົ່ານັ້ນໄດ້.c
ພະເຢໂຫວາຢາກໃຫ້ຜົວຮັກເມຍແລະລູກ ແລະເບິ່ງແຍງເຂົາເຈົ້າທາງດ້ານຮ່າງກາຍ ດ້ານອາລົມ ແລະດ້ານຄວາມເຊື່ອ (ເບິ່ງຂໍ້ 17)
17. ພີ່ນ້ອງຊາຍທີ່ຍັງໜຸ່ມຈະກຽມພ້ອມແນວໃດເພື່ອຈະເປັນຜົວແລະຫົວໜ້າຄອບຄົວ? (ເບິ່ງຮູບ)
17 ເປັນຜົວແລະຫົວໜ້າຄອບຄົວ. ຄືກັບທີ່ພະເຢຊູເວົ້າໄວ້ ຄລິດສະຕຽນທີ່ມີຄວາມເປັນຜູ້ໃຫຍ່ບາງຄົນເລືອກທີ່ຈະເປັນໂສດ. (ມທ. 19:12) ແຕ່ຖ້າເຈົ້າເລືອກທີ່ຈະແຕ່ງດອງເຈົ້າຕ້ອງຈື່ໄວ້ວ່າເຈົ້າຈະມີໜ້າທີ່ຮັບຜິດຊອບເພີ່ມຂຶ້ນຄື: ເປັນຜົວແລະຫົວໜ້າຄອບຄົວ. (1ກຣ. 11:3) ພະເຢໂຫວາບອກວ່າຜົວຕ້ອງຮັກເມຍແລະເບິ່ງແຍງລາວທາງດ້ານຮ່າງກາຍ ດ້ານອາລົມ ແລະດ້ານຄວາມເຊື່ອ. (ອຟຊ. 5:28, 29) ຄຸນລັກສະນະແລະທັກສະຕ່າງໆທີ່ເວົ້າເຖິງໃນບົດຄວາມນີ້ເຊັ່ນ: ຄວາມສຸຂຸມຮອບຄອບ ການໃຫ້ກຽດຜູ້ຍິງ ແລະການເປັນຄົນທີ່ໄວ້ໃຈໄດ້ຊ່ວຍເຈົ້າໃຫ້ພ້ອມທີ່ຈະເຮັດໜ້າທີ່ຜົວແລະຫົວໜ້າຄອບຄົວໄດ້ດີ.
18. ພີ່ນ້ອງຊາຍທີ່ຍັງໜຸ່ມຈະກຽມພ້ອມແນວໃດເພື່ອຈະເປັນພໍ່?
18 ເປັນພໍ່. ຫຼັງຈາກທີ່ແຕ່ງດອງແລ້ວເຈົ້າອາດຈະໄດ້ເປັນພໍ່. ເຈົ້າຈະຮຽນແບບພະເຢໂຫວາແນວໃດເພື່ອຈະເປັນພໍ່ທີ່ດີ? (ອຟຊ. 6:4) ພະເຢໂຫວາເວົ້າກັບພະເຢຊູຕໍ່ໜ້າທຸກຄົນວ່າເພິ່ນຮັກແລະພໍໃຈພະເຢຊູຫຼາຍ. (ມທ. 3:17) ດັ່ງນັ້ນ ຖ້າເຈົ້າເປັນພໍ່ ຂໍເຮັດໃຫ້ລູກໝັ້ນໃຈວ່າເຈົ້າຮັກລາວ ຊົມເຊີຍລາວເລື້ອຍໆສຳລັບສິ່ງດີໆທີ່ລາວເຮັດ. (ຢຮ. 15:9) ພໍ່ທີ່ຮຽນແບບຕົວຢ່າງຂອງພະເຢໂຫວາຈະຊ່ວຍລູກໃຫ້ກ້າວໜ້າເປັນຄລິດສະຕຽນທີ່ມີຄວາມເປັນຜູ້ໃຫຍ່. ເຈົ້າສາມາດກຽມໂຕສຳລັບໜ້າທີ່ນີ້ໄດ້ໂດຍສະແດງຄວາມຮັກກັບທຸກຄົນໃນຄອບຄົວ ແລະໃນປະຊາຄົມຂອງເຈົ້າ. ເບິ່ງແຍງເຂົ້າເຈົ້າໃຫ້ດີແລະບອກເຂົາເຈົ້າວ່າເຈົ້າຮັກແລະເຫັນຄ່າເຂົາເຈົ້າ. ການເຮັດແບບນີ້ຈະຊ່ວຍເຈົ້າໃຫ້ກຽມພ້ອມທີ່ຈະເປັນຜົວແລະເປັນພໍ່ທີ່ດີ. ໃນເວລາດຽວກັນເຈົ້າກໍຈະເປັນຄົນທີ່ມີຄ່າສຳລັບພະເຢໂຫວາ ສຳລັບຄອບຄົວ ແລະສຳລັບປະຊາຄົມ.
ເຈົ້າຈະເຮັດຫຍັງໃນຕອນນີ້?
ພີ່ນ້ອງຊາຍທີ່ຍັງໜຸ່ມຫຼາຍຄົນທີ່ເອົາສິ່ງທີ່ໄດ້ຮຽນຈາກຄຳພີໄບເບິນໄປໃຊ້ໃນຊີວິດຈະເປັນຄລິດສະຕຽນທີ່ມີຄວາມເປັນຜູ້ໃຫຍ່ (ເບິ່ງຂໍ້ 19-20)
19-20. ສິ່ງໃດຈະຊ່ວຍພີ່ນ້ອງຊາຍທີ່ຍັງໜຸ່ມໃຫ້ເປັນຄລິດສະຕຽນທີ່ມີຄວາມເປັນຜູ້ໃຫຍ່? (ເບິ່ງຮູບໜ້າປົກ)
19 ພີ່ນ້ອງຊາຍທີ່ຍັງໜຸ່ມ ຂໍໃຫ້ຈື່ໄວ້ວ່າການເປັນຄລິດສະຕຽນທີ່ມີຄວາມເປັນຜູ້ໃຫຍ່ບໍ່ແມ່ນສິ່ງທີ່ໄດ້ມາໂດຍອັດຕະໂນມັດ. ເຈົ້າຕ້ອງຮຽນແບບຕົວຢ່າງທີ່ດີ ພັດທະນາຄວາມສຸຂຸມຮອບຄອບ ເປັນຄົນທີ່ໄວ້ໃຈໄດ້ ຝຶກທັກສະຕ່າງໆທີ່ເປັນປະໂຫຍດ ແລະກຽມພ້ອມສຳລັບໜ້າທີ່ຮັບຜິດຊອບໃນອະນາຄົດ.
20 ບາງເທື່ອເຈົ້າອາດຮູ້ສຶກວ່າໂຕເອງຍັງຕ້ອງພັດທະນາອີກຫຼາຍຢ່າງ ແຕ່ຂໍໃຫ້ໝັ້ນໃຈວ່າເຈົ້າເຮັດໄດ້. ພະເຢໂຫວາຢາກຊ່ວຍເຈົ້າແທ້ໆ. (ອຊຢ. 41:10, 13) ພີ່ນ້ອງໃນປະຊາຄົມກໍຢາກຊ່ວຍເຈົ້າຄືກັນ. ເມື່ອເຈົ້າກ້າວໜ້າເປັນຄລິດສະຕຽນທີ່ມີຄວາມເປັນຜູ້ໃຫຍ່ ຊີວິດຂອງເຈົ້າກໍຈະມີຄວາມສຸກແລະມີຊີວິດທີ່ມີຄວາມໝາຍ. ພີ່ນ້ອງຊາຍທີ່ຍັງໜຸ່ມ ເຮົາຮັກເຈົ້າຫຼາຍ! ຂໍໃຫ້ພະເຢໂຫວາອວຍພອນເຈົ້າໃນຂະນະທີ່ເຈົ້າພະຍາຍາມກ້າວໜ້າຕໍ່ໆໄປເພື່ອຈະເປັນຄລິດສະຕຽນທີ່ມີຄວາມເປັນຜູ້ໃຫຍ່.—ສຸພາ. 22:4
ເພງ 65 ກ້າວໜ້າຕໍ່ຕໍ່ໄປ!
a ປະຊາຄົມຄລິດສະຕຽນຕ້ອງການພີ່ນ້ອງຊາຍທີ່ມີຄວາມເປັນຜູ້ໃຫຍ່. ໃນບົດຄວາມນີ້ເຮົາຈະມາເບິ່ງນຳກັນວ່າພີ່ນ້ອງຊາຍທີ່ຍັງໜຸ່ມຈະເປັນຄລິດສະຕຽນທີ່ມີຄວາມເປັນຜູ້ໃຫຍ່ໄດ້ແນວໃດ?
b ເບິ່ງ “ການອະທິບາຍຄຳສັບ” ໃນບົດຄວາມກ່ອນໜ້ານີ້.