ບົດທີ 24
ຖ້າພໍ່ແມ່ຜິດກັນຈະເຮັດແນວໃດ?
ພໍ່ແມ່ເຄີຍຜິດກັນຕໍ່ໜ້າເຈົ້າບໍ? ເຂົາເຈົ້າຖຽງກັນເລື່ອງໃດຫຼາຍທີ່ສຸດ?
□ ເງິນ
□ ວຽກເຮືອນ
□ ຍາດພີ່ນ້ອງ
□ ເຈົ້າ
ການທີ່ພໍ່ແມ່ຜິດກັນມີຜົນຕໍ່ເຈົ້າແນວໃດ? ຖ້າເຮັດໄດ້ ເຈົ້າຈະບອກເຂົາເຈົ້າແນວໃດ?
․․․․․
ເປັນເລື່ອງປົກກະຕິທີ່ເຈົ້າຈະໄດ້ຮັບຜົນກະທົບຈາກການທີ່ພໍ່ແມ່ຜິດກັນ. ນີ້ເປັນຍ້ອນເຈົ້າຮັກພໍ່ແມ່ແລະຈຳເປັນຕ້ອງໃຫ້ເຂົາເຈົ້າເບິ່ງແຍງ. ແຕ່ເຈົ້າອາດຮູ້ສຶກທຸກໃຈຫຼາຍເມື່ອໄດ້ຍິນເຂົາເຈົ້າຜິດກັນ. ເຈົ້າອາດຮູ້ສຶກຄືກັບຜູ້ຍິງຊື່ມາຣີທີ່ບອກວ່າ: “ມັນຍາກທີ່ຂ້ອຍຈະນັບຖືພໍ່ແມ່ເມື່ອເຫັນວ່າເຂົາເຈົ້າກໍຍັງບໍ່ນັບຖືກັນ.”
ການເຫັນພໍ່ແມ່ຜິດກັນເຮັດໃຫ້ເຈົ້າຕ້ອງຍອມຮັບຄວາມຈິງທີ່ເຈັບປວດໃຈທີ່ວ່າ ເຂົາເຈົ້າບໍ່ໄດ້ສົມບູນແບບຄືທີ່ເຈົ້າຄິດ. ຄວາມຈິງເລື່ອງນີ້ເຮັດໃຫ້ເຈົ້າຮູ້ສຶກຢ້ານໄປໝົດ. ຖ້າການຜິດຖຽງກັນເກີດຂຶ້ນຫຼາຍເທື່ອຫຼືຮຸນແຮງ ເຈົ້າອາດຢ້ານວ່າເຂົາເຈົ້າຈະປະກັນ. ມາຣີບອກວ່າ: “ເມື່ອຂ້ອຍໄດ້ຍິນພໍ່ແມ່ຖຽງກັນ ຂ້ອຍເລີ່ມຄິດວ່າເຂົາເຈົ້າຈະຢ່າຮ້າງກັນແລະຂ້ອຍຕ້ອງເລືອກວ່າຈະຢູ່ກັບໃຜ. ຂ້ອຍບໍ່ຢາກແຍກຈາກນ້ອງໆຂອງຂ້ອຍເລີຍ.”
ເປັນຫຍັງພໍ່ແມ່ຈຶ່ງຜິດກັນ ແລະເຈົ້າຄວນເຮັດແນວໃດ?
ເປັນຫຍັງພໍ່ແມ່ຈຶ່ງຜິດກັນ?
ຕາມປົກກະຕິແລ້ວ ພໍ່ແມ່ໜ້າຈະ “ອົດທົນຕໍ່ກັນແລະກັນດ້ວຍຄວາມຮັກ.” (ເອເຟໂຊ 4:2) ແຕ່ຄຳພີໄບເບິນບອກວ່າ: “ທຸກຄົນເປັນຄົນບາບແລະບໍ່ໄດ້ສະແດງຄຸນລັກສະນະທີ່ດີໆຂອງພະເຈົ້າຢ່າງຄົບຖ້ວນ.” (ໂຣມ 3:23) ພໍ່ແມ່ຂອງເຈົ້າບໍ່ໄດ້ສົມບູນແບບ. ດັ່ງນັ້ນ ຈຶ່ງບໍ່ແປກທີ່ບາງເທື່ອເຂົາເຈົ້າຈະຫງຸດຫງິດແລະຖຽງກັນໃຫ້ເຈົ້າເຫັນ.
ຢ່າລືມວ່າ ເຮົາຢູ່ໃນ “ໄລຍະທີ່ມີແຕ່ຄວາມຫຍຸ້ງຍາກລຳບາກແລະອັນຕະລາຍ.” (2 ຕີໂມທຽວ 3:1) ຄວາມກົດດັນໃນການຫາລ້ຽງຄອບຄົວ ບັນຫາຢູ່ບ່ອນເຮັດວຽກແລະການຫາເງິນບໍ່ພໍໃຊ້ ທັງໝົດນີ້ເຮັດໃຫ້ຊີວິດຄູ່ເຄັ່ງຕຶງຫຼາຍແທ້ໆ. ແລະຖ້າທັງພໍ່ແລະແມ່ມີວຽກອາຊີບ ເຂົາເຈົ້າອາດຈະຖຽງກັນເລື່ອງວຽກເຮືອນວ່າໃຜຈະຕ້ອງເຮັດຫຍັງ.
ຂໍໃຫ້ໝັ້ນໃຈວ່າຖ້າພໍ່ແມ່ຂອງເຈົ້າມີເລື່ອງຂັດແຍ່ງກັນກໍບໍ່ໄດ້ໝາຍຄວາມວ່າເຂົາເຈົ້າຕ້ອງຢ່າຮ້າງກັນ. ເປັນໄປໄດ້ວ່າພໍ່ແມ່ຂອງເຈົ້າຍັງຮັກກັນຢູ່ ເຖິງວ່າເຂົາເຈົ້າຈະບໍ່ເຫັນດີນຳກັນໃນບາງເລື່ອງກໍຕາມ.
ຕົວຢ່າງເຊັ່ນ ເຈົ້າເຄີຍໄປເບິ່ງໜັງກັບໝູ່ສະໜິດແລ້ວມີຄວາມຄິດເຫັນທີ່ບໍ່ກົງກັນບໍ? ນັ້ນເປັນເລື່ອງປົກກະຕິ. ແມ່ນແຕ່ຄົນທີ່ສະໜິດກັນກໍອາດຈະມີມຸມມອງເລື່ອງຕ່າງໆບໍ່ຄືກັນ. ຄ້າຍກັບພໍ່ແມ່ຂອງເຈົ້າ. ບາງທີເຂົາເຈົ້າອາດກັງວົນເລື່ອງການເງິນຂອງຄອບຄົວຄືກັນ ແຕ່ກໍອາດມີວິທີປະຢັດເງິນຕ່າງກັນ. ທັງສອງຢາກພາຄອບຄົວໄປທ່ຽວ ແຕ່ກໍຄິດເລື່ອງການພັກຜ່ອນຕ່າງກັນ ຫຼືທັງສອງຢາກໃຫ້ເຈົ້າຮຽນເກັ່ງ ແຕ່ກໍມີວິທີຊ່ວຍເຈົ້າບໍ່ຄືກັນ.
ຄວາມຈິງຄື ຄົນສອງຄົນທີ່ຮັກກັນອາດເບິ່ງເລື່ອງດຽວກັນໃນມຸມມອງທີ່ຕ່າງກັນ. ແຕ່ເຈົ້າອາດຍັງຮູ້ສຶກຮັບບໍ່ໄດ້ທີ່ເຫັນພໍ່ແມ່ຜິດຖຽງກັນແມ່ນບໍ? ຖ້າເປັນແນວນັ້ນ ອັນໃດຈະຊ່ວຍໃຫ້ເຈົ້າອົດທົນໄດ້?
ສິ່ງທີ່ເຈົ້າຄວນເຮັດ
ສະແດງຄວາມນັບຖື. ເຈົ້າຄືຊິລຳຄານພໍ່ແມ່ທີ່ຜິດກັນຕະຫຼອດເວລາ ທັງໆທີ່ເຂົາເຈົ້າຄວນຈະເປັນຕົວຢ່າງທີ່ດີໃຫ້ເຈົ້າ. ແຕ່ການດູຖູກພໍ່ແມ່ມີແຕ່ຈະເຮັດໃຫ້ບັນຍາກາດໃນຄອບຄົວເຄັ່ງຕຶງຫຼາຍຂຶ້ນ. ແລະທີ່ສຳຄັນກວ່ານັ້ນ ພະເຢໂຫວາພະເຈົ້າສັ່ງໃຫ້ເຈົ້ານັບຖືແລະເຊື່ອຟັງພໍ່ແມ່ເຖິງວ່າມັນຈະບໍ່ງ່າຍກໍຕາມ.—ອົບພະຍົບ 20:12; ສຸພາສິດ 30:17
ແຕ່ຖ້າເລື່ອງທີ່ພໍ່ແມ່ຜິດຖຽງກັນກ່ຽວຂ້ອງກັບເຈົ້າເດຈະເຮັດແນວໃດ? ຕົວຢ່າງເຊັ່ນ ສົມມຸດວ່າພໍ່ແມ່ຂອງເຈົ້າຄົນໜຶ່ງເປັນພະຍານພະເຢໂຫວາແລະອີກຄົນໜຶ່ງບໍ່ໄດ້ເປັນ. ເມື່ອມີບັນຫາເລື່ອງສາສະໜາ ເຈົ້າກັບພໍ່ຫຼືແມ່ທີ່ເປັນພະຍານພະເຢໂຫວາຕ້ອງເຮັດຕາມມາດຕະຖານຂອງພະເຈົ້າ. ຖ້າເປັນແບບນັ້ນຈະເຮັດແນວໃດ? (ມັດທາຍ 10:34-37) ຂໍໃຫ້ເຈົ້າເວົ້າແລະເຮັດ “ແບບສຸພາບແລະດ້ວຍຄວາມນັບຖື” ສະເໝີ. ເພາະມື້ໜຶ່ງຕົວຢ່າງທີ່ດີຂອງເຈົ້າອາດຊ່ວຍໃຫ້ຊະນະໃຈພໍ່ຫຼືແມ່ທີ່ບໍ່ມີຄວາມເຊື່ອກໍໄດ້.—1 ເປໂຕ 3:15
ວາງໂຕເປັນກາງ. ຖ້າເປັນເລື່ອງທີ່ບໍ່ໄດ້ກ່ຽວຂ້ອງກັບເຈົ້າໂດຍກົງ ແລ້ວພໍ່ຫຼືແມ່ຢາກໃຫ້ເຈົ້າເຂົ້າຂ້າງເດເຈົ້າຈະເຮັດແນວໃດ? ໃຫ້ພະຍາຍາມວາງໂຕເປັນກາງ. ເຈົ້າອາດເວົ້າແບບນີ້: “ພໍ່ເອີ້ຍ ແມ່ເອີ້ຍ ລູກຮັກທັງພໍ່ທັງແມ່ເດີ້. ຢ່າໃຫ້ລູກຕ້ອງເລືອກເຂົ້າຂ້າງໃຜເລີຍ. ຄ່ອຍໆລົມກັນດີບໍ. ລູກບໍ່ຢາກໃຫ້ພໍ່ແມ່ຜິດຖຽງກັນ.”
ລົມກັນ. ບອກໃຫ້ພໍ່ແມ່ຮູ້ວ່າເຈົ້າຮູ້ສຶກແນວໃດທີ່ເຂົາເຈົ້າຖຽງກັນ. ເລືອກເວລາທີ່ເຈົ້າຄິດວ່າເຂົາເຈົ້າຈະຟັງເຈົ້າ ແລ້ວບອກເຂົາເຈົ້າດ້ວຍຄວາມນັບຖືວ່າການທີ່ເຂົາເຈົ້າຜິດກັນເຮັດໃຫ້ເຈົ້າເສົ້າໃຈ ໃຈຮ້າຍ ຫຼືເຖິງຂັ້ນເຮັດໃຫ້ເຈົ້າຢ້ານແນວໃດ.—ສຸພາສິດ 15:23; ໂກໂລຊາຍ 4:6
ສິ່ງທີ່ບໍ່ຄວນເຮັດ
ຢ່າເຮັດໂຕເປັນທີ່ປຶກສາເລື່ອງຊີວິດຄູ່. ໃນຖານະທີ່ເຈົ້າຍັງນ້ອຍ ຈຶ່ງບໍ່ເໝາະທີ່ຈະແກ້ໄຂບັນຫາທີ່ພໍ່ແມ່ຜິດຖຽງກັນ. ເພື່ອເປັນຕົວຢ່າງ ລອງນຶກພາບວ່າເຈົ້າເປັນຜູ້ໂດຍສານໃນຍົນລຳນ້ອຍໆແລະໄດ້ຍິນນັກບິນກັບຜູ້ຊ່ວຍນັກບິນຜິດຖຽງກັນ ເຈົ້າອາດຈະກັງວົນ. ແຕ່ຈະເກີດຫຍັງຂຶ້ນຖ້າເຈົ້າແນະນຳນັກບິນວ່າຈະຂັບຍົນແນວໃດຫຼືເຖິງຂັ້ນໄປຂັບຍົນດ້ວຍໂຕເອງ?
ຄ້າຍຄືກັນ ການພະຍາຍາມຈັດການບັນຫາຊີວິດຄູ່ຂອງພໍ່ແມ່ມີແຕ່ຈະເຮັດໃຫ້ສິ່ງຕ່າງໆຮ້າຍແຮງຂຶ້ນ. ຄຳພີໄບເບິນບອກວ່າ: “ການເຮັດເກີນສິດມີແຕ່ຈະເຮັດໃຫ້ຜິດຖຽງກັນ ແຕ່ສະຕິປັນຍາເປັນຂອງຄົນທີ່ຊອກຫາຄຳແນະນຳ.” (ສຸພາສິດ 13:10) ພໍ່ແມ່ຂອງເຈົ້າໜ້າຈະປຶກສາກັນແລະຫາທາງແກ້ບັນຫາເອງ.—ສຸພາສິດ 25:9
ຢ່າເຂົ້າໄປຫຍຸ້ງ. ສອງສຽງທີ່ຜິດຖຽງກັນນັ້ນກໍໜັກພໍແຮງຢູ່ແລ້ວ. ເປັນຫຍັງຕ້ອງເພີ່ມສຽງທີສາມເຂົ້າໄປອີກ? ເຖິງວ່າເຈົ້າຢາກຈະຊ່ວຍແກ້ບັນຫາຫຼາຍສ່ຳໃດກໍຕາມ ແຕ່ນັ້ນເປັນເລື່ອງຂອງພໍ່ແມ່ ບໍ່ແມ່ນຂອງເຈົ້າ. ຂໍໃຫ້ພະຍາຍາມເຮັດຕາມຄຳແນະນຳຂອງຄຳພີໄບເບິນທີ່ວ່າ: “ຢ່າໄປຫຍຸ້ງກັບເລື່ອງຂອງຄົນອື່ນ.” (1 ເທຊະໂລນິກ 4:11) ດັ່ງນັ້ນ ເຈົ້າບໍ່ຄວນເຂົ້າໄປມີສ່ວນຜິດຖຽງກັນກັບພໍ່ແມ່.
ຢ່າຫາເລື່ອງໃຫ້ພໍ່ແມ່ຜິດກັນ. ໜຸ່ມສາວບາງຄົນຫາເລື່ອງໃຫ້ພໍ່ແມ່ຜິດຖຽງກັນໂດຍຍົວະຝ່າຍໜຶ່ງໃຫ້ບໍ່ພໍໃຈອີກຝ່າຍໜຶ່ງ. ຖ້າລາວຂໍອະນຸຍາດແມ່ບໍ່ໄດ້ ລາວກໍຈະໄປຂັດພໍ່ຫຼືພະຍາຍາມເຮັດໃຫ້ພໍ່ອີ່ຕົນລາວແລ້ວອະນຸຍາດ. ການໃຊ້ເລ່ລ່ຽມເພື່ອໃຫ້ພໍ່ແມ່ຕາມໃຈອາດເຮັດໃຫ້ເຈົ້າໄດ້ສິ່ງທີ່ຕ້ອງການ ແຕ່ຜົນທີ່ຕາມມາແມ່ນຄວາມຂັດແຍ່ງໃນຄອບຄົວ.
ຢ່າເຮັດໃສ່. ຊາຍໜຸ່ມຄົນໜຶ່ງຊື່ປີເຕີ້ຍອມຮັບວ່າລາວເຄີຍເຮັດສິ່ງທີ່ບໍ່ດີເພື່ອຈະເຮັດໃສ່ພໍ່ທີ່ໃຊ້ຄວາມຮຸນແຮງ. ລາວບອກວ່າ: “ເມື່ອພໍ່ເຮັດບໍ່ດີຕໍ່ແມ່ ຕໍ່ຂ້ອຍແລະນ້ອງສາວ ຂ້ອຍກໍໃຈຮ້າຍຫຼາຍແລະຢາກເຮັດໃຫ້ລາວເຈັບແດ່.” ແຕ່ບໍ່ດົນ ປີເຕີ້ກໍໄດ້ຮັບຜົນຈາກການກະທຳຂອງໂຕເອງ. ບົດຮຽນສຳລັບເຮົາແມ່ນຫຍັງ? ການເຮັດສິ່ງທີ່ບໍ່ດີບໍ່ໄດ້ຊ່ວຍແກ້ບັນຫາ ມີແຕ່ຈະເຮັດໃຫ້ຫຍຸ້ງຍາກຫຼາຍກວ່າເກົ່າ.—ຄາລາເຕຍ 6:7
ໃນບົດນີ້ມີຈຸດໃດທີ່ເຈົ້າຕ້ອງປັບປຸງເປັນພິເສດ. ․․․․․
ເຫັນໄດ້ແຈ້ງວ່າ ເຈົ້າບໍ່ສາມາດເຮັດໃຫ້ພໍ່ແມ່ເຊົາຜິດຖຽງກັນໄດ້. ແຕ່ເຈົ້າໝັ້ນໃຈໄດ້ວ່າພະເຢໂຫວາຈະຊ່ວຍເຈົ້າໃຫ້ອົດທົນໄດ້.—ຟີລິບປອຍ 4:6, 7; 1 ເປໂຕ 5:7
ໃຫ້ເຈົ້າພະຍາຍາມສຸດຄວາມສາມາດທີ່ຈະເຮັດຕາມຄຳແນະນຳທີ່ເວົ້າເຖິງໃນບົດນີ້. ເມື່ອເວລາຜ່ານໄປ ພໍ່ແມ່ຂອງເຈົ້າອາດພະຍາຍາມແກ້ບັນຫາຂອງເຂົາເຈົ້າກໍໄດ້ ແລະເປັນໄປໄດ້ວ່າຈັກມື້ໜຶ່ງເຂົາເຈົ້າອາດຈະເຊົາຜິດຖຽງກັນ.
ຖ້າເຈົ້າໃຫຍ່ມາໃນຄອບຄົວທີ່ມີແຕ່ພໍ່ຫຼືແມ່ຝ່າຍດຽວ ເຈົ້າຈະເຮັດແນວໃດ?
ຂໍ້ຄຳພີຫຼັກ
“ໃຫ້ຄຳເວົ້າຂອງພວກເຈົ້າເປັນຄຳເວົ້າທີ່ກະລຸນາສະເໝີ.”—ໂກໂລຊາຍ 4:6
ຄຳແນະນຳ
ຖ້າພໍ່ແມ່ຜິດຖຽງກັນຕະຫຼອດແລະຮຸນແຮງ ເຈົ້າໜ້າຈະຂໍຮ້ອງເຂົາເຈົ້າໃຫ້ລອງໄປປຶກສາຄົນອື່ນ.
ເຈົ້າຮູ້ບໍ . . . ?
ຄົນທີ່ຮັກກັນອາດຈະຍັງບໍ່ເຫັນດີນຳກັນໃນບາງເທື່ອ.
ແຜນພາກປະຕິບັດ!
ເມື່ອພໍ່ແມ່ເລີ່ມຜິດຖຽງກັນ ຂ້ອຍຈະ ․․․․․
ເມື່ອຂ້ອຍຕ້ອງເລືອກວ່າຈະເຂົ້າຂ້າງພໍ່ຫຼືແມ່ ຂ້ອຍຈະເວົ້າວ່າ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເປັນຫຍັງພໍ່ແມ່ບາງຄົນຈຶ່ງຜິດຖຽງກັນ?
● ເປັນຫຍັງຈຶ່ງບໍ່ແມ່ນຄວາມຜິດຂອງເຈົ້າທີ່ພໍ່ແມ່ມີບັນຫາກັນ?
● ເຈົ້າຮຽນຮູ້ຫຍັງໄດ້ແດ່ຈາກການສັງເກດພຶດຕິກຳຂອງພໍ່ແມ່?
[ຖ້ອຍຄຳທີ່ຍົກມາໜ້າ 201]
“ການເບິ່ງວ່າພໍ່ແມ່ບໍ່ໄດ້ສົມບູນແບບແລະເຂົາເຈົ້າກໍມີບັນຫາຄືກັນກັບຂ້ອຍຊ່ວຍໃຫ້ຂ້ອຍອົດທົນໄດ້ຕອນທີ່ເຂົາເຈົ້າຜິດຖຽງກັນ.”—ແຄທີ້
[ຂອບ/ຮູບພາບໜ້າ 206]
ເມື່ອພໍ່ແມ່ແຍກທາງກັນ?
ຖ້າພໍ່ແມ່ຂອງເຈົ້າແຍກທາງກັນ ເຈົ້າອາດຮູ້ສຶກເສຍໃຈຫຼາຍແລະໝົດກຳລັງໃຈ. ແລ້ວເຈົ້າຄວນເຮັດແນວໃດ? ລອງເບິ່ງຄຳແນະນຳຕໍ່ໄປນີ້:
● ຢ່າຄາດຫວັງແບບຜິດໆ. ຕອນທຳອິດເຈົ້າຄືຊິພະຍາຍາມເຮັດໃຫ້ພໍ່ແມ່ຄືນດີກັນ. ແອນເລົ່າວ່າ: “ຫຼັງຈາກທີ່ພໍ່ແມ່ຂອງຂ້ອຍແຍກທາງກັນ ເຂົາເຈົ້າກໍຍັງພາເຮົາໄປທ່ຽວ ບາງເທື່ອຂ້ອຍກັບເອື້ອຍຈຶ່ງຊິ່ມໃສ່ກັນວ່າ ‘ເຮົາລັກໜີໄປບ່ອນອື່ນປ໋ະ ເພື່ອພໍ່ແມ່ຈະໄດ້ຢູ່ນຳກັນເປັນສ່ວນໂຕ.’ ແຕ່ເບິ່ງຄືວ່າມັນບໍ່ໄດ້ຜົນ. ເຂົາເຈົ້າບໍ່ກັບມາຄືນດີກັນເລີຍ.”
ສຸພາສິດ 13:12 ບອກວ່າ: “ຄວາມຫວັງທີ່ຖືກເລື່ອນອອກໄປເຮັດໃຫ້ເສຍໃຈ.” ເພື່ອເຈົ້າຈະບໍ່ທຸກໃຈ ຂໍໃຫ້ຈື່ໄວ້ວ່າເຈົ້າບັງຄັບພໍ່ແມ່ບໍ່ໄດ້. ເຈົ້າບໍ່ໄດ້ເຮັດໃຫ້ເຂົາເຈົ້າແຍກທາງກັນ ແລະຈະເຮັດໃຫ້ເຂົາເຈົ້າກັບມາຄືນດີກັນກໍບໍ່ໄດ້.—ສຸພາສິດ 26:17
● ຢ່າຄຽດແຄ້ນ. ການຄຽດແຄ້ນພໍ່ແມ່ມີແຕ່ຈະເຮັດໃຫ້ເກີດຄວາມເສຍຫາຍ. ທອມຈື່ຄວາມຮູ້ສຶກຂອງລາວຕອນອາຍຸ 12 ປີ ລາວບອກວ່າ: “ຂ້ອຍໃຈຮ້າຍໃຫ້ພໍ່ເອົາແທ້ເອົາວ່າ. ຂ້ອຍບໍ່ຢາກໃຊ້ຄຳວ່າ ‘ຄຽດແຄ້ນ’ ແຕ່ຂ້ອຍໃຈຮ້າຍສຸດໆ. ຂ້ອຍບໍ່ເຂົ້າໃຈເລີຍວ່າພໍ່ຖິ້ມເຮົາໄປໄດ້ແນວໃດຖ້າລາວຮັກເຮົາ.”
ການທີ່ພໍ່ແມ່ແຍກກັນຢູ່ຄືຊິບໍ່ແມ່ນເປັນຍ້ອນວ່າຄົນໜຶ່ງດີໄປໝົດແລະອີກຄົນໜຶ່ງຊົ່ວໄປໝົດ. ພໍ່ແມ່ຄືຊິບໍ່ໄດ້ບອກທຸກຢ່າງກ່ຽວກັບຊີວິດຄູ່ຂອງເຂົາເຈົ້າຫຼືເຫດຜົນທີ່ເຂົາເຈົ້າແຍກກັນຢູ່. ໂຕເຂົາເຈົ້າເອງອາດບໍ່ເຂົ້າໃຈສາເຫດແທ້ໆດ້ວຍຊ້ຳ. ດັ່ງນັ້ນ ຢ່າຕັດສິນເລື່ອງທີ່ເຈົ້າບໍ່ຮູ້ຄວາມຈິງທັງໝົດ. (ສຸພາສິດ 18:13) ທີ່ຈິງມັນເປັນເລື່ອງຍາກທີ່ຈະບໍ່ໃຈຮ້າຍ ແລະເປັນເລື່ອງທຳມະດາທີ່ເຈົ້າຈະອາລົມເສຍໃນໄລຍະໜຶ່ງ. ແຕ່ການເກັບຄວາມຄຽດແຄ້ນໄວ້ອາດເຮັດໃຫ້ກາຍເປັນຄົນທີ່ນິດໄສບໍ່ດີໄດ້. ດັ່ງນັ້ນ ເຈົ້າໜ້າຈະເຮັດຕາມທີ່ຄຳພີໄບເບິນບອກໄວ້ວ່າ: “ໃຫ້ເຊົາໃຈຮ້າຍແລະເຊົາຄຽດໃຫ້ຄົນອື່ນ.”—ເພງສັນລະເສີນ 37:8
● ເບິ່ງຕາມຄວາມເປັນຈິງ. ແທນທີ່ໜຸ່ມສາວບາງຄົນຈະໃຈຮ້າຍໃຫ້ພໍ່ຫຼືແມ່ທີ່ຖິ້ມເຂົາເຈົ້າໄປ ແຕ່ເຂົາເຈົ້າພັດໄປສົນໃຈແລະຍົກຍ້ອງຜູ້ນັ້ນ. ຕົວຢ່າງເຊັ່ນ ພໍ່ຂອງໄວລຸ້ນຄົນໜຶ່ງເປັນຄົນຕິດເຫຼົ້າ ມັກຫຼິ້ນສາວ ໜີປະຄອບຄົວໄປຫຼາຍເທື່ອ ແລະໃນທີ່ສຸດກໍຢ່າຮ້າງກັບແມ່ ແຕ່ໄວລຸ້ນຄົນນີ້ພັດໄປຍົກຍ້ອງພໍ່!
ການຍົກຍ້ອງແບບຜິດໆນີ້ບໍ່ແມ່ນເລື່ອງແປກ. ໃນປະເທດໜຶ່ງ ເດັກນ້ອຍປະມານ 90 ເປີເຊັນທີ່ພໍ່ແມ່ຢ່າຮ້າງກັນຈະໃຊ້ຊີວິດຢູ່ກັບແມ່ ແຕ່ຈະທຽວໄປຢາມພໍ່. ແມ່ຕ້ອງຮັບຜິດຊອບໃນການເບິ່ງແຍງແລະສັ່ງສອນລູກ. ເຖິງວ່າພໍ່ຈະຊ່ວຍຄ່າໃຊ້ຈ່າຍໃນການລ້ຽງລູກຢູ່ແດ່ ແຕ່ສະພາບການເງິນຂອງແມ່ກໍມັກຈະຫຼຸດລົງຫຼາຍຫຼັງຈາກຢ່າຮ້າງ ສ່ວນພໍ່ພັດດີຂຶ້ນ. ຜົນກໍຄື ເມື່ອພໍ່ມາຢາມກໍມັກຈະມີຂອງຂວັນມາໃຫ້ແລະພາລູກໄປທ່ຽວ! ແຕ່ເມື່ອຢູ່ກັບແມ່ຕ້ອງໄດ້ປະຢັດຕະຫຼອດ ແລະແມ່ກໍມັກຈະສັ່ງສອນແລະຫ້າມນັ້ນຫ້າມນີ້. ໜ້າເສຍດາຍທີ່ໜຸ່ມສາວບາງຄົນເຖິງຂັ້ນປະຖິ້ມແມ່ທີ່ເປັນພະຍານພະເຢໂຫວາເພື່ອໄປຢູ່ກັບພໍ່ທີ່ບໍ່ມີຄວາມເຊື່ອເພາະພໍ່ລວຍແລະຍອມຕາມໃຈຫຼາຍກວ່າ.—ສຸພາສິດ 19:4
ຖ້າເຈົ້າເລືອກຊີວິດທີ່ສະດວກສະບາຍແບບນັ້ນ ກໍຄິດໃຫ້ດີວ່າອັນໃດສຳຄັນທີ່ສຸດ. ຈື່ໄວ້ວ່າເຈົ້າຕ້ອງມີຄົນມາຊີ້ນຳແລະສັ່ງສອນເພື່ອຈະຊ່ວຍເຈົ້າໃຫ້ມີນິດໄສທີ່ດີແລະມີຊີວິດທີ່ດີໃນອະນາຄົດ. ນີ້ແຫຼະເປັນສິ່ງທີ່ມີຄ່າທີ່ບໍ່ມີຫຍັງມາທຽບໄດ້.—ສຸພາສິດ 4:13
[ຮູບພາບໜ້າ 202, 203]
ໜຸ່ມສາວທີ່ແນະນຳພໍ່ແມ່ວ່າຈະແກ້ບັນຫາແນວໃດກໍຄືກັບຜູ້ໂດຍສານທີ່ແນະນຳນັກບິນກັບຜູ້ຊ່ວຍນັກບິນວ່າຈະຂັບຍົນແນວໃດ