Joani
15 “Ki na kota luli ya veine, mi Ndate ki mulimi. 2 Mutai kaufela o ku na, o sa beyi muselo, wa u kola, mi mutai kaufela o beya muselo wa u kenisa ka ku u kolela, kuli u beye hahulu muselo. 3 Mina mu kenile kale kabakala linzwi le ni mi bulelezi. 4 Mu zwelepili ku swalisana ni na, mi na, ni swalisana ni mina. Sina mutai ha u sa koni ku beya muselo ka ili ona feela konji haiba u siyala kwa kota ya veine, ku cwalo ni ku mina, ha mu koni ku beya muselo konji haiba mu swalisana ni na. 5 Ki na kota ya veine, mina mu mitai. Ya zwelapili ku swalisana ni na, mi na, ni swalisana ni yena, yena u beya hahulu muselo; kakuli kwandaa ka ha ku na se mu kona ku eza. 6 Mutu ha sa zwelipili ku swalisana ni na, u nepelwa kwande sina mutai mi wa oma; mi batu ba nopa mitai yeo ni ku i nepela mwa mulilo mi ya ca. 7 Haiba mu zwelapili ku swalisana ni na mi manzwi a ka a ina ku mina, mu kupe se mu lata kaufela mi mu ka si ezezwa. 8 Sa kanyiswa ka sona Ndate ki se, kuli mu zwelepili ku beya hahulu muselo ni ku bonisa kuli mu balutiwa ba ka. 9 Sina Ndate haa ni latile mi ni mi latile, mu ine mwa lilato la ka. 10 Haiba mu mamela milao ya ka, mu ka ina mwa lilato la ka, sina ha ni mamezi milao ya Ndate ni ku ina mwa lilato la hae.
11 “Ni mi bulelezi lika ze, kuli tabo ya ka i be ku mina mi tabo ya mina i tale. 12 Wo ki ona mulao wa ka, kuli mu latane sina mo ni mi latezi. 13 Ha ku na mutu ya na ni lilato le li fita le, kuli mutu a tobohe moyo wa hae kabakala balikani ba hae. 14 Mu balikani ba ka haiba mu eza ze ni mi laela. 15 Ha ni sa mi biza batanga, kakuli mutanga ha zibi se si ezwa ki mulenaa hae. Kono ni mi bizize balikani, kakuli ze ni utwile kaufela ku Ndate ni mi zibisize zona. 16 Hasi mina ba ne ba ni nomile, kono ki na ya naa mi nomile, mi ne ni mi ketile kuli mu zwelepili ku beya muselo ni kuli muselo wa mina u ine; kuli se mu ka kupa kaufela ku Ndate ka libizo la ka u ka mi fa sona.
17 “Ni mi laela lika ze kuli mu latane. 18 Haiba lifasi li mi toile, mu zibe kuli li toile na pili li si ka mi toya kale. 19 Kabe mu ba lifasi, kabe lifasi ne li ka lata ze li za lona. Cwale bakeñisa kuli ha mu ba lifasi, kono ni mi ketile mwa lifasi, ki lona libaka lifasi ha li mi toile. 20 Mu hupule linzwi le ni mi bulelezi la kuli, mutanga ha fiti mulenaa hae. Haiba ba ni nyandisize, ba ka mi nyandisa ni mina; haiba ba mamezi linzwi la ka, ba ka mamela ni la mina. 21 Kono ba ka eza lika zeo kaufela ku mi lwanisa kabakala libizo la ka, kakuli ha ba zibi ya ni lumile. 22 Kabe ne ni si ka taha ni ku to bulela ku bona, kabe ha ba na sibi; kono cwale ha ba na mwa ku itatulela kwa sibi sa bona. 23 Ya ni toya u toya ni Ndate. 24 Kabe ne ni si ka eza mwahalaa bona misebezi ye si ka ezwa kale ki mutu yo muñwi, kabe ha ba na sibi; kono cwale ba iponezi mi hape ba toile na hamoho ni Ndate. 25 Kono ku bile cwalo kuli ku petahale linzwi le li ñozwi mwa Mulao wa bona, le li li, ‘Ne ba ni toile feela ku si na mulatu.’ 26 Mutusi ha ka fita, yena ye ni ka mi lumela ku zwa ku Ndate, ona moya o patulula niti, o zwa ku Ndate, yena yo u ka ni paka; 27 mi ni mina, mu ka ni paka, kakuli mu bile ni na ku zwa ha ni kalisa.