Maroma

12 Kabakaleo na mi kupa ka taata ka mukekecima wa Mulimu, mizwale, kuli mu fe mibili ya mina sina sitabelo se si pila, se si kenile, se si amuheleha ku Mulimu, ili sebelezo ye kenile ye mu fa ka maata a mina a ku nahana. 2 Mi mu tuhele ku ya ka mikwa ya lifasi le, kono mu fetuhe ka ku shemuna munahano wa mina, kuli mu lemuhe tato ya Mulimu ye nde ni ye amuheleha ni ye petehile.

3 Kakuli ka sishemo sa Mulimu se ni filwe, ni bulelela mutu kaufela mwahalaa mina kuli a si ke a nahana ka ku ipona butuna ku fita mwa inezi; kono a nahane kuli a be ni kutwisiso, yo muñwi ni yo muñwi sina Mulimu ha mu file tumelo ye likani. 4 Kakuli sina ha lu na ni lilama ze ñata mwa mubili u li muñwi, kono lilama zeo kaufela ha li ezi musebezi o swana, 5 kamukwaoswana, ni luna niha lu li ba bañata, lu mubili u li muñwi ku Kreste, kono lu lilama ze swalisani hamoho yo muñwi ku yo muñwi. 6 Cwale, ha u bona lu na ni limpo ze shutana ku likana ni sishemo sa Mulimu se lu filwe, haiba ki bupolofita, lu polofite ku likana ni tumelo ye lu filwe; 7 kamba haiba ki bukombwa, lu be mwa bukombwa bo; kamba ya luta, a lute cwalo; 8 kamba yena ya susueza, a susueze cwalo; ya fana, a eze cwalo a sa timani; ya zamaisa, a eze cwalo ka ku tukufalelwa; ya bonisa sishemo, a eze cwalo ka tabo.

9 Lilato la mina li tokwe buipi. Mu toye hahulu bumaswe, mu kumalele kwa bunde. 10 Mu latane yo muñwi ni yo muñwi ka lilato la mizwale. Mwa ku fanana likute mu be ba pili. 11 Mu tukufalelwe, mu si ke mwa ba ni buzwa. Mu tuke ka moya. Mu sebeleze Jehova. 12 Mu tabe ka sepo. Mu itiise mwa ñalelwa. Mu tundamene ku lapela. 13 Mu ikabele ze mu na ni zona ni ba ba kenile ku likana ni mo ba tokwezi. Mu zwelepili ku ba ni moya wa ku amuhela baenyi. 14 Mu zwelepili ku fuyaula ba ba mi nyandisa; mu fuyole mi mu si ke mwa kuta. 15 Mu tabe ni ba ba tabile; mu lile ni ba ba lila. 16 Mu nge ba bañwi sina mo mu ikungela; mu si ke mwa ba ni mihupulo ya ku ipahamisa, kono mu ndongwame lika ze kwatasi. Mu si ke mwa ipona butali mwa meeto a mina.

17 Mu si ke mwa kutisa bumaswe ka bumaswe. Mu like ku eza ze nde mwa meeto a batu kaufela. 18 Haiba ku konahala, ka mo mu konela kaufela, mu pilisane ka kozo ni batu kamukana. 19 Mu si ke mwa kutiseza bumaswe ka ili mina, balatiwa, kono mu fe buhali sibaka; kakuli ku ñozwi kuli: “Ku lombota ki kwa ka; ki na ya ka kutiseza, ku bulela Jehova.” 20 Kono, “haiba sila sa hao si lapile, u si fepe; ha si shwile linyolwa, u si fe sa ku nwa; kakuli ka ku eza cwalo u ka kubukanya mashala a tuka fa toho ya sona.” 21 U si ke wa tuhelela bumaswe ku ku koma, kono u zwelepili ku koma bumaswe ka bunde.