Ki Kabakalañi Haluswanela Kusaba Jehova?

1-2. Ka kuya ka Samu 25:14, ki lika mañi zeluswanela kueza haiba lubata kuba balikani ba Jehova babatuna?

KI TULEMENO tufi tomutokwa kuba ni tona kuli muzwelapili kuba ni silikani sesitiile ni mutu yomuñwi? Mwendi mukona kubulela kuli balikani babande baswanela kulatana ni kutusana. Kono mwendi hamunahani kuli sabo ni yona ki ya butokwa kuli mube ni silikani sesinde ni mutu yomuñwi. Nihakulicwalo, sina moiboniseza toho ya taba, batu bababata kuba balikani ba Jehova babatuna baswanela ‘kumusaba.’—Mubale Samu 25:14.

² Kusina taba kuli lusebelelize Jehova ka nako yekuma kai, kaufelaa luna luswanela kuzwelapili kumubonisa sabo yeswanela. Kono kusaba Mulimu kutalusañi? Ki lika mañi zekona kulutusa kusaba Jehova? Mi lukona kuitutañi ka za kusaba Mulimu ku Obadia yanaali sikombwa, Muprisita Yapahami Jehoyada, ni ku Mulena Joasi?

KUSABA MULIMU KUTALUSAÑI?

3. Mutaluse lika zekona kulutahiseza sabo ni mo sabo ikona kulusileleleza.

³ Lwakona kukenelwa ki sabo haiba lulemuha kuli kunani nto yeñwi yemaswe yekona kuezahala ku luna. Sabo yecwalo yaswanela mi ikona kulutusa kueza likatulo zende. Haiba lwasaba kuwa, haluna kuzamaela kwa mafelelezo a liñope. Haiba lwasaba kuholofala, lukatokolomoha muinelo okona kutahisa kuli luholofale. Haiba lwasaba kusinya silikani saluna ni mutu yomuñwi yelulata, haluna kubulela kamba kueza nto ifi kamba ifi yemaswe.

4. Ki sabo yecwañi yabata Satani kuli lube ni yona ka za Jehova?

⁴ Satani ubata kuli batu babe ni sabo yesaswaneli ya kusaba Jehova. Satani ubata kuli lube ni mubonelo oswana ni wanaanani ona Elifazi wa kuli Jehova ki Mulimu yasaswaleli ni yahalifile, mi hakukonahali feela kumutabisa. (Jobo 4:18, 19) Satani ubata kuli lusabe Jehova ka nzila yetulile tikanyo kuli lutuhele kumusebeleza. Kuli luambuke lilaba leo, luswanela kuba ni sabo yeswanela ya kusaba Mulimu.

5. Kusaba Mulimu kutalusañi?

⁵ Mutu yanani sabo yeswanela ya kusaba Mulimu wamulata mi habati kueza nto ifi kamba ifi yekona kusinya silikani sahae ni yena. Jesu naanani sabo yecwalo ya ‘kusaba Mulimu.’ (Maheb. 5:7) Naasasabi Jehova ka nzila yetulile tikanyo. (Isa. 11:2, 3) Kono naamulata hahulu mi naabata kumuutwa. (Joa. 14:21, 31) Ka kuswana ni Jesu, ni luna lukuteka hahulu Jehova bakeñisa kuli unani lilato, butali, ubonisa katulo yelukile, mi unani maata. Hape lwaziba kuli Jehova ululata hahulu mi ubatanga kubona molusebeliseza litaba zaluluta. Jehova uikutwanga hahulu butuku kwa pilu halusa muutwi kono pilu yahae yatabanga halu muutwa.—Samu 78:41; Liprov. 27:11.

LWAKONA KUITUTA KUSABA MULIMU

6. Lukona kuituta cwañi kusaba Mulimu? (Samu 34:11)

⁶ Halusika pepwa inze lunani sabo ya kusaba Jehova; luswanela kuituta kueza cwalo. (Mubale Samu 34:11.) Nzila yeñwi yelukona kueza cwalo ka yona ki ka kunyakisisa lika zebupilwe. Halunze lulemuha mo “lika zeezizwe” liboniseza kuli Mulimu unani butali, maata, mi ululata hahulu, luka mukuteka hahulu ni kumulata. (Maro. 1:20) Kaizeli yabizwa Adrienne naabulezi kuli: “Namakalanga kulemuha lika zabupile Jehova ili nto yebonisa kuli unani butali, mi waziba luli zekona kunitusa.” Kabakala kuli naanahanisisanga taba yeo kamita, naabulezi kuli: “Hanitabeli kueza nto ifi kamba ifi yekona kusinya silikani saka ni Jehova, yena yanifile bupilo.” Mulike muezezo wo: Mube ni nako sunda ye ya kunahanisisa nto yeñwi yebupilwe. Kueza cwalo kuka mitusa kukuteka hahulu Jehova ni kumulata.—Samu 111:2, 3.

7. Tapelo ikona kulutusa cwañi kuba ni sabo yeswanela ya kusaba Jehova?

⁷ Nzila yeñwi yelukona kuituta ka yona kusaba Mulimu ki ka kulapelanga kamita. Haiba lulapela kamita ku Jehova, ukaba wa luli ku luna. Nako kaufela halu mukupa kuli alufe maata kuli lutiyele muliko omuñwi, taba yeo iluhupulisanga kuli Jehova unani maata amatuna hahulu. Kuitumela ku Jehova kabakala mpo yalufile ya Mwanaa hae, kuka lutusa kuhupula kuli ululata hahulu. Mi halulapela ku Jehova kumukupa kuli alutuse halukopana ni butata bobuñwi, luhupula kuli unani butali. Litapelo zecwalo lilutusa kukuteka hahulu Jehova. Mi lilutusa kuikatulela kuambuka nto ifi kamba ifi yekona kusinya silikani saluna ni yena.

8. Ki lika mañi zeluswanela kueza kuli luzwelepili kusaba Mulimu?

⁸ Lukazwelapili kusaba Mulimu haiba luituta kwa mitala ya batu bababulezwi mwa Bibele bane baezize lika zende ni bane baezize lika zemaswe. Halunyakisiseñi mutala wa batanga ba Jehova babasepahala bababeli, ili Obadia sikombwa sa mwa ndu ya Mulena Akabe ni Muprisita Yapahami Jehoyada. Hasamulaho, lukanyakisisa zelukona kuituta ku Mulena Joasi wa Juda yanaasepahala ku Jehova sapili kono hasamulaho amufulalela.

MUBE NI BUNDUME SINA OBADIA YANAASABA MULIMU

9. Kusaba Jehova nekutusize cwañi Obadia? (1 Malena 18:3, 12)

⁹ Bibele ikala kulutaluseza za Obadiab ka kubulela kuli: “Obadia naasaba hahulu Jehova.” (Mubale 1 Malena 18:3, 12.) Sabo yeswanela yeo neitusize cwañi Obadia? Nei mutusize kusepahala ni kuba yaitingwa; kabakaleo, mulena amufa buikalabelo bwa kubabalela ba ndu yahae. (Mubapanye Nehemia 7:2.) Kusaba Mulimu hape nekutusize Obadia kuba hahulu ni bundume, ili kalemeno ka naatokwa luli. Naapilile ka nako yanaabusa Mulena Akabe yamaswe, yanaaezize “zemaswe hahulu mwa meeto a Jehova kufita [malena] kaufela bane baliteñi pili ku yena.” (1 Mal. 16:30) Kutuha fo, Jezabele musalaa Akabe yanaalapela Baale naatoile hahulu Jehova kuli mane naalikile kufelisa bulapeli bwa niti mwa mubuso wa kwa mutulo. Mane naabulaile bapolofita ba Mulimu babañata. (1 Mal. 18:4) Kusina kukakanya, Obadia naasebelelize Jehova ka nako yetaata.

10. Obadia naabonisize cwañi kuli naanani hahulu bundume?

¹⁰ Obadia naabonisize cwañi kuli naanani hahulu bundume? Jezabele hanaakalile kuzuma bapolofita ba Mulimu kuli ababulaye, Obadia naangile ba 100 ku bona ni kubapata ka “likwata za batu ba 50, ni kubafanga sinkwa ni mezi.” (1 Mal. 18:13, 14) Jezabele hanaaka ziba zanaaezize Obadia yanaanani bundume, kaniti luli, naaka mubulaya. Obadia naali mutu sina luna, mi naasabati kushwa. Niteñi, Obadia naalata Jehova ni batanga bahae kufita mwanaaitatela.

11. Batanga ba Jehova ba mwa mazazi aluna baswana cwañi ni Obadia? (Mubone ni siswaniso.)

¹¹ Kacenu, batanga ba Jehova babañata bapila mwa linaha ili mo musebezi waluna ukwalilwe. Babonisa milonga likute leliswanela, kono sina Obadia, mizwale ni likaizeli babalatwa bao, bafa Jehova zeli zahae, ili kulapela feela yena anosi. (Mat. 22:21) Babonisa kuli basaba Mulimu ka kumuutwa kufita kuutwa batu. (Lik. 5:29) Baeza cwalo ka kuzwelapili kukutaza taba yende ni ka kukopana hamoho ka kusalemuseha. (Mat. 10:16, 28) Baezanga mobakonela kaufela kutusa mizwale ni likaizeli babona kufumana lico za kwa moya zebatokwa hahulu. Halunyakisiseñi mutala wa muzwale yabizwa Henri, yapila mwa naha yeñwi mwa Africa, ili mo musebezi waluna neukwalilwe ka nakonyana. Ka nako yene ukwalilwe musebezi waluna, Muzwale Henri naaitatezi kuisezanga mizwale ni likaizeli bahae lihatiso zetomile fa Bibele. Naañozi kuli: “Ni mutu yanani maswabi. Kacwalo, nikozwi kuli kukuteka hahulu Jehova ki kona kone kunitusize kuba ni bundume bone nitokwa.” Ki lika mañi zekona kumitusa kuba ni bundume sina bo Henri? Mukaba ni bundume haiba muba ni sabo yeswanela ya kusaba Mulimu.

MUSEPAHALE SINA MUPRISITA YAPAHAMI JEHOYADA YANAASABA MULIMU

12. Muprisita Yapahami Jehoyada ni musalaa hae nebabonisize cwañi kuli nebasepahala hahulu ku Jehova?

¹² Muprisita Yapahami Jehoyada naasaba Jehova, mi sabo yeo nei mutusize kusepahala ku Jehova ni kususueza babañwi kuli bamulapele. Taba yeo neiiponahalezi Atalia mwana wamusizana wa Jezabele hanaakalile kubusa mwa Juda asina tukelo ya kueza cwalo. Batu nebasaba Atalia. Naanani situhu mi naabata hahulu kubusa kuli mane naalikile kubulaya lusika lwa silena kaufela, bona baikulu bahae! (2 Makol. 22:10, 11) Yomuñwi wa bana bao wa libizo la Joasi naabandukile bakeñisa kuli Joshabeati musalaa Jehoyada naamupilisize. Yena ni muunaa hae nebapatile mwana yo ni kumubabalela. Ka kueza cwalo, Jehoyada ni Joshabeati nebatusize kuli lusika lwa Davida lwa silena lubukelezwe. Jehoyada naasepahala ku Jehova mi naasika ngangamiswa ki Atalia.—Liprov. 29:25.

13. Joasi hanaanani lilimo ze 7, Jehoyada naabonisize cwañi hape kuli naasepahala ku Mulimu?

¹³ Joasi hanaanani lilimo ze 7, Jehoyada hape naabonisize kuli naasepahala ku Jehova. Jehoyada naabile ni mulelo omuñwi. Mulelo wo hane ukakonda, Joasi naakaba mulena, yena muikulu wa Davida yanaaswanela kuyola fa bulena. Kono mulelo wo hane ukapala, Jehoyada naakabulaiwa. Ka tuso ya Jehova, mulelo wo neukondile. Jehoyada, ka kutusiwa ki manduna ni Malivi, naaezize Joasi mulena mi Atalia abulaiwa. (2 Makol. 23:1-5, 11, 12, 15; 24:1) Hasamulaho, Jehoyada “aeza tumelelano mwahalaa Jehova ni mulena ni batu, ya kuli bakazwelapili kuba sicaba sa Jehova.” (2 Mal. 11:17) Jehoyada “hape abeya balibeleli ba minyako kwa minyako ya ndu ya Jehova, kuli kusike kwaba ni mutu yasilafezi ka nzila ifi kamba ifi yakakena mwateñi.”—2 Makol. 23:19.

14. Jehoyada naakutekilwe cwañi kabakala kukuteka Jehova?

¹⁴ Kwamulaho, Jehova naabulezi kuli: “Baba nikuteka nika bakuteka ni na.” Kaniti luli, naafuyauzi Jehoyada. (1 Sam. 2:30) Ka mutala, naalukisize kuli likezo zende za muprisita yapahami yo liñolwe mwa Bibele kuli lilulute. (Maro. 15:4) Mi Jehoyada hanaashwile, naakutekilwe hahulu ka kubulukiwa “mwa Muleneñi wa Davida kone kubulukiwanga malena, kakuli naaezelize Mulimu wa niti ni ndu Yahae lika zende mwa Isilaele.”—2 Makol. 24:15, 16.

15. Luitutañi kwa likande la Jehoyada? (Mubone ni siswaniso.)

¹⁵ Likande la Jehoyada lakona kulutusa kaufelaa luna kuba ni sabo ya kusaba Mulimu. Baokameli mwa puteho bakona kulikanyisa mutala wa Jehoyada ka kuzwelapili kutona ni kusileleza mutapi wa Mulimu ka busepahali. (Lik. 20:28) Basupali bakona kulikanyisa mutala wa Jehoyada ka kusaba Jehova ni kuzwelapili kusepahala ku yena, kakuli haiba baeza cwalo, ukaitusisa bona kupeta mulelo wahae. Ubaanga kuba ba butokwa. Babanca bakona kulikanyisa mo Jehova naaezelize Jehoyada ka kukuteka mizwale ni likaizeli ba basupali babasepahala, sihulu babasebelelize Jehova ka busepahali ka nako yetelele. (Liprov. 16:31) Mi kaufelaa luna lwakona kuituta kwa mutala wa manduna ni Malivi bane batusize Jehoyada. Haike luzweleñipili kusebelisana ni “babaetelela” mwahalaa luna ka kubautwa.—Maheb. 13:17.

MUSIKE MWABA SINA MULENA JOASI

16. Ki lika mañi zebonisa kuli Mulena Joasi naasika tiya kwa moya?

¹⁶ Jehoyada naatusize Mulena Joasi kueza zelukile mwa meeto a Jehova. (2 Mal. 12:2) Kabakaleo, mulena yanaasali yomunca yo naabata kutabisa Jehova. Kono Jehoyada hasaashwile, Joasi ateeleza kwa manduna ba bakwenuheli. Ki lika mañi zenezwile mwateñi? Yena ni batu banaabusa “bakala kusebeleza likota za kulapela ni milimu ya maswaniso.” (2 Makol. 24:4, 17, 18) Nihaike kuli Jehova naautwile hahulu butuku kwa pilu, “azwelapili kubalumela bapolofita kuli abakutiseze ku yena . . kono bahana kuutwa.” Nebasika teeleza nihaiba ku Zakaria mwanaa Jehoyada, yanaasi feela mupolofita wa Jehova ni muprisita, kono hape naali muhabo Joasi. Mane Mulena Joasi naalaezi kuli Zakaria abulaiwe nihaike kuli lubasi lwa Zakaria nelu mupilisize ni kumuezeza lika zeñata.—2 Makol. 22:11; 24:19-22.

17. Ki lika mañi zeneezahezi ku Joasi?

¹⁷ Joasi naasika zwelapili kuba ni sabo yeswanela ya kusaba Jehova, mi lika nelisika muzamaela hande. Jehova naabulezi kuli: “Baba nishwaula bakashwaulwa ni bona.” (1 Sam. 2:30) Hamulaho wa nako kuzwa fo, mpinyana ya Masiria neituzi “mpi yetuna hahulu” ya Joasi mi ‘neba muholofalize hahulu.’ Masiria hase baile, Joasi abulaiwa ki batanga bahae ka sibili kabakala kubulaya Zakaria. Mulena yamaswe yo mane naangiwa kuli naasaswaneli kubulukiwa “mwa mabita a malena.”—2 Makol. 24:23-25; Mat. 23:35.c

18. Ka kuya ka Jeremia 17:7, 8, ki lika mañi zekona kulutusa kusaba sina Joasi?

¹⁸ Luitutañi kwa mutala wa Joasi? Naaswana sina kota yenani mibisi yesikaya hahulu mwa mubu, ili kota yetiyezi fa musumo omuñwi. Jehoyada yanaaswana sina musumo fanaatiyezi Joasi hasaashwile, ni hase kubile ni bakwenuheli babañata, Joasi atuhela kusepahala ku Jehova. Taba ye ibonisa hande fokusweu kuli haluswaneli feela kusaba Mulimu ka libaka feela la kuli mizwale ni likaizeli baluna, hamohocwalo ni ba lubasi lwaluna balutomela mutala omunde. Kuli luzwelepili kutiya kwa moya, luswanela kuzwelapili kusepahala ku Mulimu ni kumusaba ka kuituta Linzwi lahae kamita, kunahanisisa, ni kulapela.—Mubale Jeremia 17:7, 8; Makolo. 2:6, 7.

19. Ki lika mañi zatokwa Jehova ku luna?

¹⁹ Jehova haabati kuli lueze lika zelusa koni kueza. Zabata kuli lueze libonisizwe hande kwa Muekelesia 12:13, yeli: “Usabe Mulimu wa niti mi umamele milao yahae, kakuli yeo ki yona swanelo kaufela ya mutu.” Haiba lusaba Mulimu, lukazwelapili kusepahala ku yena kusina taba ni zeluka kopana ni zona kwapili, sina feela mwanaaezelize Obadia ni Jehoyada. Hakuna nto niyekana yekakona kusinya silikani saluna ni Jehova.