Kaufela Ne Lu Nyakalalile ka ku Zwisiwa kwa Buka Ye Nca kwa Mukopano wa Sikiliti

Buka Ye Nca I Koñomeka Zibo Ya ku Ziba Mulimu

¹ Kwa Mukopano wa luna wa sikiliti mwa mbumbi ye felile, ne lu wabelisizwe hakalo ki tukiso kamukana! Fa lizazi la bubeli musihali tabo ya luna ne i fitile fa ku tala ha ne lu utwile zibiso ye ama ka za buka ye nca ya, Zibo Ye Isa kwa Bupilo Bo Bu Sa Feli, ni litaba ze ne li latelezi ze i ama. Likiti ze bolule-lule za batu ba fa lifasi-mubu ba tokwa zibo yeo Mulimu a nosi a kona ku fa—zibo ya ku ziba Mulimu ni Mwan’a hae, Jesu Kreste.—Liprov. 2:1-6; Joa. 17:3.

² Mubuleli n’a talusize ka ku utwahala hande hakalo likalulo za buka yeo! Likauhanyo ze na ni litoho za litaba ze hoha mamelelo, liswanisezo ze sebeza, mutahisezo o susueza wa niti, lipuzo ze si ka tatafala, mi, kwa mafelelezo a kauhanyo ye ñwi ni ye ñwi, sikwenda se si li “Mu Tatube Zibo ya Mina” ki ye miñwi ya miinelo ye ka tabisa ku bao kaufela ba ba i bala. Kono sihulu baituti ba luna ba Bibele ba ka fumana tuso ha ba nze ba ikungela lituto za Bibele ze mutomo ka putako.

³ Mwa lingambolo za ku ungula fa lizazi la bubeli ni la bulalu, ne lu susuelizwe ku ba ni tuto ya lubasi ka ku itusisa yona buka yeo ye nca. Ka nako ya cwale, Mwendi se lu fitile fa ku twaelana hahulu ni ze ku yona. Ku si na ku kakanya se mu bile hape ba ba buhisani lisupo za ku ba ni zona mwa munahano muta mu fa yona buka yeo ye nca mwa simu.

⁴ Lisupo za ku Lundulula: Ne mu kana mwa hupula kuli ha n’a tahisa taba ya kuli, “Libaka Mufuta wa Mutu Ha U Tokwa Zibo ya ku Ziba Mulimu,” mubuleli n’a koñomekile lisupo li sikai, ku kopanyeleza cwalo ni ze latelela: (1) Ha mu itusisa yona buka ye mwa ku zamaisa lituto, haki ko ku butali ku tahisa litaba ze sa ami kwa tuto, ili ze kona ku tibela lisupo ze tuna; mu ise fela mamelelo fa ku fitisa seo buka i fa mwa kauhanyo ni kauhanyo. (2) Likauhanyo li na ni butelele bo bu likani ilikuli nako kaufela ye mu ituta mu kone ku feza kauhanyo i liñwi. (3) Kwa mafelelezo a kauhanyo ye ñwi ni ye ñwi, lipuzo ze mwa sikwenda se si li “Mu Tatube Zibo ya Mina” li ka fa lundululo ye kuswani.

⁵ Mu Itusise Yona kwa Lituto za Bibele: Palo-nyana ya bahasanyi se ba buzize ka za haiba ki ko ku susuezwa ku cinceza lituto za bona za Bibele mwa buka ye nca yeo. Haiba se mu ile kwahule mwa buka ye mu sweli ku ituta ka nako ya cwale, neikaba hande ku feza tuto ya buka yeo. Hakusicwalo, ku babazwa kuli mu shatukele mwa buka ya Zibo. Haiba ne mu itusisize broshuwa kamba trakiti mwa ku kalisa tuto ya Bibele, mu tahise buka ye nca ka nako ye swanela ni ku itusisa yona kwa tuto. Litaba ze ñata ka za mwa ku itusiseza buka ya Zibo li ka ba teñi mwa Bukombwa bwa Luna bwa Mubuso mwa kweli ye taha.

⁶ Jehova u tahisize yona buka yeo ye nca kwa neku la ku lu tusa ku luta ba bañwi ka za zibo ye isa kwa bupilo bo bu sa feli. Cwale lu tokwa ku itukiseza hande ni ku ba ni kabelo ye tezi mwa musebezi o sa na ni ku ezwa.