Ku Fitisa Taba ye Nde ka Mubonelo O’ Buniti
1 Kaufel’a luna lu tabela ku fumana tabo ni ku ikutwa ku peta seo lu si eza, sihulu mwa musebezi wa ku tahisa balutiwa. Ki sifi se si lu tahiseza munyaka o cwalo? Seo si kala ka ku bukeleza kwa luna mubonelo o buniti wa mwa munahano ha lu nze lu patehile mwa musebezi o swanela wa ku tusa ba bañwi. (Liprov. 11:25) Mukwa wa luna mwa ku fitisa taba ye nde u swanela ku bonisa kuli luli lwa lumela seo lu si bulela. Haiba lu bulela ka ku zwelela kwa pilu ya luna, f’ohe buniti bwa luna ni buikolwiso bwa luna bwa ka butu li ka iponelwa. (Lu. 6:45) Ka ku lundulula mutahisezo wa luna, lu ka ikutwa ku ba ni buikolwiso hahulu ha lu bulela kwa batu mwa kalulo ya simu. Seo si ka ba se si butokwa hahulu mwahal’a September ha lu ka fa libuka za Wa Kona Ku Pila Ku Ya Ku Ile mwa Paradaisi fa Lifasi-mubu ni Ku Eza Bupilo bwa Lubasi lwa Mina ku ba bwa Tabo. Ne mu kana mwa fumana liakalezo ze latelela ku ba ze tusa hahulu mwa ku fitisa taba ye nde ka mubonelo o’ buniti.
2 Ba bañata ba bilaela ka za butata bwa bukebenga bo bu sweli ku ekezeha. Ne mu kana mwa itusisa mukalisezo wa pili mwatas’a toho ya taba ye li “Crime/Safety” fa likepe 10 la buka ya “Reasoning”:
◼ “Lu sweli ku ambola ni batu ka nañungelele ka za taba ya silelezo ya ka butu. Ku na ni bukebenga bo buñata bo bu lu potolohile, mi bwa ama bupilo bwa luna. Mu hupula kuli ne ku ka tokwahalañi kuli batu ba ba cwale ka mina ni na lu ikutwe ku silelezwa mwa makululu busihu?” Ne mu kana mwa bala Samu 37:10, 11 ni ku talusa limbuyoti zeo Mubuso wa Mulimu u ka tisa, ka ku itusisa makepe 156-8 a buka ya Pila Ku Ya Ku Ile.
3 Haiba fa musipili wa mina wa makalelo ne mu buhisanile miinelo ya lifasi ye sweli ku pongana, ne mu kana mwa latelela seo ka ku bulela kuli:
◼ “Ni kolwa kuli mu ka lumela kuli licinceho ze tuna za tokwahala kuli luli lu kone ku pila mwa kozo. Bibele i bonisa kuli Satani ki yena mushaki wa pili wa butata bwa luna. Ba bañata ba makaliswa ki libaka Mulimu ha mu lumelelize ku zwelapili ka nako ye telele cwana. Mina mu hupula cwañi?” [Mu litele kalabo.] Mu apule kwa likepe 20, maparagilafu 14 ni 15, mwa buka ya Pila Ku Ya Ku Ile, ni ku talusa libaka Satani ha si ka timezwa kale. Cwale mu bale Maroma 16:20, ili ye bonisa se lu kona ku libelela mwa nako ye kwapilinyana.
4 Ha mu fa buka ya “Bupilo bwa Lubasi,” ne mu ka bulela se fa musipili wa makalelo:
◼ “Ni tile ku t’o abana ni mina litaba ka za butata bo bu ama bupilo bwa lubasi. Kaufel’a luna lu bata kuli mabasi a luna a tabe, kono lwa ziba kuli kacenu mabasi a mañata a yo cwalo. Mu hupula kuli ki sifi se ne si ka tusa batu kuli ba fumane tabo ye tuna hahulu mwa bupilo bwa lubasi lwa bona? [Mu litele kalabo.] Kana ha mu lumeli kuli ne ku ka ba ko ku tusa ku teeleza ku seo Mutahisi wa lubasi a si bulela? U fa mwa Bibele liketelelo ze tokwahala. Zona likuka zeo li buhisanwi mwa buka ye ya Ku Eza Bupilo Bwa Lubasi lwa Mina ku ba bwa Tabo. Mu lemuhe miinelo ya taba ye buhisanilwe. [Mu bonise mukoloko wa litaba ze mwahali.] Hape buka i supa kwa tatululo ye inelela kwa butata bwa mufuta wa mutu. Ha ku na ku kakanya mwa lapelela seo. Mu twaelani ni Tapelo ya Mulena, nji cwañi? [Mu ame kwa Mateu 6:9, 10.] Ki tato ya Mulimu kuli mubuso wa hae u zuse bumaswe kamukana fa lifasi-mubu le mi seo si ka tusa bupilo bwa lubasi bwa batu kaufela ba ba na ni tumelo cwale kwa Mubuso wa Mulimu.”
Mu fe buka ka nubu ya kamita.
5 Ha mu kutela ku yo potela bo ne mu siyezi buka ya “Bupilo bwa Lubasi,” ne mu kana mwa itakaleza ku bulela se:
◼ “Kwamulaho ne lu bulezi ka za butali bwa ku latelela likuka za Bibele ilikuli lu kone ku ba ni bupilo bwa lubasi bwa tabo. Mu hupula kuli sinotolo kwa ku tamahanya mabasi kacenu ki sifi?” Mu litele kalabo. Mu ame kwa paragilafu 31 fa likepe 80, mi mu bale Makolose 3:9, 10, 12-14. Mu fe maikuto a mañwi ili ku bonisa ka m’o lilato la niti li konela ku swalisanisa mabasi hamoho. Mu bonise ka m’o tuto ya kamita ya buka ya Bupilo bwa Lubasi i konela ku tusa mwa ku tatulula butata.
6 Haiba mu tabela muatumelelo o bunolo ni ku fita, ne mu kana mwa itusisa mukalisezo o swana ni o fumanwa fahalimu a likepe 12 mwa buka ya “Reasoning”:
◼ “Lu sweli ku susueza bomuyahwa ni luna kuli ba nyakisise nako ya kwapili ye makaza ili yeo Bibele i lu bulukezi yona. [Mu bale Sinulo 21:3, 4.] Kana seo sa utwahala hande ku mina? [Mu litele kalabo.] Kauhanyo 19 ya hatiso ye i koñomeka limbuyoti ze ñwi zeo mufuta wa mutu o’ ipeya ku utwa u ka ipumana ku zona mwatas’a Mubuso wa Mulimu.” Haiba ku na ni cisehelo, mu fe buka ya Pila Ku Ya Ku Ile.
7 Haiba ne mu bulezi ka za limbuyoti ze ka ipumanwa ku zona mwatas’a puso ya Mubuso, fa musipili wa mina wa makutisezo, ne mu ka bulela kuli:
◼ “Mubuso wa Mulimu u ka tisa limbuyoti ze makaza kwa lifasi-mubu ni mufuta wa mutu. Limbuyoti zeo li bonisizwe hande-nde fa fa makepe 12 ni 13. Ki sifi se mu bona ili se si mi tabisa? [Mu litele kalabo.] Mu nahane mo ne ku ka bela, ili ku pila mwa lifasi le li cwale ka le.” Mu bale paragilafu 12. Haiba ku na ni cisehelo, mu buze puzo ye fa paragilafu 13, ni ku buhisana kalabo. Mu taluse kuli kauhanyo ye, i alaba lipuzo ze ñata ka za limbuyoti za Mubuso ni kuli mu ka tabela ku li buhisana fa musipili wa mina o’ tatama.
8 Ka ku ba “ba ba sebeza ni Mulimu,” lu na ni mabaka kamukana a ku ba ni buniti ha lu fitisa taba ye nde. (1 Makor. 3:9) Ku buluka kwa luna mubonelo w’o ku ka tahisa limbuyoti ze tuna za Jehova.