Ku Fitisa Taba ye Nde ka Maikuto a Putako
1 Lu bonisa buitebuho bwa luna bo bu tungile kwa lisepiso za Mulimu za Mubuso ka ku abana ka pilu kaufela mwa bukombwa bwa Sikreste. Lu tokwa ku abana mwa musebezi wo ka maikuto a putako. Kabakalañi? Kakuli babeleki ki ba banyinyani, mafelelezo a muinelo wa linto o maswe wo a sweli a sutelela, mi bupilo bwa ba ba li mwa likalulo za simu za luna bu mwa likayamana. (Ezek. 3:19; Mat. 9:37, 38) Buikalabelo bo bu buima bo bu cwalo bu tokwa buikatazo bwa luna bo lu kona ka ku fitisisa mwa bukombwa. Lu kona ku bonisa cwañi maikuto a putako ka ku ama musebezi wa luna wa sebelezo ya mwa simu? Ka ku itukiseza cimo mitahisezo ye minde, ka ku tukufalelwa ku tembauka batu ko ne ba kana ba fumaneha kaufela, ka ku buluka pulukelo ye nepahalile ya batu kaufela ba ba bonisa cisehelo, ka ku kutela teñi ka bunako ku latelela cisehelo yeo, ni ka ku hupula kuli bakeñisa kuli bupilo bwa amiwa, lu swanela ku nga bukombwa bwa luna ka butuna hahulu. Liakalezo ze latelela ne li kana za tusa ha lu nze lu itukiseza ku fitisa taba ye nde ka maikuto a putako mwahal’a February. Buka ya Revelation—Its Grand Climax At Hand! ki yona ye ka fiwa.
2 Ne mu kana mwa kona ku kalisa puhisano ka ku bulela ka bukuswani butata bo buñwi bo bu talimanwi ni bona mwa silalanda, mi cwale mwa kona ku bulela kuli:
◼ “Batu ba bañata ba lumela kuli ku na ni Mulimu, kono ba buza kuli: ‘Ki mufuta mañi wa nako ya kwapili ya lu batela?’ Ne mu ka alaba cwañi seo? [Mu litele kalabo.] Kana ne se mu zibile kuli Bibele i talusa ka ku utwahala mulelo wa Mulimu kwa mufuta wa mutu hamohocwalo ni mihato y’a sweli ku nga kuli a u pete?” Mu apule kwa likepe 301 mwa buka ya Revelation Climax. Mu bale Sinulo 21:1 mwa paragilafu 1, mi cwale mu bale taluso ya yona ye filwe mwa licika la mafelelezo la paragilafu 2. Mu apule kwa siswaniso se si fa likepe 302 ili ku talusa se si taluswa ki seo kwa neku la nako ya luna ya kwapili. Mu bale Sinulo 21:4 mwa paragilafu 6. Mu fe buka. Mu lukise nako ye sa pitihanyi ya ku kutela teñi kuli mu zwisezepili puhisano.
3 Mwa kona ku latelela puhisano ya nako ye felile ya Sinulo 21:1, 4 ka mutahisezo o mukuswani wo:
◼ “Fa ku pota kwa ka ko ku felile, ne lu ambozi za sepiso ya Mulimu ya ku lukisa nyangela ye nca ya fa lifasi-mubu ya mufuta wa mutu. [Mu hohele mamelelo hape kwa siswaniso se si fa likepe 302 mwa buka ya Revelation Climax.] Kana ne mu ka tabela ku bona lubasi lwa mina lu nze lu ikola miinelo ye cwalo? [Mu litele kalabo.] Puzo ki ya kuli, Lisepiso za Mulimu ki ze itingwa cwañi? Shangwe mu lemuhe seo yena tota a si bulela.” Mu bale Sinulo 21:5, 6a mwa paragilafu 8 fa likepe 303. Mu buze puzo ye ñozwi ya paragilafu 9 fa likepe 304, ni ku bala kalabo, hamohocwalo ni mubamba wa mafelelezo wa paragilafu. Mu bulele za ku fiwa kwa tuto ya Bibele ye sa lifelwi. Mu lukise za ku t’o bonisa mo i zamaisezwa hasamulaho.
4 Bakeñisa kuli ba bañata ba bilaela ka za butata bo bu sweli ku hula ili bo bu ambekile mufuta wa mutu, ne mu kana mwa bulela se si cwale ka se fa musipili wa pili:
◼ “Ibata iba mutu kaufela u bilaela ka za butata bo lu talimana ni bona mwa nyangela ya luna. [Mu bulele bo bu sikai.] Ka lilimo ze mashumi-shumi ba bupolitiki ba sepisize ku tahisa litatululo ze inelela, mi ba bañwi ba likile ku eza cwalo. Mu hupula kuli ki sika mañi se si tahisa kuli miinelo i zwelapili ku pongana? [Mu litele kalabo.] Bibele i fa taluso yeo batu ba bañata ba si ka nyakisisa kale. Buka ya Sinulo i talusa za ndwa ye ne i ezahezi kwa lihalimu. Mu lemuhe ze ne li zwile mwateñi sina mo ku taluselizwe kwa Sinulo 12:9.” Mu bale timana, cwale mu apule kwa likepe 182 mwa buka ya Revelation Climax. Mu itusise siswaniso mwa ku talusa ku ikenya teñi kwa Satani mwa litaba za fa lifasi-mubu. Mu fe buka. Mu singanyeke za ku kutela teñi ni ku t’o buhisana ka m’o Mulimu a ka tatululela butata bwa mufuta wa mutu.
5 Haiba ne mu sepisize ku kutela teñi ni ku t’o talusa tatululo ya Mulimu kwa butata bwa kacenu, ne mu kana mwa lika muatumelelo wo:
◼ “Ni ezize buikatazo bo bu ipitezi bwa ku kuta ilikuli lu zwelepili ni puhisano ya luna fa tatululo luli kwa butata bo bu ambekile mufuta wa mutu. Fa musipili wa ka o felile, ne lu boni kuli Bibele i tungunyuna Satani Diabulosi sina yena ya yembulula lifasi-mubu kamukana le li yahilwe. Bakeñisa kuli ki sibupiwa sa kwa moya se si fitela kwahule mufuta wa mutu, kana mu hupula kuli ku na ni nzila yeo ka yona susuezo ya hae i konwa ku felisezwa? [Mu litele kalabo.] Shangwe mu lemuhe seo Bibele i bulela.” Mu bale ni ku talusa Sinulo 20:1-3. Ka ku itusisa siswaniso se si fa makepe 4-5 a buka ya Zibo, mu bonise mo i ka bela miinelo ha ku si ke ku ba ni susuezo ya Satani. Mu fe tuto ya Bibele mi mu like ku i kalisa onaf’o fela.
6 Ka ku ba ni batu ba bañata-ñata ba ba cisehezi mwa miinelo ya silalanda, mwa kona ku bulela nto ye cwale ka ye mwa ku kwalula puhisano:
◼ “Lu fumani kuli ibata iba kuli mutu kaufela u bilaela ka za ku silafala kwa moya, mezi ni lico za luna. Mwa linaha ze ñwi miinelo ya silalanda se i li lubeta kwa bupilo. Bakeñisa kuli Mulimu ki yena Mubupi wa lifasi-mubu, mu hupula kuli u ka eza nto mañi ka za se? [Mu litele kalabo.] Bibele i bulela kuli Mulimu u ka tahisa ku ikalabela ka za nzila yeo lu itusisa ka yona pulaneti. [Mu bale Sinulo 11:18b.] Ha mu nahane fela ka za ku pila fa lifasi-mubu le li sa silafazwi!” Mu taluse za mulelo wa Mulimu wa paradaisi, sina mo ku boniselizwe kwa Sinulo 21:3, 4. Mu bonise siswaniso se si fa likepe 302 mwa buka ya Revelation Climax. Mu fe buka ni ku lukisa za ku pota hape.
7 Ha mu kutela ku mutu ya n’a bonisize cisehelo mwa lifasi-mubu le li li paradaisi, mwa kona ku bulela kuli:
◼ “Fa musipili wa ka o felile, ne lu lumelelani kuli ku tatulula butata bwa lifasi-mubu le li silafalizwe, Mulimu u ka tokwa ku ikenya teñi mwa litaba za mutu. Kono puzo ki ya kuli, Ki sifi se lu lukela ku eza kuli lu punyuhele mwa lifasi le linca la ku luka le li tahisizwe ki Mulimu?” Mu bale Joani 17:3. Mu meme muñ’a ndu kuli a ikungele tuto ya luna ya Bibele ye sa lifelwi kuli a fumane zibo ye ipitezi yeo.
8 Ki tohonolo hakalo ye lu na ni yona ya ku itusiswa sina bakutuli ba mwa lizazi la cwale ni ku eza musebezi wa ku kutaza o punyusa bupilo! Haike kaufel’a luna lu zwelepili ku pateha ku fitisa taba ye nde ka maikuto a putako, ‘ka ku ziba kuli musebezi wa luna haki wa mbango.’—1 Makor. 15:58.