Ba Ba Koniswa ni ku Bakanyezwa ku Luta Ba Bañwi
1 Muta Mushe n’a ketilwe sina muyemeli wa Jehova, n’a si ka ikutwa ku kona ku kwanisa ku zibahaza Linzwi la Mulimu ku Faro. (Ex. 4:10; 6:12) Jeremia n’a patuluzi ku sa ikolwisa kwa hae mwa ku kona ku sebeza sina mupolofita wa Jehova, ka ku bulelela Mulimu kuli n’a sa zibi ku bulela. (Jer. 1:6) Ku si na taba ni ku tokwa buikolwiso kwa bona kwa makalelo, bubeli bwa bona bapolofita bale ne ba fumanehile ku ba lipaki za Jehova ze bundume. Ne ba konisizwe hande ki Mulimu.
2 Kacenu, ka tuso ya Jehova, lu na ni ze lu tokwa mwa ku peta bukombwa bwa luna ka buikolwiso. (2 Makor. 3:4, 5; 2 Tim. 3:17) Sina mulukisi ya kona ku kwanisa ili y’a na ni libelekiso kamukana, lu bakanyizwe hande kuli lu pete ka bucaziba bukombwa bo lu filwe. Mwa January lu fa buka ifi kamba ifi ya makepe a 192 ye ne i hatisizwe pili 1984 i si ka fita kale mi ili yeo puteho i na ni yona. Nihaike kuli libelekiso za kwa moya ze haki ze nca, litaba za zona za ka Mañolo li sa li za linako za cwale mi libuka zeo li ka tusa batu ku ituta niti. Mitahisezo ye akalelizwe ye latelela neikana ya swalisaniswa kwa buka ifi kamba ifi ye fiwa.
3 Taba ya tuto neikana ya itusiswa mwa ku tahisa cisehelo mwa Linzwi la Mulimu. Mwa kona ku kalisa puhisano ka ku bulela kuli:
◼ “Ku na ni koñomeko ye tuna kacenu fa tokwahalo ya tuto ye nde hahulu. Ka mo mu hupulela, ki mufuta mañi wa tuto w’o mutu a swanela ku ndongwama ili ku fumana tabo ye tuna ka ku fitisisa ni ku kondisa lika mwa bupilo? [Mu litele kalabo.] Lituso ze inelela za konwa ku fumanwa ki ba ba ikungela zibo ya ku ziba Mulimu. [Mu bale Liproverbia 9:10, 11.] Kabuka ka [mu bulele toho ya taba ya buka ye mu fa] ka tomile fa Bibele. Ka supa kwa simbule fela sa zibo ye kona ku isa kwa bupilo bo bu sa feli.” Mu fe mutala o nongile fa taba mwa buka. Mu fe buka ni ku lukisa za musipili wa makutisezo.
4 Ha mu kutela ku muñ’a ndu yo ne mu buhisani ni yena butokwa bwa tuto ya Bibele, ne mu kana mwa bulela kuli:
◼ “Fa musipili wa ka o felile, ne lu buhisani kuli Bibele ki yona simbule sa tuto ye kona ku koñomeka za nako ya luna ya kwapili ya kamita. Kaniti, ku tokwa buikatazo mwa ku ituta zeo lu tokwa ku ziba mwa Mañolo. [Mu bale Liproverbia 2:1-5.] Batu ba bañata ba fumana ku ba ko ku t’ata ku utwisisa likalulo ze ñwi za Bibele. Ni bata ku mi bonisa ka bukuswani mutala o lu itusisize ka butuna mwa ku tusa batu kuli ba itute ze ñata ni ku fita ka za lituto ze mutomo za Bibele.” Ka ku itusisa buka ye ne i siilwe, mu apule kwa kalulo ye swanela mi mu fe mutala wa tuto ya Bibele ka bukuswani. Haiba muñ’a ndu u itakaleza ku ba ni tuto ya kamita, mu taluse kuli mu ka kutela teñi ni siitusiso sa luna sa tuto ili Zibo ye Isa kwa Bupilo bo Bu Sa Feli.
5 Batu ba bañata ba katazwa ki ku nyanda kwa bolule-lule ba banana ba mwa lifasi. Mwendi mwa kona ku tusa muñ’a ndu ku bona ka m’o Mulimu a bonela likayamana le, ka ku bulela kuli:
◼ “Ku si na ku kakanya mu boni lipiho za makande ka za banana ba ba shwile tala, ku kula ni ku tokolomohiwa mwa lifasi kaufela. Ki kabakalañi likopano ze talima zeo ha li tuzwi ku kondolokisa muinelo wo? [Mu litele kalabo.] Mulimu u bata fela se sinde ka ku fitisisa kwa neku la mufuta wa mutu. Ha mu bone seo a sepisa banana ni ba bahulu, ka mo si ñolezwi mwa Bibele. [Mu bale Sinulo 21:4.] Buka ye [mu bulele toho ya taba] i fa litaba ka butungi ka za lifasi le li ka kondiswa ki Mulimu ili m’o ku nyanda ku ka fela.” Haiba ku konahala, mu apule kwa siswaniso se si bonisa Paradaisi, ni ku si buhisana. Mu fe buka, mi mu lukise za musipili o muñwi.
6 Haiba ka ku kalisa ne mu bulezi za ku nyanda kwa banana, fa musipili o tatama ne mu kana mwa zwisezapili puhisano ka ku bulela kuli:
◼ “Kwamulahonyana ha ne ni li fa, ne mu bilaezi ka za likayamana la banana ba ba nyanda bakeñisa mahae a sinyehile, lukupwe, matuku, ni mifilifili. Kwa omba-omba ku bala mwa Bibele ka za lifasi ili m’o banana kamba ba bahulu ba si ke ba nyandiswa ki makulanu, butuku, kamba lifu. Bupolofita bo bu mwa buka ya Isaya bu tolongosha bupilo bo bunde ni ku fita bo bu ka ba fa lifasi-mubu.” Mu bale ni ku buhisana Isaya 65:20-25. Mu libe kwa tuto ya Bibele mwa buka ya Zibo kwa nalulelule.
7 Bakeñisa kuli ku lapela kwa eziwa hahulu ki balapeli, mwa kona ku kalisa puhisano fa taba yeo ka ku bulela kuli:
◼ “Ka nako ye ñwi mwa bupilo bwa luna, buñata bwa luna lu ipumani mwa butata bo ne bu lu tahiselize ku lapelela tuso ku Mulimu. Mi niteñi, ba bañata ba ikutwa kuli litapelo za bona ha li alabiwi. Mane ku bonahala kuli baeteleli ba bulapeli ba ba lapelela kozo fa patalaza ha ba utwiwi. Lu bulela cwalo kakuli ndwa ni mifilifili li zwelapili ku zieza mufuta wa mutu. Kana Mulimu wa teeleza luli kwa litapelo? Haiba wa teeleza, ki kabakalañi litapelo ze ñata hahulu ha li bonahala ku sa alabiwa? [Mu litele kalabo.] Samu 145:18 i talusa se si tokwahala kuli litapelo za luna li alabiwe. [Mu bale liñolo.] Sa pili, litapelo ku Mulimu li swanela ku ba ze buniti ni ku lumelelana ni niti ye fumanwa mwa Linzwi la hae, Bibele.” Mu bonise buka ye mu fa, ni ku talusa se i bulela ka za butokwa bwa tapelo.
8 Ha mu latelela puhisano ye ne mu bile ni yona ka za tapelo, ne mu kana mwa lika muatumelelo wo:
◼ “Ne ni ikozi puhisano ya luna fa taba ya tapelo. Ku si na ku kakanya mu ka fumana mihupulo ya Jesu ku ba ketelelo ye tusa ku za ku lapelela.” Mu bale Mateu 6:9,10, ili ku bonisa za ku iyakatwa ze tuna ze bonisizwe ki Jesu mwa tapelo ye li mutala. Mu bonise kauhanyo 16 ye li, “Ka Mo Mu Konela ku Sutelela ku Mulimu,” mwa buka ya Zibo, ni ku buza haiba mwa kona ku fa mutala ka mwa ku itutela kalulo yeo.
9 Ha ku amiwa ku fa ba bañwi zibo ya ku ziba Mulimu, ne lu kana lwa buza kuli, “Ki mañi ya kona ku kwanisa hande lika ze?” Mañolo a alaba kuli: “Ki luna.”—2 Makor. 2:16, 17, NW.